GENESE

1 Ngöne la qaan, hnei Akötresie hna xup la hnengödrai me ihnadro.

2 Ame hune la ihnadro, pëkö ca ewekë ka cia, nge tha pexeje pala kö ej. Nge kola hakuthe la itre tim* hnei mit, nge kola nyenyape la mene* i Akötresie hune la itre tim.

3 Matre öni Akötresie: “Lai pi!” Ame hna lai pi.

4 Thupene lai, Akötresieti a öhne laka, lolo la lai. Ame hnei nyidrëti hna nyiqaane isa ijene la lai me mit. 5 Matre Akötresie a ati ëjene ju la lai, “drai,” nge ame kowe la mit, “jidr.” Ame hna jidri pi me hmakany: pane drai.

6 Nge öni Akötresie: “Loi e troa hetre gaa pë nyipine la itre tim, matre thawaluën itre ej. 7 Ame hnei Akötresie hna xup la gaa pë, matre isa ijen la itre tim e kuhu fen, me e koho hun la gaa pë. Celë hi ewekë ka traqa. 8 Matre, hnei Akötresie hna ati ëjene la gaa pë, “hnengödrai.” Ame hna jidri pi me hmakany: Hnaaluene drai.

9 Öni Akötresie: “Loi e tro la itre tim fene la hnengödrai, a ca lapa ngöne la ketre götran, nge epi fetra pi la ihnadro. Celë hi ewekë ka traqa. 10 Ame hnei Akötresie hna ati ëjene la fen, “ihnadro,” nge “hnagejë” la itre tim hna acasin. Nge öhne jë hi Akötresie ka hape, ka lolo. 11 Öni Akötresie: “Epi tro la ihnadro a aciane la haö, me itre feja ka hamë wen. Nge loi tro ej a aciane la nöjei pengöne isinöe, me itre isinöe ka hamë wen, me itre itine feja ngöne la ihnadro.” 12 Ame hna cia haö la ihnadro, me itre feja ka hetre itin, me itre isinöe ka hamë wen, me ka hamë itin, thenge la isa pengöne itre ej. Nge öhne ju hi Akötresie ka hape, ka lolo. 13 Ame hna jidri pi me hmakany: Hnaakönine drai.

14 Öni Akötresie: “Epi troa mama la itre pengöne wëtresij* ngöne la gaa pë ne la hnengödrai, matre aisan la lai me jidr. Tro itre ej a itre hatren kowe la itre ijin, me itre drai, me itre macatre. 15 Nge tro itre ej a hudrum ngöne la gaa pë ne la hnengödrai, matre thinane la ihnadro.” Celë hi ewekë ka traqa. 16 Ame hnei Akötresie hna xup la lue pengöne wëtresij ka tru: tro la ka tru a hudrum* e lai, nge tro la ka co, a hudrum e jidr. Hnei nyidrëti hna xupe fe la itre fini wëtresij. 17 Nge hnei Akötresie hna amë lu ej ngöne la gaa pë ne la hnengödrai, matre thinane la ihnadro, 18 me thinan* e lai me jidr, me isa ijene la lai me mit. Nge öhne ju hi Akötresie ka hape, ka lolo. 19 Ame hna jidri pi me hmakany: hna 4 ne drai.

20 Öni Akötresie: “Epi troa tiqa la itre tim hnei öni,* nge tro la itre öni ka hetre iapen a sesë hune la ihnadro, ngöne la gaa pë e caha hnengödrai. 21 Nge Akötresie a xupe jë la itre öni ka tru ne hnagejë, me itre öni ka wewë, me nöjei pengöne öni* ka nyimutre, thenge la isa pengö i angatr, me nöjei öni ka sesë thenge la isa pengö i angatr. Nge öhne ju hi Akötresie ka hape, ka lolo. 22 Thupene lai, Akötresie a amanathithi angatre ju me hape: “Hnaho pi me mana, nge nyialiene jë la itre timi ne hnagejë, nge loi e tro fe a mana la itre öni ka hetre iapen.” 23 Ame hna jidri pi me hmakany: hna 5 ne drai.

24 Öni Akötresie: “Epi tro la ihnadro a axulune la itre öni* thenge la isa pengö i angatr. Itre öni ka mem, me itre öni ka wewë,* me itre öni wael ne la ihnadro, thenge la isa pengö i angatr.” Celë hi ewekë ka traqa. 25 Ame hnei Akötresie hna xup la itre öni wael ne la ihnadro, thenge la isa pengö i angatr, me itre öni ka mem, thenge la isa pengö i angatr, me nöjei öni ka wewë, thenge la isa pengö i angatr. Nge öhne ju hi Akötresie ka hape, ka lolo.

26 Öni Akötresie: “Xupe jë so* la atr hnaiji so, me ka tui nyiso, nge tro angeic a musinëne la itre ie ne hnagejë, me itre öni ne hnengödrai ka sesë, me itre öni ka mem, me ihnadro asë, me itre öni ka wewë hune la ihnadro.” 27 Nge Akötresie a xupe ju la atr hnaiji nyidrë, nge nyidrëti a xupe ju la atr hnaiji Akötresie. Ame hna xupi nyidro, trahmanyi me föe. 28 Thupene lai, Akötresieti a amanathithi nyidroti ju, me hape: “Hnaho pi me mana, nyialiene jë la ihnadro me musinën. Musinëne jë la itre ie ne hnagejë, me itre öni ka sesë e hnengödrai, me nöjei öni ka tro hune la ihnadro.”

29 Öni Akötresie: “Eni a hamë epone la nöjei feja ne la ihnadro, itre ka hamë itin, me nöjei isinöe ka hamë wen, me itin. Celë hi nyine a i epon. 30 Nge ame la itre öni wael ne la ihnadro, me itre öni ka sesë e hnengödrai, me itre öni* ka mel me ka tro hune ihnadro, ase hë ni hamëne koi nyudren la nöjei hnitr nyine xen.” Celë hi ewekë ka traqa.

31 Thupene lai, Akötresie a goeën asë jë la hnei nyidrëti hna xup, me öhne laka, lolo catr. Ame hna jidri pi me hmakany: hna 6 ne drai.

2 Celë hi aqane afenesine la hnengödrai me ihnadro, me itre ewekë e hnin.* 2 Ngöne la hna 7 ne drai, ase hë Akötresie la huliwa i nyidrë. Ame hnei nyidrëti hna mano hna huliwa ngöne la hna 7 ne drai. 3 Nge hnei Akötresie hna amanathithine la hna 7 ne drai me ahmitrötrën, ke ngöne la drai cili, nyidrëti a pane mano qa ngöne la itre ewekë hnei nyidrëti hna xup, me itre xa hnei nyidrëti hna mekune troa kuca.

4 Hane hi la pengöne la hnengödrai me ihnadro, ngöne lo ijine xupe lu ej, lo drai ne xupe Iehova* Akötresie la ihnadro me hnengödrai.

5 Nge pë pala kö haö me hnitr, ke tha ase kö Iehova Akötresie axulune la mani kowe la fen, nge pë pala kö atr ka troa huliwane la dro. 6 Nge hna mejë la xaxapo qa kuhu hnadro, me ahmuhmune la ihnadro.

7 Ame hnei Iehova Akötresie hna xupe la trahmany jëne la xaxau ne la ihnadro, me ufe kowe la lue hnafiji angeic la mano ne mel, ene pe, mele* jë hi la trahmany. 8 Ketre, Iehova Akötresie a acile ju la ketre hlapa e Edrena, götrane koië, nge e cili, nyidrëti a amë ju la trahmany hnei nyidrëti hna xup. 9 Iehova Akötresie a aciane ju la nöjei pengöne sinöe ka mingöming e troa goeën, me itre wene sinöe ka hnyapa, me aciane nyipine la hlapa la isinöe ne mel, memine la isinöe ne atrehmekune la loi me ngazo.

10 Hetrenyi e cili la ketre hneopegejë ka tro qa Edrena, troa fie la hlapa. Nge ame lai hneopegejë, ka 4 lao wapicin.* 11 Ame la ëjene la hnapan, tre, Pisona. Ej a kanoth asë la nöje Havila, götrane gaa hetre gool. 12 Kolo nyipi gool, nge hetrenyi fe la bedola* me etë soama.* 13 Nge ame la ëjene la hnaaluene hneopegejë tre, Kisona. Ej a kanoth asë la nöje Kusi. 14 Ame la ëjene la hnaakönine hneopegejë, tre, Hidekela.* Ej a neni uti hë e Asuria götrane koië. Nge ame la hna 4 tre, Euferata.

15 Hnei Iehova Akötresie hna xome la trahmany, me ami angeic ngöne la hlapa e Edrena, matre tro angeic a eën me nyihnyawan. 16 Iehova Akötresie a amekötine jë kowe la trahmany ka hape: “Tro eö a xen la nöjei wene ne la itre isinöe ne la hlapa, uti hë la tro eö a mej. 17 Ngo tha tro pi kö eö a xeni la wene ne la isinöe ne atrehmekune la loi me ngazo, ke e traqa eö xen, tro hë eö a meci ngöne la drai cili.

18 Nge öni Iehova Akötresie: “Tha loi kö tro la trahmany a lapa cas. Tro ni a hamë angeic la ketre ixatua hmeku i angeic.” 19 Nge tha mano kö Iehova Akötresie xup qa ngöne la xaxau, la nöjei öni wael, me nöjei öni ka sesë. Nyidrëti a tro fë jë itre ej kowe la trahmany, matre wange la aqane tro angeic a ati ëjen. Ame hna isa ati ëjene la itre öni* hnene la trahmany. 20 Matre, hnene la trahmany hna isa ati ëjen la nöjei öni ka mem, me nöjei öni ka sesë, me nöjei öni wael. Ngo ame angeic, pëkö ixatua ka ihmeku me angeic. 21 Ame hnei Iehova Akötresie hna ahmuliziëne la trahmany. Nge ame la angeic a meköl, nyidrëti a xome pi la ketre wengesisila i angeic, me thinge hmaca la ijön. 22 Iehova Akötresie a xupe jë la föe memine la wengesisila ne la trahmany, me tro sai angeic kowe la trahmany.

23 Matre, önine jë hi la trahmany:

24 Celë hi matre, tro la trahmanyi a nue la kem me thine i angeic, me fedre* kowe la föi angeic, nge tro hë nyidroti a ca ngönetrei. 25 Nge lue ka tro xöe la trahmany me föe, ngo tha hmahma kö nyidro.

3 Ketre öni ka hmeke* la un thene la itre öni wael asë, hnei Iehova Akötresie hna xup. Angeic a hnyinge jë kowe la föe ka hape: “Nyipici kö la hna qaja hnei Akötresie laka, tha tro kö epon a xen la itre wene sinöe ne la hlapa?” 2 Sa jë hi lai föe ka hape: “Ijiji nyio hi troa xen la itre wene isinöe ne la hlapa. 3 Ngo ame göne la itre wenene la sinöe nyipine la hlapa, öni Akötresie: ‘Tha tro kö epon a xen, nge tha tro pi kö epon a ketr, wanga meci pi epon.’” 4 Önine jë hi la un kowe la föe: “Tha tro jë kö epone lai a mec. 5 Ke atre hi Akötresie laka, e traqa jë epone xen, tro ha fe la luemeke i epon, nge tro hë epon a tui Akötresie me atrepengöne la loi me ngazo.”

6 Hnene la föe hna öhne laka, lolo nge mingöminge catr la itre wenene la isinöe, nge ka mingöminge e troa goeën la isinöe. Matre, angeic a huje pi me xeni la ketre wen, me hamëne kowe la föi angeic lo nyidrëti a traqa, matre nyidrëti a xeni ju. 7 Fe pi hi la luemeke i nyidro, nge wangatrehmekune ju hi nyidro laka, lue ka cile xöe nyidro. Ame hnei nyidro hna juetrë nyidro hnene la itre dröne wacua hna icanekeun.

8 Thupene lai, hnei Iehova Akötresie hna ngenu ngöne la hlapa, hmekune la kola nango hnahna la enyi ka lepany, drenge ju hi nyidro la aqane ewekë i nyidrë. Ame hnei nyidro hna zae Iehova Akötresie nyipine la itre isinöe ne la hlapa. 9 Nge Iehova Akötresie a hëne jë la trahmanyi me hape: “Eö ekaa?” 10 Önine jë hi la trahmany: “Ame la eni a drenge la aqane ithanata i nyipë ngöne la hlapa, xou ju hi ni, ke ka cile xöe ni. Matre, eni a zae ju.” 11 Ngo sa jë hi nyidrë ka hape: “Hnei drei hna qaja koi eö ka hape, ka cile xöe eö? Hnei eö kö hna xeni lo wene sinöe hnenge hna wathebo eö troa xen?” 12 Sa jë hi la trahmany ka hape: “Hnene lo föe hnei nyipëti hna hamë ni, angeice hi lo ka hamë ni la wenene la sinöe, matre hane jë fe ni xen. 13 Öni Iehova Akötresie kowe la föe: “A nemene la hnei eö hna kuca?” Sa jë hi la föe ka hape: “Hna iaö ni hnene lo un, matre eni pë hë a xeni jë.”

14 Matre, öni Iehova Akötresie kowe la un: “Pine eö ujë tun, hnëjine hë eö nyipine la nöjei öni ka mem, me nöjei öni wael. Tro eö a wewë hune la hni eö, me xeni xaxau e nöjei drai ne la mele i eö. 15 Tro ni a axulune la icilekeu* nyipi eö memine la föe, me matra i eö me matrane la föe. Nge tro angeic a waja fica* la he i eö, nge tro hë eö a eatrën* la tidöca i angeic.”

16 Nge öni Akötresie kowe la föe: “Tro ni a atrune catrëne la itre akötr i eö ngöne la eö a lapa fë upune, nge tro hë eö a hnahone la itre nekönatr hnine la akötr. Nge troa tru la aja i eö kowe la föi eö, nge tro angeic a musinë eö.”

17 Nge koi Adramu,* öni Akötresie: “Pine eö drenge la föi eö, me xen lo wenene la sinöe hnenge hna amekötine koi eö ka hape: ‘Tha tro kö eö a xen,’ hnëjine hë la hnadro hnei’ö. Nge hnine la akötr, tro eö a tra xen* koi eö e nöjei drai ne la mele i eö. 18 Nge tro la dro a aciane koi eö la itre feja ka ithiny me ka ngazo, nge tro eö a xeni la hnitr ne la hlapa. 19 Tro eö a xeni la falawa* hnene la wene zihnue i eö, uti hë la tro eö a bëeke hmaca kowe la hnadro, ke hna xomi eö qa ngön. Nge pine laka, xaxau eö, tro eö a bëeke hmaca kowe la xaxau.”

20 Thupene lai, hnei Adramu hna ati ëjene la föi angeic, Eva,* ke tro Eva a thinene la itre ka mel. 21 Nge hnei Iehova Akötresie hna cai ikupeine öni nyine iheetre ka qea i Adramu me föi angeic. 22 Öni Iehova Akötresie: “Ceitu hë la trahmanyi memine la ketre e easë,* göi troa atrepengöne la loi me ngazo. Ame enehila, tro ni a kuca la ketre ewekë, matre tha tro kö angeic a huj me xen la wene sinöe ne mel. Nge tha tro kö angeic a mele epine palua—” 23 Matre, hnei Iehova Akötresie hna helë angeic qa ngöne la hlapa e Edrena, matre eënyine la dro, lo hna xomi angeice qa ngön. 24 Ame hnei nyidrëti hna helëne la trahmany. Nge ngöne la götrane koië ne la hlapa e Edrena, hnei nyidrëti hna acile la lue kerubi me taua ka melemel nge ka emo pala hi, troa thupëne la gojenyi ne tro kowe la isinöe ne mel.

4 Ame hnei Adramu hna ce meköle me Eva föi angeic, matre upune pi hi Eva. Ame ngöne lo kola hnaho Kaina, öni eahlo: “Hnenge hna hnahone* la nekönatr trahmany, hnene la ixatua i Iehova.” 2 E thupen, hnei eahlo hna hnahone la jini Kaina, Abela la ëjen.

Ame Abela, atre thupë mamoe angeic, nge ame Kaina, ka eëny. 3 Ame ngöne la ketre drai, Kaina a traqa fë pi la itre xeni ne la dro, nyine huuj koi Iehova. 4 Nge Abela a traqa fë la itre si i angeic hna pane hnahon, memine la itre giris. Ame hnei Iehova hna kepe Abela, me huuj i angeic. 5 Ngo tha hnei Akötresieti kö hna kepe Kaina, me huuj i angeic. Matre, hnei Kaina hna elëhni catr, me wesitr ameny.* 6 Öni Iehova jë hi koi Kaina: “Eö a elëhni fë nemen me wesitr ameny? 7 Maine troa loi la aqane ujë i eö, hapeu, tha tro hmaca kö ni a kepe* eö? Ngo e tha saze kö eö, kola treqe eö hnene la ngazo ngöne la qene qëhnelö, nge tro ej a musinë eö. Ngo hapeu, atreine kö eö musi koi angeic?”

8 Thupene lai, öni Kaina koi Abela jini angeic: “Jë fe, matre tro jë nyiso helep.” Ame hë la nyidroti a traqa, Kaina a sesë pi koi Abela me humuthi angeic. 9 Ame hë e thupen, öni Iehova koi Kaina: “Ekaa pë hë Abela jini eö?” Öni Kaina: “Thatre kö ni? Ke eni la ka thupë angeic?” 10 Ngo öni Akötresie: “Hnei eö hna u? Dreng! Kola treije koi ni qa kuhu hnadro la madra ne la jini eö. 11 Ame enehila, hnëjine hë eö, pë hë eö hune la ihnadro, lo ihnadro ka ij la madra ne la jini eö, lo hnei eö hna humuth. 12 Nge e tro eö a eëny, tha tro kö a hamën atrun.* Tro hë eö a mele menu me tro menu hune la ihnadro.” 13 Öni Kaina koi Iehova: “Ka tru catre la aqane nyithupene la ngazong. 14 Enehila, nyipëti a helë ni qa ngöne la nöj,* nge nanyi hë ni koi nyipë. Nge tro ni a mele menu me tro menu hune la ihnadro. Nge atre hnyawa hi ni laka, e tro ni a ixelë me ketre, tro angeic a humuthi ni.” 15 Öni Iehova jë hi: “E tro la ketre a humuthi Kaina, tro ha a 7 lao të koi angeic.”

Iehova a amë ju la ketre hatren, matre e tro la ketre a ixelë me Kaina, tha tro kö a lepi angeic. 16 Matre, hnei Kaina hna tro troa lapa ngöne la Nöje Trenyiwa,* e koië e Edrena, götrane gaa nanyi qaathei Iehova.

17 E thupen, hnei Kaina hna ce meköle me föi angeic. Nge upune jë hi eahlo, ame hna hnaho Enoka. Nge Kaina a xupi traon, me atë la ëjene la nekö i angeic, Enoka. 18 Enoka la keme i Irada. Nge Irada la keme i Mehuiaela. Mehuiaela la keme i Methusaela, nge Methusaela la keme i Lameka.

19 Ame hnei Lameka hna xome la lue föe, Ada la ëjene la hnapan, nge Zila la hnaaluen. 20 Ada a hnaho Iabala jë. Angeice la xötrapan ne la itre ka lapa itat, me itre ka axö öni. 21 Ame la ëjen la trejin me angeic, tre, Iubala. Angeic la xötrapan ne la itre ka elo arp, me ufi trutru. 22 Zila a hnaho Tubala-kaina jë. Nge Tubala-kaina la atre huliwane la nöjei jia ne huliwa kopa, me fao. Ame la trejin me Tubala-kaina, tre, Naama. 23 Ame hnei Lameka hna sili nyima kowe la lue föe i angeic, Ada me Zila:

25 Hnei Adramu hmaca hna ce meköle me föi angeic, nge eahlo a hnahone jë la nekönatr trahmany. Ame hnei eahlo hna ati ëje nyën, Setha,* ke öni eahlo: “Hnei Akötresie hna hamë ni la ketre matran nyine nyihnai Abela, ke hnei Kaina hna humuthi Abela.” 26 Nge hetre neköi Setha mina fe, angeic a ati ëje nyëne ju, Enoka. Nge ngöne la ijine cili, kola ha nyiqaane hëne la ëje i Iehova.

5 Hane hi la itusi ne la mele i Adramu. Ame lo Akötresie a xupi Adramu, hnei nyidrëti hna xupi angeic hnaiji Akötresie. 2 Hnei nyidrë hna xupi nyidro, trahmanyi me föe. Nge ngöne la drai ne xupi nyidro, hnei nyidrëti hna amanathithi nyidro, me ati ëje i nyidro ka hape, Atr.*

3 Hnei Adramu hna mele koi 130 lao macatre, nge hnei angeice hna kemene la nekö trahmany, hnaiji angeic, nge ka tui angeic, me ati ëjen, Setha. 4 Thupene la hna hnaho Setha, hnei Adramu hna mele koi 800 lao macatre, me kemene la itre trahmanyi me jajiny. 5 Matre hnei Adramu hna mele koi 930 lao macatre, nge angeic a meci pi.

6 Hnei Setha hna mele koi 105 lao macatre, nge angeic a keme i Enosa pi. 7 Thupene la hna hnaho Enosa, hnei Setha hna mele koi 807 lao macatre, me kemene la itre trahmanyi me jajiny. 8 Matre hnei Setha hna mele koi 912 lao macatre, nge angeic a meci pi.

9 Hnei Enosa hna mele koi 90 lao macatre, nge angeic a keme i Kainana pi. 10 Thupene la hna hnaho Kainana, hnei Enosa hna mele koi 815 lao macatre, me kemene la itre trahmanyi me jajiny. 11 Matre hnei Enosa hna mele koi 905 lao macatre, nge angeic a meci pi.

12 Hnei Kainana hna mele koi 70 lao macatre, nge angeic a keme i Mahalaleel pi. 13 Thupene la hna hnaho Mahalaleel, hnei Kainana hna mele koi 840 lao macatre, me kemene la itre trahmanyi me jajiny. 14 Matre hnei Kainana hna mele koi 910 lao macatre, nge angeic a meci pi.

15 Hnei Mahalaleel hna mele koi 65 lao macatre, nge angeic a keme i Iareda pi. 16 Thupene la hna hnaho Iareda, hnei Mahalaleel hna mele koi 830 lao macatre, me kemene la itre trahmanyi me jajiny. 17 Matre hnei Mahalaleel hna mele koi 895 lao macatre, nge angeic a meci pi.

18 Hnei Iareda hna mele koi 162 lao macatre, nge angeic a keme i Enoka pi. 19 Thupene la hna hnaho Enoka, hnei Iareda hna mele koi 800 lao macatre, me kemene la itre trahmanyi me jajiny. 20 Matre hnei Iareda hna mele koi 962 lao macatre, nge angeic a meci pi.

21 Hnei Enoka hna mele koi 65 lao macatre, nge angeic a keme i Methusela pi. 22 Thupene la hna hnaho Methusela, hnei Enoka hna catre tro memine la nyipi Akötresie* koi 300 lao macatre, nge hnei angeic hna kemene la itre trahmanyi me jajiny. 23 Matre hnei Enoka hna mele koi 365 lao macatre. 24 Enoka a ce tro memine la nyipi Akötresie, nge pë hmaca kö ka öhnyi angeic, ke hnei Akötresie hna xomi angeic.

25 Hnei Methusela hna mele koi 187 lao macatre, nge angeic a keme i Lameka pi. 26 Thupene la hna hnaho Lameka, hnei Methusela hna mele koi 782 lao macatre, me kemene la itre trahmanyi me jajiny. 27 Matre hnei Methusela hna mele koi 969 lao macatre, nge angeic a meci pi.

28 Hnei Lameka hna mele koi 182 lao macatre, nge angeic a kemene la ketre trahmany. 29 Angeic a ati ëjene jë ka hape, Noa. Nge öni angeic: “Tro nyën a akeukawanyi* së ngöne la huliwa së. Lo huliwa së ka jol, ke hnei Iehova hna ejine la ihnadro.” 30 Thupene la hna hnaho Noa, hnei Lameka hna mele koi 595 lao macatre, me kemene la itre trahmanyi me jajiny. 31 Matre hnei Lameka hna mele koi 777 lao macatre, nge angeic a meci pi.

32 Hnei Noa hna traqa koi 500 lao macatre, nge angeic a keme i Sema jë, me Hama, me Iafeta.

6 Ame hë la kola tiqa hnei atr e celë fen, nge angatr a hnahone la itre nekö jajiny, 2 hnene la itre nekö ne la nyipi Akötresie* hna öhne laka, mingöminge la itre nekö jajiny hna hnahon hnene la itre atr. Matre angatr a xome jë nyine föi angatr, la nöjei jajiny hnei angatr hna ajan. 3 Ene pe, öni Iehova: “Tha tro kö ni* a xomihnine paluane la atr, ke ijöne* lai. Tro hi ej a mele koi 120 lao macatre.”

4 Ngöne la ijine cili me e thupen, hetre Nefilim* hune la ihnadro. Ngöne la ijine cili, itre nekö ne la nyipi Akötresie a ce meköl me itre jajiny, nge angatr a hnaho trahmany. Itre trahmanyi lai ka tru trengecatr, nge ka hlemu.

5 Nge öhne hi Iehova laka, tru hë hnei iangazo hune la ihnadro, nge ka ngazo pala hi la itre mekuna* ne la atr. 6 Matre Iehova a hace* pine la hna xupi atr e celë fen, nge kola hleuhleu* la hni nyidrë. 7 Öni Iehova jë hi: “Tro ni a apatrene qa ngöne la ihnadro la atr hnenge hna xup, la atr memine la itre öni ka mem, me itre öni ka wewë, me itre öni ka trene iap, ke eni a hace pine la hnenge hna xupi nyudren.” 8 Ngo Noa pe a amadrinë Iehova.

9 Hane hi la mele i Noa. Atre ka meköti Noa, tha ceitu i angeice kö me itre ka mel* ngöne la hneijine i angeic, ke atre ka mele nyipici Noa. Nge angeic a ce tro memine la nyipi Akötresie. 10 E thupen, hnei Noa hna kemene la köni nekö trahmany: Sema, Hama, me Iafeta. 11 Ngo sisi hë la ihnadro kowe la nyipi Akötresie, nge hna lapan ej hnene la iakötrë. 12 Eje hi, Akötresie a goeëne la ihnadro, nge sisi hë eje koi nyidrë. Nge goi sisi fe la mele ne la nöjei atr* e celë fen.

13 Matre öni Akötresie koi Noa: “Ase hë ni mekune troa apatrene la nöjei atr,* ke zö i angatr, matre tiqa ha la ihnadro hnei iakötrë. Tro hë ni a apatrenyi angatr, me lepe la ihnadro. 14 Cane jë koi eö la aka* hna kuca hnei sinöe ka sia. Tro eö a thewe nyimu hnahag, me pele koltar e hnin me e trön. 15 Hane hi la aqane tro eö a cane la aka: 300 kubit la eqean, 50 kubit la eisaisan, nge 30 kubit* la edraiën. 16 Nge tro eö a nyi jë i lai, tro eö a kuci mamalama* ka ca kubit qaane e koho hune la aka. Nge tro eö a kuci hnë lö ngöne la ca götrane lai aka, nge tro eö a kuci köni etaz: casi he fen, casi he nyipin, nge casi he hun.

17 “Nge ame ni, tro ni a axulune la ketre iwë e celë fen, matre apatrene la nöjei ka mel* fene la hnengödrai, me nöjei ewekë ka hetre mano ne mel.* Tro ha meci la nöjei ka mel e celë fen. 18 Eni a isisinyikeu me eö, nge tro eö a lö ngöne la aka, eö me itre nekö i eö trahmany, me ifënekö i eö, me itre föe ne la itre nekö i eö. 19 Nge alöne jë la nöjei pengöne öni hnine la aka, isa ala lu, ca trahmany nge ca föe, matre ce amele nyudreni me eö: 20 Thene la itre öni ka trene iap thenge la isa pengö i angatr, me thene la itre öni ka mem thenge la isa pengö i angatr, me thene la itre öni ka wewë asë e celë fen, thenge la isa pengö i angatr. Tro nyudreni a isa traqa ala lu koi eö, me lö hnine la aka matre mel. 21 Nge ame eö, qa i eö troa xawane me xometrongëne la nöjei pengöne xen, nyine a i eö me itre öni.”

22 Ame hnei Noa hna kuca asë la hnei Akötresie hna upi angeic troa kuca, nge hnei angeice hna trongëne hnyawa.

7 Thupene lai, öni Iehova koi Noa: “Lö jë eö me fami eö hnine la aka, ke öhne hë ni laka, isa pengöi eö kö memine la xötre atre celë, ke atre ka meköti eö. 2 Tro eö a xome la 7 lao öni ka hmitrötr,* trahmanyi me föe, nge thene la itre öni ka sis, ala lue hi, trahmanyi me föe. 3 Nge tro fe eö a xom la 7 lao öni ka sesë thenge la isa pengö* i angatr, trahmanyi me föe, matre tro nyudren a mel, me hnaho e cailo fen. 4 Ke 7 pe hi lao drai matre axulune pi ni la mani kowe la ihnadro, nge troa mani koi 40 lao drai, me 40 lao jidr. Nge tro ni a apatrene qa ngöne la ihnadro la nöjei ewekë ka mel, lo hnenge hna xup.” 5 Matre Noa a kuca asë jë la hnei Iehova hna upi angeic.

6 Traqa koi 600 lao macatre i Noa lo kola traqa la iwë e celë fen. 7 Matre hnei Noa me itre nekö i angeic trahmany, me ifënekö i angeic, me itre föe ne la itre nekö i angeic, hna lö hnine la aka qëmekene troa nyiqaane trotro la mani. 8 Nge hnene la itre öni ka hmitrötr, me itre öni ka sis, me itre öni ka trene iap, me itre öni ka wewë, 9 hna lö koi Noa hnine la aka, isa ala lu, trahmanyi me föe, tune lo hnei Akötresie hna amekötin koi Noa. 10 Nge thupene la 7 lao drai, hlupi pi hi la mani e celë fen.

11 Matre ame la kola 600 lao macatre i Noa, hmekune la hna 17 ne drai ne la hnaaluene treu, hna kaca la itre qeqe ne tim e hnengödrai, nge hna fe pi la hnengödrai. 12 Ame hna trotro pi la mani kowe la ihnadro koi 40 lao drai, me 40 lao jidr. 13 Ngöne la drai cili, hnei Noa hna lö hnine la aka me itre nekö i angeice trahmany, Sema, Hama, me Iafeta, memine la föi angeic, me köni föe ne la itre nekö i angeic. 14 Angatr a ce lö jë me itre öni wael thenge la isa pengö i angatr, me itre öni ka mem thenge la isa pengö i angatr, me itre öni ka wewë e celë fen, thenge la isa pengö i angatr, me nöjei öni ka sesë thenge la isa pengö i angatr, me nöjei waco, me nöjei öni ka trene iap. 15 Nöjei ewekë ka mel* nge ka mano, a isa tro ala lu koi Noa hnine la aka. 16 Nöjei öni ka mel, trahmanyi me föe a lö jë, tune lo hnei Akötresie hna amekötine koi Noa. Thupene lai, hnei Iehova hna thinge la qëhnelö hutrö i Noa.

17 Hnene la mani hna trotro kowe la ihnadro koi 40 lao drai, nge hna elë la tim, ame hna manije pi la aka. Ej a manij hune la ihnadro. 18 Kola elë catre la tim, nge kola iwë catr, ngo ka manije pala hi la aka. 19 Elë catr pala ha la tim, matre hna heetrën asë la itre wetr atraqatr ngöne la fene la hnengödrai. 20 Hna elë catre la tim, nge traqa koi 15 kubit* hune la itre wetr.

21 Ame hna meci pi la nöjei ka mel,* nge ka tro hune la ihnadro: itre öni ka trene iap, itre öni ka mem, itre öni wael, itre öni ka wewë,* me nöjei atr. 22 Ame la nöjei ewekë asë ka mel me mano* hune la ihnadro, meci asë hë. 23 Aqane kuca i Akötresieti hi lai matre apatrene la nöjei ka mel qa ngöne la ihnadro: itre atr, me itre öni, me itre öni ka wewë, me itre öni ka sesë e caha hnengödrai. Hna apatrenyi angatr asë qa ngöne la ihnadro. Ngo Noa pe hi me itre ka ce me angeic, la itre ka mele pe e hnine la aka. 24 Hnene la tim hna heetrën asë la ihnadro koi 150 lao drai.

8 Thupene lai, Akötresie a meku Noa hmaca ju, me nöjei öni wael, me nöjei öni ka mem ka ce me angeic hnine la aka. Nyidrëti a kuca jë matre hnahna pi la enyi hune la ihnadro, ame hna nyiqaane uti trootro la itre tim. 2 Nge hna thinge la itre qeqe ne tim e hnengödrai, memine la ithingene la hnengödrai, nge pë ju hi mani.* 3 Itre tim a nyiqaane uti trootro hune la ihnadro, matre thupene la 150 lao drai, uti hë la itre tim. 4 Nge ngöne la hna 17 ne drai ne la hna 7 ne treu, hnene la aka hna të hune la itre wetr ne Ararata. 5 Hnene la time hna uti trootro, uti hë la hna 10 ne treu. Nge ngöne la pane drai ne la hna 10 ne treu, kola ha mama la itre hene wetr.

6 Thupene la 40 lao drai, Noa a fe pi la mamala hnei angeic hna can hnine la aka. 7 Nge angeic a nue pi la ketre halo, nge ej a sesë jë koië me kuë, uti hë la kola weliwele la ihnadro.

8 E thupen, Noa a nue pi la ketre piny troa wange ka hape, pë hë tim hune la ihnadro. 9 Ngo pëkö hnë të* ne ej, matre ej a bëeke hmaca jë koi Noa hnine la aka, ke kolo pala kö a heetrëne la ihnadro hnei tim. Matre angeic a li ime ju, me alöne la piny hnine la aka. 10 Noa a itreqe hmaca ju koi 7 lao drai, nge angeic a nue ej hmaca pi tröne la aka. 11 E hnaipajö hej, la kola bëeke hmaca lai piny, öhne ju hi Noa laka, ej a heje la ketre dröne elaio* hnen ej hna nyipi jean. Haawe, trotrohnine ju hi Noa ka hape, uti hnyawa ha la tim qa ngöne la ihnadro. 12 Angeic a treqene hmaca ju kö la 7 lao drai, nge angeic a nue hmaca pi lai piny, ngo tha bëeke kö ej koi Noa.

13 Ngöne la kola 601 lao macatre i Noa, hmekune la pane drai ne la pane treu, pë ju hi tim hune la ihnadro. Matre Noa a feje pi la ketre götrane la ihakune la aka, nge öhne ju hi angeic ka hape, kola weliwele trootro la ihnadro. 14 Nge ngöne la hna 27 ne drai ne la hnaaluene treu, weliwele hë la ihnadro.

15 Ame hnei Akötresie hna qaja koi Noa ka hape: 16 “Uti pi hë qa hnine la aka, eö me föi eö, me itre nekö i eö trahmany, me itre föi angatr. 17 Nge ce uti pi memine la itre öni ka mel, itre öni ka trene iap, me itre ka mel hune ihnadro, me nöjei öni ka wewë e celë fen, matre tro angatr a mana, me hnaho, me haöthe la fen.”

18 Matre Noa a uti pi me föi angeic, me itre nekö i angeic trahmany, me itre föi angatr. 19 Nge hnene la nöjei ka mel, me itre öni ka wewë, me itre öni ka trene iap, me itre öni ka tro hune ihnadro, hna uti pi qa ngöne la aka, thenge la isa pengö i angatr. 20 Thupene lai, Noa a acili ita ne huuje jë koi Iehova, nge angeic a xome ju la itre xan qaathene la itre öni ka hmitrötr, me itre öni ka trene iap ka hmitrötr, nge angeic a tro fë jë la itre huuj ne dreuth asë* hune la ita ne huuj. 21 Nge Iehova a hngölëne jë la ka pui lolo,* matre öni Iehova jë hi: “Tha tro hmaca kö ni a ejine la ihnadro pine la atr, ke ame la itre mekuna ne la atr, ka ngazo itre ej qane la kola co. Nge tha tro hmaca kö ni a apatrene la itre ka mel, tune la hnenge hna kuca. 22 Qaane ju hi enehila, tro pë hë a hetre ijine jumi feja me menu, me lepany me keukawa, me ijine hnötr me hedredrei, me lai me jidr hune la ihnadro.”

