Ini 6

Nemene La Aliene La Baselaia i Akötresie?

Hna acile eka la Baselaia i Akötresie? (1) Drei la Joxu ne la Baselaia cili? (2)

Hapeu, hetre itre xane kö ka troa ce thawa la musi memine la Joxu? Maine eje hi, ke, ala ije angatr? (3)

Nemene la ka amamane ka hape easë a melëne la itre drai hnapin? (4)

Nemene la hna troa kuca hnene la Baselaia i Akötresie kowe la nöjei atr ngöne la itre drai ka troa xulu? (5-7)

1. Ngöne lo Iesu petre kö e celë fen