9 Akötresie a amanathithi Noa jë me itre nekö i angeic, me hape: “Hnaho pi, me mana, nge nyialiene jë la ihnadro. 2 Tro la nöjei ewekë ka mel, me nöjei öni ka sesë e caha hnengödrai, me nöjei öni ka tro hune ihnadro, me nöjei ie ne hnagejë, a cile ses me xoue epun. Ase hë nue* angatre kowe la lue ime i epun. 3 Tro la nöjei öni ka tro me ka mel, a nyine xeni koi epun. Eni a hamë angatr asë koi epun, tune lo aqane kuca ni kowe la itre feja. 4 Ame pe, tha tro pi kö epuni a öni la ijön me melen ej, ene la madra. 5 Ketre, tro fe ni a hnyingë pengöne la madra i epun, ene la mele i epun. Tro ni a hnyingë pengöne la madra i epun kowe la nöjei öni ka troa anenine la madra i epun. Nge ame fe kowe la atr, tro ni a hnyingë pengöne koi angeic la mele ne la trejin me angeic. 6 Nge maine tro ketre a anenine la madra ne la ketre, tro fe la ketre atr a anenine la madra i angeic, ke hnei Akötresie hna xupe la atr hnaiji nyidrë. 7 Ngo ame epun, hnaho pi me mana, haöthe jë la ihnadro, nge hnaho atrunyi jë.”

8 Nge öni Akötresie hmaca koi Noa me itre nekö i angeic: 9 “Eni a isisinyikeu me epun me itre matra i epun, 10 me nöjei ewekë ka mel thei epun, itre waco, itre öni, me nöjei ewekë ka mel e celë fen nge ka ce me epun, nöjei atr me öni ka uti qa ngöne la aka, me nöjei ewekë ka mel e celë fen. 11 Eje hi, eni a isisinyikeu me epun: tha tro hmaca kö ni a apatrene la nöjei ewekë ka mel* hnene la iwë atraqatr. Nge tha tro hmaca kö ni a lepe la ihnadro hnene la iwë atraqatr.”

12 Nge öni Akötresieti hmaca: “Hane hi la hatrene la isisinyikeung me epun, me itre ewekë ka mel thei epun, me nöjei xötr atr e thupen. 13 Eni a amë la leweneng nyipine la iaw, nge celë hi hatrene la isisinyikeung memine la ihnadro. 14 Nge e tro ni a axulune la ketre iaw hune la ihnadro, nge e tro la lewen a mama ngöne la iaw, 15 tro hmaca ni a mekune la isisinyikeung me epun, me nöjei ewekë ka mel. Nge tha tro hmaca kö la tim a tune la iwë atraqatr, me apatrene la itre ka mel. 16 Nge ame la nöjei ijine tro la lewen a mama ngöne la iaw, tro ni a öhn, me mekune la isisinyikeu ka epine palua, lo hna kuca hnei Akötresie me nöjei ka mel e celë fen.”

17 Thupene lai, öni Akötresieti hmaca jë koi Noa: “Hatrene la isisinyikeunge lai memine la nöjei ewekë ka mel* e celë fen.”

18 Hane hi la itre nekö i Noa ka uti qa ngöne la aka: Sema, Hama, me Iafeta. E thupen, hnei Hama hna hnaho Kanana. 19 Köni nekö i Noa lai, nge ame la nöjei atr ka lapane la ihnadro ke ka xulu qaathei angatr.

20 Hnei Noa hna nyiqaane eëny, hnei angeic hna eënyi vin.* 21 Matre ame la ketre drai, hnei Noa hna pane iji waina uti hë la kola hmo hnyawa. Nge hnine la itate i angeic, hnei angeic hna una la itre iheetre i angeic. 22 Matre hnei Hama hna öhne la keme i angeic, kola meköle xöe,* nge angeic a tro pi e kuhu qëhnelö troa porotrikën kowe la lue trejin me angeic. 23 Ame hnei Sema me Iafeta hna xomi imaano, me atë hune la lue iape i nyidro. Nge nyidroti a lö jë hnine la itat, me tro hutrö kowe la keme i nyidro, nge nyidroti a heetrë nyidrëti jë. Hnei nyidroti hna tro hutrö koi Noa, matre tha öhne kö nyidro la nyidrëti a meköle xöe.

24 Matre ame hë la Noa a hlë nge tha hmo hë, drenge ju hi angeic la hna kuca hnene la wene puhnen. 25 Öni Noa jë hi:

“Hnëjin hë Kanana,

Tro hë angeic a hluene la itre hlu ne la itre trejin me angeic.”

26 Nge öni Noa hmaca:

Nge epi tro Kanana a hlue i angeice fe.”

28 Hnei Noa hna mele koi 350 lao macatre thupene la iwë atraqatr. 29 Matre 950 lao macatre i Noa, nge angeic a meci pi.

10 Hane hi la pengöne la itre nekö i Noa: Sema, Hama, me Iafeta. Thupene la iwë atraqatr, hnei angatr hna hnahone la itre trahmany. 2 Itre nekö i Iafeta: Gomera, me Magog, me Madai, me Iavana, me Tubala, me Meseka, me Tirasa.

3 Itre nekö i Gomera: Asekenaza, me Rifatha, me Togarema.

4 Itre nekö i Iavana: Elisa, me Tasesa, me Kitim, me Dodanima.

5 Qa ngöne la itre trahmanyi celë, hnene la itre atrene la itre hnapet hna isa ije ngöne la nöje i angatr, thenge la itre qene hlapa me itre fami angatr, me thenge la nöje i angatr.

6 Itre nekö i Hama: Kuza, me Mizeraima, me Futa, me Kanana.

7 Itre nekö i Kuza: Saba, me Havila, me Sabeta, me Rama, me Sabeteka.

Lue nekö i Rama: Sheba me Dedana.

8 Hnei Kuza hna hnaho Nimeroda, lo pane atr ka hlemu catr e celë fen. 9 Angeice la ketre atre ka maca troa weje öni, nge ka icilekeu me Iehova. Celë hi matre hetre trengewekë ka qaja ka hape: “Tui Nimeroda atre weje öni ka catr, nge ka icilekeu me Iehova.” 10 Ame la itre pane traon* ne la baselaia i angeic, tre Babela, me Ereka, me Akada, me Kalene, ngöne la nöje Sinara. 11 Nge hnei angeic hna tro qa ngöne la nöje cili a tro Asuria, me xupe Nineve, me Rehoboth-ire, me Kala, 12 me Resen, nyipin e Nineve me Kala, lo* traon atraqatr.

13 Mizeraima a hnaho Luda, me Anami, me Lehabi, me Nafetui, 14 me Patherusi, me Kaselui, (matra i angeice la angetre Filisiti,) me Kafetori.

15 Nge hnei Kanana hna hnaho Zidona pane nekö i angeic, me Heth, 16 me angetre Iebusi, me angetre Amora, me angetre Girigasa, 17 me angetre Hivi, me angetre Areki, me angetre Sini, 18 me angetre Arevadi, me angetre Zemari, me angetre Hamath. Thupene lai, hnene la itre fami i angetre Kanana hna isa ije. 19 Ame la itre götrane i angetre Kanana, kola tro qa Zidona uti hë Gerara ezine Gaza, nge uti hë Sodroma me Gomora, me Adema, me Zeboim ezin e Lasa. 20 Itre nekö i Hama lai, thenge la itre fami me qene hlapa i angatr, me thenge la itre hnepadro me nöje i angatr.

21 Nge hnei Sema, qaaqaa ne la angetre Heberu, lo trejin me Iafeta lo ka tru,* hna hnahone fe la itre nekönatr. 22 Hane hi la itre nekö i angeic: Elama, me Asura, me Afasada, me Luda, me Arama.

23 Itre nekö i Arama: Uza, me Huli, me Gethera, me Mase.

24 Hnei Afasada hna hnaho Sala, nge Sala a hnaho Heberu.

25 Lue nekö i Heberu: Pelege* la ketre, ke ngöne la ijine cili, hna isa ijene la itre atrene la fen. Nge Ioketana la ëjene la trejin me angeic.

26 Ioketana a hnaho Alemodada, me Salefa, me Hazamaveta, me Iara, 27 me Hadorama, me Uzala, me Dikela, 28 me Obala, me Abimaela, me Sheba, 29 me Ofira, me Havila, me Iobab. Itre nekö i Ioketana asë angatr.

30 Ame la götrane i angatr, kola tro qaa Mesa uti hë Sefara, ngöne la itre götrane wetr e Koië.

31 Itre nekö i Sema lai, thenge la itre fami me qene hlapa i angatr, thenge la itre hnepadro me nöje i angatr.

32 Itre fami ne la itre nekö i Noa lai, thenge la itre xötre qaaqaa i angatr, me thenge la itre nöje i angatr. Qaathei angatre hi matre lapane jë la fen hnene la itre nöj, thupene la iwë atraqatr.

11 Casi hi la qene hlapa ne la itre atr e cailo fen,* nge casi hi la itre hnëewekë.* 2 Nge ame la angatr a tro ngöne la götrane koië, öhne ju hi angatre la ketre hnapapa, hmekune la nöje Sinara, matre angatr a lapa ju e cili. 3 Thupene lai, angatr a iqajakeune jë ka hape: “Tro sa kuci birik, me san ngöne eë.” Qa ngöne lai, tha huliwa etë hmaca kö angatr, ngo birik, nge angatr a xomi koltar nyine sima. 4 Nge öni angatre hmaca jë: “Tro sa xupi traone koi së, me xupi ita ka troa ketr la hnengödrai. Nge loi e troa hlemu la ëje së, matre tha tro kö sa isa ije hune la ihnadro.”

5 Ame hnei Iehova hna ut troa wange la traon, memine la ita hna xup hnene la itre nekö i atr. 6 Nge öni Iehova jë hi: “Casi hi la nöj me qene hlapa i angatr, nge goeëne la huliwa i angatr. Enehila, pëkö ewekë hnei angatr hna thatreine eatrën. 7 Tro sa uti me amenune la itre qene hlapa i angatr, matre tha tro hmaca kö angatr a itrotrohni.” 8 Iehova a isa ije angatre pi e cailo fen, nge tha xupe hmaca kö angatre la traon. 9 Celë hi kepin matre hëne jë la traone cili ka hape, Babela,* ke e cili hi la Iehova a amenune la qene hlapa ne la itre atr ka lapa e celë fen. Nge e cili fe la Iehova a isa ije angatr e cailo fen.

10 Hane hi la mele i Sema:

Traqa koi 100 lao macatre i Sema lo angeic a keme i Afasada, lue macatre thupene la iwë atraqatr. 11 Thupene la hna hnaho Afasada, hnei Sema hna mele koi 500 lao macatre, me hnaho trahmanyi me jajiny.

12 Traqa koi 35 lao macatre i Afasada, nge angeic la keme i Sala. 13 Thupene la hna hnaho Sala, hnei Afasada hna mele koi 403 lao macatre, nge angeic la keme ne la itre trahmanyi me jajiny.

14 Traqa koi 30 lao macatre i Sala, nge angeic la keme i Heberu. 15 Thupene la hna hnaho Heberu, hnei Sala hna mele koi 403 lao macatre, nge angeic la keme ne la itre trahmanyi me jajiny.

16 Traqa koi 34 lao macatre i Heberu, nge angeic la keme i Pelege. 17 Thupene la hna hnaho Pelege, hnei Heberu hna mele koi 430 lao macatre, nge angeic la keme ne la itre trahmanyi me jajiny.

18 Traqa koi 30 lao macatre i Pelege, nge angeic la keme i Reu. 19 Thupene la hna hnaho Reu, hnei Pelege hna mele koi 209 lao macatre, nge angeic la keme ne la itre trahmanyi me jajiny.

20 Traqa koi 32 lao macatre i Reu, nge angeic la keme i Serugo. 21 Thupene la hna hnaho Serugo, hnei Reu hna mele koi 207 lao macatre, nge angeic la keme ne la itre trahmanyi me jajiny.

22 Traqa koi 30 lao macatre i Serugo, nge angeic la keme i Nahora. 23 Thupene la hna hnaho Nahora, hnei Serugo hna mele koi 200 lao macatre, nge angeic la keme ne la itre trahmanyi me jajiny.

24 Traqa koi 29 lao macatre i Nahora, nge angeic la keme i Tera. 25 Thupene la hna hnaho Tera, hnei Nahora hna mele koi 119 lao macatre, nge angeic la keme ne la itre trahmanyi me jajiny.

26 Traqa koi 70 lao macatre i Tera, nge angeic la keme i Aberama, me Nahora, me Harana.

27 Hane hi la mele i Tera.

Tera la keme i Aberama, me Nahora, me Harana. Harana la keme i Lota. 28 Meci ju kö Harana ngöne la nöj hna hnaho angeic, e Ure thei angetre Kaledaia, nge mele pala kö Tera keme i angeic. 29 Nge hnei Aberama me Nahora hna faipoipo: Sarai la ëjene la föi Aberama, nge Mileka la ëjene la föi Nahora. Kolo nekö i Harana, lo keme i Mileka me Iseka. 30 Ka tha hnaho Sarai, matre pëkö nekö i eahlo.

31 Thupene lai, hnei Tera hna xomi Aberama nekö i angeic, me Lota api angeic, lo nekö i Harana, me Sarai tresi angeic nge föi Aberama. Angatr a ce tro ju qa Ure thei angetre Kaledaia, a tro Kanana. Ngo ame ju hi la angatr a traqa e Karan, angatr a lapa ju e cili. 32 Traqa koi 205 lao macatre i Tera, nge meci ju hi angeic e Karan.

12 Öni Iehova jë hi koi Aberama: “Tro jë qa ngöne la nöje i eö, me fami eö, me hnalapa ne la keme i eö, nge tro jë kowe la nöj hnenge hna troa amamane koi eö. 2 Tro ni a kuca matre nöje ka tru eö, nge tro ni a amanathithi eö, nge tro ni a kuca matre hlemu jë la ëje i eö, nge tro la itre atr a manathith jëne eö. 3 Tro ni a amanathithine la itre ka amanathithi eö, me ejine la itre ka eji eö. Nge jëne eö, tro la nöjei fami e cailo fen a manathith.”*

4 Ame hnei Aberama hna tro tune lo aqane upi angeic hnei Iehova. Nge hnei Lota hna ce tro me angeic. Traqa koi 75 lao macatre i Aberama lo angeic a tro qa Karan. 5 Ame hnei angeic hna xomi Sarai föi angeic, me Lota nekö ne la trejin me angeic, me nöjei ewekë i angatr, me itre hlu hnei angatr hna hetreny e Karan, nge angatr a tro jë kowe la nöje Kanana. Thupene la angatr a traqa e Kanana, 6 Aberama a trongëne jë la nöj uti hë la zi Sekema, ezine la itre isinöe ka tru ne More. Ngöne la ijine cili, angetre Kanana la ka lapane la nöj. 7 Nge hnei Iehova hna mama koi Aberama me hape: “Tro ni a hamëne la nöje celë kowe la itre matra* i eö.” Ame hnei Aberama hna acil e cili la ketre ita ne huuj koi Iehova, lo atre mama koi angeic. 8 E thupen, hnei angeic hna tro qa cili kowe la itre wetr e Bethela götrane koië. Nge angeic a acile ju la itate i angeic akawane Bethela götrane koië, me Ai götrane kuë. E cili, angeic a acili ita ne huuje jë koi Iehova, me atrune* la ëje i Iehova. 9 Thupene lai, angeic a feke pi a tro kowe la Negeb,* me feke trootro memine la lapa i angeic asë.

10 Ame hna traqa pi la ketre jiin ngöne la nöj, matre Aberama a uti pi kowe la nöje Aigupito troa pane* lapa e cili, ke catrehnine catre la jiin. 11 Ngo qëmekene troa lö e Aigupito, öni angeic koi Sarai föi angeic: “Pane drei ni, föe ka mingöminge catre nyipo, 12 nge e traqa jë öhnyi nyipo hnei angetre Aigupito, tro angatr a hape, ‘föi angeice lai,’ nge tro angatr a humuthi ni, me nuamele nyipoti pe. 13 Haawe, qaja ju ka hape, xange nyipo, matre mele pi ni, nge jëne nyipo, tha tro kö a humuthi ni.”

14 Matre ame ju hi la Aberama a lö e Aigupito, canga öhne ju hi angetre Aigupito laka, ka mingöminge catre la föi angeic. 15 Hnene fe la itre he ne nöj i Farao hna öhnyi eahlo, nge angatr a selëne la emingömingö i eahlo koi Farao. Matre hna traqa sai eahlo kowe la hnalapa i Farao. 16 Matre hnei Farao hna nyipi Aberama pi Sarai. Nyidrëti a hamë Aberama jë la itre mamoe, me itre kau, me itre boliko trahmanyi me föe, me itre kamela, me itre hlue, trahmanyi me föe. 17 Ngo hnei Iehova hna lepi Farao hnei itre akötre ka tru, angeic me nöjei atre ka lapa hnine la uma i angeic, pi Sarai föi Aberama. 18 Matre Farao a hë Aberama jë, me hape: “Nemene la hnei eö hna kuca koi ni? Hnauëne laka tha qaja kö eö ka hape, föi eö? 19 Hnauëne la qaja jë eö ka hape, ‘xa i eö lai,’ eni lo a troa xomi angeic nyine föeng. Hane hmaca la föi eö, xome jë, nge tro pi!” 20 Nge Farao a upe jë la itre atre i nyidrë troa upi Aberama, me föi angeic, me nöjei ewekë i angeic.

13 Nge hnei Aberama hna tro qa Aigupito kowe la götrane Negeb. Nge ce angeic me föi angeic me Lota, me nöjei ewekë i angeic. 2 Trenamo catre hë Aberama, nge tru catre hë hnei itro öni i angeic, me sileva, me gool. 3 Nge qa ngöne la Negeb, hnei angeic hna elë hmaca a tro Bethela, me acili itate trootro, uti hë la götran hnei angeice hë hna acili itat, akawan Bethela me Ai, 4 lo hnei angeic hna xupi ita ne huuj. E cili, Aberama a atrune* jë la ëje i Iehova.

5 Nge ame Lota, lo ka ce tro me Aberama, hetre mamoe i angeice hë, me itre kau, me itre itat. 6 Tha ijiji angatre hë la nöj, ke eje hi, nyimutre catre hë la itre ewekë i angatr, matre thatreine hë angatre ce lapa. 7 Nge pine lai, hnene la itre ka thupë öni Aberama, hna iwesitrë memine la itre ka thupë öni Lota. (Ngöne la ijine cili, angetre Kanana me Perizi la ka lapane la nöj.) 8 Matre öni Aberama koi Lota: “Pane dreng, tha nyipiewekë kö tro nyiso a iwesitrë, nge tha tro kö a iwesitrë la itre ka thupë öning, me itre ka thupë öni eö, ke lue trejine nyiso. 9 Hapeu, tha thatraqai eö kö la nöj? Matre isa ije pi nyiso. Maine tro eö a tro kowe la götrane mi, tro ni a tro kowe la götrane maca. Ngo e tro eö a tro kowe la götrane maca, tro ni a tro kowe la götrane mi.” 10 Lota a gala jë, me öhne laka, ame la hnapapa ne Ioridrano* uti hë Zoara, tre götrane gaa hetre tim, tune la hlapa i Iehova, memine la nöje Aigupito. (Kolo qëmekene tro Iehova a apatrenyi Sodroma me Gomora). 11 Ame hnei Lota hna iëne la hnapapa ne Ioridrano, nge angeic a feje pi la itre itate i angeic me tro koië. Hane hi la aqane isa ije i nyidro. 12 Aberama a lapa ju ngöne la nöje Kanana, nge Lota a lapa ju nyipine la itre traon ne la hnapapa. Nge angeic a acile jë la itate i angeic ezine Sodroma. 13 Ngo ngazo catre la itre atrene Sodroma, nge angatr a kuca catrëne la ngazo koi Iehova.

14 Thupene la Aberama a isa ije me Lota, öni Iehova koi Aberama: “Gala jë, nge qaane la götran hnei eö hna cil, goeëne jë e kolopi me kolojë, e koië me kuë, 15 ke ame la nöj hnei eö hna goeën, tro ni a hamëne paluan koi eö, me itre matra i eö. 16 Nge tro ni a kuca matre mana pi la itre matra i eö, tune la xaxau ne la ihnadro. Nge e tro ketre a atreine e la xaxau ne la ihnadro, tro fe a atreine e la etrune la itre matra i eö. 17 Haawe cile jë, trongëne asë jë la nöj, ke tro ni a hamë eö.” 18 Aberama pala hi a lapa fene itat, nge e thupen, angeic a tro jë troa lapa ezine la itre isinöe ka tru e Mamere, e Heberona. Nge e cili, angeic a acili ita ne huuje jë koi Iehova.

14 Ngöne la ijine cili, hnei Amerafela joxu ne Sinara, me Arioka joxu ne Elasara, me Kedalaoma joxu ne Elama, me Tidala joxu ne Goim, 2 hna isi me Bera joxu ne Sodroma, me Biresa joxu ne Gomora, me Sinaba joxu ne Adema, me Semeba joxu ne Zeboim, memine la joxu ne Bela, ene Zoara. 3 Hnei angatre hna acasine la itre trongene isi i angatr ngöne la Hnathup e Sidima, lo Hnagejë Sotr.*

4 Hnei angatre* hna nyihlue i Kedalaoma koi 12 lao macatre, ngo ngöne la hna 13 ne macatre, hnei angatr hna icilekeu. 5 Nge ame ngöne la hna 14 ne macatre, hnei Kedalaoma me itre joxu ka ce me angeic, hna tro ju me ngaane la angetre Refai e Aseterotha-karenaima, me angetre Zuzi e Hama, me angetre Emi e Save-kiriathaima, 6 me angetre Hori ngöne la wetre i angatr e Seira, uti hë Eleparana ezine la hnapapa. 7 Thupene lai, hnei angatr hna bëeke hmaca me traqa e Eni-misepata, ene Kadesi. Angatr a thapa jë la nöj i angetre Amaleka, me ngaane la angetre Amora ka lapa e Hazezo-tamara.

8 Ame hnene la itre joxu ne Sodroma, me Gomora, me Adema, me Zeboim, me Bela, ene Zoara, hna tro ju me cile troa isi ngöne la hnathup e Sidima, 9 kola isi me Kedalaoma joxu ne Elama, me Tidala joxu ne Goim, me Amerafela joxu ne Sinara, me Arioka joxu ne Elasara, 4 lao joxu ka isi me 5 lao joxu. 10 Ngo ame ngöne la hnathup e Sidima, nyimutre la itre hnaopë koltar, matre hnene la lue joxu ne Sodroma me Gomora, hna kei e hnin la nyidro a kötre mel. Nge ame pena la itre xan, angatr a kötre kowe la itre wetr. 11 Nge hnene la itre ka huun ngöne la hna isi, hna eöth asë la itre ewekë i Sodroma me Gomora, me nyine xen, nge angatr a tro pi. 12 Nge ame Lota, lo nekö i Aberama, angeic a lapa fe e Sodroma, matre angatr a xomi angeice ju fe, me itre ewekë i angeic, nge angatr a tro hmaca pi.

13 Thupene lai, hnene la ketre trahmany ka kötre mel, hna traqa troa thuemacanyi Aberama atre Heberu, ka lapa fene la itre isinöe atraqatr i Mamere atre Amora, lo trejin me Esekolo me Anere. Ame la itre trahmanyi cili, itre sinexöle i Aberama lai. 14 Nge e cili, atre ju hi Aberama laka, ase hë othe me kötre fë la nekö* ne la trejin me angeic, matre angeic a acasine jë la itre atre i angeic hna inine troa isi, ala 318 lao hlu hna hnahon ngöne la hnalapa i angeic. Nge angatr a huzune jë la itre joxu uti hë e Dana. 15 Nge e hej, hnei angeic hna thawa nyimutrene la itre sinatronge i angeic, nge hnei angeic hna tro me itre hlue i angeic troa isi me itre joxu. Angeic a ngaa angatre ju, me huzun uti hë e Hoba, e Damaseko nge kolopi. 16 Angeic a xomi Lota hmaca jë, me itre ewekë i angeic, me nöjei föe, me itre xa hna oth.

17 Nge ame hë la Aberama a bëeke qa hna isi me Kedalaoma me itre xa joxu, hnene la joxu ne Sodroma, hna tro troa ixelë me Aberama ngöne la hnathup e Save, ene la Hnathup i Joxu. 18 Nge hnei Melekisedek, joxu ne Salema, hna traqa fë falawa me waina. Nyidrëti la atre huuj ne la Akötresie Ka Draië Catr.

19 Thupene lai, nyidrëti a amanathithi Aberama jë, me hape:

Aberama a hamëne jë koi Melekisedek la sin* ne la nöjei ewekë asë.

21 Thupene lai, önine la joxu ne Sodroma koi Aberama: “Awe jë la itre atr, ngo xome jë kö eö la itre mo.” 22 Ngo öni Aberama kowe la joxu ne Sodroma: “Eni a li im, me sisiny qëmekei Iehova Akötresie Ka Draië Catr, Atre xupe la hnengödrai me ihnadro, 23 ka hape, tha tro kö ni a xome la ketre ewekë i eö, uti fe hë la neköi theny, maine engene butr, matre tha tro kö eö a hape: ‘Eni la ka atrenamo Aberama.’ 24 Tro hi ni a xome la hna nyiqaane xeni hë hnene la itre thupëtresij. Ngo ame la itre ka ce traqa me eni, ene Anere, me Esekolo, me Mamere, tro angatr a isa xomi edrön.”

15 Thupene lai, hnei Aberama hna meköle goeën la trengewekë i Iehova kola uti koi angeic, me hape: “The xou kö Aberama, eni la petre i eö. Troa atraqatre la manathithi eö.” 2 Nge hnei Aberama hna sa me hape: “Iehova Joxu ka Sisitria, nemene la hnei nyipëti hna troa hamë ni? Ke pë pala kö neköng, nge tro Eliezera atre Damaseko a kepe edröne la hnalapang?” 3 Öni angeice hmaca: “Tha hnei nyipëti kö hna hamë neköng, matre ketre hlueng* pë hë la ka troa nyihnai ni, me kapa la edröng.” 4 Ngo öni Iehova: “Tha angeice kö la ka troa nyihnai eö, me xome la edrö i’ ö, ngo sipu nekö i eö.”

5 Nge Akötresie a xomi Aberama a tro trön, me hape: “Pane gala jë draië, nge tupathe ju troa e la itre wëtresij.” Nge öni nyidrëti hmaca: “Tro ha tune la itre matra i eö.” 6 Nge Aberama a lapaune ju koi Iehova, nge pine lai, hna jelemeköti angeic. 7 Öni Akötresie hmaca jë hi: “Eni Iehova, Atre tro xomi eö qa Ure thei angetre Kaledaia, matre hamëne la nöje celë nyine edrö i eö.” 8 Matre öni Aberama: “Iehova Joxu ka Sisitria, tro ni a atre tune kaa ka hape, edrönge la nöje ce?” 9 Akötresieti a sa jë me hape: “Xome jë la neköi kau ka 3 lao macatre, me ca nani ka 3 lao macatre, me ca mamoe trahmany ka 3 lao macatre, me ca piny, me ca neköi melimala.” 10 Aberama a xom jë la itre öni cili, me thupaluën, me ce amë la lue götrane ka ihmeku. Ngo tha thupa kö angeice la lue waco. 11 Matre hnene la itre waco ka tru hna nyiqane uti kowe la itre sine mitr, nge Aberama a sengön itre ej.

12 Qëmekene troa lö la jö, hnei Aberama hna hmulizië, nge uti pi koi angeice la miti ka tru, nge hna xouen. 13 Nge öni Akötresie koi Aberama: “Lapa atre ju laka, tro la itre matra i eö a mele trenyiwa ngöne la ifekë nöjen. Tro la itre atrene la nöje cili a thahluë angatr, me akötrë angatr koi 400 lao macatre. 14 Ngo tro ni a amekötine la nöj hnei angatr hna nyihlue kow, nge thupene lai, tro angatr a tro, me xometrongëne la itre ewekë ka nyimutre. 15 Ngo ame eö, tro eö a uti memine la tingeting kowe la itre qaaqaa i eö, tro ha kelemi eö, thupene la hnei eö hna pane mel aqeany. 16 Nge ngöne la hna 4 ne xötr atr, tro la itre matra i eö a bëeke a tro ce, ke tha pexeje pala kö la ngazo i angetre Amora.”

17 Ngo thupene la kola lö la jö, lo kola miti hnyawa, mama pi hi la ketre hnasaihnyi kola so, nge kola tro la uke jina ka mel nyipine la itre mitr. 18 Ngöne la drai cili, hnei Iehova hna isisinyikeu me Aberama, me hape: “Tro ni a hamëne la nöje ce kowe la itre matra i eö, qaane la hneopegejë ne Aigupito, uti hë la hneopegejë ka tru Euferata: 19 nöj i angetre Keni, me Kenaza, me Kademoni, 20 me Heth, me Perizi, me Refai, 21 me Amora, me Kanana, me Girigasa, me Iebusi.”

16 Tha hnaho pala kö Sarai, föi Aberama. Ngo hetre hlue i eahlo, Hagara la ëjen atre Aigupito. 2 Matre öni Sarai koi Aberama: “Pane drei ni, hnei Iehova matre tha hnaho kö ni. Pane ce meköle ju memine la hlueng, nge maine jë tro ni a hetre nekönatr qaathei angeic.” Ame hnei Aberama hna drei Sarai. 3 Traqa ha koi 10 lao macatre ne lapa angeic ngöne la nöje Kanana, matre hnei Sarai föi Aberama, hna xomi Hagara lo hlue i eahlo qa Aigupito, me hamë Aberama troa ketre föi nyidrë. 4 Ame hnei Aberama hna ce meköl me Hagara, matre upune jë hi angeic. Nge ame hë la Hagara a öhne laka, upune hë angeic, angeic a methinë Sarai, maseta i angeic.

5 Matre öni Sarai koi Aberama: “Zö i eö la angeic a akötrë ni, eni la ka upi angeice koi eö, ngo ame hë la angeic a öhne laka, upune hë angeic, angeic a methinë ni jë. Epi tro Iehova a ameköti nyiso.” 6 Ngo sa jë hi Aberama ka hape: “Dreng! Hlue* i nyipoti lai, kuca jë koi angeic la hnei nyipoti hna mekun.” Ame hnei Sarai hna ahmahmanyi Hagara, nge angeic a kötre eahlo pi.

7 E thupen, hnene la angela i Iehova hna öhnyi angeic, ezine la qeqe ne tim ngöne la hnapapa, lo qeqe ne tim ngöne la gojenyi ne tro Sura. 8 Önine la angela koi angeic: “Hagara, hlue i Sarai, qa i eö kaa? Nge eö a tro ië?” Sa jë hi angeice ka hape: “Eni a kötre Sarai masetang.” 9 Ame hnene la angela i Iehova hna qaja ka hape: “Bëeke hmaca jë kowe la maseta i eö, nge drengethenge ju me ipië qëmeke i eahlo.” 10 Thupene lai, önine la angela i Iehova: “Tro ni a kuca matre mana pi la itre matra i eö, tro hë angatr a ala nyimu catr, uti hë thatreine kö e la etru i angatr.” 11 Nge önine hmaca jë la angela i Iehova: “Upune hë eö, nge tro eö a hnahone la nekö trahmany. Tro eö a ati ëjen, Isamaela,* ke drenge hë Iehova la itre treije i eö. 12 Tro nyën a tune la boliko wael,* tro nyën a icilekeu me nöjei atr, nge tro la nöjei atr a icilekeu me nyën. Nge tro nyën a acili itat, qëmekene la itre trejin* me nyën.”

13 Ame hnei angeic hna qaja koi Iehova, lo ka ithanata me angeic, ka hape: “Nyipëti la Akötresie ka öhn asë.” Nge öni angeice hmaca: “Hapeu, ase kö ni öhn e celë la atre goeë ni?” 14 Celë hi matre hëne jë la hna tha tim ka hape, Bere-lahai-roi,* (ej e nyipine Kadesi me Bareda). 15 Ame hnei Hagara hna hnahone koi Aberama la nekönatr trahmany, nge hnei Aberama hna ati ëje i nyën, Isamaela. 16 Traqa koi 86 lao macatre i Aberama, lo Hagara a hnaho Isamaela.

17 Traqa koi 99 lao macatre i Aberama lo Iehova a mama koi angeic, öni nyidrë: “Eni la Akötresie ka Tru Trenge Men, tro jë qëmekeng, nge mele nyipici jë. 2 Eni a acile la isisinyikeu nyipi nyiso, nge tro ni a atiqane la itre matra i eö.”

3 Ame hnei Aberama hna thili kowe la ihnadro, nge Akötresie a ithanata me angeic, öni nyidrë: 4 “Ase hë ni isisinyikeu me eö, nge tro kö eö a keme ne la itre nöj ka ala nyim. 5 Tha tro hmaca kö a hë eö Aberama,* ngo Aberahama,* ke tro ni a kuca matre tro eö a keme ne la itre nöj ka ala nyim. 6 Tro ni a hamë nyimu matra i eö, nge tro ni a kuca matre nöje jë eö, nge tro la itre joxu a xulu qaathei eö.

7 “Tro ni a metrötrëne la isisinyikeu i nyiso me itre matra i eö. Isisinyikeu ka epine palua, matre tro ni a Akötresi eö, me Akötresi ne la itre matra i eö. 8 Tro ni a hamëne paluane koi eö, me itre matra i eö la nöj hnei eö hna mel trenyiwa ngön, la nöje Kanana asë. Nge tro hë ni a Akötresi angatr.”

9 Öni Akötresieti hmaca jë hi koi Aberahama: “Ngo ame eö, qa i eö troa metrötrëne la isisinyikeung, eö me itre matra i eö. 10 Hane hi la isisinyikeung me epun, isisinyikeu hnei epuni hna troa trongën, eö me itre matra i eö: tro ha xötrehatrene la nöjei trahmanyi thei epun. 11 Qa i epuni troa thupa la ikupein ne la ka hmitrötr i epun, nge tro lai a hatrene la isisinyikeu së. 12 Ngöne la nöjei xötre i epun e thupen, tro ha xötrehatrene la nöjei medrenge trahmany ka 8 lao drai: itre nekö trahmanyi hna hnahon thei epun, me itre hna itön qaathene la trenyiwa, lo ka tha sine kö la itre matra i eö. 13 Troa xötrehatrene la nöjei trahmany hna hnahon thei eö, me hna itön, nge tro la isisinyikeung hna sija ngöne la ngönetrei i epun, a isisinyikeu ka epine palua. 14 Nge e tro la ketre trahmanyi hna tha xötrehatren a xele ma xötrehatrenyi angeic, tro ha apatrenyi* angeic qaathene la nöje i angeic, ke hnei angeic hna thë la isisinyikeung.”

15 Nge öni Akötresie koi Aberahama: “Nge ame Sarai* föi eö, tha tro hmaca kö eö a hëne ka hape Sarai, ngo troa hëne ka hape, Sara.* 16 Tro ni a amanathithi angeic, nge jëne angeic, tro ni a hamë nekö i eö trahmany. Tro ni a amanathithi angeic, nge tro angeic a itre nöj, nge tro ha xulu qaathei angeic la itre joxu ne la itre nöj.” 17 Ame hnei Aberahama hna thili ju e kuhu hnadro, me hnyimahnyima me mekune ka hape: “Tro kö a hnaho nekönatr trahmany hnene la ka 100 lao macatre? Nge tro kö Sara, qatre föe ka 90 lao macatre a hnaho?”

18 Aberahama a qaja ju kowe la nyipi Akötresie ka hape: “Epi tro Isamaela a mel qëmeke i nyipë!” 19 Matre öni Akötresie: “Tro Sara föi eö a hnaho nekö trahmany, nge tro eö a hën, Isaaka.* Tro ni a isisinyikeu me nyën, isisinyikeu ka epine palua kowe la itre matra i angeic. 20 Nge ame koi Isamaela, ase hë ni drei eö. Dreng, tro ni a amanathithi nyën, nge tro ni a hamë nyimu nekö i nyën, nge troa mana la itre matra i nyën. Tro nyën a keme ne la 12 lao tan, nge tro ni a kuca matre nöje ka tru jë nyën. 21 Ngo ame la isisinyikeung, tro ni a ce kuca me Isaaka, hnei Sara hna troa hnahon koi eö, ngöne la macatre ka troa xulu, hmekune la ijine celë.”

22 Ame hë la nyidrë a ase ithanata me Aberahama, Akötresie a nue angeice pi me elë hmaca. 23 Aberahama a xomi Isamaela jë nekö i angeic, me nöjei trahmany hna hnahon thei angeic, me nöjei trahmany hnei angeic hna itön, me nöjei trahmany hnine la hnalapa i angeic, nge angeic a xötrehatrenyi angatre jë la drai cili, tune lo aqane upi angeic hnei Akötresie. 24 Traqa koi 99 lao macatre i Aberahama lo kola xötrehatrenyi angeic. 25 Nge ame Isamaela nekö i angeic, ka 13 lao macatre i nyën lo kola xötrehatrenyi nyën. 26 Matre ngöne la drai cili, hna xötrehatrenyi Aberahama me Isamaela. 27 Nge ame fe la nöjei trahmanyi thei angeic, me nöjei trahmanyi hna hnahon thei angeic, me itre hna itön qaathene la trenyiwa, hna hane fe xötrehatrenyi angatre la drai cili.

18 E thupen, Iehova a mama pi koi Aberahama ezine la itre isinöe atraqatr e Mamere, lo angeic a lapa ngöne la hnë lö ne la itat, lo ijin kola hedredrei catr. 2 Ame hë la Aberahama a öhne la köni trahmany kola nango cil e gaa nanyi, angeic a canga nyinyape pi koi angatr, me thil e kuhu hnadro. 3 Thupene lai, öni angeic: “Iehova fe, maine nyipë a kepe ni, pane cile ju thene la hlue i nyipë, 4 matre tro huni a traqa fë time koi nyipë, me wasine la lue ca i epun. Nge pane mano ju fene la isinöe. 5 Nge hnene laka, traqa ha epuni e celë thene la hlue i epun, pane nue ni pi troa hamë sine falawa koi epun, matre tro epuni a hetre trengecatr, me xome hmaca la gojeny.” Öni angatre jë hi: “Öö ka loi.”

6 Ame hnei Aberahama hna canga nyinyape pi koi Sara hnine la itat, me hape: “Nyimenyime jë, xome jë la köni tulu* ne farin ka lolo, lepe jë, nge sane pi la falawa.” 7 Thupene lai, angeic a canga nyinyape pi kowe la hna axö öni, me iëne la ketre neköi kau ka lolo, nge angeic a hamëne pi kowe la itre hlu, nge angatr a canga atrone jë. 8 Nge angeic a xomi batra jë me melek, memine la neköi kau hnei angeic hna hnëkën, nge angeic a atë ju la xeni qëmeke i angatr. Nge ame hë la angatr a xen, angeic a nango cile ju ezi angatr fene la isinöe.

9 Angatr a hnyingë angeice jë ka hape: “Ekaa Sara föi eö?” Matre öni angeic: “Hane hi la, hnine la itat.” 10 Matre önine la ketre e angatr: “Ngöne la macatre ka troa xulu, hmekune la ijine celë, tro hmaca ni a bëeke koi eö, nge tro Sara ifënekö i eö, a hetre nekönatr trahmany.” Nge drenge hi Sara ngöne la qëhnelö ne la itat, hutrö i nyidrë. 11 Lue qatre hë Aberahama me Sara, nge tha ijine tro hmaca kö Sara a hnaho. 12 Matre eahlo a hnyima jë e kuhu hni, me mekune ka hape: “Qatre föe hë ni la, nge qatre hë la joxung, tro hmaca kö ni a madrin?” 13 Öni Iehova jë hi koi Aberahama: “Hnauëne la Sara a hnyima, me mekune ka hape, ‘tro jë kö ni a hnaho nge qatre föe hë ni la?’ 14 Hapeu, hetre ewekë kö hna thatreine kuca hnei Iehova? Tro hmaca ni a bëeke koi eö ngöne la macatre ka troa xulu, hmekune la ijine celë, nge tro Sara a hnahone la nekönatr trahmany.” 15 Ngo öni Sara jë hi: “Waea, tha ase kö ni hnyima,” ke angeic a xou. Ngo önine lai atr: “Nyipici, hnei eö hna hnyima.”

16 Matre ame hë la itre trahmany a tro, angatr a goeëne jë e Sodroma. Nge Aberahama a nango ce tro me angatr. 17 Nge öni Iehova: “Tro kö ni a juetrëne koi Aberahama la hnenge hna troa kuca? 18 Eje hi, tro angeic a nöje ka tru, nge ka catr. Nge tro la nöjei nöj e cailo fen a manathith jëne angeic. 19 Ke epe catre hë ni koi angeic, matre tro angeic a amekötine kowe la itre nekö i angeic, me itre matra i angeic troa metrötrëne la aja i Iehova, ene la troa kuca la ka meköt memine la thiina ka meköt, nge tro hë Iehova a eatrëne la hnei nyidrëti hna sisiny göi Aberahama.”

20 Nge öni Iehova jë hi: “Ala nyimu la itre ka hokötre hnei Sodroma me Gomora, nge hace catre pi hë la itre ngazo i angatr. 21 Tro hë ni a uti me wange ka hape, ka nyipici kö la aqane hokötre fë la ngazo koi ni. Ngo e tha eje kö, tro kö ni lai a atre.”

22 Nge hnene la itre trahmanyi hna tro Sodroma, ngo ce Iehova pala kö me Aberahama. 23 Ame hnei Aberahama hna easenyi me hape: “Nyipici kö lai laka, tro nyipëti a ce apatrene la atre ka meköt me ka ngazo? 24 Ngo maine 50 ju lao atre ka meköt hnine la traon, tro kö nyipëti a humuthe la itre atren, me tha nue la ngazo i angatr, nge ala 50 pe lao ka meköt? 25 Thatreine kö ni mekun laka, tro nyipëti a ujë tun, ene la troa ce humuthe la atre ka meköt me ka ngazo, nge troa casi la pun koi itre ka meköt me ka ngazo. Waea, thatreine kö huni troa mekune tune lai göi nyipë. Hapeu, tha tro kö la Atre Iameköti e cailo fen a kuca la ka meköt?” 26 Matre öni Iehova: “Maine tro ni a öhne la 50 lao atre ka meköt e Sodroma, pi angatr, tro ni a nue la ngazo ne la traon asë.” 27 Nge öni Aberahama hmaca: “Menu hë ni Iehova, ke tha xounge kö troa ithanata me nyipë, nge so ne dro ni me hnatresij. 28 Ngo e troa patre la ala 5 thene lo ala 50 ka meköt, tro kö nyipëti a apatren asë lai traon pine la ala 5?” Nge öni Akötresie: “Tha tro kö ni a apatren, e tro ni a öhne la ala 45.”

29 Nge angeic a ithanata hmaca jë koi nyidrë me hape: “Nge e ala 40 hi angatr?” Öni Akötresie: “Pine la ala 40, tha tro kö ni a apatren.” 30 Nge öni angeice hmaca: “Iehova fe, the elëhni kö ngo nue ni pi tro hmaca a ithanata, e ala 30 hi angatr?” Öni Akötresie: “Pine la ala 30, tha tro kö ni a apatren.” 31 Ngo öni angeic hmaca: “Menu hë ni Iehova, tha xounge kö troa ithanata me nyipë. Ngo e tro hi a ala 20?” Öni Akötresie: “Pine la ala 20, tha tro kö ni a apatren.” 32 Matre öni angeic: “Iehova fe, the elëhni kö, casi pe hi la ithanatang. Nge e tro hi a ala 10?” Öni Akötresie: “Pine la ala 10, tha tro kö ni a apatren.” 33 Matre ame hë la nyidrëti a ase ithanata me Aberahama, Iehova a tro pi, nge Aberahama a bëeke hmaca jë kowe la hnalapa i angeic.

19 Hnene la lue angela hna traqa e heji e Sodroma. Nge Lota a lapa ngöne la qëhnelö ne la traon. Matre ame hë la angeic a öhnyi nyidro, angeic a canga mejë jë koi nyidro, me thil e kuhu hnadro. 2 Öni angeic: “Lue joxung, pane lö jë kowe la hnalapa ne la hlue i epon, nge meköle ju e celë, matre tro huni a wasine la lue ca i epon. Nge ame hë elany, tro epon a canga ilë, me tro hmaca.” Öni nyidroti jë hi: “Oleti, ngo tro hi nyio a meköl ngöne la hna maketr.” 3 Ngo hnei Lota hna iele nyidro, matre nyidroti a lö jë kowe la hnalapa i angeic. Nge angeic a hnëkë xeni atrune jë koi nyidro, me atrone la falawa ka pë levenen, nge nyidroti a xeni jë.

4 Tha meköle pala kö nyidro, nge xulu pi la itre trahmany ne Sodroma asë, qaane la nekönatr uti hë la qatr, nge angatr a cile xötreithe la uma. 5 Nge angatr a sue jë koi Lota, me hape: “Ekaa lo lue trahmanyi ka lö kowe la uma i eö enehila hej? Lö sai nyidroti pi koi hun, matre tro huni a ce meköle memin.”

6 Nge hnei Lota hna tro koi angatr, me thinge la qëhnelö hutrö i angeic. 7 Nge öni angeic: “Ange trejine fe, the huliwa kö tune lai. 8 Dreng, hane hi la lue nekönge jajiny, nge tha ka ce meköle pala kö me trahmany, tro na traqa sai nyidro koi epun, matre tro epuni a kuca la aja i epun koi nyidro. Ngo the ketre kö la lue trahmanyi celë, ke eni la ka thupë nyidro.” 9 Ngo öni angatr: “Ezi pi eö.” Nge öni angatre hmaca jë hi: “Ame la trenyiwa ka mele e ce, angeic a pi ameköti së. Enehila, co ju kö la hne huni hna troa kuca koi nyidro hui eö.” Nge angatr a uku* Lota pi, me thele troa thöne la qëhnelö. 10 Ame hnene la lue trahmanyi hna e Lota, me huli angeic kowe la uma, me thinge la qëhnelö. 11 Nge hnei nyidroti hna atimekëne la itre trahmany ngöne la qëhnelö ne la uma, qaane la ka co uti hë la ka tru. Matre hmanono ju kö angatr hna thele la qëhnelö.

12 Nge önine la lue trahmanyi koi Lota: “Hetre sine i eö hmaca kö e celë? Lue tresi eö, me itre nekö i eö trahmanyi me jajiny, me nöjei atrene la hnalapa i eö, lö sai angatre pi qa ngöne la traon. 13 Tro huni a lep apatrene la götrane celë, ke tru catre hë la hna hokötr pine la ngazo ne la itre atrene la traon. Nge drenge hë Iehova, celë hi matre hnei Iehova hna upi nyio troa apatrene la traon.” 14 Hnei Lota hna tro troa qaja kowe la lue tresi angeic, lo lue ka troa faipoipo memine la lue nekö i angeice jajiny, nge öni angeic: “Mejë jë, nge kötre jë qa la, ke tro Iehova a lep apatrene la traon.” Ngo öni nyidroti pena kö ka hape, angeic a qene hnyima.

15 Ngo ame hë la kola kaqa ne lai, hnene la lue angela hna iele Lota me hape: “Lolo jë, xome jë la föi eö me lue nekö i eö jajiny, wanga meci pi eö hnene la ngazo ne la traon.” 16 Ngo angeice pala hi a huli hmitr. Eloine pe, hnei Iehova hna utipi angeic, matre hnene la lue trahmanyi hna ea la iwanakoime i angeic, angeic me föi angeic, me lue nekö i angeice jajiny. Nge nyidroti a lö sai angatre pi tröne la traon. 17 Nge ame hë la nyidroti a ase tro sai angatr e tröne la traon, önine la ketre e nyidro: “Kötre jë matre mel! The xei hutrö kö, nge the cile kö ngöne la hnapapa!* Kötre pi kowe la itre wetr, matre mele pi eö!”

18 Ngo öni Lota: “Iehova fe, tha e cili kö. 19 Nyipëti a kapa la hlue i nyipë, nge atraqatre la aqane utipi ni* hnei nyipë, ke hnei nyipëti hna amele ni. Ngo thatreine kö ni kötre kowe la itre wetr, wanga ee ni jë hnene la akötr, nge meci pi ni. 20 Hetre neköi traon ka easeny qa celë matre tro na kötre kow, nue ni pi troa tro cili. Neköi traone ka co, nge tro hë ni a mel.” 21 Öni nyidrëti jë hi: “Ka loi, ke eni a hnimi eö, tha tro kö ni a lep apatrene la traon hnei eö hna qaja. 22 Lolo jë, canga kötre pi a tro cili, ke tha tro kö ni a kuca la ketre ewekë, e tha traqa pala kö eö e cili.” Celë hi matre hna hëne la traone ka hape, Zoara.*

23 Kolo petre hi a fetra la jö kowe la nöj, la Lota a traqa e Zoara. 24 Ame hnei Iehova hna kuca matre trotro pi la gaz me eë hui Sodroma me Gomora. Kolo hi lai a xulu qaathei Iehova e hnengödrai. 25 Nyidrëti a apatren asë jë la itre traone cili, eje hi, hna apatrene la gaa papa, me nöjei atrene la itre traon, me itre feja. 26 Nge hnene la föi Lota hna xötrethenge angeic me xei hutrö, ame hnene la ngönetrei eahlo hna nyi sootr*.

27 Nge hnei Aberahama hna canga ilë, me tro kowe lo götrane hnei angeic hna cile qëmeke i Iehova. 28 Nge ame hë la angeic a goeën e Sodroma me Gomora, memine la hnapapa, öhne ju hi angeic la kola so draië qa cili, tune la so ne eë ne la ketre hnasaihnyi! 29 Ame lo Akötresie a apatrene la itre traon ne la gaa papa, hnei nyidrëti hna meku Aberahama, matre hnei nyidrë hna tro sai Lota tröne la itre traon hnei nyidrë hna apatren, lo itre traon hna lapan hnei Lota.

30 E thupen, hnei Lota me lue nekö i angeice jajiny, hna tro qa Zoara troa lapa ngöne la itre wetr, ke xou i angeic troa lapa e Zoara. Angeic a lapa ju hnine la ketre ngönemenyi memine la lue nekö i angeic. 31 Ngöne la ketre drai, önine la ka tru kowe la ka co: “Qatre hë kaka, nge pëkö trahmany ngöne la nöj troa faipoipo me nyiso, tune la hna majemine kuca e cailo fen. 32 Jë fe, ma traimene jë nyiso la keme i nyiso hnei waina, matre tro nyiso a ce meköle memin, me nyi matra i nyiso qaathei nyidrë.”

33 Ngöne la jidri cili, hnei nyidro hna traimene la keme i nyidro, nge hnene la ka tru hna lö ju, me ce meköl memine la keme i angeic. Nge goi tha drenge fe Lota, thatre kö angeic la kola meköle me tro hnene la nekö i angeic. 34 Nge ngöne la drai thupen, önine la ka tru kowe la ka co: “Ase hë ni eidr ce meköl me kaka, jë fe ma traimei nyidrëti hmaca jë nyiso hnei waina, nge tro pena eö a ce meköl me nyidrë, me nyi matra i nyiso qaathei nyidrë.” 35 Ngöne la heji cili, hnei nyidroti hmaca hna traimene la keme i nyidro, nge hnene la ka co hna ce meköle me nyidrë. Nge loi tha drenge fe kö Lota, thatre kö angeic la kola meköle me tro hnene la nekö i angeic. 36 Nge hna upune la lue nekö i Lota hnei kem. 37 Hnene la ka tru hna hnaho trahmany, me ati ëjen, Moaba. Angeic la qaaqaa ne la angetre Moaba enehila. 38 Nge hnene la ka co hna hnaho trahmanyi fe, me ati ëjen, Benami. Angeice la qaaqaa i angetre Amona enehila.

20 Nge hnei Aberahama hna sa la itre itate i angeic, me acil ngöne la nöje Negeb, akawan e Kadesi me Sura. Ame la angeic a lapa* e Gerara, 2 öni angeice hmaca jë ka hape, ame Sara ke xa i angeic. Ame hnei Abimelek joxu ne Gerara, hna lö sai Sara kowe la hnalapa i nyidrë. 3 Nge ame ngöne la ketre jidr, hnei Akötresie hna ithanata* koi Abimelek jëne pu, me hape: “Tro hë eö a mec, pine eö xome la föe celë, ke ka faipoipo hë, nge ifekë föen.” 4 Ngo tha hnei Abimeleke kö hna ce meköl me Sara, matre öni Abimelek: “Iehova fe, tro kö nyipëti a apatrene la nöje ka pë ngazon?* 5 Tha angeice kö lo ka qaja koi ni ka hape, ‘Xange la’? Nge ame eahlo, tha eahlo kö lo ka qaja ka hape, ‘Xange la’? Hnenge hna kuca lai memine la hni ka wië, me ime ka pë engazon.” 6 Önine la nyipi Akötresie jëne pu: “Atre hi ni laka, ka nyipici la hni ö, celë hi matre tha hnenge kö hna nue eö troa ngazo koi ni, me ketri eahlo. 7 Ngo enehila, bëeke fë jë lai föe kowe la föi eahlo, ke perofeta angeic. Tro hë angeic a xëwe sai eö, nge tro hë eö a mel. Ngo maine tha bëeke sai eahlo kö hnei eö, lapa atre ju laka, tro eö a mec, eö me itre atre i eö asë.”

8 Nge e sine hmakany, hnei Abimelek hna canga ilë, me hën asë la itre hlue i nyidrë, me porotrikën asë koi angatr. Ame hnei angatr hna meci hnei xou. 9 Thupene lai, hnei nyidrëti hna hë Aberahama me hape: “Nemene la hnei eö hna kuca koi hun? Maine ju, zö i ’ö e tro ni memine la nöjeng a kuca la ngazo? Hnauën? Nemene la ngazo hnenge hna kuca koi eö? Tha ka loi kö la hnei eö hna kuca.” 10 Öni nyidrëti hmaca: “Ame la eö a kuca tun, ke nemene la mekuna i eö?” 11 Sa jë hi Aberahama ka hape: “Eni lo a mekune ka hape, ‘Tha ka xoue Akötresieti kö la nöje ce, nge tro hë angatre lai a humuthi ni pine la föeng. 12 Ngo nyipici hi, xange la, ke casi la keme nyio, ngo isa thine nyio kö. Nge hnenge hna xomi eahlo nyine föeng. 13 Matre ame la Akötresie a upi ni qa ngöne la hnalapa i kaka, öninge koi eahlo, ‘hane hi la aqane tro nyipoti a amamane la ihnimi nyipici nyipoti koi ni, ngöne la nöjei jë i nyiso, hape jë ka hape, ame ni ke xa i nyipo.’”

14 Nge hnei Abimelek hna xome la itre mamoe, me itre kau, me itre hlue trahmanyi me jajiny, nge nyidrëti a hamë Aberahama pi. Nge nyidrëti a bëeke sai Sara hmaca jë koi angeic. 15 Nge öni nyidrë: “Goeëne la nöjeng, iëne jë la hnei eö hna pi lapa ngön.” 16 Nge öni nyidrë koi Sara: “Hane hi la 1 000 lao piese sileva kowe la xa i nyipo, nge nyine hatrene lai kowe la itre ka ce me nyipo, me koi nöjei atr laka, pëkö ngazo hnei nyipoti hna kuca, nge ka meköti nyipo.” 17 Nge hnei Aberahama hna xëwe sai Abimeleke kowe la nyipi Akötresie, ame hnei Akötresie hna amanathithi Abimelek, me föi nyidrë, me itre hlue i nyidrë, nge angatr a isa hnaho pi. 18 Ke hnei Iehova hna thinge la itrengene hnaho ne la nöjei föe ne la hnalapa i Abimelek, pi Sara föi Aberahama.

21 Nge hnei Iehova hna meku Sara, thenge lo aqane qaja i nyidrë. Ame hnei Iehova hna eatrën lo hnei nyidrëti hna sisinyi koi eahlo. 2 Nge hmekune lo ijine hna sa hnei Akötresie, hnei Sara hna upune, me hnahone la nekönatre trahmanyi koi Aberahama, ngacama qatre hë angeic. 3 Aberahama a ati ëjene jë la nekönatr hnei Sara hna hnahon ka hape, Isaaka. 4 Nge angeic a xötrehatrenyi nyëne jë la nyën a 8 lao drai, tune lo hna amekötine hnei Akötresie. 5 Traqa koi 100 lao macatre i Aberahama, lo kola hnaho Isaaka. 6 Matre öni Sara: “Hnei Akötresie hna aijijë ni troa hnyima. Nge ame la nöjei atr ka troa drenge lai, tro angatr a ce hnyima me eni.”* 7 Nge öni eahlo hmaca: “Drei la ka atreine qaja koi Aberahama ka hape, ‘tro Sara a hane iji thi nekönatr’? Ngo ame pe, ngacama qatre hë nyidrë, ngo ase hë ni hnaho trahmanyi koi nyidrë.”

8 Tru hë la nekönatr, matre ase hë triji thi nyën. Nge ame la drai ne kola triji thi Isaaka, hnei Aberahama hna hnëkëne la ketre feet ka tru. 9 Ngo öhne kö Sara laka, kolo pala hi a hnyimasai Isaaka hnene la nekö i Hagara atre Aigupito, lo hna ce hnahon me Aberahama. 10 Matre öni eahlo koi Aberahama: “Helëne pi la hlue cili, memine la nekö i angeic, ke tha tro kö la nekön la hlue cili, a ce kepe edrö me Isaaka neköng!” 11 Ngo akötre catre koi Aberahama la hna qaja göne la nekö i angeic. 12 Ame hnei Akötresieti hna qaja koi Aberahama ka hape: “The wesitre kö pine la hna qaja hnei Sara, göne la nekönatr memine la hlue i eö. Drei eahlo ju, ke ame la hna troa hëne ka hape, matra i eö, tro ha xulu qaathei Isaaka. 13 Nge ame la neköne la hlue i eö, tro ni a kuca matre nöje jë fe angeic, ke nekö i eö fe lai.”

14 Aberahama a canga ilë jë, me xomi falawa, me trengene tim, me atë hune la iape i Hagara. Thupene lai, hnei angeic hna ce upi Hagara memine la nekö trahmany. Matre hnei Hagara hna tro, me kanothe la hnapapa ne Bere-seba. 15 Nge ame hë la kola pë aliene la trengene tim, hnei Hagara hna amë la nekönatr fene la ketre sinöe ka lapalapa. 16 Nge hnei angeic hna tro ananyine* la nekönatr me lapa cas, ke öni angeic: “Tha tro kö ni a goeën la neköng a mec.” Angeic a lapa ananyine pi la nekönatr, me treije latresi.

17 Ame hnei Akötresie hna drenge la aqane ewekë ne la nekönatr, nge hnene la angela i Akötresie hna hë Hagara qa hnengödrai, me hape: “Hagara, hnauën la eö a treij? The xou kö, ke drenge hë Akötresie la nine treijene la nekönatr qa ngöne la hne i nyën. 18 Cile jë, amejë nyëne jë, nge xatua nyëne jë troa tro. Ke tro ni a kuca matre nöje ka tru jë nyën.” 19 Thupene lai, Akötresie a fe pi la luemeke i Hagara, nge angeic a öhne ju la ketre hnë tha tim, matre angeic a nyialiene jë la trengene tim, me thue imene la nekönatr. 20 Ce Akötresie memine la nekönatr ngöne la nyën a tru trootro. Hnei Isamaela hna lapa hnapapa, nge ketre atre ka huji pehna angeic. 21 Hnei angeic hna lapa ngöne la hnapapa ne Parana, nge hnene la thine i angeic hna xomi föe ne Aigupito koi angeic.

22 Ngöne la ijine cili, hnei Abimelek me Fikolo, tane la trongene isi i nyidrë, hna qaja koi Aberahama ka hape: “Ce Akötresie me eö ngöne la nöjei huliwa i eö. 23 Enehila, sisinyi jë qëmeke i Akötresie laka, tha tro kö eö a iaö ni, me itre neköng, me itre matrang, ngo tro pala hi eö a amamane la ihnimi nyipici eö koi ni, memine la nöj hnei eö hna lapa ngön, thenge la ihnimi nyipicinge koi eö.” 24 Öni Aberahama jë hi: “Eni hi la a nyipici koi ’ö.”

25 Ngo hnei Aberahama hna eetr koi Abimelek, ke hnene la itre hlue i Abimelek hna thapa la hnë tha tim. 26 Öni Abimeleke jë hi ka hape: “Thatre kö ni la atre kuca lai, tha qaja pi kö eö koi ni, eni petre hi la a dreng.” 27 Nge hnei Aberahama hna xome la itre mamoe, me itre kau, me hamë Abimelek, nge nyidroti a isisinyikeu jë. 28 Ngo ame hë la Aberahama a amë acon la 7 lao neköi mamoe föe, 29 öni Abimelek jë hi: “Hnauëne la eö a amë acone la 7 lao neköi mamoe föe?” 30 Nge öni Aberahama: “Tro eö a kapa qaathenge la 7 lao neköi mamoe föe, nyine hatrene laka, eni hi la ka kuje la hnë tha timi celë.” 31 Celë hi matre hëne jë la götrane cili, Bere-seba,* ke hnei nyidroti hna isisinyikeu. 32 Nyidroti a isisinyikeu jë e Bere-seba. Nge hnei Abimelek me Fikolo, tane la trongene isi i nyidrë, hna bëeke hmaca kowe la nöje i angetre Filisiti. 33 Thupene lai, hnei Aberahama hna traane la ketre itamaris e Bere-seba, nge e cili, angeic a atrune* jë la ëje i Iehova, Akötresie ka epine palua. 34 Nge hnei Aberahama hna lapa* aqeany* ngöne la nöje i angetre Filisiti.

22 Thupene lai, hnene la nyipi Akötresie hna tupathi Aberahama. Öni nyidrë: “Aberahama!” Öni angeice jë hi: “Eni hi la!” 2 Öni Akötresie hmaca jë hi: “Eni a sipo eö, pane xome jë la nekö i eö, lo nekö hnimina i eö ka cas, ene Isaaka, nge tro jë kowe la nöje Moria. E cili, huujë nyëne jë nyine huuj ne dreuth asë,* hune la wetr lo hnenge hna troa amamane koi eö.”

3 Nge hnei Aberahama hna canga ilë, me ati biritine la boliko i angeic, me xome la lue hlue i angeic, me Isaaka nekö i angeic. Nge angeic a nyi sinöe jë nyine kuca la huuj ne dreuth asë, nge angeic a tro pi kowe la götrane hna upi angeic hnene la nyipi Akötresie. 4 Ngöne la hnaakönine drai, hnei Aberahama hna gala draië me goeën qa gaa nanyi la götrane cili. 5 Öni angeice jë hi kowe la lue hlue i angeic: “Lapa ju pë hë epon e celë memine la boliko, nge tro ni memine la neköng a tro koilo troa atrunyi Akötresie. Nge qanyi nyio hmaca ha.”

6 Aberahama a xome jë la uke sinöe nyine kuca la huuj ne dreuth asë, me atë hune la iape i Isaaka nekö i angeic. Thupene lai, hnei angeice hna xome la eë memine la hele, nge nyidroti a xötrëne hmaca jë la gojeny. 7 Isaaka a hnyingëne jë koi Aberahama keme i angeic, me hape: “Kaka!” Öni Aberahama: “Nemen neköng!” Öni Isaaka jë hi: “Hetre eë i nyiso, me sinöe, ngo ekaa pë hë la mamoe nyine huuj ne dreuth asë?” 8 Sa jë hi Aberahama ka hape: “Neköng, qanyi Akötresieti kö thue mamoe nyine huuj ne dreuth asë.” Nge nyidroti a tro hmaca pi.

9 Ame hë la nyidroti a traqa ngöne la götrane hna amaman hnene la nyipi Akötresie, hnei Aberahama hna acili ita ne huuj, me atë la hnënge sinöe, nge angeic a othe ju la lue im me lue ca i Isaaka nekö i angeic, me ameköle Isaaka hune la itre sinöe ne la ita ne huuj. 10 Thupene lai, hnei angeice hna xome la hele troa humuthe la nekö i angeic. 11 Ngo hnene la angela i Iehova hna hë angeic qa hnengödrai, me hape: “Aberahama, Aberahama!” Sa jë hi angeice ka hape: “Eni hi la!” 12 Matre önine hmaca jë la angela: “The akötrëne kö la nekö trahmany, the kuca kö la ketre ewekë koi angeic. Ke enehila, atre hë ni laka, ka xoue Akötresieti eö, ke tha hnei eö kö hna cipane la nekö i eö ka cas koi ni.” 13 Nge Aberahama a gala jë, me öhne e cili la ketre nani trahmany, kola jole la lue jian ngöne la isinöe ka lapalapa. Matre angeic a xome ju la nani, me huujën nyine hnane la nekö i angeic. 14 Aberahama a hëne jë la götrane cili, Iehova-irae.* Celë hi matre kolo pala hi a qaja ka hape, “Ngöne la wetre i nyidrë, qanyi Iehova kö hamën la ka ijij.”

15 Nge hna alua hë Aberahama qa hnengödrai hnene la angela i Iehova, 16 me hape: “Öni Iehova, ‘Eni a sisiny ngöne la ëjeng, pine laka, tha hnei eö kö hna cipane la nekö i eö koi ni, lo nekö i eö ka cas, 17 tro hë ni a amanathithi eö, nge tro hë ni a atiqane la itre matra i eö, tune la itre wëtresij e hnengödrai, me tune la itre wene ngöni ne ngönegejë. Tro la itre matra i eö a thapa la itre traon ne la itre ithupëjia me eö. 18 Nge jëne la itre matra i eö, tro ha manathithi la itre nöj e cailo fen, ke hnei eö hna drenge la trengewekëng.’”

19 Thupene lai, Aberahama a bëeke hmaca jë kowe la lue hlue i angeic, nge angatr a ce tro jë a tro Bere-seba. Aberahama a lapa hmaca ju e Bere-seba.

20 E thupen, hna thuemacanyi Aberahama ka hape: “Hnei Mileka hna hnaho nekö trahmanyi koi Nahora, trejine me eö, 21 Uza la ka tru, me Buza jini angeic, me Kemuela keme i Arama, 22 me Kesed, me Xazo, me Piledasa, me Idelafo, me Bethuela.” 23 Hnei Bethuela hna hnaho Rebeka. Hnei Mileka hna hnahone la 8 lao nekö i angeic koi Nahora, trejin me Aberahama. 24 Nge ame Reuma lo ketre föi angeic, hnei eahlo fe hna hane hnaho nekö trahmany: Teba, me Gaama, me Takasa, me Maaka.

23 Hnei Sara hna mel koi 127 lao macatre. Itre macatre ne mele eahlo lai. 2 Hnei eahlo hna meci e Kiriath-areba, ene Heberona e Kanana. Nge hnei Aberahama hna hnëmeci eahlo, me treije pi eahlo. 3 Thupene lai, hnei Aberahama hna tro qa ngöne la götran hna amë la wezipo, ene la föi angeic, me tro troa qaja kowe la itre nekö i Heth, ka hape: 4 “Eni la thei epun, nge trenyiwa ni e ce. Matre pane hamë ni pi la ketre hnepadro ngöne la götrane i epun, matre tro ni a keleme la föeng.” 5 Nge önine la itre nekö i Heth: 6 “Joxu, pane drei hun, nyipëti la ketre joxu* hna acil hnei Akötresie. Keleme ju la föi nyipë ngöne la ketre hua i eahun ka sisitria. Thatreine kö tro la ketre e eahun a cipane la hua i angeic koi nyipë, matre troa keleme la föi nyipë.”

7 Ame hnei Aberahama hna thili ju qëmekene la itre atrene la nöj, itre nekö i Heth. 8 Nge öni angeic: “Maine aja i epun tro ni a keleme la föeng, pane drei ni ju. Ithanata jë me Eferona nekö i Zohara, 9 matre tro angeic a salemëne koi ni la ngönemenyi i angeic e Makepela, ngöne la ifego ne la zi angeic. Tro angeic a salemëne koi ni qëmeke i epun, me athipe la thupene sileva ka pexej, matre hetre hnepadrong nyine keleme la föeng.”

10 Nge hnei Eferona atre Heth, lo ka musi kowe la itre nekö i Heth, hna sa koi Aberahama qëmeke i angatr, me qëmekene la itre ka lö qa ngöne la qëhnelö ne la traon, ka hape: 11 “Waea joxu, pane drei ni, eni a hamëne koi nyipë la hlapa memine la ngönemenyi, eni a hamëne koi nyipë qëmekene la itre nekö ne la nöjeng, keleme jë la föi nyipë.” 12 Matre Aberahama a thili ju qëmekene la itre atrene la nöj, 13 me hape koi Eferona qëmeke i angatr: “Pane drei ni, tro ni a hamëne koi eö la thupene ka pexej ne la hlapa. Kapa ju la manieng, matre keleme jë ni la föeng.”

14 Eferona a sa jë koi Aberahama ka hape: 15 “Joxung, pane drei ni. Ame la hlapa ke 400 lao sekele* sileva, ngo tha nyipiewekë kö troa nyithupen. Keleme pi pe la föi nyipë.” 16 Aberahama a kapa ju, me tuluthe koi Eferona la etrune sileva hnei angeic hna qaja qëmekene la itre nekö i Heth: 400 lao sekele* sileva thenge la tulu hna athip hnene la itre ka salem. 17 Qa ngöne lai, hna anyipicine laka, ame la hlapa i Eferona e Makepela, qëmeken e Mamere, hlapa me ngönemenyi, me nöjei isinöe ka cia ngöne la ifego ne lai hlapa, 18 hna itön asë hnei Aberahama qëmekene la itre nekö i Heth, me qëmekene la itre ka lö qa ngöne la qëhnelö ne la traon. 19 Thupene lai, Aberahama a kelemi Sara ju föi angeic, hnine la ngönemenyi ne la hlapa e Makepela, qëmeken e Mamere, ene Heberona e Kanana. 20 Hnene la itre nekö i Heth hna kapa, matre zi Aberahama pë hë lai hlapa, memine la ngönemenyi, göi troa keleme la föi angeic.

24 Qatre catre hë Aberahama, nge hnei Iehova hna amanathithi angeic ngöne la nöjei götran. 2 Öni Aberahama jë hi kowe la hlue i angeic, lo ka qatre catre ngöne la hnalapa i angeic, nge ka thupën asë la itre ewekë i angeic, ka hape: “Pane amë ju la ime i eö fene la itrepëng, 3 tro ni a upi eö troa sisiny ngöne la ëje i Iehova Akötresie ne hnengödrai me ihnadro laka, tha tro kö eö a xomi föe kowe la neköng thene la angetre Kanana, lo hnenge hna lapa then. 4 Ngo tro jë kowe la nöjeng, thene la faming, me xomi föi Isaaka neköng.”

5 Ngo önine la hlu ka hape: “Ngo maine xele kö la föe troa ce tro me eni? Tro kö ni a xome la nekö i nyipë kowe lo nöje i nyipë?” 6 Öni Aberahama ka hape: “The xome pi kö la neköng a tro cili. 7 Tro Iehova Akötresie ne hnengödrai, lo atre upi ni qa ngöne la hnalapa i kaka, me nöjene la faming, me atre ithanata koi ni, me sisinyi koi ni ka hape, ‘tro ni a hamëne la nöje ce kowe la itre matra i eö,’ tro kö nyidrëti a upe la angela i nyidrë qëmeke i eö, nge tro hë eö a xome qa lai, la ketre föe kowe la neköng. 8 Ngo maine xele kö la föe troa ce tro me eö, tha hna othi eö hmaca kö hnene la isisinyikeu. Ngo the tro kö eö a xome la neköng a tro cili.” 9 Ame hnene la hlu hna amë la ime i angeic fene la itrepë i Aberahama maseta i angeic, nge angeic a sisinyi jë troa trongëne la aja i Aberahama.

10 Angeic a xome jë la 10 lao kamela ne la maseta i angeic, me xome la nöjei ewekë ka lolo qaathene la maseta i angeic. Nge angeic a tro ju Mesopotamia, ngöne la traon e Nahora. 11 Nge ame hë la angeic a traqa ezine la hnë tha tim, tröne la traon, angeic a amekölene pi la itre kamela, nge kola ha hejihej, ijine kola traqa hnene la itre föe troa tha tim. 12 Nge öni angeic: “Iehova fe, Akötresi Aberahama lo masetang, pane kapa ju enehila la sipong, nge amamane jë la ihnimi nyipici i nyipë koi Aberahama masetang. 13 Eni ezine la qeqe ne tim, nge itre nekö jajiny ne la traon a traqa troa tha tim, 14 matre epi tro la nekö jajiny hnenge hna troa sipone ka hape, ‘pane aipiëne ju la trengene tim i’ö, matre tro ni a ij,’ nge tro angeic a sa ka hape, ‘iji jë, nge tro fe ni a thue imene la itre kamela i nyipë,’ epi angeice hi la föe hnei nyipëti hna iën koi Isaaka hlue i nyipë. Qa ngöne lai, tro ha mama cile koi ni laka, hnei nyipëti hna amamane la ihnimi nyipici nyipë kowe la masetang.”

15 Kolo pala kö a ithanata hnene la hlu, nge xulu pi hi Rebeka memine la trengene tim hune la iape i angeic. Rebeka la nekö i Bethuela, nekö i Mileka, föi Nahora trejin me Aberahama. 16 Mingöminge catre la nekö jajiny, nge tha ka iatre pala kö me trahmany, pë pala kö trahmanyi ka ce meköle memin. Matre angeic a uti pi kowe la qeqe ne tim, me nyialiene la trengen, me elë hmaca. 17 Ame hnene la hlu hna canga nyinyape koi angeic me hape: “Pane thue imenge qa ngöne la trengene tim i eö.” 18 Nge öni angeic: “Iji jë joxung.” Nge angeic a canga autinge pi la trengene tim qa ngöne la iape i angeic, me thue imene la hlu. 19 Thupene la hna thue ime angeic, öni Rebeka: “Tro fe ni a tha tim kowe la itre kamela i nyipë, uti hë ase angatre ij.” 20 Rebeka a canga nenge pi la tim kowe la trepene ime i öni, nge tha mano kö angeic nyinyape kowe la hnë tha tim, me jöe timi lapa kowe la itre kamela. 21 Ngöne la ijine cili, kolo pala hi a goeë Rebeka hnene lai hlu me hain, nge angeic a hnyinge ka hape, Iehova jë kö la ka eatrëne la tronge i angeic.

22 Matre ame hë la kola ase ij hnene la itre kamela, hnene lai trahmanyi hna hamë angeic la ketre otrene hnafiji gool, laka, ca sine sekel* la ehacen, me lue otrene ime gool, laka, 10 sekel la ehacen. 23 Thupene lai, önine lai atr ka hape: “Drei la keme i eö? Hetre göhnë kö ngöne la hnalapa ne la keme i eö, matre tro huni a meköl?” 24 Sa jë hi Rebeka ka hape: “Ame ni ke nekö i Bethuela, lo hnei Mileka hna hnahone koi Nahora.” 25 Nge öni Rebeka hmaca: “Ka tiqa hnei qitr me a i öni the hun. Nge hetre hnë meköle fe.” 26 Ame hnene lai trahmanyi hna thili ju, me sa iwatingöneca qëmeke i Iehova. 27 Nge öni angeic: “Epi atrunyi Iehova Akötresi Aberahama masetang, ke hnei nyidrëti hna loi hni,* me amamane la ihnimi nyipici i nyidrë kowe la masetang. Hnei Iehova hna tro sai ni kowe la hnalapa ne la itre trejin ne la masetang.”

28 Nge hnene la nekö jajiny hna canga nyinyape kowe la thine i angeic, me tro fë la maca. 29 Hetre xa i Rebeka, Labana la ëjen. Ame hnei Labana hna canga nyinyap troa ixelë memine la trahmanyi ka cil ngöne la qeqe ne tim, tröne la traon. 30 Ame la angeic a öhne la otrene hnafij, me otrene im ngöne la ime ne la xa i angeic, me dreng la hna qaja hnene la trahmanyi koi Rebeka, angeic a tro ju troa wange lai trahmany ezine la qeqe ne tim, memine la itre kamela. 31 Nge canga öni angeice jë: “Trohemi atre hna amanathithin hnei Iehova. Hnauëne laka, eö a lapa e ce? Ase hë ni hnëkëne la uma, me hnëkë göhnene la itre kamela.” 32 Ame hnene lai trahmanyi hna lö hnine la uma, nge hnei angeic* hna una la ehnefene la itre kamela, me hamë qitr me itre xa a i öni. Nge hna hamë timi fe nyine wasine la lue ca ne lai trahmany, me itre sinatronge i angeic. 33 Ngo ame ju hi la kola troa eli a i angeic, önine lai trahmany: “Xeni jë kö ni e ase hë ni qaja la aliene la trongeng.” Matre öni Labana jë hi: “Ka loi, qaja jë.”

34 Önine la trahmany: “Eni la hlue i Aberahama. 35 Hnei Iehova hna amanathithine hnyawa la masetang. Hnei nyidrëti hna atrenamone la masetang, me hamëne la itre mamoe, me kau, me sileva me gool, me itre hlu, trahmanyi me föe, me itre kamela, me boliko. 36 Ketre, hnei Sara föe ne la masetang, hna hnaho trahmany kowe la masetang, ngacama qatre föe hë eahlo. Nge tro la masetang a hamëne kowe la nekö i nyidrë, la nöjei ewekë i nyidrë. 37 Hnene la masetang hna upi ni troa sisinyi ka hape, ‘tha tro kö eö a xome kowe la neköng, la ketre föe ne Kanana, nöj hnenge hna lapa ngön. 38 Tro eö a tro kowe la uma i kaka, thene la faming, me xomi föe kowe la neköng.’ 39 Ngo öninge kowe la masetang, ‘Ngo maine xele kö la föe troa ce tro me eni?’ 40 Hnei nyidrëti hna sa ka hape, ‘Ame Iehova lo hnenge hna tro qëmeken, tro nyidrëti a upe la angela i nyidrë me eö, nge tro hë nyidrëti a eatrëne la tronge i eö, nge tro hë eö a xome kowe la neköng la ketre atrene la faming, qa ngöne la hnalapa i kaka. 41 Tha hna othi eö hmaca kö hnene la isisinyikeu, e tro eö a tro kowe la faming, nge maine xele kö angatr troa hamë eö la jajiny. Mele hë eö qa ngöne la hnei eö hna sisiny.’

42 “Matre ame la eni a traqa la drai ce ngöne la qeqe ne tim, öning, ‘Iehova fe Akötresi Aberahama masetang, maine aja i nyipë troa eatrëne la trongeng, 43 hane hi la ka troa traqa: eni ezine la qeqe ne tim, nge tro ni a sipon kowe la ketre jajiny ka traqa troa tha tim ka hape, ‘pane ithue imenge jë qa ngöne la trengene tim i eö,’ 44 nge tro angeic a sa koi ni ka hape, ‘iji jë, nge tro fe ni a tha tim kowe la itre kamela i nyipë.’ Epi tro Iehova a iëne la jajinyi cili kowe la nekö ne la masetang.”

45 “Nge tha ase pala kö ni ithanata e kuhu hning, nge xulu pi hi Rebeka, angeic a ajö trengene tim. Angeic a uti kowe la qeqe ne tim troa tha tim. Matre öning, ‘Pane ithue imeng.’ 46 Angeic a canga autinge pi la trengene tim qa ngöne la iape i angeic, nge öni angeic, ‘iji jë, nge tro fe ni a ithue imene la itre kamela i nyipë.’ Eni a iji ju nge angeic a ithue imene jë la itre kamela. 47 Thupene lai öning, ‘Neköi drei eö?’ Öni angeic, ‘Eni la nekö i Bethuela, lo hnei Mileka hna hnahone koi Nahora.’ Matre eni a athipe ju la otren ngöne la hnafiji angeic, me otrene ime kowe la lue ime i angeic. 48 Nge eni a thili ju me sa iwatingöneca qëmeke i Iehova, nge eni a atrunyi Iehova jë Akötresi Aberahama masetang, ke hnei nyidrë hna xometrongë ni ngöne la nyipi gojeny, matre xome kowe la neköne la masetang, la neköne la trejin me nyidrë. 49 Ngo enehila, pane qaja jë koi ni maine aja i epuni troa loi hni me nyipici kowe la masetang. Ngo e jole kö, qaja jë, matre atre jë ni la nyine tro ni a kuca.”

50 Öni Labana jë hi me Bethuela: “Pine laka, qaathei Iehova hi lai, thatreine kö huni troa qaja ka hape, öö maine waea.* 51 Hana lae Rebeka, xomi angeice jë, nge tro jë hë. Matre tro angeic a föene la nekö ne la maseta i eö, tune lo hna qaja hnei Iehova.” 52 Ame ju hi la kola drenge lai hnene la hlue i Aberahama, angeic a canga thili ju me sa iwatingöneca qëmeke i Iehova. 53 Nge hnene la hlu hna jelë la itre ewekë sileva me gool, me itre iheetr me hamë Rebeka, me hamë itre ewekë ka tru thupene kowe la xa i Rebeka, me thine i angeic. 54 Thupene lai, hnene la hlu me itre sinatronge i angeic hna xeni me ij, me meköl e cili.

Nge ame e hmakany la angeic a hlë, önine lai hlu: “Upi ni jë hë kowe la masetang.” 55 Matre önine la xa i Rebeka me thine angeic ka hape: “Tro la nekö jajiny a lapa the huni koi 10 lao drai, thupene lai, tro hë angeic a tro.” 56 Ngo sa jë hi lai hlu ka hape: “The cipa ni kö, ke ase hë Iehova eatrëne la trongeng. Upi ni jë hë, matre bëeke jë ni kowe la masetang.” 57 Matre öni angatre jë hi: “Hëne jë la nekö jajiny, matre atre jë së la mekuna i angeic.” 58 Angatr a hë Rebeka ju me hape: “Aja i eö kö troa ce tro me nyidrëti la?” Sa jë hi angeice ka hape: “Öö, eni a kapa.”

59 Ame hnei angatr hna iahni me Rebeka xa i angatr, memine la föe ka thupë Rebeka, memine la hlue i Aberahama, me itre sinatronge i angeic. 60 Nge angatr a amanathithi Rebeka ju me hape: “Ame eö Rebeka, epi tro eö a tune la itre milio, nge epi tro la itre matra i eö a thapa la itre traon ne la itre ithupëjia me angatr.” 61 Thupene lai, hnei Rebeka me itre hlue i angeic hna të hune la itre kamela, me xötrethenge lai atr. Matre hnene la hlue i Aberahama hna xomi Rebeka me tro.

62 Bëeke hë Isaaka qa ngöne la itre hnepadro e Bere-lahai-roi. Angeic a lapa ngöne la nöje Negeb. 63 Matre ngöne la ketre hnaipajö hej, Isaaka a tro ju ngöne la itre hnehlapa me meku ewekë. Nge ame hë la angeic a gala, öhne ju hi angeice la kola fetra la itre kamela! 64 Nge ame hë la Rebeka a gala, öhnyi Isaaka ju hi angeic, ame hnei angeice hna canga uti pi qa hune la kamela. 65 Matre öni angeic kowe lai hlu: “Drei la trahmanyi ka tro ngöne la itre hlapa nge ka traqa troa ixelë me easë?” Sa jë hi lai hlu ka hape: “Masetange hi lai.” Ame hnei Rebeka hna xome la isol i angeic, me atuthe la he i angeic. 66 Nge hnene la hlue hna qejepengöne koi Isaaka la nöjei ewekë hnei angeic hna kuca. 67 Thupene lai, Isaaka a alö Rebeka jë hnine la itate i Sara thine angeic. Aqane faipoipo i angeice hi lai me Rebeka. Nge Isaaka a hnimi Rebeka ju, matre tha treije pine hë Isaaka la thine i angeic.

25 Nge hnei Aberahama hna xome hmaca la ketre föe, Ketura la ëjen. 2 Hane hi la itre nekönatr hnei eahlo hna hnahon me Aberahama: Zimeran, me Iokesana, me Medana, me Midiana, me lsebak, me Sua.

3 Iokesana a hnaho Sheba jë, me Dedana.

Hane hi la itre nekö i Dedana: Asurim, me Letusim, me Leumim.

4 Hane hi la itre nekö i Midiana: Efa, me Efera, me Enoka, me Abida, me Eledaa.

Itre matra i Ketura asë hi lai.

5 E thupen, hnei Aberahama hna hamë Isaaka la nöjei ewekë i angeic. 6 Ngo ame kowe la itre nekö ne la itre xa föi angeic, hnei angeice hna hamë ahnahna. Nge ame lo mele pala kö angeic, hnei Aberahama hna upi angatre kowe la nöje koië, matre tro angatr a lapa ananyi Isaaka nekö i angeic. 7 Hnei Aberahama hna mele koi 175 lao macatre. 8 Hnei angeic hna mec nge qatre catre hë angeic, nge pexeje hë la itre drai ne mele angeic. Ame hna acasi* angeic memine la nöje i angeic. 9 Nge hnei Isaaka me Isamaela hna kelemi Aberahama hnine la ngönemenyi e Makepela, ngöne la hlapa i Eferona, nekö i Zohara atre Heth, lo hlapa qëmeken e Mamere, 10 lo hnei Aberahama hna itön qaathene la itre nekö i Heth. Hna ce kelemi Aberahama e cili me Sara föi angeic. 11 Thupene la hna mec hnei Aberahama, hnei Akötresieti pala hi hna amanathithi Isaaka nekö i angeic, lo ka lapa ezine Bere-lahai-roi.

12 Hane hi la mele i Isamaela nekö i Aberahama, lo hna hnahon hnei Hagara qa Aigupito, hlue i Sara.

13 Hane hi la itre ëjene la itre nekö i Isamaela, itre matra i angeic: Nebaioth la ka tru, me Kedara, me Adebeela, me Mibesam, 14 me Misema, me Duma, me Masa, 15 me Hadara, me Tema, me Ietura, me Nafiso, me Kedema. 16 Itre nekö i Isamaela hi lai, nge itre ëje i angatre lai, thenge la itre götran [maine “hunahmi”] i angatr, nge thenge la itre itate i angatr, 12 lao tan thenge la itre lapa i angatr. 17 Traqa koi 137 lao macatre ne mele i Isamaela, nge meci pi hi angeic. Ame hna acasi* angeic memine la nöje i angeic. 18 Angatr a acili itat qaane Havila uti hë Sura, ezine Aigupito, uti hë Asuria. Angatr a lapa ju ezine la itre trejin* me angatr.

19 Hane hi la mele i Isaaka nekö i Aberahama.

Aberahama la keme i Isaaka. 20 Traqa koi 40 lao macatre i Isaaka lo angeic a faipoipo me Rebeka, nekö i Bethuela atre Arama e Padanarama, nge xa i Labana atre Arama. 21 Isaaka a xëwe sai Rebeka jë föi angeice koi Iehova, ke tha ka hnaho kö Rebeka. Nge hnei Iehova hna drenge la itre sipo i angeic, ame hna upune hnei Rebeka. 22 Nge drenge hi Rebeka laka, kola isi e kuhu hni la lue nekö i eahlo, öni eahlo jë hi: “E kola tune la, nyine ue la tro na mel?” Eahlo a hnyinge jë koi Iehova. 23 Matre öni Iehova: “Lue baselaia e kuhu hni eö, nge troa isa ije la lue nöj ka xulu qaathei eö. Tro la ketre nöj a catr hune la ketre nöj, nge tro la ka tru a hlue ne la ka co.”

24 Nge ame hë la kola traqa la ijine tro eahlo a hnaho, lue fini e kuhu hni eahlo. 25 Ame la hna pane hnahon, ka oma asë, nge kösë nyën a heetrë ipene öni, matre hna hë nyën, Esau.* 26 Thupei nyën, fetra pi hi la jini nyën, nge kola ea la tidöca i Esau. Matre hna hë nyën, Iakobo.* Traqa koi 60 lao macatre i Isaaka la Rebeka a hnaho nyidro.

27 Nyidroti a tru trootro, nge ame Esau, ketre atre ka atreine weje öni, nge ketre atrene hnitr angeic. Nge ame Iakobo, ka lapa pe hi fene itat, nge ka pë engazon*. 28 Nge ame Esau hna hnime catrën hnei Isaaka, ke ka traqa fë mitr koi Isaaka, ngo ame Rebeka, ka hnime catrë Iakobo. 29 Ngöne la ketre drai, Iakobo a öle laati, nge traqa pi hi Esau qa hna weje öni e helep, nge kucakuca catr angeic. 30 Ame hnei Esau hna qaja koi Iakobo ka hape: “Eni a sipo eö, pane canga ithuange jë la trepe xen ka madra zane i eö, ke kucakuca* catre ni.” Celë hi matre ati ëje i angeice jë ka hape, Edoma.* 31 Ngo öni Iakobo: “Pane salemëne pi koi ni la edrö ne ka tru i eö.” 32 Sa jë hi Esau ka hape: “Ka tro hë ni la a mec. Nyine uëne la edrö ne ka tru?” 33 Ngo öni Iakobo: “Pane sisinyi jë koi ni.” Matre angeic a sisinyi jë, nge angeic a salemëne pi koi Iakobo la edrö ne ka tru i angeic. 34 Ame hnei Iakobo hna hamë falawa me laati koi Esau, nge angeic a xeni jë me ij, nge angeic a tro hmaca pi. Celë hi aqane wangacon Esau la edrö ne ka tru i angeic.

26 Ame hna traqa pi la ketre jiin ngöne la nöj. Hnaaluene hë lai thupene lo ka traqa ngöne la ijine i Aberahama. Matre hnei Isaaka hna tro Gerara, thei Abimelek joxu i angetre Filisiti. 2 Ame hnei Iehova hna mama koi Isaaka me hape: “The uti kö a tro Aigupito, ngo lapa ju kö ngöne la nöj hnenge hna amamai eö. 3 Lapa trenyiwa ju ngöne la nöje ce. Nge tro ni a ce me eö me amanathithi eö, ke tro kö ni a hamë eö la nöjei nöje celë, koi eö me itre matra i eö. Tro ni a metrötrëne la hnenge hna sisinyi koi Aberahama keme i eö ka hape: 4 ‘Tro hë ni a atiqane la itre matra i eö, tune la itre wëtresij e hnengödrai, nge tro ni a hamëne la itre nöje ce kowe la itre matra i eö. Nge jëne la itre matra i eö, tro ha manathithe la nöjei nöj e cailo fen,’ 5 ke hnei Aberahama hna drenge la trengewekëng, me catre kuca la ajang, me trongëne la itre hnenge hna amekötin, me nöjei wathebong asë.” 6 Matre Isaaka a lapa ju e Gerara.

7 Ame la itre trahmanyi ne la nöj a hnyingë pengöi föi angeic, öni Isaaka jë hi, “xange lai.” Xou i angeic troa qaja ka hape, föi angeic, ke ka mingöminge catre Rebeka, nge öni angeic: “Tro la itre trahmanyi ne la nöj a humuthi ni pi eahlo.” 8 Ngo ame la ketre drai, lo Abimelek a tu qa ngöne mamala, hnei Abimelek joxu i angetre Filisiti, hna öhnyi Isaaka e haluthi Rebeka föi angeic. 9 Ame hnei nyidrëti hna canga hë Isaaka me hape: “Föi eö hi, hnauëne laka, eö a qaja ka hape, trejin me eö?” Matre öni Isaaka: “Kolo ke xoung e troa humuthi ni pi eahlo.” 10 Abimelek a qaja hmaca jë ka hape: “Nemene la hnei eö hna kuca koi hun? Maine ce meköle ju hnene la ketre atrene la nöj me angeic, tro hë eö a nyi zö hun!” 11 Matre Abimelek a thuemacane jë la nöj me hape: “Ame la atre ketr la trahmanyi celë memine la föi angeic, tre tro ha humuth!”

12 Isaaka a nyiqaane tra feja jë ngöne la nöj, nge ngöne la macatre cili, hnei angeice hna menuën la 100 hmaca kö* qa ngöne la hnei angeic hna tran, ke Iehova a amanathithi angeic. 13 Qa ngöne lai, trenamo hë Isaaka, nge angeice pala hi a kepe mo atruny, uti hë la trenamo catre hë angeic. 14 Hetre itro mamoe, me itro kau i angeic, me nyimu hlu, matre hnene la angetre Filisiti hna nyiqaane piine la itre ewekë i angeic.

15 Ame hnei angatr hna kelem hnei dro la nöjei hnë tha tim hna kuj hnei Aberahama keme i angeic. 16 Matre öni Abimeleke jë hi koi Isaaka: “Tro pi hë eö qaathe hun, ke ketre atr ka tru catre hë eö hui hun.” 17 Isaaka a tro pi, me acile la itre itat i angeic ngöne la hnathup ne Gerara. Angeic a lapa ju e cili. 18 Nge hnei Isaaka hna kuje hmaca la itre tim, hna kuj ngöne lo ijine i Aberahama keme i angeic, lo hna kelem hnei angetre Filisiti thupene la mec i Aberahama. Nge angeic a ati ëjene ju, thenge la itre ëje hna hamën hnene la keme i angeic.

19 Ame la angatr a sine la dro, hnene la itre hlue i Isaaka hna öhne la ketre qeqe ne tim. 20 Ngo hnene la itre ka thupë öni qa Gerara hna iwesitrë me itre ka thupë öni i Isaaka, öni angatr: “Timi huni lai.” Matre angatr a hëne jë la hnë tha tim, Esek,* ke hnei angatr hna iwesitrë me angeic. 21 Ame hnei angatr hna sine la ketre tim, nge hna iwesitrë hmaca. Matre hna hëne lai hnë tha tim, Sitena.* 22 E thupen, hnei angeic hna tro me kuje la ketre tim, nge pëhë iwesitrë. Matre hna hëne lai tim, Rehoboth,* me hape: “Kolo ke ase hë Iehova hamë götrane ka tru koi së, nge hnei nyidrëti hna kuca matre, ala nyimu pi së ngöne la nöj.”

23 Nge angeic a elë jë qa lai a tro Bere-seba. 24 Ngöne la jidri cili, Iehova a mama pi koi angeic me hape: “The xou kö, eni la Akötresi Aberahama keme i eö, nge ce eni me eö. Tro ni a amanathithi eö, me atiqane la itre matra i eö, pi Aberahama hlueng.” 25 Ngöne la götrane cili, Isaaka a acile ju la ketre ita ne huuj, me atrune* la ëje i Iehova. Angeic a acile ju la itate i angeic, nge itre hlue i angeic a kuje la ketre tim.

26 E thupen, hnei Abimelek hna traqa qa Gerara troa wai angeic, ce nyidrë me Ahuzatha atre eamo nyidrë, me Fikolo tane sooce i nyidrë. 27 Isaaka a qaja jë koi angatre ka hape: “Epuni a traqa troa wai ni fë nemen, nge epuni pe a methinë ni, me helë ni qaathei epun?” 28 Öni angatr: “Mama hnyawa ha koi eahuni laka, ce Iehova me eö, matre hne huni hna mekune troa qaja koi eö ka hape, ‘loi e tro sa isisinyikeu, matre troa hetre tingeting nyipi së. Loi e tro sa ce sisinyi ka hape: 29 tha tro kö eö a angazo hun, ke tha hne huni kö hna ngazo koi eö. Hne huni hna kuca la loi koi eö, la eahuni a upi eö fë la tingeting. Atre hi eahuni laka, eö la hnei Iehova hna amanathithin.’” 30 Ame hnei angeic hna hnëkë xeni atrunyi koi angatr, nge angatr a xeni jë me ij. 31 Ngöne la drai thupen e hmahmakany, hnei angatr hna canga ilë, me isisinyikeu. Thupene lai, hnei Isaaka hna nue angatre pi troa tro, nge hnei angatre hna ce tro memine la tingeting.

32 Ngöne la drai cili, hnene la itre hlue i Isaaka hna traqa troa thuemacanyi angeic, göne la tim hnei angatr hna sin, ka hape: “Öhne hë huni la tim!” 33 Matre angeic a hëne jë la time celë, Seba. Celë hi matre uti hë enehila, hna hëne la traone ka hape, Bere-seba.

34 Matre ame hë la Esau a 40 lao macatre, hnei angeic hna faipoipo me Iuditha nekö i Beeri atre Heth, me Basemathi nekö i Elona atre Heth. 35 Nge tru catr la hna ahleuhleunyi* Isaaka me Rebeka hnene la lue tresi nyidro.

27 Ngöne la ketre drai, lo qatre hë Isaaka nge ti hë la luemeke i angeic, Isaaka a hë Esau jë, lo pane nekö i angeic me hape: “Neköng!” Nge öni Esau: “Eni hi la.” 2 Öni Isaaka hmaca jë: “Qatre hë ni la, nge thatre kö ni la ijine tro ni a mec. 3 Matre pane ajöne jë la nyine weje öni eö, me uke pehna i eö, me pehna, nge tro jë helep troa thele öning. 4 Nge hnëkëne hnyawa jë lo xen hnenge hna ajan, nge traqa fë jë koi ni, matre tro ni a xen, me amanathithi eö qëmekene tro na mec.”

5 Ame la Isaaka a ithanata me Esau, drenge hi Rebeka. Thupene lai, hnei Esau hna tro helep troa weje öni, matre traqa fë öni. 6 Rebeka a qaja jë koi Iakobo nekö i eahlo ka hape: “Drenge hë ni la keme i eö e qaja koi Esau ka hape, 7 ‘traqa fë mitre pi koi ni, nge hnëkëne jë koi ni la ketre xeni ka lolo, matre tro ni a xen, me amanathithi eö qëmeke i Iehova, e tha meci pala kö ni.’ 8 Ngo enehila neköng, pane drei ni hnyawa ju, nge kuca jë la hnenge hna qaja. 9 Tro jë kowe la hna axö öni, nge traqa fë pi koi ni la lue neköi nani ka lolo, matre tro ni a kuca la xeni koi kaka, lo hnei nyidrë hna ajan. 10 Nge tro hë eö a tro fë koi kaka, matre tro nyidrëti a öni, me amanathithi eö qëmekene tro nyidrëti a mec.”

11 Öni Iakobo jë hi koi Rebeka thine i angeic: “Ka cia pene lo mamang, nge ame ni pëkö. 12 Nge e traqa ju kaka ketri ni, tro hë nyidrëti a mekune laka, eni a qehnamo nyidrë, nge tha tro kö nyidrëti lai a amanathithi ni, ngo tro pe nyidrëti a eji ni.” 13 Ngo önine la thine i angeic: “Epi eatre koi ni la ieji cili neköng, ngo kuca ju pe la hnenge hna qaja. Tro ja xome la lue neköi nani.” 14 Matre angeic a tro ju troa xom, me traqa fë koi thin. Ame hnei eahlo hna hnëkëne la xen, lo hna ajan hnene la keme i angeic. 15 Nge eahlo a xome jë qa ngöne la uma la itre iheetre ka mingöming i Esau, lo pane nekö i eahlo, me heetrë Iakobo, lo nekö i eahlo ka co. 16 Eahlo a heetrëne ju fe hnei ikupein neköi nani la lue ime i Iakobo, me nyinawa i angeic ka pë pen. 17 Nge eahlo a hamë Iakobo jë la xeni ka lolo, memine la falawa hnei eahlo hna san.

18 Iakobo a lö jë kowe la keme i angeic me hape: “Kaka!” Öni Isaaka: “Öö neköng, drei hmunë?” 19 Öni Iakobo ka hape: “Eni Esau, pane nekö i nyipë. Ase hë ni kuca la hnei nyipëti hna qaja. Matre pane lapa jë nge öni jë la mitr hnenge hna traqa fë, nge amanathithi ni jë.” 20 Ngo öni Isaaka ka hape: “Neköng, hnei eö hna tune kaa matre canga saqe hi eö hetre tha?” Sa jë hi angeic ka hape: “Iehova Akötresi nyipë la ka engën koi ni.” 21 Ame hnei Isaaka hna qaja koi Iakobo ka hape: “Alemi jë neköng, matre tro ni a ketri eö, nge tro hë ni a atre ka hape, Esau kö eö maine drei.” 22 Iakobo a alemi jë koi Isaaka keme i angeic. Nge thupene la Isaaka a ketri angeic, öni Isaaka: “Aqane ithanata i Iakobo, ngo ime i Esau pe.” 23 Tha wangatrehmekunyi Iakobo kö hnene la keme i angeic, ke ka cia pene la lue ime i angeic tui Esau. Matre Isaaka a amanathithi angeice jë.

24 Nge öni Isaaka: “Esau neköng, eö hi la?” Nge öni Iakobo: “Öö eni hi.” 25 Matre öni Isaaka: “Neköng, pane thue öninge jë mitr, nge thupene lai, tro ni a amanathithi eö.” Iakobo a hamëne pi la mitr me waina koi kem, matre Isaaka a öni jë me ij. 26 Nge öni Isaaka jë hi: “Alemi jë neköng, nge pane dremi ni ju.” 27 Angeic a alemi jë me dremi Isaaka, nge drenge hi Isaaka la punepunene la iheetre i angeic. Matre Isaaka a amanathithi angeice jë me hape:

“Ceitune la punepunene la neköng, memine la punepunene la hnitr hnei Iehova hna amanathithin. 28 Epi tro la nyipi Akötresie a hamë eö la wene lepany ne hnengödrai, me itre gaa hmelek ne la ihnadro, me itre wene feja ka nyimutre, nge troa tru hnei waina ka hnyipixe. 29 Epi tro la itre nöj a huliwa koi eö, nge epi tro la itre nöj a thili qëmeke i eö. Musinëne jë la itre trejin me eö, nge epi tro la itre neköne la thine i eö a thili koi eö, nge epi tro ha hnëjine la itre ka eji eö, nge epi tro la itre ka amanathithi eö a manathith.”

30 Thupene la Isaaka a ase amanathithi Iakobo, nge kolo petre hi a trotriji Isaaka hnei Iakobo, xulu pi hi Esau qa hna weje öni. 31 Angeic a hnëkëne ju fe la ketre xeni ka lolo, me tro fë koi kem, me hape: “Lapa jë kaka, nge pane öni jë la mitreng, matre tro nyipëti a amanathithi ni.” 32 Öni Isaaka jë hi: “Drei eö?” Nge öni angeic: “Eni Esau nekö i nyipë, lo pane nekö i nyipë.” 33 Ame hnei Isaaka hna hmengöhmengöne catr, me hape: “Nga drei kö lo ka weje öni koi ni, me traqa fë mitr? Ase hë ni xen qëmekene tro eö a traqa, nge ase fe hë ni amanathithi angeic, matre manathithi hë angeic.”

34 Ame hë la Esau a ase drenge la hna qaja hnei kem, angeic a sue catre jë me treije latresi, me hape: “Amanathithi ni ju fe kaka!” 35 Ngo sa jë hi Isaaka ka hape: “Ase hë iaö ni hnene la jini eö, matre tro angeic a kapa la manathith hna hnëkëne koi eö.” 36 Nge öni Esau jë hi: “Tha kolo kö a hëne menu angeic ka hape, Iakobo*. Alua thipatrë ni hë hnei angeic. Ase hë angeice thapa la edröng ne ka tru, nge enehila, angeic a thapa la manathithing!” Nge öni angeice hmaca: “Hetre ketre manathith pala kö nyine tro nyipëti a hamë ni?” 37 Ngo sa jë hi Isaaka ka hape: “Ase hë ni acili angeic troa musi koi eö, me hamëne la itre trejin me angeic troa hlue i angeic, me hamë wene feja, me waina ka hnyipixe. Matre, nemene hmaca pe kö la nyine tro na hamë eö neköng?”

38 Nge öni Esau: “A casi hi la manathithi nyipë kaka? Nga amanathithi ni ju fe kaka?” Nge angeic a treije catre jë. 39 Öni Isaaka jë hi:

“Tro eö a lapa ananyine la itre gaa hmelek ne la ihnadro, me wene lepanyi ka uti qa hnengödrai. 40 Tro eö a mel hnene la taua i eö, nge tro eö a hlue ne la jini eö. Nge e thele hë eö troa isi memin, tro hë eö a hutra la ehnef hnei angeic hna atë hune la nyinawa i eö.”

41 Ngo Esau pala kö a lapa fë trengehni, pine laka, hnei kem hna amanathithi Iakobo. Nge Esau a mekune ka hape: “Easenyi hë tro kaka a mec, nge easenyi hë la ijine troa hnëmeci nyidrë, nge thupene lai, tro ni a humuthi Iakobo jining.” 42 Ngo ame hë la kola qajaqaja koi Rebeka la itre trengewekë i Esau, lo pane nekö i eahlo, hnei eahlo hna canga iupe troa hë Iakobo, nekö i eahlo ka co. Öni eahlo: “Pane dreng, Esau mama i eö a thele troa humuthi eö, matre troa të koi eö* lo ewekë hnei eö hna kuca. 43 Kuca ju la hnenge hna qaja koi eö neköng, kötre pi a tro Karan thei Labana xa i nenë. 44 Pane lapa ju thei nyidrë, uti hë la troa lapa kötre la elëhni ne la mama i eö, 45 nge uti hë patre hnyawa la elëhni angeice koi eö, nge thëthëhmine hë angeic la hnei eö hna kuca. Nge e cili, tro hë ni a upi ketre troa thei eö. Hnauëne la tro epon a ce patr qaatheng ngöne la drai ka cas?”

46 Thupene lai, tha mano kö Rebeka qaja koi Isaaka ka hape: “Pine la lue nekö i Heth, thatreine hë ni xomihnine la mele ce! E traqa ju fe Iakobo xome la ketre föe ne Heth, tune la itre jajinyi ne la nöj, nga nyine ue hmaca kö la tro na mel?”

28 Ame hnei Isaaka hna hë Iakobo me amanathithi angeic, me amekötine koi angeice ka hape: “The tro kö eö a xomi föe qaathene la angetre Kanana. 2 Tro jë Padanarama thei Bethuela keme ne la thine i eö, nge xome jë la ketre föe qaathene la itre nekö i Labana, mathine i eö. 3 Nge tro la Akötresie ka Tru Trenge Men a amanathithi eö, me atiqane la itre nekö i eö me itre matra i eö, matre tro eö a nöj ka nyimutre. 4 Tro nyidrëti a hamëne koi eö, me itre matra i eö, la manathith hna hamën koi Aberahama, matre tro eö a thapa la nöj hnei eö hna lapa trenyiwa ngön, lo hnei Akötresie hna hamë Aberahama.”

5 Ame hnei Isaaka hna upi Iakobo troa tro Padanarama, thene la nekö i Bethuela qa Arama, ene Labana, xa i Rebeka thine i Iakobo me Esau.

6 Nge öhne hi Esau laka, hnei Isaaka hna amanathithi Iakobo, me upi angeic a tro Padanarama troa xomi föe e cili. Nge hnei Isaaka hna upi Iakobo me wathebo angeic troa xomi föe thene la itre nekö jajiny ne Kanana. 7 Nge öhne hë Esau laka, hnei Iakobo hna drenge la keme me thine i angeic, me tro Padanarama. 8 Matre trotrohnine hë Esau laka, xele catre Isaaka keme i angeic, ma wange la itre föe ne Kanana. 9 Esau a tro ju koi Isamaela, lo nekö i Aberahama, me xomi ketre föe, Maalatha nekö i Isamaela, xa i Nebaioth.

10 Mejë hë Iakobo qa Bere-seba a tro Karan. 11 Matre angeic a traqa ju ngöne la ketre götran, nge angeic a hnëkë jë troa meköl e cili, ke lö hë la jö. Angeic a xome ju la ketre ietë nyine tane he, me meköl e cili. 12 Nge hnei angeic hna puje la ketre ija ka tro qa la fen, me elë a tro hnengödrai. Itre angela i Akötresie a elë me ut hune lai ija. 13 Nge Iehova e koho hun, öni nyidrë koi Iakobo:

“Eni Iehova Akötresi Aberahama qaaqaa i eö, me Akötresi Isaaka. Tro ni a hamë eö me itre matra i eö la götran hnei eö hna meköle ngön. 14 Nge tro la itre matra i eö a ala nyimu tune la xaxau ne la ihnadro, nge tro angatr a lapa e koië me kuë, e kolopi me kolojë, nge tro hë la nöjei nöj hune la ihnadro a manathith jëne eö, me jëne la itre matra i eö. 15 Tro ni a ce me eö, nge tro ni a thupë eö ngöne la nöjei jë i eö. Nge tro hmaca ni a abëekë eö kowe la nöje celë. Tha tro jë kö ni a nue eö, ngo tro pe ni a eatrëne la hnenge hna sisinyi koi eö.”

16 Ame hnei Iakobo hna hlë jë, nge öni angeic: “Nyipici laka, Iehova hnyawa e celë, nge thatre kö ni.” 17 Nge angeic a xou, matre öni angeic: “Ka ketre pengöne catre la götrane celë, ma e celë hi la hnalapa i Akötresie, nge e celë hi la qëhnelö ne la hnengödrai.” 18 Matre hnei angeic hna canga ilë, me xome la ietë hnei angeic hna nyi ta ne hen, me acil kösë sine feni, me nei oel hun ej. 19 Ame hnei angeic hna ati ëjen, Bethela.* Ngo ame la ëjene la traon cili ekö, ke Luza.

20 Thupene lai, Iakobo a sisinyi jë me hape: “Maine tro Akötresie a ce me eni, me thupë ni ngöne la trongeng, nge maine tro nyidrëti a thuange falawa, me thue iheetreng, 21 nge maine tro hmaca ni a bëeke memine la tingeting ngöne la hnalapa i kaka, tro ha mama cil e cili ka hape, Iehova hi la Akötresing. 22 Nge ame lai etë hnenge hna acil kösë sine feni, tro ej a nyi uma i Akötresie, nge tro ni a hamëne la ketre sine* la nöjei ewekë hnei nyidrëti hna troa hamë ni, nge tha tro kö ni a triane lai.”

29 Thupene lai, hnei Iakobo hna xome hmaca la gojenyi angeic kowe la itre nöj e Koië. 2 Nge ame ngöne la ketre ijin, hnei angeice hna öhne la ketre hnë tha tim ngöne la hlapa, me köni itro mamoe ka meköl ezine la hnë tha tim, ke hna majemine ithue imene la hnëng öni e cili. Nge hetre etë atraqatr ka thinge la qe ne la hnë tha tim. 3 Thupene la kola ase acasine la hnënge öni asë, hnene la itre atre thupë mamoe hna ukune la etë, me fe la hnë tha tim, me thue imene la itre öni. Thupene lai, hnei angatre hmaca hna thinge la hnë tha tim memine lai etë.

4 Iakobo a hnyinge jë ka hape: “Ange trejin, atre kaa epun?” Sa jë hi angatr ka hape: “Angetre Karan.” 5 Matre öni angeic: “Atre Labana hi hnei epun, api Nahora?” Matre öni angatr: “Öö atre hi eahun.” 6 Nge öni angeic: “Tune kaa nyidrë?” Nge öni angatr: “Ka egöcatre nyidrë, nge hane hi lae Rakela nekö i nyidrë, ce angeic me itre mamoe!” 7 Öni angeice hmaca jë: “Kolo petre hi a nyiqane la hnaipajö, tha ijine tro pala kö a icasikeune la itre öni, ngo ithue imene jë pe, nge tro fë koi itre gaa hetre xen.” 8 Öni angatre jë hi: “Waea, tha ijine pala kö. Loi e troa pane acasine la hnënge öni, nge troa fe la hnë tha tim, nge e cili, tro hë eahuni a ithue imene la itre mamoe.”

9 Iakobo pala kö a ithanata me angatr, nge traqa pi fe hi Rakela me itre mamoe ne la keme i angeic, ke atre thupë öni Rakela. 10 Matre ame hë la Iakobo a öhnyi Rakela, nekö i Labana, mathine i angeic, me itre mamoe i Labana, angeic a canga alemi jë, me fe la hnë tha tim, me ukune la ietë ka thing, me thue imene la itre mamoe i Labana. 11 Nge Iakobo a dremi Rakela jë me treije catr. 12 Thupene lai, angeic a qaja ju koi Rakela ka hape, angeic a xulu qaathene la fami* Labana, nge nekö i Rebeka angeic. Matre Rakela a canga nyinyape pi troa qaja koi keme i angeic.

13 Ame ju hi la Labana a drenge la kola qeje Iakobo, lo neköne la xa i nyidrë, Labana a canga nyinyape jë troa wai angeic. Nge nyidrëti a haluthi angeice jë, me dremi angeic, me alö angeic hnine la hnalapa i nyidrë. Nge Iakobo a qejepengön asë jë la nöjei ewekë ka traqa koi angeic. 14 Matre öni Labana jë hi: “Eö la sine la ijuneng me sine la ijöneng.”* Nge Iakobo a lapa ju thei nyidrë koi ca treu ka pexej.

15 Nge öni Labana jë hi koi Iakobo: “Tha hnene kö laka, ca madra* nyiso matre tro eö a huliwa gufa koi ni. Tro ni a nyithupei eö tune kaa?” 16 Nge lue nekö i Labana jajiny: Lea la ka tru, nge Rakela la ka co. 17 Nge ame Lea, tha ka mingöminge kö la luemeke i angeic, ngo ame Rakela, ka mingöminge catr angeic. 18 Hnimi Rakela ha hnei Iakobo, matre öni angeic koi Labana: “Tro ni a huliwa i nyipë koi 7 lao macatre göi Rakela, nekö i nyipë ka co.” 19 Matre sa jë hi Labana ka hape: “Ka loi koi ni troa hamë nyëne koi eö, hune la troa nue nyën koi ketre trahmany. Matre pane lapa ju theng.” 20 Nge hnei Iakobo hna huliwa koi 7 lao macatre matre troa xomi Rakela, ngo kösë itre hnepe drai hi, ke atraqatre la ihnimi angeic koi Rakela.

21 Thupene lai, öni Iakobo koi Labana: “Pexeje hë la itre macatre ne huliwa ni, hamë ni pi hë la föeng, matre tro ni a ce meköle memin.” 22 Nge Labana a hën asë jë la itre trahmanyi qa lai, me feet. 23 Ngo e jidr, Lea la hnei nyidrëti hna traqa fë koi Iakobo, matre tro angeic a ce meköl memin. 24 Nge Labana a hamëne pi koi Lea la ketre hlue i nyidrë, Zilepa la ëjen. 25 Ngo e hmakanyi hë, kola sesëkötr hnei Iakobo laka, Lea pena ha! Matre öni angeic koi Labana: “Hnei nyipëti hna huliwa thoi koi ni? Tha eni kö lo a huliwa koi nyipë göi Rakela? Hnauëne la nyipëti a huliwa thoi koi ni?” 26 Labana a sa jë ka hape: “Ame e celë, tha hna majemine kö troa pane hamëne la ka co, nge pine pë hë la ka tru. 27 Matre, pane lapa ju kö la wiike celë memine la föe ce. Nge tro pë hë ni a hamë eö la ketre, e tro hmaca eö a huliwa koi 7 lao macatre.” 28 Celë hi hna kuca hnei Iakobo. Angeic a lapa ju la wiike cili me Lea, nge e thupen, Labana a hamë Rakela ju fe troa föi angeic. 29 Nge Labana a hamëne ju koi Rakela la ketre hlue i nyidrë, Bila la ëjen.

30 Ame hnei Iakobo hna ce meköl me Rakela, nge tru catre kö la hnei angeic hna hnimi Rakela hui Lea. Nge angeic a huliwa hmaca jë koi Labana koi 7 lao macatre. 31 Matre ame hë la Iehova a öhne laka, tha hna hnimi* Lea kö, hnei nyidrëti hna aijijë angeice troa hnaho. Ngo ame Rakela, tha ka hnaho kö angeic. 32 Ame hnei Lea hna upune, me hëne lai nekönatr ka hape, Reubena.* Nge öni angeic: “Kolo ke hnei Iehova hna öhne la akötreng, nge qaane enehila, tro hë la föeng a hnimi ni.” 33 Nge hnei angeice hna upune hmaca, me hnahone la nekö trahmany. Öni angeic: “Hnei Iehova hna hamë nyëne fe koi ni, ke öhne* hi nyidrë laka, tha hna hnimi ni kö.” Angeic a hë nyën ju, Simeona.* 34 Nge hnei angeice hna upune hmaca , me hnahone la nekö trahmany. Öni angeic: “Ame hë enehila, tro hë la föeng a epe koi ni, ke ase hë ni hamë nyidrë la köni nekö trahmany.” Celë hi matre hë nyëne jë, Levi.* 35 Ame hnei angeice hna upune hmaca, me hnahone la nekö trahmany. Öni angeic: “Haawe, ame enehila, tro pena ni a atrunyi Iehova.” Celë hi matre ati ëje i nyëne jë ka hape, Iudra.* Nge tha hnaho ju hi angeic.

30 Ame hë la Rakela a öhne laka, pëkö nekönatr hnei angeic hna hnahone koi Iakobo, zalu jë hi Rakela koi Lea mama i angeic. Nge öni angeice koi Iakobo: “Hamë nekönge jë, wanga tro ni a mec.” 2 Elëhni jë hi Iakobo koi Rakela, nge öni nyidrë: “Akötresieti ni matre sewe eö troa hnaho?” 3 Matre öni Rakela: “Hane hi lae Bila hlueng, ce meköle jë me angeic matre tro angeic a hnaho koi ni, nge jëne angeic tro fe hë ni a ketre thin.” 4 Matre Rakela a hamë Bila jë, hlue i angeic, troa föi Iakobo. Nge Iakobo a ce meköle ju me Bila. 5 Ame hnei Bila hna upune me hnaho nekö trahmanyi koi Iakobo. 6 Matre öni Rakela jë hi: “Akötresie la atre ameköti ni, nge hnei nyidrëti fe hna drei ni. Hnei nyidrëti hna hamë nekö trahmanyi koi ni.” Celë hi matre ati ëje i nyëne jë, Dana.* 7 Nge hnei Bila, hlue i Rakela, hna upune hmaca, me hnahone la hnaaluene nekö trahmanyi koi Iakobo. 8 Nge öni Rakela jë hi: “Anyimua isi* ni memine la mamang, nge hune kö ni!” Celë hi matre ati ëje i nyëne jë, Nafatali.*

9 Ame hë la Lea a öhne laka, tha upune hmaca kö angeic, angeic a hamë Zilepa jë, lo hlue i angeic koi Iakobo. 10 Ame hnei Zilepa hlue i Lea, hna hnaho nekö trahmanyi koi Iakobo. 11 Matre öni Lea jë hi: “Manathithi hë ni!” Celë hi matre ati ëje i nyëne jë, Gada.* 12 Thupene lai, hnei Zilepa hlue i Lea, hna hnahone la ketre nekö trahmanyi koi Iakobo. 13 Matre öni Lea jë hi: “Madrine ka tru koi ni, tro hë la itre föe a hape, ka madrine ni.” Celë hi matre ati ëje i nyëne jë, Asera.*

14 Ngöne la ijine hle qitr, hnei Reubena hna ngenu ngöne la itre hlapa, me öhne la ketre pengöne feja,* me traqa fë koi Lea thine i angeic. Ame hnei Rakela hna sipo Lea ka hape: “Pane hamë ni pi la itre xa feja ne la nekö i eö.” 15 Sa jë hi Lea ka hape: “Tha ijiji kö la hnei eö hna xome la föeng, nge eö fe a hane pi xome la itre feja ne la neköng!” Matre öni Rakela: “Nga ka loi, hamëne pi la itre feja ne la nekö i eö, nge tro Iakobo a ce meköl me eö e drae hej.”

16 Matre ame hë la Iakobo a traqa lo hej qa ngöne la itre hlapa, hnei Lea hna canga tro troa ixelë me nyidrë, nge öni eahlo: “Tro nyipëti a ce meköl me eni, ke ase hë ni itö nyipë hnene la itre feja ne la neköng.” Ame hnei Iakobo hna ce meköl me Lea la jidri cili. 17 Akötresieti a kapa ju la sipo i Lea, matre upune pi hi eahlo, nge eahlo a hamëne pi koi Iakobo la hna 5 ne trahmany. 18 Matre öni eahlo: “Hnei Akötresie hna nyithupene koi ni, ke hnenge hna hamëne la hlueng kowe la föeng.” Celë matre ati ëje i nyëne jë, Isakara.* 19 Nge hnei eahlo hna upune hmaca, me hnahone la hna 6 ne trahmany. 20 Matre öni Lea: “Hnei Akötresie hna hamë ahnahnange ka mingöming. Tro hë la föeng a kepe ni, ke hnenge hna hnahone la 6 lao nekö trahmanyi koi nyidrë.” Matre eahlo a hëne jë, Zebulona.* 21 Ame hnei eahlo hna hnahone la ketre nekö jajiny, Dina la ëjen.

22 Nge Akötresieti a meku Rakela jë, me kapa la sipo i angeic, me aijijë angeic troa hnaho. 23 Hnei angeic hna upune me hnaho nekö trahmany, matre öni angeic: “Ase hë Akötresie apatrene la hmahmang!” 24 Nge angeic a hë nyëne jë, Iosefa* me hape: “Iehova a nyi xa nekönge trahmany.”

25 Matre ame hë la Rakela a hnaho Iosefa, öni Iakobo jë hi koi Labana: “Nue ni pi troa bëeke kowe la zing. 26 Hamëne pi koi ni la itre föeng, thupene lo hnenge hna huliwa koi nyipë, me itre neköng, matre tro ni a tro, ke atre hnyawa hi nyipë la nöjei huliwa hnenge hna kuca koi nyipë.” 27 Öni Labana jë hi: “Eni a sipo eö, pane lapa ju e ce, ke öhne* hë ni laka, Iehova a amanathithi ni jëne eö.” 28 Nge öni Labana: “Qaja jë la thupei eö, nge tro hë ni a kapa.” 29 Ngo öni Iakobo: “Atre hi nyipëti la aqane huliwange koi nyipë, me aqane tro loi la itre öni i nyipë jëne ni: 30 Tha tru kö hnei öni i nyipë qëmekene tro ni a traqa, ngo enehila, nyimutre hë. Hnei Iehova hna amanathithi nyipë qaane lo eni a traqa e ce. Ngo eue la tro ni a huliwa kowe la sipu faming?”

31 Öni Labana jë hi: “Tro ni a hamë nemene koi eö?” Matre öni Iakobo: “Pëkö nyine tro nyipëti a hamë ni, tro pala kö ni a engëne la itre öni i nyipë ka co, me tro sai nyudren kowe la gaa hetre xen, me thupë nyudren, e tro nyipëti a kuca la koi ni: 32 Enehila, tro ni a wange la itre öni i nyipë. Nge tro nyipëti a ketre amë la itre mamoe hna thatha han, nge ka nyimu han, me nöjei nani trahmany ka oma mit, me nöjei nani hna thatha han. Qaan enehila, tro ha nyithupeng hnene la itre öni cili. 33 Nge tro hë nyipëti a öhne la aqane huliwa nyipicing, la drai ne tro nyipëti a traqa troa wange la thupeng. Nge e traqa jë nyipëti öhne theng la itre nani tha hna thatha hane kö, nge tha ka nyimu hane kö, maine itre nani trahmanyi ka tha oma mit, itre hna atrekënö lai.”

34 Öni Labana jë hi: “Ka loi lai, tro ha kuca la hnei eö hna qaja.” 35 Ngöne la drai cili, hnei nyidrëti hna ketre amë la itre mamoe trahmanyi ka agöagö han, nge hna thatha han, me nöjei nani hna thatha han, nge ka nyimu han, nöjei öni ka nango wië han, me nöjei neköi nani trahmanyi ka oma mit. Nge nyidrëti a ahnithe jë kowe la itre nekö i nyidrë. 36 Nge hnei nyidrëti hna tro kowe la ketre götran laka, troa köni drai ne tro qaathei Iakobo. Nge Iakobo a thupëne la munëne la itre neköi öni i Labana.

37 Ame hnei Iakobo hna hutra la itre picine sitirak, me iamad me ipalatan, nge hnei angeice fe hna ule la kupein ngöne la itre xa götran, matre mama pi la gaa wiën. 38 Thupene lai, angeic a amë ju la itre sine sinöe qëmekene la itre öni, ngöne la itre jë i tim, me itre trepene ime i öni, matre ame hë la itre ej a traqa troa ij, me öhne lai, cia jë hi la aja i itre ej troa pi hnaho.

39 Matre kola pi hnaho la itre öni qëmekene la itre sine sinöe, nge itre ej a hnahone jë la itre neköne ka agöagö han, nge hna thatha han, nge ka nyimu han. 40 Iakobo a ketre amë ju la itre neköi mamoe, me amë la itre öni qëmekene la itre öni ka agöagö han, me ka oma mit qa ngöne la itro öni Labana. Thupene lai, angeic a ketre amë ju la itre öni i angeic ka co, tha hnei angeice kö hna ce nue memine la itre öni Labana. 41 Matre ame la nöjei ijine kola pi hnaho la itre öni ka egöcatr, Iakobo a amë jë la itre sine sinöe ngöne la itre jë i tim, matre troa öhn hnene la itre öni, nge tro itre ej a itrokeu qëmekene la itre sinöe. 42 Ngo e traqa jë ka hape, itre öni ka kucakuca la ka pi hnaho, tha angeice kö a amë la itre sine sinöe, matre thatraqai Labana pala hi la itre ka kucakuca, nge thatraqai Iakobo la itre öni ka egöcatr.

43 Ame hnei Iakobo hna trenamo, nge nyimu öni i angeic ka co, me itre hlue trahmanyi me föe, me itre kamela, me itre boliko.

31 E thupen, drenge hë Iakobo la hna qaja hnene la itre nekö i Labana trahmany, öni angatr: “Hnei Iakobo hna xom asë la itre ewekë i kaka. Ame la itre mo i angeic, ke itre qaathei kaka asë hi.” 2 Ame la Iakobo a goeëne la qëmeke i Labana, öhne ju hi angeic laka, saze hë la aqane ujë i Labana. 3 Matre öni Iehova koi Iakobo: “Bëeke hmaca jë kowe la nöj ne la itre qaaqaa i eö, me ngöne la fami eö, nge tro ni a ce me eö.” 4 Iakobo a hë Rakela jë me Lea ngöne la itre hlapa, hmekune la hna amë la itre öni angeic. 5 Nge öni angeice koi nyidro ka hape:

“Öhne hi ni laka, tha tune hmaca kö la aqane goeë ni hnei Labana keme i epon. Ngo ce eni memine la Akötresi kaka. 6 Ngo ame epon, atre hnyawa hi epon laka, hnenge hna huliwa mec kowe la keme i epon. 7 Hnene la keme i epon hna huliwa thoi koi ni, nge a 10 lao saze la thupeng, ngo tha hnei Akötresieti kö hna nue la keme i epon troa akötrë ni. 8 E tro Labana a qaja ka hape, ‘troa nyithupei eö hnene la itre öni hna thatha han,’ haawe, tro la nöjei öni a hnaho hna thatha han. Ngo e traqa jë nyidrë qaja ka hape, ‘troa nyithupei eö hnene la itre öni ka agöagö han,’ tro hë la nöjei öni a hnaho ka agöagö han. 9 Haawe, hnei Akötresieti hna xome la itre öni qaathene la keme i epon, matre hamë ni. 10 Ngöne la ketre drai ne kola pi itrokeu la itre öni, hnenge hna gala draië me puje laka, ame la itre nani trahmany ka tro kowe la itre nani föe, ke itre ka agöagö han, nge hna thatha han, nge ka nyimu han. 11 Nge ngöne la pu, hnene la angela ne la nyipi Akötresie hna hë ni me hape: ‘Iakobo!’ Nge öning: ‘Eni hi la.’ 12 Nge önine la angela: ‘Pane goeën, nge tro eö a öhne laka, ame asë hi la itre nani trahmany ka tro kowe la itre föe, itre ka agöagö han, nge hna thatha han, nge ka nyimu han. Ke öhne hnyawa hi ni la nöjei ewekë hna kuca koi eö hnei Labana. 13 Eni la nyipi Akötresie, lo ka mama koi eö e Bethela, lo götrane hnei eö hna nei oel* hune la etë hna acil kösë sine feni, me sisinyi koi ni. Enehila, trotrije pi la nöje ce, nge bëeke hmaca jë kowe la nöj hna hnaho eö ngön.’”

14 Öni Rakela jë hi me Lea ka hape: “Hetre edrö i nyio pala kö thene la keme i nyio? 15 Hapeu, tha hnei nyidrëti kö hna qene trenyiwa nyio, lo nyidrë a salemë nyio, me huliwan menun la mani hna itö nyio? 16 Ame la itre mo hnei Akötresieti hna xom asë qaathei kaka, ke itre ewekë i nyio lai, me itre nekö i nyio. Matre kuca asë jë la hnei Akötresie hna qaja koi nyipë.”

17 Ame hnei Iakobo hna atë la itre nekö i angeic, me itre föi angeic hune la itre kamela. 18 Angeic a xom asë jë la itre öni i angeic, itre öni hna hetrenyi qa Padanarama, me nöjei mo hnei angeic hna kapa. Nge hnei angeic hna bëeke hmaca a tro Kanana koi Isaaka keme i angeic.

19 Nge ame Labana, hnei nyidrëti hna tro troa xötre pene la itre mamoe i nyidrë. Nge hnei Rakela hna atrekënö la itre neköi idrola ne la fami i keme i angeic. 20 Ketre, hnei Iakobo hna juetrëne koi Labana atre Arama laka, angeic a tro. 21 Matre angeic a kötre pi me nöjei ewekë i angeic, me sasaithe la hneopegejë.* Nge hnei angeic hna tro kowe la itre wetr e Gileada. 22 Ngöne la hnaakönine drai, hna thuemacanyi Labana ka hape, kötre hë Iakobo. 23 Matre Labana a ce tro ju me itre trejin* me nyidrë, me huzu Iakobo a 7 lao drai, me traqa koi angeic ngöne la itre wetr e Gileada. 24 Ngo e jidr, Akötresie a ewekë* ju koi Labana atre Arama ngöne pu, öni nyidrë: “Wange pala kö la aqane tro eö a ithanata koi Iakobo, maine loi maine ngazo.”

25 Hnei Iakobo hna acile la itre itate i angeic ngöne la wetr, nge ame Labana me itre trejin me nyidrë, hnei angatr hna acili itat ngöne la itre wetr ne Gileada. Ame hnei Labana hna tro koi Iakobo, 26 me hape: “Nemene la hnei eö hna kuca? Hnauëne laka eö a huliwa thoi koi ni, me kötre fë la lue neköng kösë itre hna oth qa hna isi? 27 Hnauëne laka, eö a kötre juetrë me huliwa thoi koi ni, nge tha thuemacanyi ni kö hnei eö? Maine thuemacanyi ni ju hnei eö, tro hë ni a nue eö, ce memine la madrin, me nyima, me lepe itrapë me arp. 28 Nge goeën, tha hnei eö kö hna nue ni troa idrem memine la itre aping,* me lue neköng. Aqane huliwa ne hmo la aqane ujë i eö. 29 Maine ju, ijije hi tro ni a akötrë epun, ngo hnene la Akötresi ne la keme i epun hna ithanata koi ni eidri lo hej ka hape: ‘Wange pala kö la aqane tro eö a ithanata koi Iakobo, maine loi maine ngazo.’ 30 Atre hi ni laka, eö a tro, ke aja i eö troa canga bëeke kowe la keme i eö. Ngo hnauëne laka eö a atrekënö la itre hazeng?”

31 Iakobo a sa jë koi Labana ka hape: “Hnenge hna kötre juetrë, ke tru la xoung, öning, tro hë nyipëti a thapa qaathenge la itre nekö i nyipë. 32 Matre e tro nyipëti a öhne la itre haze i nyipë thene la ketre atr, troa humuthi angeic. Qëmekene la itre atre i nyipë, thele jë ngöne la itre ewekëng, nge xome jë la nyi nyipë.” Ngo thatre kö Iakobo laka, Rakela hi la ka atrekënö la itre haze. 33 Labana a lö ju hnine la itate i Iakobo, me Lea, memine la lue hlu, ngo pëkö hnei nyidrëti hna öhn. Matre ame hë la nyidrëti a tro qa ngöne la itate i Lea, hnei Labana pena hna lö kowe la itate i Rakela. 34 Nge hnei Rakela hna xome la itre neköi idrola, me amë hnine la watreng ka thip ngöne la ju ne la kamela, nge angeic a lapa tithe ju. Matre Labana a thele ju ngöne la itat asë, ngo pëkö hnei nyidrëti hna öhn. 35 Matre öni Rakela kowe la keme i angeice ka hape: “The elëhni kö joxung. Thatreine kö ni cil qëmeke i nyipë, ke eni a meci itre föe.” Matre nyidrëti a thele hnyawa ju, ngo tha öhne kö nyidrë la itre idrola.

36 Ame hnei Iakobo hna elëhni me amexeje la itre ngazo i Labana, me hape: “Nemene la triang? Hnauëne la nyipëti a huzu ni? Nemene la ngazong? 37 Ame enehila, ase hë nyipëti jelë la itre ewekëng, hetre ewekë i nyipëti pala kö theng? Amë ju e ce qëmekene la itre atre i nyiso, matre tro angatr a ameköti nyiso. 38 Ame lo eni a lapa thei nyipë koi 20 lao macatre, pëkö mamoe me nani i nyipë ka uthithi nekön. Nge pëkö mamoe trahmanyi i nyipë hnenge hna öni qa ngöne la itre öni nyipë. 39 Tha hnenge kö hna traqa fë koi nyipë la ketre öni hna hej hnei öni wael, ngo e hetre öni hna hej, hnenge hmaca kö hna të. Nge e hetre öni hna atrekënö e lai me jidr, hnei nyipëti pala hi hna hnyingë thupene koi ni. 40 Nge ame e lai, eni a meci hnei hedredrei, nge ame e hej, eni a meci hnei hnötr, matre thatreine hë ni meköl. 41 Hnenge hna lapa thei nyipë koi 20 lao macatre, 14 kowe la lue nekö i nyipë, nge 6 kowe la itre öni i nyipë. Nge traqa koi 10 lao saze nyipëti la thupeng. 42 Nge maine patre ju thenge la Akötresi kaka, me Akötresi Aberahama, me atre hna xouen hnei Isaaka, tro hë nyipëti lai a upi ni, fë la ka pë. Ngo öhne hi Akötresie la akötreng, me aqane catre ni huliwa, celë hi matre eidri lo hej, hnei nyidrëti hna hmekë nyipë.”

43 Ame hnei Labana hna sa koi Iakobo ka hape: “Ame la lue föe celë, lue nekönge hi lai, nge ame la itre nekönatr, itre apinge hi lai, nge ame la itre öni, itre öninge lai, nge ame la nöjei ewekë hnei eö hna goeën, itre ewekënge lai me lue neköng, matre tro ni a akötrë nyidro tune kaa memine la ha nekö i nyidro? 44 Ngo enehila, trohemi tro nyiso a isisinyikeu, matre nyine anyipicin koi nyiso.” 45 Ame hnei Iakobo hna xome la ketre etë, me acil tune la ketre sine feni. 46 Nge öni Iakobo kowe la itre atre i angeic: “Hleme jë la itre etë.” Matre hnei angatr hna hleme me kuci ita. Nge angatr a xeni ju e cili, hune la itra etë. 47 Nge Labana a ati ëjene ju ka hape, Iegarasadutha.* Ngo Iakobo a ati ëjene ju ka hape, Galeed.*

48 Öni Labana: “Ame la itra etë celë, tre nyine anyipicine göi nyiso.” Celë hi matre ati ëjene jë ka hape, Galeed. 49 Nge hna hëne fe ka hape, Ita Ne Thup, ke öni nyidrë: “Epi tro Iehova a thupë nyiso e tha iöhnyi hë nyiso. 50 E tro eö a qanangazone la lue neköng, me xome la itre xa föe, mekune ju laka, maine pëkö atre ka goeë eö, ngo öhne kö Akötresie atre anyipicine la isisinyikeu i nyiso.” 51 Nge öni Labana koi Iakobo: “Goeëne ju cahu itra etë, memine la ietë hnenge hna acil nyipi nyiso, 52 tro la itra etë me ikapa a anyipicine ka hape, tha tro kö ni a tro sasaith troa akötrë eö, nge tha tro kö eö a tro sasaith troa akötrë ni. 53 Ngo epi tro la Akötresi Aberahama me Nahora, lo Akötresi ne la keme i nyidro a anyipici nyiso.” Nge Iakobo a sisinyi jë ngöne la ëjene la Akötresie hna xouen hnei Isaaka keme i angeic.

54 Nge Iakobo a huuje jë ngöne la itre wetr, me hëne la itre trejin me angeic troa hane xeni falawa. Angatr a ce xeni ju, me meköl ngöne la itre wetr. 55 Nge hnei Labana hna canga ilë e hmahmakany, me idreme memine la itre api i nyidrë, me lue nekö i nyidrë, nge nyidrëti a amanathithi nyidroti ju. Nge nyidrëti a bëeke hmaca jë kowe la hnalapa i nyidrë.

32 Ame la Iakobo a trongëne la jë i angeic, hnene la itre angela i Akötresie hna ixelë me angeic. 2 Matre ame hë la angeic a öhnyi angatr, öni Iakobo: “Hnë lapa i Akötresieti la!” Nge angeic a ati ëjene jë la götrane cili, Mahanaima.

3 Nge hnei Iakobo hna upe panëne la itre ka tro fë maca, kowe la mama i angeic Esau, ngöne la nöje Seira, götran e Edoma. 4 Nge hnei angeic hna upi angatr, me hape: “Hane hi la hnei epuni hna troa qaja koi Esau joxung, ‘Hane hi la hna qaja hnei Iakobo hlue i nyipë: “Ekö hë ni lapa thei Labana, 5 hetre itre kaunge hë, me itre boliko, me itre mamoe, me itre hlu trahmanyi me föe. Nge eni a upe la itre ka tro fë maca troa thuemacanyi nyipë joxung, matre tro nyipëti a kepe ni.”’”

6 Matre ame hë la itre ka tro fë maca a bëeke koi Iakobo, öni angatr: “Iöhnyi hë hun me Esau mama i nyipë, nge nyidrëti hë lai troa ixelë me nyipë. Ce nyidrë me 400 lao trahmany.” 7 Ame hna traqa la xou koi Iakobo, matre angeic a hnehengazo. Angeic a thawaluëne pi la itre atr ka ce me angeic, me itre öni angeic ka co, me itre kau, me itre kamela. 8 Öni angeic: “Maine tro Esau a lepe la ketre lapa, tro pe kö a mel la ketre.”

9 Nge öni Iakobo: “Iehova fe, Akötresi Aberahama qaaqaang, nge Akötresi Isaaka kemeng, nyipë la atre qaja koi ni ka hape, ‘bëeke jë kowe la nöje i eö, me fami eö, nge tro ni a amanathithi eö.’ 10 Tha ijijinge kö troa kapa la ihnimi nyipici i nyipë, memine la loi hnei nyipëti hna kuca koi ni hlue i nyipë, ke ame lo eni a sasaithe la Ioridrano ke eni hi me ca sine tö. Ngo enehila, lue lapange hë. 11 Matre eni a sipo nyipë, epi amele ni jë qa ngöne la ime Esau mamang, ke xounge angeic, nge xounge fe tro angeic a lepi ni, me lepe la itre föe, me itre nekö i angatr. 12 Nge öni nyipëti lo koi ni ka hape, ‘tro ni a amanathithi eö, me kuca matre ala nyimu la itre matra i eö, kösë wene ngöni ne ngönegejë hna thatreine e.’”

13 Nge angeic a meköle ju e cili. Thupene lai, hnei angeic hna xome qaathene la itre öni angeic, la itre xa öni nyine nyi ahnahna koi Esau mama i angeic: 14 traqa koi 200 lao nani föe, me 20 lao nani trahmany, me 200 lao mamoe föe, nge 20 lao mamoe trahmany, 15 me 30 lao kamela ka iji thine la itre nekön, me 40 lao kau föe, nge 10 lao kau trahmany, me 20 lao boliko föe, nge 10 lao boliko trahmany.

16 Angeic a ahnithe jë kowe la itre hlue i angeic la isa hnënge öni, nge öni angeic: “Ange tro pa jë me itre öni, nge loi e tro la itre öni a iananyi.” 17 Nge angeic a qaja jë kowe la hlu ka tro pa ka hape: “E traqa jë Esau ixelë me eö me hnyingëne koi eö ka hape, ‘Drei la maseta i eö? Nge eö a tro ië? Nge itro öni i drei la qëmeke i eö?’ 18 Hape jë, ‘Iakobo hlue i nyipë. Ketre ahnahna lai hna upe koi nyipë Esau joxung, nge hane fe hi lae Iakobo.’” 19 Öni angeic kowe la hnaaluen, me hnaakönin, me kowe la nöjei hlue ka tro e hutröne la itre öni ka hape: “Hane hi la aqane tro epun a sa koi Esau, e tro epuni a ixelë memin.” 20 Nge tro fe epuni a hape: ‘Ma Iakobo hë lai.’” Ke öni angeic: “E tro ni a iupi fë ahnahna koi Esau, tro ha lapa kötre la elëhni angeic, nge maine tro angeic a öhnyi ni, tro hë angeic a kepe ni.” 21 Matre hnene la itre hlue i angeic ka xome la itre ahnahna, hna pane sasaithe la hneopegejë. Nge ame Iakobo, hnei angeic pë hë hna meköl hnine la itre itate i angeic.

22 Ngöne la jidri cili, hnei angeic hna mejë, me xome la lue föi angeic, me lue hlu, memine la 11 lao nekö i angeice trahmany, nge hnei angeic hna sasaithe la gaa tëtë ne la hneopegejë Iaboka. 23 Nge hnei angeic hna xatua angatr troa sasaithe la hneopegejë, me mejë fë la nöjei ewekë i angeic.

24 Nge lapa casi ju pe hi Iakobo, matre hnene la ketre trahmany hna ikuië me angeic, uti hë e kaqa ne lai. 25 Nge ame hë la trahmany a öhne laka, tha huune kö angeic, angeic a ketre ju la hnaitöjun ne la hune itrepë i Iakobo. Matre itria pi hi la hnaitöjun ne la hune itrepë i Iakobo, la nyidroti a ikuië. 26 Thupene lai, önine la trahmany: “Nue ni pi, ke kaqa ne lai hë la.” Ngo öni Iakobo: “Waea, tro ni a nue eö e ase jë eö amanathithi ni.” 27 Matre önine lai atr: “Drei la ëje i eö?” Öni angeic: “Iakobo.” 28 Matre önine lai atr: “Tha tro hmaca kö a hë eö Iakobo, ngo Isaraela,* ke hnei eö hna ikuië me Akötresie me itre atr, nge catre kö eö.” 29 Ame hnei Iakobo hna hnyingë angeice ka hape: “Pane qaja jë koi ni la ëje i eö.” Ngo önine lai atr: “Eö a hnyingëne fë nemene la ëjeng?” Nge angeic a amanathithi Iakobo ju ngöne la götrane cili. 30 Nge hnei Iakobo hna ati ëjene la götrane cili ka hape, Peniela,* ke öni angeic: “Ase hë ni iqëmekekeu me Akötresie, ngo mele ju kö ni.”

31 Matre ame hë la kola fetra la jö, Iakobo a tro ezine Penuela,* ngo angeic a peje trootro, ke itria ha la hune itrepë i angeic. 32 Celë hi matre, uti hë enehila, tha angetre Isaraela hmaca kö a öni ijön* hmekune la hnaitöjun ne la hune itrepë, pine laka, hna ketr la hnaitöjun ne la hune itrepë i Iakobo.

33 Ame hë la Iakobo a öhnyi Esau e traqa memine la 400 lao trahmany, angeic a thawa pi la itre nekönatr koi Lea, me Rakela, me kowe la lue hlu: 2 Ngöne la qëmeken, lue hlu me ha nekö i nyidro, nge e thupen, Lea me ha nekö i angeic, nge thupei angatr, Rakela me Iosefa. 3 Nge Iakobo la ka wejemekene la tronge i angatr asë. Matre ame hë la angeic a easenyine la mama i angeic, angeic a 7 lao thil e kuhu hnadro.

4 Ngo Esau a canga nyinyape pi koi angeic, me haluthi angeic, me dremi angeic, nge nyidroti a ce treije jë. 5 Nge ame hë la Esau a öhne la itre fö me ha nekönatr, öni Esau: “Drei la itre sinatronge i eö?” Nge öni Iakobo: “Kolo itre nekönatr hnei Akötresie hna hamëne madrin kowe la hlue i nyipë.” 6 Matre hnene la lue hlu me ha nekö i nyidro hna easeny, me thili ju. 7 Nge Lea me ha nekö i angeic a easenyi jë, me thili ju. Nge Iosefa me Rakela a easenyi ju me thil.

8 Esau a hnyingëne jë ka hape: “Hnauëne laka upe jë eö la itre atr me itre ume öni troa ixelë me eni?” Sa jë hi Iakobo ka hape: “Ke matre troa kepe ni hnei nyipë joxung.” 9 Matre öni Esau: “Nyimutre catre la itre ewekëng jining, matre xome jë kö eö la itre ewekë i eö.” 10 Ngo Iakobo kö a catre fë me hape: “Waea pëkö, ngo maine nyipëti a hnimi ni, tro nyipëti a kapa la ahnahnang. Ke hnenge lo hna upe panëne la ahnahna, matre aijijë ni troa iöhnyi me nyipë, nge kösë eni a iöhnyi me Akötresie, ke hnei nyipëti hna kapa aloinyi ni. 11 Kapa ju la ahnahna* hna upe koi nyipë, ke hnei Akötresie hna kepe ni, nge pëkö ka pë theng.” Ngo pine laka, catre fë kö Iakobo, ame hnei Esau hna kapa.

12 Nge thupene lai, öni Esau: “Jë fe, easë a tro. Tro ni a tro pa.” 13 Ngo sa jë hi Iakobo ka hape: “Joxung, atre hi nyipë laka, kucakuca ha la ha nekönatr, nge ce eni me itre mamoe me itre kau hna iji thin, matre e tro sa tro nyimenyim, koi ca drai hi, tro asë la hnënge öni a mec. 14 Matre tro pai nyipëti jë joxung, nge tro la hlue i nyipë a nango hmitr, memine la itre öninge ka co, me ha neköng, uti hë traqa ni e Seira kowe la hnalapa i nyipë joxung.” 15 Öni Esau jë hi: “Nga tro hë la itre xa atreng a ce tro me eö.” Ngo öni Iakobo: “Tha nyipiewekë kö, ngo kepe ni ju pe joxung.” 16 Matre ngöne la drai cili, Esau a bëeke hmaca jë a tro Seira.

17 Nge hnei Iakobo hna tro Sukotha, me acile la ketre uma, me itre uma i öni. Celë hi matre hëne jë angeic la götrane cili, Sukotha.*

18 Hnei Iakobo hna trotrij e Padanarama, me traqa hnyawa e Sekema, ketre traon e Kanana. Nge hnei angeic hna acili itre itat ezine la traon. 19 Nge angeic a hamëne pi kowe la itre nekö i Hamora, keme i sekema, la 100 lao mani sileva, nyine itöne la ketre götrane la hlapa hnei angeic hna acili itati ngön. 20 Nge angeic a acile ju la ketre ita ne huuj, me ati ëjen, “Akötresie, Akötresi Isaraela.”

34 Ame Dina, lo nekö i Iakobo me Lea, ka majemine angeic ce tro* me itre nekö jajiny ne la nöj. 2 Matre ame hë la Sekema, nekö i Hamora qa Hivi, ketre tane la nöj a öhnyi Dina, angeic a xomi Dina jë, me angazo nyën. 3 Nge fedre hë la hni angeic koi Dina nekö i Iakobo, nge tru hë la ihnimi angeice koi Dina, matre hnei angeic hna tupath troa thapa la hni Dina. 4 Thupene lai, öni Sekema koi Hamora keme i angeic: “Sipone jë la jajinyi celë nyine föeng.”

5 Drenge hë Iakobo laka, hna angazo Dina hnei Sekema. Nge itre nekö i nyidrë petre kö ngöne la itre hlapa a thupëne la itre öni i nyidrë. Matre pëkö hnei nyidrëti hna qaja, uti hë la angatr a bëek. 6 E thupen, hnei Hamora keme i Sekema, hna traqa troa ithanata me Iakobo. 7 Ame hë la itre nekö i Iakobo a drenge la ewekë ka traqa, bëeke jë hi angatr qa ngöne la itre hlapa, nge angatr a dreng akötrën me elëhni catr ke hnei Sekema hna ahmahmanyi Isaraela, pine angeic ce meköl memine la nekö i Iakobo, ngo hmitrötre pe troa kuca tun.

8 Öni Hamora jë hi: “Kei hë la hni Sekema neköng kowe la nekö i epun, hamë nyëne pi nyine föi angeic. 9 Nge loi e tro epuni a hamë huni la itre nekö i epuni jajiny, nge xome jë la itre nekö hun. 10 Tro hë epuni a lapa the hun, nge kola nue koi epuni la nöj, lapa ju e celë nge saleme jë, nge isa lapa ju ngöne la nöj.” 11 Nge öni Sekema kowe la keme i Dina me itre xa i nyën: “Kepe ni ju hnei epun, nge tro ni a hamëne la nöjei ewekë hnei epuni hna ajan. 12 Hën atrune jë la thupene la föe, nge sipo ahnahna atrunyi jë, tro ni a hamën asë koi epun, ngo casi hi, nue nyëne pi nyine föeng.”

13 Matre hnene la itre nekö i Iakobo hna ithanata thoi koi Sekema me Hamora, ke hnei angeic hna angazo Dina xa i angatr. 14 Öni angatr: “Waea, thatreine kö huni nue la xa i eahun troa föene la ketre trahmanyi hna tha xötrehatren,* ke hmahma ka tru lai koi hun. 15 Tro eahuni a kapa e tro epuni a tui eahun, tro epuni a xötrehatrene la nöjei trahmanyi thei epun. 16 Nge tro hë eahuni a nue la itre nekö huni jajiny, me xome la itre nekö i epun, nge tro sa ce mel, nge tro hë sa nöje ka cas. 17 Ngo e tha drenge kö epun, nge e tha hna xötrehatrenyi epuni kö, tro hë huni a xome hmaca la xa i eahun, me tro.”

18 Matre hnei Hamora me Sekema nekö i angeic, hna kapa la ithanata i angatr. 19 Hnene la nekö trahmany hna canga trongëne la hna qaja, ke tru catre la ihnimi angeic kowe la nekö i Iakobo. Atre ka hlemu loi angeic hnine la hnalapa ne la keme i angeic.

20 Hnei Hamora me Sekema nekö i angeic, hna canga tro kowe la qëhnelö ne la traone i nyidro, me qaja kowe la itre trahmany e cili ka hape: 21 “Kola thele tingeting me easë hnene la itre trahmany, nue angatre pi troa lapa ngöne la nöj me salem, ke ijije hi la nöj troa kepe angatr. Nge tro hë sa xome la itre nekö i angatre jajiny nyine föi easë, me hamëne la itre nekö së koi angatr. 22 Tro hë angatre lai a kapa troa ce mel me easë, nge tro hë sa nöje ka cas, ngo casi hi, loi e troa xötrehatren la nöjei trahmanyi së tui angatr. 23 Nge hapeu, tha tro kö la nöjei ewekë i angatr, me itre mo i angatr, me itre öni angatr a itre ewekë së? Loi e tro sa kapa, matre tro angatr a lapa the së.” 24 Ame la nöjei atre ka lö pi qa ngöne la qëhnelö ne la traon, angatr a drei Hamora me Sekema nekö i angeic. Nge hnene la itre trahmanyi asë hna xötrehatrenyi angatr, nöjei atre ka lö pi qa ngöne la qëhnelö ne la traon.

25 Ngöne la hnaakönine drai, kolo pala kö a akötre la itre trahmany, ame hnene la lue nekö i Iakobo, Simeona me Levi, lue xa i Dina, hna xome la isa taua, me tro juetrë ngöne la traon, me humuthi angatr asë. 26 Nyidroti a humuthi Hamora jë me Sekema nekö i angeic hnei taua, nge hnei nyidro hna xomi Dina qa ngöne la hnalapa i Sekema, me tro. 27 Nge hnene la itre xa nekö i Iakobo hna traqa e thupen, me öhne laka, meci hë la itre trahmany, matre angatr a thapa pi la itre mo ne la traon, ke hna angazone la xa i angatr. 28 Angatr a thapa pi la hnënge öni ka co, me hnënge öni ka tru, me itre boliko, me nöjei ewekë ngöne la traon me itre hlapa. 29 Angatr a thapa pi la nöjei mo, me xolouthe la itre nekönatr me itre föe, me thapa asë la itre aliene uma.

30 Ame hnei Iakobo hna qaja koi Simeona me Levi ka hape: “Jole hë ni hnei epon. Zö i epon matre pui ngazo hë ni kowe la itre atrene la nöj, angetre Kanana me angetre Perizi. Ala xalaithe hi easë, nge enehila, tro hë angatr a cas, me ce uti koi së, me lepi ni me faming, nge tro hë angatr a apatrenyi së.” 31 Matre öni nyidroti jë hi: “Ke föe ne gojenyi la xa i eahun?”

35 Thupene lai, öni Akötresie koi Iakobo: “Mejë jë qa la, nge lapa ju e Bethela, nge acile jë la ita ne huuj kowe la nyipi Akötresie, lo ka mama koi eö lo eö a kötre Esau mama i eö.”

2 Matre öni Iakobo kowe la fami angeic, me nöjei atre ka ce me angeic: “Trije pi la itre haze trenyiwa thei epun, ahmitrötrë epuni jë, nge saze iheetre pi. 3 Tro sa elë a tro Bethela, nge tro na acil la ita ne huuj e cili kowe la nyipi Akötresie, lo atre ithanata koi ni lo ijine eni a akötr, me atre ce me eni ngöne la nöjei jëng.” 4 Angatr a hamëne pi koi Iakobo la nöjei haze trenyiwa thei angatr, me itre iane hnangenyë i angatr, nge Iakobo a keleme* pi, fene la isinöe atraqatr ezine Sekema.

5 Ame hë la angatr a tro, hnei Akötresie hna kuca matre xou pi la itre traon xötreith, matre tha huzune pi angatre la itre nekö i Iakobo. 6 Ame hnei Iakobo me itre sinatronge i angeic, hna traqa e Luza ene Bethela, ngöne la nöje Kanana. 7 E cili, angeic a acili ita ne huuje jë, me ati ëjen, Ele-bethela,* ke e cili hi lo kola mama la nyipi Akötresie, lo angeic a kötrene la mama i angeic. 8 E thupen, hna meci hnei Debora, lo ka thupë Rebeka, matre hna kelemi eahlo ezine Bethela, fene la ketre isinöe hna hën, Alona-bakota.*

9 Akötresie a mama hmaca pi koi Iakobo lo angeic a bëeke qa Padanarama, me amanathithi angeic. 10 Öni nyidrë: “Iakobo la ëje i eö, ngo tha tro hmaca kö a hë eö Iakobo, ngo Isaraela la ëje i eö.” Nge nyidrëti a nyiqaane hë angeice jë Isaraela. 11 Öni Akötresieti hmaca jë: “Eni la Akötresie ka Tru Trenge Men, tro ha ala nyimu catre la itre matra i eö. Troa xulu qaathei eö la itre nöj, itre nöj ka ala nyimu, nge tro fe la itre joxu a xulu qaathei eö. 12 Nge ame la nöj hnenge hna hamëne koi Aberahama me Isaaka, tro fe ni a hane hamë eö, me itre matra i eö.” 13 Nge Akötresieti a elë hmaca jë qaathei angeic, qa ngöne lo götran hnei nyidrëti hna ithanata me Iakobo.

14 Iakobo a acile jë la ketre itra etë ka draië, hmekune la götrane hnei Akötresie hna ithanata me angeic. Nge angeic a nenge pi hun ej la waina nyine fii huuj,* me oel. 15 Nge hnei angeice pala hi hna hëne la götrane hnei Akötresie hna ithanata me angeic ka hape, Bethela.

16 Angatr a feke pi qa Bethela, nge nanyi pala kö angatr qa Eferatha ngöne la kola hnaho hnei Rakela. Nge jole catre la angeic a hnaho. 17 Nge ame la angeic a akötre catr, önine la föe ka xomi upune ka hape: “The xou kö, ke ketre trahmanyi hmaca la hnei nyipoti hna troa hnahon.” 18 Drenge hë Rakela laka, kola troa patre la mele qaathei angeic (ke angeice hë a troa mec), matre angeic a ati ëjene jë la nekönatr, Benoni,* ngo keme pe a hë nyën, Beniamina.* 19 Ame hnei Rakela hna meci ju, nge hna kelemi angeic ngöne la gojenyi ne tro Eferatha, ene Betheleema. 20 Iakobo a acile ju la ketre itra etë hune la hua i Rakela, nge uti hë enehila, ame la itra etë cili, ke itra etë ne la hua i Rakela.

21 Isaraela a tro hmaca pi, nge thupene la hna sasaithe la ita ne thupe hna ati ëjene ka hape, Edera, angeic a acile ju la itat i angeic. 22 Ngöne la ketre drai, lo Isaraela a lapa e cili, hnei Reubena hna ce meköl me Bila, ketre föe ne la keme i angeic. Nge atre jë hi Isaraela.

Ala 12 lao nekö i Iakobo trahmany. 23 Ame qaathei Lea, Reubena la ka tru, me Simeona, me Levi, me Iudra, me Isakara me Zebulona. 24 Ame qaathei Rakela, Iosefa me Beniamina. 25 Ame qaathei Bila hlue i Rakela, Dana, me Nafatali. 26 Ame qaathei Zilepa hlue i Lea, Gada me Asera. Itre nekö i Iakobo lai hna hnahon e Padanarama.

27 E thupen, Iakobo a traqa pi koi Isaaka keme i angeic, e Mamere ezine Kiriath-areba, ene Heberona, nöj hnei Aberahama me Isaaka hna lapa trenyiwa. 28 Nge traqa koi 180 lao macatre ne mele Isaaka. 29 Ame hna patre pi la hnamano i nyidrë, nge nyidrëti a mec nge qatre hë nyidrë, nge lolo la mele i nyidrë.* Thupene lai, hna acasi nyidrë me nöje* i nyidrë, nge hnene la lue nekö i nyidrë, Esau me Iakobo, hna kelemi nyidrë.

36 Hane hi la pengöi Esau hna hën ka hape, Edoma.

2 Hnei Esau hna xomi föe thene la angetre Kanana: Ada nekö i Elona qa Heth, me Aholibama nekö i Ana nge api Zibeona qa Hivi. 3 Hnei angeice fe hna faipoipo me Basemathi nekö i Isamaela, xa i Nebaioth.

Celë hi la itre nekö i Esau trahmany, hna hnahon e Kanana. 6 Thupene lai, hnei Esau hna xome la itre föi angeic, me itre nekö i angeic, trahmanyi me jajiny, me nöjei hlue i angeic, me hnënge öni i angeic, me itre xa öni i angeic, me nöjei mo hnei angeic hna kapa e Kanana, nge angeic a tro pi kowe la ketre nöj, ka nanyi qaathei Iakobo jini angeic. 7 Ke eje hi, tru catre hë la itre ewekë i nyidro, matre thatreine hë nyidro ce lapa. Nge pine laka, tru catre hë la itre öni i nyidro, tha ijije hë la nöj hnei angatr hna lapan,* troa hamë xeni koi angatr asë. 8 Esau a lapa ju ngöne la itre wetr e Seira. Hna hë Esau fe ka hape, Edoma.

9 Hane hi la pengöi Esau, qaaqaa ne la angetre Edoma ka mel ngöne la itre wetr e Seira.

10 Hane hi la itre ëjene la itre nekö i Esau trahmany: Elifaza nekö i Ada sipu föi Esau, me Reuela nekö i Basemathi sipu föi Esau.

11 Itre nekö i Elifaza: Temana, me Omara, me Zefo, me Gatama, me Kenaza.

12 Timena la ketre föi Elifaza nekö i Esau. Hnei eahlo hna hnaho Amaleka. Celë hi itre api i Ada, sipu föi Esau.

13 Itre nekö i Reuela: Nakath, me Zera, me Sama, me Miza. Celë hi itre api i Basemathi, sipu föi Esau.

14 Hane hi la itre hna hnahon hnei Aholibama koi Esau: Ieuso, me Ialama, me Kora. Aholibama la ketre sipu föi Esau, nekö i Ana, nge api Zibeona.

15 Hane hi la itre tan* ne lapa ka xulu qaathei Esau: hane hi la itre nekö i Elifaza pane nekö i Esau: Tan Temana, me tan Omara, me tan Zefo, me tan Kenaza, 16 me tan Kora, me tan Gatama, me tan Amaleka. Itre tan ne la nöje Edoma, lo ka xulu qaathei Elifaza, api Ada.

17 Hane hi la itre nekö i Reuela nekö i Esau: Tan Nakath, me tan Zera, me tan Sama, me tan Miza. Itre tan ne la nöje Edoma, lo ka xulu qaathei Reuela, api Basemathi sipu föi Esau.

18 Hane hi la itre nekö i Aholibama sipu föi Esau: Tan Ieuso, me tan Ialama, me tan Kora. Itre tan ka xulu qaathei Aholibama, nekö i Ana nge sipu föi Esau.

19 Celë hi itre nekö i Esau ene Edoma. Nge itre tan i angatre fe.

20 Hane hi la itre nekö i Seira qa Hori, lo ka lapane la nöj: Lotana, me Sobala, me Zibeona, me Ana, 21 me Disona, me Ezera, me Disana. Celë hi itre tan i angetre Hori, itre nekö i Seira ka lapa e Edoma.

22 Itre nekö i Lotana: Hori me Homama. Timena la xa i Lotana.

23 Itre nekö i Sobala: Alevana, me Manakatha, me Ebala, me Sefo, me Onama.

24 Itre nekö i Zibeona: Aia me Ana. Ana hi lo ka öhne la itre tim ka qeq nge ka idreuth ngöne la hnapapa, lo angeic a thupëne la itre boliko i Zibeona keme i angeic.

25 Lue nekö i Ana: Disona la trahmany, nge Aholibama la jajiny.

26 Itre nekö i Disona: Hemedan, me Eseban, me Itheran, me Keran.

27 Itre nekö i Ezera: Bilehana, me Zaavana, me Akana.

28 Itre nekö i Disana: Uza me Arana.

29 Hane hi la itre tan i angetre Hori: Tan Lotana, me tan Sobala, me tan Zibeona, me tan Ana, 30 me tan Disona, me tan Ezera, me tan Disana. Celë hi itre tan i angetre Hori, ka lapa ngöne la nöje Seira.

31 Hane hi la itre joxu ka mus ngöne la nöje Edoma, qëmekene tro angetre Isaraela* a hetre joxu: 32 Bela nekö i Beora a musi e Edoma, nge Dinaba la ëjene la traone i angeic. 33 Ame hë la kola mec hnei Bela, hnei Iobab nekö i Zera qa Bozera hna mus thupei angeic. 34 Nge ame hë la kola mec hnei Iobab, hnei Husama qa Temana hna mus thupei angeic. 35 Nge ame hë la kola mec hnei Husama, hnei Hadada nekö i Bedada, lo ka lepi angetre Midiana ngöne la nöje* Moaba, hna mus thupei angeic. Avitha la ëjene la traone i angeic. 36 Nge ame hë la kola mec hnei Hadada, hnei Samela qa Masereka, hna mus thupei angeic. 37 Nge ame hë la kola mec hnei Samela, hnei Saulo qa Rehoboth ngöne la hneopegejë, hna mus thupei angeic. 38 Nge ame hë la kola meci hnei Saulo, hnei Baala-hanana nekö i Akebora, hna mus thupei angeic. 39 Nge ame hë la kola meci hnei Baala-hanana nekö i Akebora, hnei Hadara hna mus thupei angeic. Pau la ëjene la traone i angeic, nge Mehetabela la föi angeic, nekö i Matereda, nekö i Mezahaba.

40 Hane hi la itre ëjene la itre tan ka xulu qaathei Esau, thenge la itre fami, me thenge la itre götrane i angatr: Tan Timena, me tan Aleva, me tan Iethetha, 41 me tan Aholibama, me tan Ela, me tan Pinono, 42 me tan Kenaza, me tan Temana, me tan Mibezara, 43 me tan Magediela, me tan Irama. Celë hi itre tane i angetre Edoma, thenge la itre götran hnei angatr hna lapan. Celë hi itre matra i Esau, ene la angetre Edoma.

37 Iakobo a lapa ngöne la nöje Kanana, lo nöj hna lapa trenyiwa hnene la keme i angeic.

2 Hane hi la pengöne la mele i Iakobo.

Ka 17 lao macatre i Iosefa, nge angeic a thupëne la itre öni ka co. Ce angeic me itre nekö i Bila me Zilepa, lo lue xa föe ne la keme i angeic. Ngöne la ketre drai, hnene la nekö trahmanyi hna qajaqaja koi kem, la itre ewekë ka ngazo hna kuca hnene la itre mama i angeic. 3 Isaraela a nekö hnimë Iosefa, ke nekö ne qatre i angeic. Matre hnei Isaraela hna iupe troa cane koi angeic la ketre iheetr ka qea, nge ka mingöming. 4 Matre ame hë la itre mama i angeic a öhne laka, hna nekö hnimë Iosefa hnei kem, angatr a methinë angeice jë, nge xele hë angatr ma ithanata koi angeic.

5 E thupen, hnei Iosefa hna pu, nge hnei angeic hna qaja kowe la itre mama i angeic, ame hna methinë angeice catre jë hnei angatr. 6 Nge öni angeic: “Pane drenge ju la pung. 7 Easë a ukëne la itre feja nyipine la hlapa. Nge hnene la fejang hna mejë me cil. Nge hnene la itre feja i epun hna cile xötreithe la fejang, me thili kow.” 8 Matre önine la itre mama i angeic: “Eö ka hape, tro eö a joxu, me musinë hun?” Celë hi kepin, matre angatr a methinë angeice catre jë pine la pu i angeic, memine la hnei angeic hna qaja.

9 Thupene lai, hnei angeice hmaca hna pu me qaja kowe la itre mama i angeic. Öni angeic: “Hnenge hmaca hna pu, ngo enehila, hnene la jö me treu, me 11 lao wëtresij hna thili qëmekeng.” 10 Nge angeic a qaja ju fe koi keme i angeic. Ngo hnene la keme i angeic hna nango wesitr, me hape: “Nemene pu lai? Tro ni me thine i eö, me itre mama i eö a thil uti hë e kuhu hnadro qëmeke i eö?” 11 Ame hnene la itre mama i angeic hna zalu koi angeic. Ngo hnei keme hna lapa fë hnyawa la itre trengewekë cili.

12 Itre mama i angeic a tro fë jë la itre öni ka co ne la keme i angatr, kowe la itre hnë axö öni ezine Sekema. 13 E thupen, Isaraela a qaja jë koi Iosefa ka hape: “Itre mama i eö a thupë öni ezine Sekema, eje hi? Nge eni a ajan troa upi eö koi angatr.” Öni Iosefa jë hi: “Ka loi.” 14 Sa jë hi Isaraela ka hape: “Pane tro jë troa wange ka hape, tune kaa la itre mama i eö, nge tune kaa jë fe la itre öni, nge bëeke jë troa thuemacanyi ni.” Nyidrëti a upi Iosefa jë, qa ngöne la hnathup e Heberona a tro Sekema. 15 E thupen, hnene la ketre trahmanyi hna öhnyi angeic e tro ngöne la ketre hlapa, matre hnene lai trahmanyi hna hnyingë Iosefa la hnei angeice hna thel. 16 Öni angeice jë hi: “Eni a thele la itre mamang, pane qaja jë koi ni ka hape, ekaa la hnei angatr hna thupë öni?” 17 Nge önine hmaca jë lai trahmany: “Mejë hë angatre qa la, ke drenge hi ni lo angatr a qaja ka hape, ‘Treilo ma tro jë së Dothana.’” Iosefa a xötrëne hmaca jë la gojeny, nge traqa ju hi angeic a öhnyi angatr e Dothana.

18 Canga öhnyi angeice hi hnei angatr qa gaa nany. Matre qëmekene tro angeic a traqa, hnei angatr hna ce thë troa humuthi Iosefa. 19 Angatr a iqajakeune jë ka hape: “Goeën, hane hi lo la ka pu! 20 Tro sa humuthi angeic, me kuië angeic hnine la ketre hnë tha tim. Nge tro hë sa qaja ka hape, hna heji angeic hnei öni wael. Matre wange jë së ka hape, tune kaa ha lo itre pu i angeic!” 21 Matre ame la kola drenge hnei Reubena, hnei angeic hna thele jëne troa amele Iosefa. Matre öni Reubena: “The humuthi angeice kö.”* 22 Öni Reubena hmaca: “The aneni madra kö, kuië Iosefa pi hnine la time celë ngöne la hnapapa, ngo the kuca kö la ketre ewekë ka ngazo koi angeic.”* Ame la aja i Reubena, ke tro Iosefa a mel, me tro hmaca koi keme i angeic.

23 Nge ame hë la Iosefa a traqa ezi angatr, itre mama i angeic a una pi la iheetre i angeic, lo iheetr ka qea nge ka mingöming. 24 Nge angatr a kuië Iosefa pi hnine la hnë tha tim. Nge ngöne la ijine cili, pëkö tim e kuhu hnin.

25 Nge angatr a lapa ju troa xen, nge öhne ju hi angatre la tronge i angetre Isamaela ka traqa qa Gileada. Itre kamela i angatr a thue la itre ewekë nyine kuci drösinöe, me nyine kuci senitr, me itre kupeine sinöe ka sia. Nge angatr a uti a tro Aigupito. 26 Matre öni Iudra kowe la itre trejin me angeic: “Hnauëne laka, tro sa humuthe la jini së, me juetrëne la hne së hna kuca? 27 Salemë angeice pi pe kowe la angetre Isamaela, ngo the kuca kö la ketre ewekë ka ngazo koi angeic, ke jini së lai, nge sine la madra së.” Ame hna kapa hnene la itre trejin me angeic. 28 Nge hnei angatr hna aelë Iosefa qa ngöne la hnë tha tim, me salemë angeic koi 20 lao mani sileva kowe la itre ka itö qa Midiana, la kola tro ezi angatr. Matre hnei angetre Isamaela hna xomi Iosefa a tro Aigupito.

29 E thupen, hnei Reubena hna bëeke hmaca kowe la hnë tha tim, nge öhne ju angeic laka, patre hë Iosefa. Matre angeic a tha zezene pi la itre iheetre i angeic. 30 Angeic a tro ju troa wange la itre trejin me angeic, me hape: “Patre hë la nekönatr, nge tro pë hë ni la a kuci nemen?”

31 Matre angatr a xome ju la iheetre i Iosefa, me humuthe la ketre nani trahmany, me hnea la iheetr ngöne la madra. 32 Nge angatr a iupi fë pi la iheetre ka mingöming kowe la keme i angatr, fë la maca celë: “Hane hi la hne huni hna öhn. Pane wange ju ka hape, tha iheetrene la nekö i nyipëti kö la.” 33 Thupene la hna goeëne la iheetr, öni Iakobo jë hi: “Iheetre i nyëne hi! Maine jë, ase hë heje thaitrë nyën me öni hatrën.” 34 Ame hnei Iakobo hna tha zezene la itre iheetre i nyidrë. Nge nyidrëti a he la gö i nyidrë hnene la ibëek ka tru thenyin, me treije pine la nekö i nyidrë a nyimu drai. 35 Nge hnene la itre nekö i nyidrë trahmanyi me jajiny hna thele troa aupunyi nyidrë, ngo xele kö nyidrë. Öni nyidrë: “Tro ni a treije pine la neköng uti hë la tro ni a uti koi hua!”* Nge tha mano kö nyidrë treije pi angeic.

36 Ame hë e Aigupito, hnei angetre Midiana hna salemë Iosefa koi Potifara, ketre atre huliwa hnine la hnalapa i joxu, tane la itre sooc i Farao.

38 Ngöne la ijine cili, Iudra a trotrije pi la itre trejin me angeic, me acili itat ezine la hnalapa i Hira atre Adulama. 2 E cili, öhne ju hi Iudra la ketre jajiny, nekö ne la atre Kanana, Sua la ëjen. Angeic a faipoipo jë memin, me ce meköle memin. 3 Nge upune jë hi lai föe. Eahlo a hnahone pi la nekö trahmany, Era la ëjen. 4 Nge eahlo a upune hmaca pi, me hnahone la nekö trahmany, Onana la ëjen. 5 Eahlo a hnahone hmaca pi la ketre nekö trahmany, Sela la ëjen. Angeic* e Keziba la eahlo a hnaho.

6 E thupen, hnei Iudra hna xomi föe koi Era, pane nekö i angeic, Tamara la ëjen. 7 Ngo ame Era, pane nekö i Iudra, hna nuetriji angeic hnei Iehova. Celë hi matre humuthi angeice pi hnei Iehova. 8 Öni Iudra jë hi koi Onana: “Eatrëne jë la hnëqa i eö kowe la trejin me eö. Faipoipo jë memine la föene la mama i eö, nge nyi matra i angeice jë.” 9 Ngo atre hi Onana laka, ame la itre hna troa hnahon, tre tha nyine matra i angeice kö. Matre, ame la angeic a ce meköl memine la föene la mama i angeic, angeic a neng e kuhu hnadro la trenge zane i angeic, matre tha tro kö a nyi matrane la mama i angeic. 10 Ewekë lai hna sisin hnei Iehova, matre nyidrëti a humuthi angeice pi fe. 11 Ame hnei Iudra hna qaja koi Tamara tresi angeic, ka hape: “Lapa sine föe ju hnine la hnalapa ne la keme i eö, uti hë la tro Sela neköng a tru.” Nge ma kola mekune hnei Iudra ka hape: “Ma tro jë nyëne elanyi lai a hane mec tune la lue mama i nyën.” Ame hnei Tamara hna tro troa lapa thene la keme i angeic.

12 Tro ju pë hë la itre drai, nge meci pi la föi Iudra, lo nekö i Sua. Thupene la hna pane metrötrëne la ijine hnëmec, hnei Iudra hna tro Timenatha troa wange la itre ka xötre pene mamoe i angeic, nge ce angeic me Hira qa Adulama, lo sine i angeic. 13 Ame hna thuemacanyi Tamara ka hape: “Kem ne la fö i eö a elë a tro Timenatha troa xötre pene mamoe.” 14 Matre angeic a una pi la iheetre ne hnëmec, me atu he me heetrë isol, nge angeic a tro ju troa lapa ngön la hnë lö e Enaima, ngöne la gojenyi ne tro Timenatha. Ke öhne hi angeic laka, tru hë Sela, ngo tha hna hamë angeice kö troa föi Sela.

15 Matre ame hë la Iudra a öhnyi angeic, öni Iudra ka hape, ma ketre föe ne gojenyi la, ke ka atu ialamek. 16 Matre hnei Iudra hna jea koi angeic me hape: “Eni a sipo eö tro nyiso a ce meköl.” Ngo thatre kö Iudra ka hape, tresi angeice hi. Matre önine lai föe: “Nemene la nyine tro nyipëti a hamë ni nyine thupen la hna ce meköl?” 17 Öni Iudra jë hi: “Tro ni a upe koi eö la ca neköi nani qa ngöne la itre sing.” Ngo önine jë hi lai föe: “Nemene la hnei nyipëti hna troa amë pe koi ni enehila nyine anyipicin?” 18 Nge öni Iudra: “Nemene la nyine tro ni a amë thei eö?” Sa jë hi lai föe: “Otrene wanakoime nyine pelehatren i nyipë, memine la otren ej, memine fe lai sine tö hnei nyipëti hna ea.” Ame hnei Iudra hna hamëne kowe la föe, me ce meköl memin, nge upune pi hi la föe. 19 Nge hnene la föe hna tro hmaca, me una la isol, me heetrëne hmaca la iheetr ne hnëmec i angeic.

20 Iudra a upe pi la sine i angeic qa Adulama troa tro fë kowe lai föe la neköi nani, me xome hmaca la nyine anyipicin. Ngazo pe, tha öhnyi eahlo ju kö. 21 Matre angeic a hnyingëne jë kowe la itre trahmany e cili ka hape: “Ekaa ha lo föe ne gojeny* ka cil ezine la gojeny e Enaima?” Ngo öni angatr: “Qaane ekö, pëkö föe ne gojeny* e celë.” 22 Matre angeic a bëeke jë koi Iudra me hape: “Tha öhnyi angeice kö ni, nge önine la itre trahmanyi ne cili ka hape, pëkö föe ne gojenyi thei angatr.” 23 Matre öni Iudra jë hi: “Nue pi hë koi angeic, wanga hnyima sai nyiso jë. Ase hë ni lai iupi fë la neköi nani, ngo tha öhnyi angeice kö hnei eö.”

24 Thupene la köni treu, hna thuemacanyi Iudra ka hape: “Hnei Tamara tresi nyipë hna nyi föe ne gojeny, nge upune hë angeic.” Matre öni Iudra: “Xomi angeice pi a tro kuhu trön, nge dreuthi angeice pi.” 25 Nge ame la kola xomi angeic a tro e kuhu trön, hnei angeic hna upe la ketre atre kowe la keme ne la föi angeic, me hape: “Eni a upune hnene la atrekë ewekëne la itre ewekë ce. Matre pane wange hnyawa ju la otrene wanakoim nyine pelehatren celë, me otren ej, memine la sine tö, nge wange ju ka hape, itre ewekë i drei.” 26 Ase jë hi goeëne hnyawa la itre ewekë cili, öni Iudra: “Meköti kö angeice hui eni, ke tha hnenge kö hna hamë angeic koi Sela neköng.” Nge qaane ju hi lai, tha hnei nyidroti hmaca kö hna ce meköl.

27 Ame hë la angeic a hnaho, mama pi hi laka, lue fini e kuhu hni angeic. 28 Ame la angeic a hnaho, hnene la ketre e nyidro hna tro pa iwanakoim, matre hnene la föe ka xomi upune hna hnöthe la ketre sine thenyi ka madra kowe la ime i nyën, me hape: “Nyëne hi la ka pane traqa.” 29 Ngo ame la nyën a uthe hmaca la iwanakoim, ketre pena ha la ka traqa. Matre önine la föe: “Hnei eö hna ka thenge!”* Ame hna hë nyën, Farez.* 30 Thupene lai, traqa pi hi lo hna othe iwanakoimen hnei thenyi ka madra. Ame hna ati ëje i nyën, Zera.

39 Hna xomi Iosefa a tro Aigupito hnene la angetre Isamaela. Nge hnei angatr hna salemë angeice koi Potifara atre Aigupito, ketre atre huliwa ngöne la hnalapa i Farao, tane la itre sooc i Farao. 2 Ngo ce Iehova me Iosefa. Celë hi matre, hna tro loi pala hi la nöjei huliwa i Iosefa. Matre hna acili angeic hune la hnalapa ne la maseta i angeic, atre Aigupito. 3 Nge öhne hi la maseta i angeic ka hape, ce Iehova me Iosefa, nge Iehova pala hi a eatrëne la nöjei huliwa i Iosefa.

4 Nge ka madrine Potifara koi Iosefa, nge angeice la hlue hnei Potifara hna mejiune kow. Matre Potifara a acili angeice ju hune la hnalapa i nyidrë, me upi angeic troa thupëne la nöjei ewekë i nyidrë. 5 Qaane lo Potifara a acili Iosefa troa musinëne la hnalapa i nyidrë, me nöjei ewekë i nyidrë, hnei Iehova pala hi hna amanathithine la hnalapa ne lai atre Aigupito, pi Iosefa. Nge mama hi la manathith qaathei Iehova ngöne la nöjei ewekë i Potifara, itre ewekë hnine la hnalapa i nyidrë, me ngöne la itre hlapa i nyidrë. 6 Ame hnei Potifara hna nu asë la itre ewekë i nyidrë koi Iosefa, pëkö hnei nyidrëti hna hnehengazon, ngo loi pe troa hetre xen. Ketre, mingöminge hë Iosefa, nge ka lolo la hmae i angeic.

7 Matre hnene la föi Potifara hna nyiqaane goeë Iosefa me hape: “Ce meköle ju me eni.” 8 Ngo xele kö Iosefa, nge öni angeic kowe la föe ne la maseta i angeic: “Pane dreng! Hnene la masetang hna nu asë la itre ewekë i nyidrë koi ni, nge pë hmaca kö nyine tro nyidrëti a hane kuca ngöne la hnalapa. 9 Pëkö ketre atre ka draië hung ngöne la hnalapa ce, nge pëkö ca ewekë hnei nyidrëti hna cipane koi ni, ngo nyipoti hmekuje hi, ke föi nyidrëti nyipo. Nge ngazo ka tru lai, matre hnauëne laka, tro ni a kuca la ngazo cili koi Akötresie?”

10 E nöjei drai, tha mano kö eahlo ithanata koi Iosefa. Ngo xele pala hi angeic ma ce meköl me eahlo, me ce lapa me eahlo. 11 Ame la ketre drai, hnei angeic hna lö ngöne la uma troa huliwa, nge pëkö ca hlu e cili, 12 matre hnei eahlo hna ea la iheetre i Iosefa, me hape: “Ce meköle ju me eni.” Nge angeic a nue pi la iheetre i angeic ngöne la ime i eahlo, me kötre lö pi. 13 Nge ame hë la eahlo a öhne laka, hnei angeic hna nue la iheetre i angeic ngöne la ime i eahlo, me kötre lö, 14 eahlo a sue jë kowe la itre trahmany ne la hnalapa i eahlo me hape: “Öhne i epuni la, hnei nyidrë hna traqa fë la atre Heberu celë, matre troa ahmahmanyi së. Hnei angeic hna thele troa ce meköl me eni, ngo eloine pe, hnenge hna sue catr. 15 Nge ame hë la angeic a drei ni e sue, angeic a nuetrije pi la iheetre i angeic ezing, me kötr.” 16 Thupene lai, eahlo a lapa fë ju la iheetre i Iosefa, uti hë traqa hmaca la maseta i Iosefa.

17 Ame hnei eahlo hna qaja hmaca jë koi nyidrë ka hape: “Hnene la hlu atre Heberu, hnei nyipëti hna traqa fë koi hun, hna ahmahmanyi ni. 18 Ngo ame ju hi la angeic a drei ni e sue, angeic a nuetrije pi la iheetre i angeic ezing, me kötr.” 19 Matre ame hë la Potifara a drenge la föi nyidrë e hape: “Hane hi la hna kuca koi ni hnene la hlue i nyipë,” elëhni jë hi nyidrë. 20 Matre hnene la maseta i Iosefa hna kuië angeic ngöne kalabus, lo hna akalabusine la itre hna othe hnei joxu. Matre hnei Iosefa hna lapa kalabus.

21 Ngo ce Iehova pala hi me Iosefa, nge nyidrëti pala hi a amamane la ihnimi nyipici nyidrë koi Iosefa. Matre nyidrëti a kuca jë matre tro la tane kalabus a kapa alonyi Iosefa. 22 Hnene la tane kalabus hna acili Iosefa hune la itre hna akalabusin. Iosefa la ka thewe huliwa hnine la kalabus. 23 Tha goeëne hë la tane kalabusi la itre huliwa i Iosefa, ke ce Iehova me Iosefa, nge Iehova pala hi a kuca, matre tro loi la nöjei huliwa i Iosefa.

40 E thupen, hnene la tane la itre ka kepe trepe ime i joxu, memine la tane la itre ka sa falawa, hna ngazo kowe la joxu i angatr, lo joxu ne Aigupito. 2 Matre hnei Farao hna elëhni kowe la lue ka huliwa koi nyidrë, lo tane la itre ka kepe trepe ime i joxu, memine la tane la itre ka sa falawa. 3 Nyidrëti a akalabusi nyidroti ju, hnine la kalabus ne la tane la itre sooc i joxu, lo hna umë Iosefa. 4 Nge hnene la tane la itre sooc i joxu, hna upi Iosefa troa lapa me nyidro, me thupë nyidro. Hna akalabusi nyidro kowe la ketre hnepe ijin.

5 Nge ngöne la kalabus, hnene la ka kepe trepe ime i joxu, memine la ka sa falawa kowe la joxu ne Aigupito, hna isa pu ngöne la ca jidr. Hetre aliene la lue pu i nyidro. 6 Nge ame e hmakany hnei Iosefa hna tro troa wai nyidro, ngo tha loi kö la qëmeke i nyidro. 7 Öni angeice jë hi: “Hnauëne la kola ngazo la lue ialameke i epon?” 8 Nge öni nyidro: “Hnei nyio hna isa pu, ngo pëkö ka atreine qejepengön.” Matre öni Iosefa: “Hapeu, tha Akötresieti kö la ka troa qejepengön? Pane qaja jë koi ni.”

9 Ame hnene la tane la itre ka kepe trepe ime i joxu, hna porotrikëne la pu i angeic koi Iosefa. Öni angeic: “Hnenge hna puje la ketre wene vin qëmekeng. 10 Hune lai vin,* hetre köni picin, nge ej a wa wene me eng, nge hna hmedre la itre wene vin. 11 Nge eni a cila xome la vere i Farao, matre eni a xome ju la itre wene vin, me öje kowe lai ver, me line hmaca koi Farao.” 12 Öni Iosefa jë hi: “Hane hi la alien. Ame la köni picin, tre köni drai. 13 Thupene la köni drai, tro Farao a xomi* eö qa hnine kalabus, me acili eö hmaca ngöne la huliwa i eö. Tro hmaca kö eö a kepe trepe ime i nyidrë, tune ekö lo. 14 Ngo the thëthëhmi ni kö e loi hë eö, amamane jë la ihnimi nyipici eö koi ni, me qeje ni koi Farao, matre hane pi ni lö qa la. 15 Hna xomi ni qaathene la nöje i angetre Heberu, matre hna akalabusine menu ni.”

16 Nge ame hë la tane la itre ka sa falawa a dreng ka hape, kola qeje loi la aqane qejepengöne Iosefa, öni angeic: “Hnenge fe hna puji ni. Nge kola të la köni trenge falawa ka wië hune la heng. 17 Nge ngöne la treng e koho, ka tiqa hnei ewekë hna san koi Farao, nge itre waco a xen ngöne lai treng, hune la heng.” 18 Iosefa a sa jë ka hape: “Hane hi la alien. Ame la köni treng, tre köni drai. 19 Thupene la köni drai, tro Farao a thupa la he i eö, me athipi eö hune la sinöe, nge tro la itre waco a öni la ngönetrei eö.”

20 Thupene la köni drai, kola feetëne la drai ne hnaho i Farao, matre nyidrëti a kuci xeni jë kowe la nöjei hlue i nyidrë. Nge qëmeke i angatr, nyidrëti a xome pi qa kalabusi la tane la itre ka kepe trepe ime i joxu, memine la tane la itre ka sa falawa. 21 Nyidrëti a acile hmaca jë la tane la itre ka kepe trepe ime i joxu, nge angeic a nei ime i joxu hmaca jë. 22 Ngo ame pë hë la tane la itre ka sa falawa, nyidrëti a athipi angeice jë, tune lo aqane qejepengöne Iosefa. 23 Ngo thëthëhmi Iosefa ha hnene lo tane la itre ka kepe trepe ime i joxu.

41 Lue macatre thupen, hnei Farao hna puji nyidrë ezine la hneopegejë Nil. 2 Hna elë qa ngöne la Nil la 7 lao kau föe ka kökötre lolo me giris. Nge angatr a nyiqaane xeni haö trootro jë ezine la hneopegejë. 3 Nge hnene la 7 lao kau föe, ka ngazo itrei nge ka wegeju, hna hane fe elë qa ngöne la Nil, thupene la itre kau ka giris. Nge hnene la itre ka wegeju hna ce cile me itre ka giris. 4 Matre hnene la itre kau ka ngazo itrei nge ka wegeju, hna nyiqaane öni la 7 lao kau ka kökötre lolo me giris. Nge hlë jë hi Farao.

5 Nyidrëti a meköle hmaca pi, me puj la kola ce cia la 7 lao ene qitr ka kökötre lolo, ngöne la ca ngöne qitr. 6 Nge hna cia fe la 7 lao qitr ka aenë me fitr, ke qaqacile hë hnene la enyi ne koië. 7 Nge hnene la 7 lao qitre ka aenë hna ulume la 7 lao qitre ka kökötre lolo. Nge hlë jë hi Farao a atre laka, nyidrëti a pu.

8 E hmakany, tha lapa hnyawa ha Farao. Matre nyidrëti a hën asë jë la itre atre huuj ka trene haze, me itre ka inamacan e Aigupito. Nyidrëti a qaja jë koi angatr la itre pu i nyidrë, ngo pëkö ka atreine qejepengön.

9 Matre hnene la tane la itre ka kepe trepe ime i Farao hna hape: “Menu hë ni ke ca ngazonge la. 10 Ngöne la ketre drai, hnei Farao hna wesitre kowe la itre hlue i nyidrë, nge hnei nyidrëti hna kuië ni hnine la kalabus ne la tane la itre sooc i joxu. Hna ce umë ni memine lo tane la itre ka sa falawa. 11 Thupene lai, hnei nyio hna isa pu ngöne la ca jidr, ngo ame la lue pu i nyio, isa pengöne kö la alien ej. 12 Ce nyio memine la ketre thupëtresij, atre Heberu. Angeice la hlue ne la tan la itre sooc i joxu. Nge ame la nyio a ase qaja koi angeic la lue pu i nyio, angeic a qejepengöne jë koi nyio. 13 Nge hna eatre hnyawa la hnei angeice hna qaja. Hna acili ni hmaca ngöne la hnëqang, nge hna athipe pë hë lo ketre trahmany.”

14 Ame hnei Farao hna iupe troa thei Iosefa. Nge hna canga xomi angeic qa kalabus, nge angeic a icinyi jë, me saze iheetr, me lö koi Farao. 15 Farao a qaja ju koi Iosefa ka hape: “Hnenge hna pu, ngo pëkö ka atreine qejepengön. Ngo drenge hë ni laka, e troa qaja la ketre pu, atreine hi eö troa qejepengön.” 16 Ngo sa jë hi Iosefa ka hape: “Tha eni kö, ngo tro kö Akötresie a qaja la maca ka loi koi Farao.”

17 Ame hnei Farao hna qaja koi Iosefa ka hape: “Eni a puj la eni a cil ezine la hneopegejë Nil. 18 Hnene la 7 lao kau föe ka kökötre lolo me giris, hna elë qa ngöne la Nil, me xeni haö trootro ezine la hneopegejë. 19 Nge hnene la 7 lao kau föe, hna hane fe elë thupene la itre ka giris. Itre kau ka kucakuca, nge ka ngazo itrei me wegeju. Pë fe kö itre kau ka ngazo itreine tun hnenge hna hane öhne e Aigupito. 20 Nge hnene la itre kau cili, ka ngazo itrein me wegeju, hna öni la 7 lao kau ka giris. 21 Ngo ame hë la angatr a ase öni, pëkö ka atreine qaja ka hape, hnei angatr hna öni lo itre xan, ke casi pala hi la aqane ngazo la itrei i angatr, me wegeju, ene pe hlë jë hi ni.

22 “Thupene lai, hnenge hna öhne ngöne la pung, la 7 lao ene qitr ka kökötre lolo ngöne la ca ngöne qitr. 23 Nge hna cia fe la 7 lao ene qitr ka qaqacil, me aenë me fitr, ke qaqacil la enyi ne koië. 24 Nge hnene la itre ene qitre ka aenë, hna ulume la 7 lao ene qitre ka kökötre lolo. Ase hë ni qaja lai kowe la itre atre huuj ka trene haze, ngo pëkö ka atreine qejepengöne koi ni.”

25 Matre öni Iosefa koi Farao: “Casi hi la aliene la lue pu i Farao, matre hnene la nyipi Akötresie hna thuemacanyi Farao la hnei nyidrëti hna troa kuca. 26 Ame la 7 lao kau föe ka lolo, ke 7 lao macatre. Nge ame la 7 lao ene qitr ka lolo, ke 7 fe lao macatre. Casi hi la aliene lai lue pu. 27 Ame la 7 lao kau föe, thupen lo ka ngazo itrein me wegeju, ke 7 lao macatre. Nge ame la 7 lao ene qitr ka aenë, nge ka qaqacil hnene la enyi ne koië, tre 7 lao macatre ne jiin. 28 Nge tune lo hnenge hna qaja koi Farao, kola amamane koi Farao hnene la nyipi Akötresie, la itre ewekë hnei nyidrëti hna troa kuca.

29 “Tro ha traqa la 7 lao macatre ne mana e Aigupito. 30 Thupene lai, troa xulu la 7 lao macatre ne jiin. Nge troa thëthëhmine la aqane mana e Aigupito. Nge tro ha kucakuca la nöj hnene la jiin. 31 Pine laka, tro ha catrehnine la jiin, tro ha thëthëhmine la aqane mana la xeni ngöne la nöj. 32 Hna alua pu hnei Farao, ke xecie hnyawa kowe la nyipi Akötresie troa eatrën asë lai. Nge easenyi hë matre eatrëne jë nyidrë.

33 “Enehila, epi tro Farao a thele la ketre atre ka hetre wangatrehmekun, nge ka inamacan, matre troa acilë angeic hune la nöje Aigupito. 34 Tro angeic a acile la itre tan ngöne la nöj, nge qa i angatr troa xome la sin* ne la itre xeni hna menuën e Aigupito, hmekune la 7 lao macatre ne mana la xen. 35 Tro angatr a ce amë la nöjei xeni hna troa menuëne ngöne la itre macatre ka lolo ka troa traqa. Nge tro angatr a hnëkë göhnene la itre wene feja, nge tro ha thupën hnei Farao. Nge troa amë hnyawane la itre wene feja cili ngöne la itre traon. 36 Nge tro la itre xeni cili, a nyi kemeje kowe la 7 lao macatre ne jiin e Aigupito. Qa ngöne lai, tha tro kö la nöjei atr me öni a meci hnene la jiin.”

37 Madrine hi Farao me itre hlue i nyidrë kowe la hna qaja. 38 Öni Farao jë hi kowe la itre hlue i nyidrë: “Hetre ketre atre kö ka tui angeice la, ka hetrenyi la ua i Akötresie?” 39 Thupene lai, öni nyidrëti koi Iosefa: “Pine laka, Akötresie la ka amamane lai koi eö, pëkö xa atre ka hetre wangatrehmekun, nge ka inamacane tui eö. 40 Eö hi la ka ijij troa thupën la hnalapang, nge tro asë hi la nöjeng a drengethenge eö. Ngo eni a draië hui eö, ke joxu ni.”* 41 Öni Farao hmaca: “Dreng! Eni a nue la nöje Aigupito asë koi eö.” 42 Thupene lai, Farao a hule pi la otrene wanakoime i nyidrë nyine pele hatren, me line kowe la hene* wanakoime i Iosefa, me heetrë angeic hnei nyipi iheetre lino, me afenane ngöne la nyinawa i Iosefa la finiceine gool. 43 Nge nyidrëti a aelë angeice jë hune la hnaaluene ikatre ka mingöming i nyidrë, nge kola suen qëmeke i Iosefa ka hape: “Avrek!”* Celë hi aqane kuca i Farao troa acili Iosefa hune la nöje Aigupito asë.

44 Öni Farao hmaca koi Iosefa: “Farao ni, ngo e tha hna pane sipo eö kö, pëkö ka atreine kuca la ketre ewekë* e Aigupito.” 45 Thupene lai, Farao a ati ëje i Iosefa, Zafenatha-paenea. Nge nyidrëti a hamë Asenatha jë, la nekö i Potifera atre huuj e Ona,* troa föi Iosefa. Nge angeic a nyiqaane musi ju e Aigupito. 46 Traqa koi 30 lao macatre i Iosefa, lo angeic a nyiqaane huliwa* koi Farao joxu ne Aigupito.

Thupene lai, Iosefa a tro ju qaathei Farao, me trongëne la nöje Aigupito asë. 47 Ngöne la 7 lao macatre ne mana la xen, kola hame menu la itre hlapa. 48 Matre angeic a xawane jë la xeni hna menuën e Aigupito, ngöne la 7 lao macatre, nge angeic a amë acone jë hnine la itre traon. Ngöne la nöjei traon, angeic a amë hnyawa la itre xeni hna traqa fë qa ngöne la itre hlapa ezin. 49 Angeice pala hi a amë acone la itre wene feja ka nyimutre, kösë wenengöni ne ngönegejë. Nge tha e hë angatre la etrune la xen, ke thatreine hë angatr.

50 Qëmekene la pane macatre ne jiin, hnei Asenatha nekö i Potifera atre huuj e Ona,* hna hnahone la lue nekö trahmany koi Iosefa. 51 Hnei Iosefa hna hëne la ka tru, Manase,* ke öni angeic: “Hnei Akötresie hna kuca matre thëthëhmine pi ni la itre akötreng, me fami i kaka.” 52 Nge angeic a hëne jë la hnaaluen, Eferaima,* ke öni angeic: “Hnei Akötresie hna hamë neköng ngöne la nöj hna akötrë ni.”

53 Thupene lai, fenesi pi hi la 7 lao macatre ne mana la xen e Aigupito. 54 Nge hna nyiqaane la 7 lao macatre ne jiin, tune lo hna qaja hnei Iosefa. Kola jiin ngöne la nöjei nöj, ngo tha e Aigupito fe kö, ke hetre xeni pala hi. 55 Ngo ame hë la kola lapan asë la nöje Aigupito hnei mecijiin, hnene la itre atr hna treije koi Farao troa hetre falawa. Ame hnei Farao hna qaja kowe la angetre Aigupito asë ka hape: “Tro jë koi Iosefa, nge kuca jë la hnei angeice hna troa qaja.” 56 Ase hë haöthe la fen asë hnene la jiin, matre Iosefa a fe pi la itre hnë ami xen, me salemëne la itre wene feja koi angetre Aigupito, ke catrehnine catre la jiin e Aigupito. 57 Nge kola tro Aigupito hnene la itre atr qa ngöne la nöjei nöj, troa itö wene feja thei Iosefa, ke catrehnine catre la jiin ngöne la fen asë.

42 Ame hë la Iakobo a drenge laka, hetre xen* e Aigupito, öni nyidrë kowe la ha nekö i nyidrë: “Epuni a ilapa goeë fë nemen?” 2 Öni nyidrëti hmaca: “Drenge hë ni ka hape, hetre xen e Aigupito. Tro jë troa pane itö xen koi së, matre tro sa mel, nge tha tro kö sa mec hnei mecijiin.” 3 Ame hnene la 10 lao trejin me Iosefa hna uti a tro Aigupito troa itö xen. 4 Ngo tha hnei Iakobo kö hna upi Beniamina, lo jini Iosefa, troa ce tro memine la itre mama i angeic, ke öni nyidrë: “Wanga traqa pi la ketre ewekë ka ngazo koi nyën, nge meci pi nyën.”

5 Hnene la itre nekö i Isaraela hna traqa e Aigupito, nge hetre itre xane fe ka traqa troa hane itö xen, ke hna haöthe la nöje Kanana hnei jiin. 6 Iosefa la ka musi kowe la nöj, nge angeice la ka salemë xen kowe la nöjei atre ka traqa qa ngöne la nöjei nöj. Matre hnene la itre mama i Iosefa hna traqa, me thil e kuhu hnadro qëmekei angeic. 7 Nge ame hë la Iosefa a öhne la itre mama i angeic, canga wangatrehmekunyi angatre ju hi hnei Iosefa, ngo tha qaja pi kö angeic ka hape, drei angeic. Nge hnei angeic hna ithanata akökötrenyi koi angatr. Öni angeic: “Angetre kaa epun?” Nge sa jë hi angatr ka hape: “Kanana. Eahuni a traqa troa itö xen.”

8 Iosefa a wangatrehmekune la itre mama i angeic, ngo tha wangatrehmekunyi angeice kö hnei angatr. 9 Nge canga mekune jë hi angeic, lo angeic a puji angatr. Matre öni Iosefa: “Epuni a traqa troa goeën la nöj, matre thele la itre ewekë ka pë ngöne la nöj.” 10 Öni angatre jë hi: “Pëkö joxu, eahuni a traqa troa itö xen. 11 Casi hi la keme hun, nge itre atre ka meköti hun. Nge joxu, tha eahuni kö a traqa troa goeëne la nöj.” 12 Ngo öni angeic: “Epuni a thoi! Epuni a traqa troa thele la itre ewekë ka pë ngöne la nöj.” 13 Nge sa jë hi angatre ka hape: “Joxu, ala 12 eahun, itre trejin. Nge casi hi la keme hun. Nyidrëti a lapa e Kanana. Ce nyidrëti memine la wene puhnen, nge patre pë hë la ketre.”

14 Iosefa a qaja hmaca jë ka hape: “Eje hi lo hnenge hna qaja, epuni a traqa troa goeëne la nöj!” 15 Tro ni a pane wange ka hape, ka nyipici kö la hnei epuni hna qaja. Loine Farao, tha tro jë kö epuni a tro qa la, e tha pane traqa kö la jini epun. 16 Pane upe pi la ketre trejin me epun troa thenge la jini epun, nge troa umëne la itre xan e celë. Nge tro hë ni a öhne ka hape, nyipici kö la hnei epuni hna qaja. Ngo e tha kuca kö epun, loine Farao, ame koi ni, epuni a traqa troa goeëne la nöj.” 17 Nge angeic a ce umë angatre jë hnine la kalabus koi köni drai.

18 Ngöne la hnaakönine drai, öni Iosefa koi angatre ka hape: “Pine laka ka xoue Akötresieti ni, nge maine epuni a pi mel, hane hi la nyine tro epuni a kuca: 19 Maine itre ka meköti epun, tro pë hë la ketre a lapa kalabus, nge tro itre xan a bëeke fë la itre xen kowe la itre fami epun ka mecijin. 20 Nge bëeke fë jë koi ni la jini epun, nge tro ha mama koi ni laka, hnei epuni hna qaja la nyipici. Nge tha tro kö epuni a mec.” Ame hnei angatr hna kapa.

21 Angatr a iqajakeune ju ka hape: “Mama hi laka, easa xeni pune lo hne së hna kuca kowe la jini së. Ke öhne hi së lo akötre i angeic, lo angeic a treije xëwe, ngo tha hne së kö hna dreng. Ame hë enehila, traqa ha la akötre koi së. ” 22 Öni Reubena hmaca: “Ase hë ni lo qaja koi epun ka hape, tha tro kö a akötrëne* la nekönatr. Ngo xele kö epuni ma drei ni, nge ame hë enehila, easa xeni pune la madra i angeic hne së hna anenin.” 23 Thatre kö angatre ka hape, trotrohnine hi Iosefa, pine laka, hetre ka ujë qene hlapa koi angeic. 24 Matre Iosefa a pane ananyi angatre jë, me treij. Nge ame hë la angeic a bëeke troa ithanata me angatr, angeic a ië Simeona jë, me othi Simeona qëmeke i angatr. 25 Thupene lai, hnei Iosefa hna upe troa nyialiene la itre watrenge* i angatr hnei xen, me amë hmaca la manie i angatr ngöne isa watrenge i angatr, me hamë kemeji angatr göi gojeny. Hane hi lai ewekë hna kuca.

26 Angatr a atë jë la itre xen hune la itre boliko, me tro. 27 Ame la angatr a cil troa mano e jidr, hnene la ketre hna fe la watrenge i angeic troa ithuane la boliko i angeic. Nge öhne ju angeic la mani ngöne la watreng. 28 Matre öni angeic kowe la itre trejin me angeic: “Hna hamë ni hmaca la mani, nge eje kö hnine la watrengeng.” Angatr a isa sesëkötre ngazo me hape: “Nemene la hna kuca koi së hnei Akötresie?”

29 Nge ame hë la angatr a traqa e Kanana koi Iakobo keme i angatr, angatr a qaja asë jë koi nyidrë la ka traqa koi angatr. Angatr a qejepengöne jë koi nyidrë ka hape: 30 “Ame lo atre ka musi kowe la nöj, hnei nyidrëti hna ithanata akökötrenyi koi hun, me qaja ka hape, eahuni a traqa troa goeën la nöj. 31 Ngo hne huni hna sa koi nyidrë ka hape, ‘Itre atre ka meköti hun, nge tha eahuni kö a traqa troa goeëne la nöj. 32 Ala 12 eahun itre trejin, nge casi hi la keme hun. Patre hë la ketre trejin me eahun, nge ame la wene puhnen, angeice thei kaka e Kanana.’ 33 Ngo önine la joxu ne la nöj ka hape, ‘Hane hi la aqane tro na atre ka hape, itre atre ka meköt epun: lapa ju pë hë theng la ketre e epun. Nge xomi xeni jë kowe la itre fami i epun ka mecijiin, nge tro jë hë. 34 Nge bëeke fë jë koi ni la jini epun, matre mama jë koi ni laka, itre atr ka meköti epun. Nge tro hmaca ni a nue la trejin me epun, nge tro hë epuni a salem ngöne la nöj.’”

35 Nge ame hë la angatr a hule la aliene la itre watrenge i angatr, öhne ju hi angatre laka, eje kö hnine la itre watrenge i angatr la isa trengene mani i angatr. Matre ame hë la angatr me keme i angatr a öhne lai mani, xou i angatre ju hi. 36 Matre öni Iakobo jë hi: “Tro hë ni a pë nekönatr hnei epun. Patre hë Iosefa, me Simeona, nge epuni fe a troa xomi Beniamina. Kola traqa koi ni la itre ewekë celë.” 37 Matre öni Reubena kowe la keme i angeic ka hape: “Tro hë nyipëti a humuthe la lue neköng, e tha bëeke sai nyëne kö ni. Nue nyëne pi koi ni, nge tro ni a bëeke sai nyën koi nyipë.” 38 Ngo öni Iakobo: “Tha tro kö la neköng a ce uti me epun, ke meci hë la mama i nyën, nge nyëne pe hi. Nge e traqa jë la ketre ewekë ka ngazo koi nyën, nge tro nyën a mec, tro hë ni* a uti koi Hua* fë la akötreng.”

43 Catrehnine catre la jiin ngöne la nöj. 2 Matre ame hë la angatr a ase xeni la hnei angatr hna itön qa Aigupito, önine la keme i angatr ka hape: “Tro hmaca jë epuni a itö xen.” 3 Ngo sa jë hi Iudra ka hape: “Önine lo trahmany, tha tro hmaca kö huni a lö koi nyidrë, e tha ce eahuni kö memine la jini hun. 4 Maine tro nyipëti a ce upi hun memine la jini hun, tro hë huni a itö xeni koi nyipë. 5 Ngo e tha upi nyëne kö hnei nyipë, tha tro kö eahuni a tro. Ke önine lo trahmany, ‘Tha tro hmaca kö epuni a lö koi ni, e tha ce epuni kö memine la jini epun.’” 6 Öni Isaraela e sue ka hape: “Ke epuni a qaja fë nemene kowe lai atre ka hape, hetre jini epuni pala kö? Goeën, jole hë ni la hnei epun.” 7 Matre öni angatr: “Hnene la atre hna hnyingë pengö hun me fami hun. Öni nyidrë, ‘Mele pala kö la keme i epun? Hetre trejin me epuni pala kö?’ Nge drei la ka atre ka hape tro nyidrë a hnyingën la jini hun?”

8 Nge Iudra a sipo ielene jë koi kem me hape: “Nue pi koi ni troa ce tro memine la nekö trahmany, nge nue huni pi troa tro, matre tro pala kö sa mel, nge tha tro kö sa mecijiin, eahun, me nyipë, me itre nekö hun. 9 Tro kö ni a isigöline la mele i nyën, nge tro nyipëti a hnyingën koi ni la mele i nyën. E tha bëeke sai nyëne kö ni koi nyipë, ke zönge lai koi nyipë uti hë epin. 10 Nge maine canga tro ju eahun, ke drei la alua tro me bëeke hë eahun.”

11 Matre öni Isaraela keme i angatre ka hape: “Maine eje hë lai, hane hi la nyine kuca. Amë jë hnine la itre watrenge* i epun la itre ewekë ka lolo ne la nöj, trepe basama, me trepe miel, me nyine drösinöe,* me itre kupeine isinöe ka sia, me itre wene pistac, me wene amad, nge xome jë nyine ahnahna kowe lai trahmany. 12 Nge xomi mani atrunyi ju fe, nge xome jë fe lo mani hna amë hmaca ngöne la ulane la itre watrenge i epun, ke ma hna imenune lai. 13 Ce tro jë memine la jini epun, nge tro hmaca jë kowe lai trahmany. 14 Nge qanyine kö la Akötresie ka Tru Trenge Men troa aciane la utipin ne la atre celë, matre troa nue hmaca la ketre trejin me epun, me Beniamina. Ngo ame ni, ke maine patrë hë la itre neköng, ke tro ni a qeje nemen!”

15 Ame hnene la itre nekö i Isaraela hna xome la itre ahnahna me trenge mani ka tru, nge hnei angatr hna ce tro Aigupito me Beniamina, nge angatr a lö hmaca ju koi Iosefa. 16 Matre ame hë la Iosefa a ce öhnyi Beniamina me angatr, canga öni angeic kowe la ka thupëne la hnalapa i angeic ka hape: “Hëne jë la itre trahmanyi ce, nge tro jë kowe la hnalapa, nge humuthe pi la itre xa öni, nge kuci xeni jë, ke tro angatr a ce xeni me eni e hnaipajö.” 17 Nge hnene la atre hna canga kuca, me tro sai angatr kowe la hnalapa i Iosefa. 18 Ngo angatr a xou la kola tro sai angatr kowe la hnalapa i Iosefa, ke öni angatr: “Kola xomi së kowe lai, pine lo mani hna amë hmaca hnine la isa watrenge së. Tro angatr a xolouthi së, me othi së troa itre hlu, me thapa la itre boliko së.”

19 Angatr a easenyine ju la atre ka thupëne la hnalapa i Iosefa, me ce ithanata me angeic ngöne la hnë lö ne la uma. 20 Öni angatr: “Menu hë eahuni joxung, ngo aca qa i eahuni hë la hna itö xen, 21 ngo ame la eahuni a bëek, me cile troa meköl e jidr, me fe la itre watrenge hun, öhne ju hi eahuni la isa trengene mani hun, ngöne la isa watrenge hun, nge kolo hi lo manie ka pexej. Matre eahuni a pi hamëne hmaca. 22 Hne huni hna xomi xa mani nyine itö xen, ngo thatre kö huni ka hape, drei la ka amë lai mani hnine la itre watrenge hun.” 23 Matre önine lai atr: “Pëkö, the xou kö, Akötresi epun, me Akötresi ne la keme i epun la ka amë la mani* hnine la itre watrenge i epun. Hnenge hi lo hna kapa lo manie i epun.” Thupene lai, angeic a traqa sai Simeona jë koi angatr.

24 Nge hnene lai atr hna lö sai angatr kowe la hnalapa i Iosefa, me thue timi angatr troa wasine la lue ca i angatr. Nge angeic a ithuane jë la itre boliko i angatr. 25 Nge hnei angatr hna hnëkëne la ahnahna me treqen tro Iosefa a traqa e hnaipajö. Ke drenge hë angatr ka hape, tro angatr a ce xeni e cili. 26 Nge ame hë la Iosefa a lö kowe la uma, angatr a hamëne pi lai ahnahna, me sa iwatingöneca me thil qëmeke i angeic. 27 Thupene lai, Iosefa a hnyingë pengöi angatre jë, me hape: “Nge tune kaa ha lo keme i epun, lo qatr hnei epuni hna qaja koi ni? Mele pala kö nyidrë?” 28 Öni angatre jë hi: “Lolo hi la keme hun, mele pala kö la hlue i nyipë.” Nge angatr a sa iwatingöneca ju me thil.

29 Nge ame hë la angeic a öhnyi Beniamina jini angeic, nekö ne la thine i angeic, öni angeic: “Nyëne hi la jini epun, lo hnei epuni hna qaja koi ni?” Nge öni Iosefa hmaca: “Epi tro Akötresie a kepe eö neköng.” 30 Nge ame la Iosefa a goeëne la jini angeic, angeic a canga mejë jë qa lai, ke thatreine hë angeic xomihnine la trenge pi treije i angeic. Matre Iosefa a lö jë hnine la ketre hnahag, me treij. 31 Nge ame la Iosefa a ase treij, hnei angeic hna köle ialamek, me tro me iupe troa traqa fë la xen. 32 Hna ketre eli a i Iosefa kö, ketre tune la itre trejine me angeic, nge ketre angetre Aigupito kö. Ke thatreine kö tro la angetre Aigupito a ce xeni me angetre Heberu, ke sisi koi angatr.

33 Kola lapa xötrë qëmeke i Iosefa la itre trejin me angeic,* qaane la ka tru ka trene edrö ne pane kuku, uti hë la wene puhnen. Nge angatr a igoeë me sesëkötr. 34 Iosefa a iupe jë troa kepe xen qa ngöne la laulau i angeic, me tro fë kowe la laulau ne la itre trejin me angeic. Nge hnei Iosefa hna atrune la itrepa i Beniamina, kösë a 5 hmaca kö hune lo trepa ne la itre mama i angeic. Angatr a ce xeni jë me ij, uti hë la angatr a mej.

44 E thupen, hnei Iosefa hna upe la ka thupë hnalapa i angeic, me hape: “Atiqane jë la itre watreng ne la itre trahmanyi ce, nge hamë xeni atrunyi jë uti hë la kola hace e troa xututh, nge isa amë ju la itre manie i angatr ngöne la isa watrenge i angatr. 2 Nge tro eö a amë la vereng, lo vere sileva, hnine la watrenge ne la ka co, memine la trenge mani hnei angeic hna hamën thatraqane la itre xen.” Matre hnene lai hlu hna kuca asë la hnei Iosefa hna qaja.

3 E hmakany, lo kola mejë la jö, hna upe hmaca la itre trahmany me itre boliko i angatr. 4 Tha nanyi petre kö angatre qa ngöne la traon, nge öni Iosefa kowe la ka thupëne la hnalapa i angeic ka hape: “Huzu angatre jë, nge e traqa ha eö koi angatr, hape jë, ‘Hnauëne la epuni a të la loi hnei ngazo? 5 Hnauëne la epuni a atrekënö la ver ne la masetang? Ver ne tro nyidrëti lai a ijin, me goeën la itre ewekë ka troa traqa. Ngazo catre la hnei epuni hna kuca.’”

6 Matre angeic a huzu angatre jë, me qaja la itre trengewekë cili. 7 Öni angatre jë hi: “Joxung, hnauëne la nyipëti a qaja tune lai? Thatreine jë kö huni kuca lai! 8 Atre hi nyipë laka, hne huni hna bëeke fë qa Kanana la mani hne huni hna öhn ngöne la isa watrenge hun. Matre tro huni a atrekënö fë nemene la sileva, me gool hnine la hnalapa ne la maseta i nyipë? 9 Maine traqa jë öhne la vere cili hnine la watrengene la ketre e eahun, tro ha humuthi angeic, nge tro la itre xan a nyihlue i nyipë joxung.” 10 Matre öni angeic: “Aqane ithanata i easë hi lai. Ame la atre xome la ver, tro pë hë angeic a hlueng, nge tro ha nue la itre xan.” 11 Angatr a canga amë ju e kuhu hnadro la itre watrenge i angatr, me fe. 12 Matre hnene lai atre hna thele hnyawa, hna nyiqaan qaathene la ka tru uti hë la ka co. Ame hna öhne lai ver hnine la watrenge i Beniamina.

13 Angatr a tha zezene pi la itre iheetre i angatr, me isa atë la itre trengetrenge i angatr hune la itre boliko, me bëeke kowe la traon. 14 Nge ame hë la Iudra me itre trejin me angeic a lö hnine la hnalapa i Iosefa, traqa ju hi angatr a öhnyi Iosefa, matre angatr a kei ju kowe la lue ca i Iosefa. 15 Iosefa a qaja jë koi angatre ka hape: “Nemene la hnei epuni hna kuca? Thatre kö epuni laka, atreine hi la itre atr ka tunge troa atre la ka troa traqa?” 16 Matre öni Iudra: “Tro huni a qeje nemen joxu? Tro huni a amamane tune kaa ka hape, pëkö ngazo hne huni hna kuca? Hnene la nyipi Akötresie hna öhne la ngazo hun. Itre hlue i nyipëti hë hun, eahun, memine la atre ka xome lai ver!” 17 Ngo öni Iosefa: “Thatreine kö ni troa kuca lai. Tro hi a hlueng la atre ka xome lai ver. Ngo ame epun, tro jë memine la tingeting kowe la keme i epun.”

18 Ame hnei Iudra hna easenyi Iosefa me hape: “Joxung, nue ni pi troa qaja la ketre ewekë koi nyipë. The elëhni kö koi ni hlue i nyipë, ke ceitu i nyipë me Farao. 19 Hnei nyipëti lo hna hnyingë hun, itre hlue i nyipë ka hape, hetre keme i eahuni kö, me trejin me eahun? 20 Matre hne huni hna sa koi nyipë joxu ka hape, ‘Eje hi hetre keme hun, qatre hë nyidrë. Nge hetre jini hun, nekö ne qatr, nge wene puhnen. Hetre mama i nyëne lo, ngo meci hë enehila. Matre ame la itre hna hnahon hnene la thine i nyën, ke nyëne pe hi la ka mel, nge hna nekö hnimë nyën hnei kem.’ 21 Nge öni nyipëti lo, ‘Traqa sai nyëne pi koi ni, ke eni a pi iöhnyi me angeic.’ 22 Ngo öni eahuni lo, ‘Thatreine kö la nekönatr troa inu me kem, wanga meci pi la keme i nyën.’ 23 Matre öni nyipë, ‘E tha traqa fë kö epuni la neköi jini epun, tha tro hmaca kö epuni a lö koi ni.’

24 “Matre hne huni hna bëeke koi kaka, hlue i nyipë, nge hne huni hna qaja la itre trengewekë i nyipë joxu. 25 E thupen, hnene la keme huni hna upi eahuni hmaca troa itö xen. 26 Matre öni eahun, ‘Thatreine kö huni tro. Ngo tro hi eahuni a tro, e tro la neköi jini hun a ce tro me eahun. Ke thatreine jë kö huni lö kowe lai atr, nge patre kö nyën.’ 27 Matre öni kaka hlue i nyipë, ka hape, ‘Atre hi epuni laka, luetre hi la lue neköng hna hnahon hnene la föeng. 28 Patre hë la ketre, nge öning, “Ma ase hë heje thaitrë nyën hnene la ketre öni wael.” Nge uti hë enehila, tha öhnyi nyëne pala kö ni. 29 Nge maine tro epuni a iananyi ni me nyën, nge tro ha traqa la ketre ewekë koi nyën, nge tro nyën a mec, tro hë epuni lai a autingi* ni koi Hua* fë la akötreng.’

30 “Nge maine tro hmaca ni a bëeke koi kaka hlue i nyipë, nge patre pë hë la nekönatr hnei nyidrëti hna hnime catrën, 31 nge e tro nyidrëti a öhne laka, patre kö la nekönatr, tro nyidrëti lai a mec, nge tro hë huni a autingi* nyidrëti koi Hua* fë la akötr. 32 Joxu fe, ase hë ni sisinyi koi kaka troa thupën la mele ne lai nekönatr, nge öning, ’Maine tha bëeke sai nyëne kö ni koi nyipë, ngazonge lai uti hë epine palua koi nyipë.’ 33 Matre eni a sipo nyipë joxu, loi e tro ni a hlu hnane la nekönatr, nge epi tro la nekönatr a ce bëeke memine la itre mama i nyën. 34 Thatreine kö ni bëeke koi kaka nge patre pë hë la nekönatr, nge thatreine kö ni troa goeë kaka e akötr!”

45 Thatreine hë Iosefa xomihnine la trenge pi treij i angeic qëmekene la itre hlue i angeic, matre angeic a upi angatre jë ka hape: “Pane lö pi epun!” Nge ame hë la angeice cas me itre trejin me angeic, angeic a qaja amamane jë koi angatr ka hape, drei angeic.

2 Ame hnei angeice hna treije catre, nge dreng asë hi la angetre Aigupito, me hnalapa i Farao. 3 Matre öni Iosefa kowe la itre trejin me angeic ka hape: “Iosefa ni, mele pala kö kaka?” Ngo pëkö ka atreine sa koi angeic, ke angatr a isa sesëkötr. 4 Nge hnei Iosefa hna qaja koi angatre ka hape: “Pane alemi jë.” Ame hnei angatr hna easenyi koi angeic.

Nge öni angeice hmaca jë : “Iosefa ni trejin me epun, lo hnei epuni hna salemën a tro Aigupito. 5 Ngo enehila, the xou kö, nge the upezö ketre kö me ketre la hna salemë ni, ke Akötresie la ka upi ni qëmeke i epun, matre thupëne la mele i epun. 6 Hnaaluene macatre ne jiin ngöne la nöj, nge tro hmaca kö a traqa koi 5 lao macatre ne tha eëny, me tha menu. 7 Ngo hnei Akötresie hna upe panë ni a tro ce, matre amele epun, nge nyine haine lai. Qa ngöne lai, tha tro kö la itre fami i epun a hane patr.* 8 Haawe, tha epuni kö la ka upi ni a tro ce, ngo hnene la nyipi Akötresie. Hnei Akötresieti hna acili ni troa atre hamë eamo koi Farao, me joxu hune la hnalapa i nyidrë, me tan e Aigupito asë.

9 “Canga bëeke jë epuni koi kaka, nge hape jë koi nyidrë, ‘hane hi la hna qaja hnei Iosefa nekö i nyipë: “Hnei Akötresieti hna acili ni troa tan e Aigupito asë, matre trohemi koi ni, nge the hmitre kö. 10 Tro nyipëti a lapa ngöne la nöje Gosena ezing, nyipë, me itre nekö i nyipë, me ha api i nyipë, me itre öni ka co i nyipë, me itre öni ka tru i nyipë, me nöjei ewekë i nyipëti asë. 11 Nge tro ni a thu a i nyipë, ke 5 pala kö lao macatre ne jiin, wanga tro nyipëti a pë ewekë, nyipë me fami i nyipë, nge wanga luzi pi la nöjei ewekë i nyipë asë.”’ 12 Epuni hi lai a öhne me Beniamina jining laka, eni hi la ka ithanata koi epun. 13 Matre qa i epun troa qaja koi kaka la etrune la lolong e Aigupito, me nöjei ewekë hnei epuni hna öhn. Nge canga traqa sai nyidrëti pi.”

14 Ame hnei Iosefa hna haluthi Beniamina jini angeic, me treij, nge Beniamina a treije ju fe ngöne la imano i Iosefa. 15 Thupene lai, hnei angeic hna treije xome la itre trejin me angeic. Nge itre trejin me angeic a ithanata ju me angeic.

16 Nge drenge hë la hnalapa i Farao laka, traqa ha la itre trejin me Iosefa. Matre tru catre la madrine i Farao me itre hlue i nyidrë kowe la hna dreng. 17 Ame hnei Farao hna qaja koi Iosefa ka hape: “Hape ju kowe la itre trejin me eö ka hape, ‘atë jë la itre trengetreng hune la itre öni i epun, nge tro jë kowe la nöje Kanana. 18 Tro jë a thenge la keme i epun, me fami epun, nge traqa pi koi ni. Nge tro hë ni a hamë epun la itre ewekë ka lolo ne Aigupito, nge tro epuni a xen la itre wen hna menuën ngöne la itre götrane gaa sisitria* ne la nöj. 19 Nge hape ju fe koi angatr, xome jë qa Aigupito la itre ikatr kowe la itre nekönatr me itre föi epun. Nge atë jë la keme i epun hune la ketre ikatr, nge traqa pi. 20 Nge the hnehengazone kö la itre ewekë ka lolo i epun, ke thatraqai epuni la itre ewekë ka sisitria ne Aigupito.’”

21 Celë hi hna kuca hnei itre nekö i Isaraela. Hnei Iosefa hna hamë angatre la itre ikatr, tune lo hna amekötin hnei Farao, me nyine kemej e cahu gojeny. 22 Koi angatr asë, hnei Iosefa hna hamëne la isa ca iheetr nyine saze, nge koi Beniamina, angeic a hamëne pi la 300 lao mani sileva, me 5 lao iheetr nyine saze. 23 Nge angeic a upe pi kowe la keme i angeic la 10 lao boliko ka thue ewekë ka lolo qa Aigupito, me 10 lao boliko föe ka thue la itre wene feja, me falawa, me itre xa xen göi gojeny. 24 Matre hnei angeic hna iahni me itre trejin me angeic, nge ame hë la angatr a tro, öni angeic: “The tro kö epuni a iwesitrë e cahu gojeny.”

25 Thupene lai, hnei angatr hna tro qa Aigupito, me traqa koi Iakobo keme i angatr e Kanana. 26 Nge hnei angatr hna qaja koi nyidrë ka hape: “Mele pala kö Iosefa, nge angeic la ka mus e Aigupito asë!” Ngo tha jele nyipicine kö nyidrë, ke ame koi nyidrë, angatr a thoi. 27 Ngo ame hë la nyidrëti a drei angatr e qaja la itre trengewekë i Iosefa, me öhne la itre ikatr hna upe hnei Iosefa troa ati nyidrë, mele jë hi Iakobo. 28 Öni Isaraela jë hi: “Ame enehila, eni a jelenyipici epun! Mele pala kö Iosefa neköng! Tro ni a canga tro troa wai angeic qëmekene tro na mec!”

46 Isaraela a xom asë jë la itre ewekë i nyidrë, me tro. Nge ame hë la nyidrëti a traqa e Bere-seba, hnei nyidrëti hna huujëne la itre huuj kowe la Akötresi Isaaka keme i nyidrë. 2 Ame hnei Akötresieti hna ithanata me Isaraela ngöne la ketre pu e jidr, me hape: “Iakobo, Iakobo!” Nge sa jë hi Iakobo ka hape: “Eni hi la!” 3 Öni Akötresieti hmaca: “Eni hi la nyipi Akötresie, Akötresi ne la keme i eö. The xou kö troa uti a tro Aigupito, ke e cili, tro ni a kuca matre tro eö a nöje ka tru. 4 Tro ni a ce uti me eö a tro Aigupito, me bëeke sai eö hmaca. Nge tro Iosefa a atë la ime i angeic hune la luemeke* i eö.”

5 Thupene lai, Iakobo a tro ju qa Bere-seba. Nge itre nekö i Isaraela a ati Iakobo jë keme i angatr, me itre nekö i angatr, me itre föi angatr, hune la itre ikatr hnei Farao hna up troa ati angatr. 6 Angatr a xometrongëne jë la itro öni, me itre mo hnei angatr hna kapa e Kanana. Matre hnei Iakobo me fami nyidrë asë hna lö e Aigupito. 7 Iakobo a ce uti pi a tro Aigupito me itre nekö i nyidrë, me itre api nyidrë, me itre nekö i nyidrëti jajiny, me itre api i nyidrëti jajiny, nöjei matra i nyidrë asë.

8 Hane hi la ëjene la itre nekö i Isaraela, ene lo itre nekö i Iakobo ka lö e Aigupito: Reubena la pane nekö i Iakobo.

9 Itre nekö i Reubena: Enoka, me Palu, me Hezerona, me Karemi.

10 Itre nekö i Simeona: Iemuela, me lamina, me Ohada, me Iakina, me Zohara, me Saulo nekö ne la föe ne Kanana.

11 Itre nekö i Levi: Geresoma, me Kohatha, me Merari.

12 Itre nekö i Iudra: Era, me Onana, me Sela, me Farez, me Zera. Ngo meci hë Era me Onana e Kanana.

Itre nekö i Farez: Hezerona me Hamula.

13 Itre nekö i Isakara: Tola, me Pua, me Iobu, me Simerona.

14 Itre nekö i Zebulona: Sereda, me Elona, me Ialela.

15 Itre nekö i Lea lai hnei eahlo hna hnahone koi Iakobo e Padanarama, me Dina nekö i nyidrëti jajiny. Ala 33 la itre nekö i nyidrë trahmanyi me jajiny.

16 Itre nekö i Gada: Zifiono, me Hagi, me Suni, me Ezebona, me Eri, me Aroda, me Areli.

17 Itre nekö i Asera: Iemina, me Ieseva, me Iesevi, me Beria, nge Sera la xa i angatr.

Itre nekö i Beria: Heberu, me Malekiela.

18 Itre nekö i Zilepa lai, lo hnei Labana hna hamëne koi Lea nekö i angeic. Matre ala 16 la itre matra i Iakobo qaathei Zilepa.

19 Itre nekö i Rakela lo föi Iakobo: Iosefa me Beniamina.

20 E Aigupito, hnei Asenatha nekö i Potifera, atre huuj e Ona, hna hnaho Manase me Eferaima koi Iosefa.

21 Itre nekö i Beniamina: Bela, me Bekera, me Asebala, me Gera, me Naamana, me Eki, me Rosa, me Mupima, me Hupima, me Areda.

22 Itre nekö i Rakela me Iakobo lai, ala 14 angatr.

23 Nekö i Dana: Husima.

24 Itre nekö i Nafatali: Iazela, me Guni, me Iezera, me Silema.

25 Itre nekö i Bila lai, lo hnei Labana hna hamëne koi Rakela nekö i angeic. Matre hna hnahone qaathei Bila me Iakobo la 7 lao nekönatr, me 7 lao api hmunë.

26 Ala 66 lao matra i Iakobo ka ce lö me nyidrë e Aigupito, nge tha hna e kö la itre tresi nyidrë. 27 E Aigupito, hna hnahone koi Iosefa la lue trahmany, matre ala 70 lao atrene la fami i Iakobo ka lö e Aigupito.

28 Iakobo a upi Iudra jë troa thuemacanyi Iosefa laka, easenyi hë matre traqa pi nyidrëti e Gosena. Matre ame hë la angatr a traqa ngöne la nöje Gosena, 29 hnei Iosefa hna iupe troa hnëkëne la ikatre i angeic, me tro troa ixelë me Isaraela keme i angeic e Gosena. Ame la Iosefa a traqa kowe la keme i angeic, hnei angeic hna haluthi nyidrë me treije aqeany me nyidrë. 30 Nge öni Isaraela koi Iosefa: “Ijijinge hë troa mec, ke öhne hë ni la iqëmeke i eö, nge atre hë ni laka, mele pala kö eö.”

31 Ame hnei Iosefa hna qaja koi itre trejin me angeic, me fami ne la keme i angeic ka hape: “Tro ni a pane tro koi Farao troa qaja ka hape, ‘Traqa ha koi ni la itre trejin me eni, me fami ne la kemeng, lo ka lapa e Kanana. 32 Itre ka thupë öni angatr, nge ka axö öni. Hnei angatre hna traqa fë la itre öni ka co i angatr, me itre öni ka tru i angatr, me nöjei ewekë i angatr.’ 33 E tro Farao a hë epun me hnyingëne ka hape: “Nemene la huliwa i epun?” 34 Hape jë, ‘Joxu, itre ka axö öni hun, qane lo eahuni a co, tune la itre qaaqaa hun.’ Qa ngöne lai, tro hë epuni a lapa ngöne la nöje Gosena, ke methi angetre Aigupito la itre ka axö mamoe.”

47 Ame hnei Iosefa hna tro troa thuemacanyi Farao, me hape: “Traqa ha la kemeng me itre trejin me eni qa Kanana, memine la itre öni i angatre ka co me ka tru, me nöjei ewekë i angatr asë. Angatre ngöne la nöje Gosena.” 2 Nge hnei angeic hna xome la 5 lao trejin me angeic, me traqa sai angatr koi Farao.

3 Farao a hnyingë angatre jë ka hape: “Nemene la huliwa i epun?” Nge angatr a sa jë ka hape: “Itre ka axö öni la itre hlue i nyipë, tune lo itre qaaqaa hun.” 4 Nge öni angatr: “Eahuni a traqa troa lapa trenyiwa ngöne la nöj, ke catrehnine catre la jiin e Kanana, nge pëkö nyine xeni kowe la itre öni huni ka co. Matre joxu, pane nue pi koi huni troa lapa ngöne la nöje Gosena.” 5 Ame hnei Farao hna qaja koi Iosefa ka hape: “Traqa ha koi eö la keme i eö, me itre trejin me eö, 6 nge hna nue koi eö la nöje Aigupito asë, matre alapane jë la keme i eö, me itre trejin me eö ngöne la götrane gaa sisitria ne la nöj. Nue angatre pi troa lapa ngöne la nöje Gosena. Nge e öhne hi eö laka, hetre atre ka atreine thei angatr, ahnithe jë koi angatre la ume öning.”

7 Thupene lai, hnei Iosefa hna hë Iakobo keme i angeic, me traqa sai nyidrë koi Farao. Nge Iakobo a amanathithi Farao ju. 8 Farao a hnyingë Iakobo jë ka hape: “Ije macatre i nyipë?” 9 Öni Iakobo: “Traqa ha koi 130 lao macatre ne feke trootro ni. Xalaithe hi la itre macatre ne mele ni, nge itre macatre ne hnehengazo. Tha traqa kö ni kowe la itre macatre ne la itre qaaqaang, itre ka hane feke trootro.”* 10 Nge Iakobo a amanathithi Farao ju, me tro qaathei nyidrë.

11 Iosefa a alapane jë la keme i angeic, me ha trejine me angeic e Aigupito, me hamë hnepadro i angatr ngöne la götrane gaa mana ne la nöj, lo nöj i Ramese, tune lo hna amekötin hnei Farao. 12 Nge Iosefa a hamë xen* kowe la keme i angeic, me ha trejin me angeic, me fami i keme i angeic asë, thenge la etrune la itre nekönatr.

13 Pëkö xeni ngöne la nöj asë, ke catrehnine catre la jiin. Nge pine la jiin, kola ha kucakuca la nöje Aigupito me Kanana. 14 Iosefa a kapa asë la mani qa Aigupito me Kanana, lo mani hna kuiën hnei itre atr, la angatr a traqa troa itö xen.* Nge angeic a amë ju la mani cili, hnine la trengamo i Farao. 15 Matre ame hë la pun, pë hë maniene la angetre Aigupito me Kanana, matre hnene la angetre Aigupito hna traqa asë koi Iosefa, me qaja koi angeice ka hape: “Thue a i huni jë, ke tro kö huni a mec qëmeke i eö hnei pë mani?” 16 Iosefa a sa jë koi angatre ka hape: “E pëhë mani i epun, hamë ni pi la itre öni epun, nge tro ha hamë xeni koi epun.” 17 Matre angatr a traqa fë pi koi Iosefa la itre öni angatr, itre hos, me itre öni ka co, me itre öni ka tru, me itre boliko, nge Iosefa a thue a i angatre jë. Ngöne la macatre cili, hnei Iosefa hna kapa la itre öni angatr, nyine itö a i angatr.

18 Nge fenesi hë la ketre macatre, nge ame la kola xejë la ketre, angatr a tro ju troa qaja koi Iosefa ka hape: “Atre hi nyipë joxu laka, ase hë eahuni hamën asë la manie hun, me itre öni hune koi nyipë, pëhë nyine tro huni a hamë nyipë, ngo hnepadro i eahuni pe hi, me ngönetrei hun. 19 Nge hapeu, tro hi nyipëti a goeë huni e mec memine la itre hnepadro hun? Nyithupei huni jë hnei xen, eahun me itre hnepadro hun, nge tro huni a nyihlue i Farao, nge tro nyidrëti a xome la itre hnepadro hun. Ngo hamë huni pi la itre xaji, matre tro huni a mel, nge tha tro kö huni a mec, nge tro pala hi a lapane la itre hnepadro hun. 20 Iosefa a itöne jë thatraqai Farao la itre hnepadro i angetre Aigupito, ke angetre Aigupito a isa salemëne la itre hlapa i angatr, ke catrehnine catre la jiin. Qa ngöne lai, Farao ju pe hi la trenadro ne la nöje Aigupito asë.

21 Nge hnei angeice hna xome la itre atr matre lapane la itre traon ne Aigupito asë. 22 Ngo itre hnepadrone la itretre huuje pe hi la hna tha itön, ke angatr a xen qaathei Farao. Celë hi matre, tha salemëne fe kö angatre la itre hnepadro i angatr. 23 Nge öni Iosefa kowe la nöj: “Pane dreng! Ase hë ni itö epun, me itre hnepadro i epun koi Farao, hane fe hë la itre xaji epun. Trane jë. 24 Matre e cia ha la hlapa i epun, tro epuni a hamëne koi Farao la hna 5 ne la itre hnei epuni hna menuën. Nge ame pë la munën, koi epuni pë hë. Tro epuni a xome nyine tra feja, me nyine xeni koi epun, me itre nekö i epun, me nöjei atre ka lapa thei epun.” 25 Matre öni angatr: “Joxu, hnei nyipëti hna amele hun, matre hnimi huni ju, nge nue huni pi troa nyihlue i Farao.” 26 Iosefa a acile jë la wathebo cili laka, troa hamëne koi Farao la hna 5 ne la itre hna menuën. Nge ame enehila, kolo pala hi a trongëne la wathebo cili e Aigupito. Ngo tha hna e kö la itre hlapa ne la itre atre huuj, ke tha itre ewekë i Farao kö.

27 Isaraela me fami i nyidrë a lapa ju e Aigupito, hmekune la nöje Gosena. Angatr a lapa ju e cili, me hnaho atruny, matre mana catr angatr. 28 Nge hnei Iakobo hna mele koi 17 lao macatre e Aigupito, matre traqa koi 147 lao macatre i nyidrë.

29 Nge ame hë la Isaraela a drenge laka, easenyi hë tro nyidrëti a mec, nyidrëti a hë Iosefa jë nekö i nyidrë, me hape: “E aja i eö troa atrunyi ni, pane amë ju la ime i eö fene la itrepëng, nge sisinyi ju laka, tro eö a loi hni me amamane la ihnimi nyipici eö koi ni. Eni a sipon, the kelemi ni kö e Aigupito. 30 E meci hë ni,* qa i eö troa xomi ni qa Aigupito, me ami ni hnine la hua ne la itre qaaqaang.” Nge öni Iosefa jë hi: “Tro ni a eatrëne la sipo i nyipë.” 31 Matre öni nyidrë: “Sisinyi jë koi ni.” Nge Iosefa a sisinyi jë. Nge Isaraela a thili ju qëmeke i Akötresie, qëmekene la göhnë i nyidrë.

48 Thupene lai, hna qaja koi Iosefa ka hape: “Kucakuca ha la keme i eö.” Ame hnei angeic hna ce tro memine la lue nekö i angeice trahmany, Manase me Eferaima. 2 Ame hë la kola thuemacanyi Iakobo laka, Iosefa nekö i nyidrë a traqa troa wai nyidrë, nyidrëti* a thele jëne troa lapa hune la göhnë i nyidrë. 3 Nge öni nyidrëti jë hi koi Iosefa:

“Hnene la Akötresie Ka Tru Trenge Men hna mama koi ni e Luza, ngöne la nöje Kanana, nge hnei nyidrëti hna amanathithi ni. 4 Öni nyidrëti koi ni, ‘Tro ni a hamë nyimu nekö i eö, nge troa ala nyimu la itre matra i eö, nge tro ni a kuca matre tro hë eö a itre nöje ka nyimutre. Tro ni a hamëne paluane la nöje celë kowe la itre matra i eö.’ 5 Nge ewekënge pë hë la lue nekö i eö, lo hnei eö hna hnahon e Aigupito, qëmekene tro ni a traqa koi eö. Tro Eferaima me Manase a lue neköng, ceitu me Reubena me Simeona. 6 Ngo ame la itre nekönatre hna hnahon e thupen, ke itre nekö i eö pë hë. Tro angatr a xome la ëjene la lue mama i angatr, nge tro angatr a kepe edrö qaathei nyidro. 7 Ame lo eni a bëeke qa Padanarama, hnei Rakela hna meci ezing e Kanana, ngo nanyi pala kö la gojenyi ne tro Eferata. Matre hnenge hna kelemi angeic ngöne la gojenyi ne tro Eferata, ene Bethelema.”

8 Thupene lai, Isaraela a goeëne ju la lue nekö i Iosefa me hape: “Drei la?” 9 Matre öni Iosefa kowe la keme i angeic: “Lue nekönge trahmany, lo hna hamë ni hnei Akötresie ngöne la nöje celë.” Matre öni nyidrë: “Pane alemi nyidroti jë koi ni, matre tro ni a amanathithi nyidro.” 10 Tha öhne hnyawa ha Isaraela koilo, ke qatre catre hë nyidrë, nge easenyi hë matre ti pi la luemeke i nyidrë. Matre Iosefa a easenyi nyidroti jë koi nyidrë. Ame hnei Isaraela hna dremi nyidro, me haluthi nyidro. 11 Öni nyidrë koi Iosefa: “Tha ase kö ni mekune troa öhne hmaca la qëmeke i eö, ngo hnei Akötresieti hna aijijë ni troa öhne la itre matra i eö.” 12 Ame hnei Iosefa hna ananyi nyidro qa ngöne la lue iwatingöneca ne la keme i angeic, nge angeic a thili ju e kuhu hnadro.

13 Nge Iosefa a ce e nyidroti jë, Eferaima ngöne la ime maca i angeic, matre tro nyën a cil ngöne la götrane mi i Isaraela, nge Manase ngöne la ime mi i angeic, matre tro nyën a cil ngöne la götrane maca i Isaraela. Nge angeic a easenyi nyidroti jë koi nyidrë. 14 Ngo Isaraela a saathe pi la ime maca i nyidrë hune la he i Eferaima, ngo ka co pe nyën. Nge nyidrëti a atë ju la ime mi i nyidrë hui Manase, ngacama atre hi nyidrë ka hape, Manase la ka tru, ngo hnei nyidrëti hi hna thë troa ati ime tune lai. 15 Nge nyidrëti a amanathithi Iosefa jë me hape:

17 Ame hë la Iosefa a öhne laka, kolo pala hi a të la ime maca ne la keme i nyidrë hui Eferaima, tha madrine kö Iosefa. Matre angeic a ea jë la ime ne la keme i angeic qa hune la he i Eferaima, me atë hune la he i Manase. 18 Matre öni angeic kowe la keme i angeic ka hape: “Waea the tune kö lai kaka, ke angeice la, la ka tru. Atë jë la ime maca i nyipë hune la he i angeic.” 19 Ngo xele kö la keme i angeic, matre öni nyidrë: “Atre hi ni, atre hi ni neköng! Tro fe nyëne lai a ketre nöj, nge tro fe nyën a tru. Ngo tro la jini nyën a sisitria catre hmaca kö, nge tro la itre matra ne la jini nyën a ala nyimu catr, uti hë tro angatr a itre nöj.” 20 Ngöne la drai cili, nyidrëti a amanathithi nyidroti ju, me hape:

Nyidrëti a pane qeje Eferaima, nge pi Manase pë hë.

21 Nge öni Isaraela jë hi koi Iosefa: “Easenyi hë matre meci pi ni, ngo tro kö Akötresie a ce me epun, me bëeke sai epun kowe la nöj ne la itre qaaqaa i epun. 22 Nge ame ni, tro ni a hamë eö la ketre hnepadro nyine nyixane la nöje i eö, hune la itre trejine me eö, kolo hnepadro hnenge hna thapa qaathene la angetre Amora, hnene la tauange me pehnang.”

49 Iakobo a hëne jë la itre nekö i angeic me hape: “Icasikeu jë, nge tro ni a qaja la ka troa traqa koi epun ngöne la itre drai ne la pun. 2 Icasikeu jë, nge pane drenge ju itre nekö i Iakobo, drei Isaraela ju keme i epun.

3 “Reubena, eö la pane neköng, trengecatreng, nge pane matrang. Sisitria kö la aqane wangatrunyi eö me trengecatre i eö. 4 Ngo tha tro kö eö a draië hune la itre trejine me eö, ke ceitu i eö me itre time ka holehol, lo hna thatreine xomacon. Hnei eö hna eli hagën* la keme i eö.

5 “Ame Simeona me Levi, lue trejine nyidro. Ame la itre jia ne isi i nyidro, itre jia ne iangazo. 6 Melenge* fe, the majemi kö koi nyidro, nge hninge fe, the thele jëne kö troa ce tro me nyidro. Ke hnei nyidro hna humuthe la itre atr hnene la elëhni. Nge kösë nyidroti a elo la kola sa la itre fekatro ne la itre kau. 7 Epi hnëjine la elëhni me iangazo i nyidro, ke ka iaxösisi la elëhni i nyidro, nge ka catrehnine la elëhni i nyidro. Tro hë ni a isa ije nyidro ngöne la nöje i Iakobo, me isa lapa nyidro ngöne la nöje Isaraela.

8 “Nge ame eö Iudra, troa atrunyi eö hnene la itre trejine me eö, nge tro la ime i eö a të hune la pixöji ne la itre ithupëjia me eö. Nge tro la itre neköne la keme i eö, a thil qëmeke i eö. 9 Iudra la neköi liona, elë jë kö eö neköng, e ase hë eö öni la tha i eö. Hnei angeic hna meköl tune la liona, nge tro drei a amejëne la liona? 10 Nge tha tro kö la sine tö ne la joxu a nanyi qaathei Iudra, nge tro pala hi la sine tö ne mus, a cil nyipine la lue ca i angeic, uti hë traqa pi Silo.* Tro la nöjei nöj a drengethenge angeic. 11 Tro angeic a hnöthe la boliko i angeic kowe la vin,* me neköi boliko i angeic kowe la nyipi vin. Tro angeic a wasi iheetr ngöne la waina, me wasi imaano ngöne zane vin.* 12 Tro la luemeke i angeic a waxamadra hnei waina, nge troa wië la itre inyö* i angeic hnei melek.

13 “Tro Zebulona a lapa ezine hnagejë, ezine la hnë xepe hnei he. Uti hë Zidona la ifego i angeic.

14 “Isakara la boliko ka catre ijun, tro angeic a meköl nyipine la lue treng hnei angeice hna thu. 15 Tro angeic a öhne laka, lolo la hnë mano, nge lolo la nöj, matre tro angeic a hamëne la iape i angeic troa thue la ehnef, me nue angeic troa nyihlu.

16 “Tro Dana, ketre tribu ne Isaraela, a amekötine la nöje i angeic. 17 Dana la un e cahu gojeny, nge vaipa ka hetre jian ezine la gojeny, atre hej la tidröca ne la hos, ame hna kei gala la atre tith. 18 Tro ni a treqene la iamele qaathei nyipë Iehova!

19 “Nge troa lepi Gada hnene la itre ka atrekënö. Ngo tro angeic a lepi angatr qa hutrö.

20 “Troa mana la xen thei Asera, nge tro angeic a hamë xen, tune la a i joxu.

21 “Nafatali la drube föe ka nyinyape catr. Nge mingöminge la aqane ithanata i angeic.

22 “Iosefa la picine sinöe ka wa, nge ka cia ezine la qeqe ne tim, nge itre picin ej a sasaithe la ngöne uma. 23 Ngo itre ka huji pehna a akötrë angeic, me pehna angeic, me methinë angeic. 24 Ngo tha nue kö angeic la pehna i angeic, nge catre me maca la ime i angeic. Kolo lai a xulu qaathene la lue ime ne la trengecatre i Iakobo, qaathene la atre thupëne la etë ne Isaraela. 25 Angeic* a xulu qaathene la Akötresi ne la keme i eö, nge tro Akötresie a xatua eö. Ce angeic memine la ka Tru Trenge Men, nge tro Akötresie a amanathithi eö, me hamë eö la itre manathith ka uti qa hnengödrai, me itre ka elë qa ngöne la itre gaa jui ne la ihnadro, me itre manathith ka xulu qa ngöne la lue thi memine la hni. 26 Tro la manathith ne la keme i eö a sisitria hune la manathith ne la itre wetr ka pë pun, me itre ewekë hna piin ngöne la itre sasala ka cile hut. Tro itre ej a lapa hune la he i Iosefa, hune la he ne la atre hna thapa qaathene la itre trejin me angeic.

27 “Tro Beniamina a heje thaitrëne lapane la itre tha i angeic, tune la luko. E hmakany, tro angeic a öni la tha i angeic, nge e hej, tro angeic a thawa la tha i angeic.”

28 Kolo 12 lao tribu ne Isaraela lai, nge celë hi la hna qaja hnei keme i angatr lo kola amanathithi angatr. Nge hnei nyidrëti hna isa amanathithi angatr thenge la ka ijiji angatr.

29 Thupene lai, hnei nyidrëti hna amekötine koi angatre ka hape: “Troa acasi ni memine la nöjeng.* Kelemi ni jë me itre qaaqaang, hnine la ngönemenyi ne la hlapa i Eferona atre Heth. 30 Lo ngönemenyi hnine la hlapa e Makepela, ka qëmeke koi Mamere ngöne la nöje Kanana, lo hnei Aberahama hna itön qaathei Eferona qa Heth, nyine hua. 31 E cili la hna kelemi Aberahama me Sara föi nyidrë, nge e cili la hna kelemi Isaaka me Rebeka föi nyidrë, nge e cili fe la hnenge hna kelemi Lea. 32 Ame la hlapa memine la ngönemenyi, hna itöne qaathene la itre neköi Heth.”

33 Thupene la hna qaja asë lai kowe la itre nekö i nyidrë, hnei Iakobo hna aelëne hmaca la lue ca i nyidrë hune la göhnë i nyidrë, me aca mano. Ame hna acasi nyidrë memine la nöje* i nyidrë.

⁵⁰ Ame hnei Iosefa hna kei ju hune la keme i angeic, me treije hui nyidrë, me dremi nyidrë. 2 Thupene lai, angeic a upe jë la droketre ka huliwa koi angeic, troa hnëkëne* la keme i angeic, matre angatr a hnëkë Isaraela jë. 3 Hnei angatre hna hnëkë nyidrë koi 40 lao drai, ke itre drai lai hnei angatre hna majemine xom, göi troa hnëkëne la wezipo. Nge angetre Aigupito a treije pi nyidrëti jë koi 70 lao drai.

4 Matre ame hë la kola ase la ijine hnëmec, hnei Iosefa hna qaja kowe la lapa* i Farao ka hape: “E epuni a kepe ni, tro fë jë la maca celë koi Farao, 5 ‘Hnene la kemeng hna upi ni troa sisiny, me hape, “Pane dreng! Easenyi hë tro ni a mec. Qa i eö troa kelemi ni ngöne la huang hnenge hna hnëkën e Kanana.” Matre eni a sipon troa nue ni a tro cili, matre keleme la kemeng, nge qanyinge hmaca ha.’” 6 Matre öni Farao: “Tro jë troa keleme la keme i eö, tune lo aqane sisinyi eö koi nyidrë.”

7 Ame hnei Iosefa hna tro troa keleme la keme i angeic, nge hnene la nöjei hlue i Farao, me itre qatr ne la lapa i joxu, me nöjei qatr ne Aigupito hna ce tro me angeic. 8 Nge hnene la fami angeic asë, me itre hlue i angeic, me itre trejin me angeic, me fami ne la keme i angeic, hna ce tro me angeic. Ngo lapa ju pe kö e Gosena, la itre neköi angatr ka co, me itre öni i angatr ka co me ka tru. 9 Nge ce angatre fe me itre ikatr, me itre ka ti hos. Ala nyimu catre la tronge i angatr. 10 Nge ame hë la angatr a traqa kowe la hnë lepe qitr e Atada, hmekune la Ioridrano, angatr a itreijenyi catre jë, me latresi. Nge traqa koi 7 lao drai ne hnëmecin angatr la keme i Iosefa. 11 Ame hë la angetre Kanana a öhnyi angatr e itreijeny ngöne la hnë lepe qitr e Atada, öni angetre Kanana: “Hnëmeci ka tru koi angetre Aigupito!” Matre hna hëne la götrane cili ne la Ioridrano ka hape, Abela-mizeraima.*

12 Hnene la itre nekö i Iakobo, hna kapa asë la nöjei sipo i nyidrë. 13 Angatr a xomi nyidrëti jë a tro Kanana, me kelemi nyidrë hnine la ngönemenyi ne la hlapa e Makepela, lo ka qëmeke koi Mamere, lo hnei Aberahama hna itön qaathei Eferona atre Heth. 14 Thupene la hna keleme la keme i angeic, hnei Iosefa me itre trejin me angeic, me itre sinatronge i angeic ka traqa troa keleme la keme i angeic, hna ce bëeke hmaca a tro Aigupito.

15 Thupene la hna meci hnene la keme i angatr, hnene la itre trejin me Iosefa hna iqajakeune ka hape: “Ma Iosefa a lapa fë elëhni koi së, nge ma tro jë angeic a të lo ngazo hne së hna kuca koi angeic.” 16 Matre angatr a iupi fë jë la maca celë koi angeic: “Qëmekene tro la keme i eö a mec, hnei nyidrëti hna amekötine la ketre ewekë koi hun, öni nyidrë: 17 ‘Hane hi la hnei epuni hna troa qaja koi Iosefa, “Eni a sipon, nue pi la ngazo ne la itre trejin me eö, me ngazo hnei angatr hna kuca, lo angatr a akötrë eö.” Matre enehila, epi nue la ngazo hun, eahun itre ka nyihluene la Akötresi ne la keme i eö.’ Matre ame hë la Iosefa a drenge lai, treije jë hi Iosefa. 18 Ame hna traqa hnene la itre trejin me angeic, nge angatr a thili ju kowe la lue ca i angeic, me hape: “Eahuni la itre hlue i nyipë!” 19 Nge öni Iosefa jë hi: “The xou kö, Akötresieti ni matre troa ameköti epun? 20 Hnei epuni lo hna mekune troa akötrë ni, ngo hnei Akötresie hna mekune troa ujëne la ngazo koi loi, me amelene la itre atr ka ala nyim, tun enehila. 21 Haawe the xou kö, tro pala kö ni a thue a i epun, me itre nekö i epun.” Matre keukawa jë hi la hni angatr, nge tha xou i angatre hë.

22 Hnei Iosefa hna lapa e Aigupito, angeic me fami ne la keme i angeic. Hnei angeic hna mele koi 110 lao macatre. 23 Hnei angeic hna öhne la itre nekö i Eferaima uti hë la hnaakönine xötr, me itre nekö i Makiri nekö i Manase. Hna hnaho angatr hune la lue iwatingöneca i Iosefa.* 24 E thupen, öni Iosefa kowe la itre trejin me angeic: “Easenyi hë matre meci pi ni, ngo tro kö Akötresieti a thupë epun. Tro nyidrëti a xomi epuni qa ngöne la nöje ce, me lö sai epuni kowe la nöj hnei nyidrëti hna sisinyi koi Aberahama, me Isaaka me Iakobo.” 25 Nge angeic a upe jë la itre nekö i Isaraela troa sisiny, nge öni angeic: “Tro kö Akötresie a thupë epun, the luelue kö. Ngo qa i epun troa xome trongëne qa la, la trepe juneng.” 26 Ame hnei Iosefa hna mec, lo kola 110 lao macatre i angeic. Hna hnëkëne* la ngönetrei angeic, me amë hnine la ketre hua e Aigupito.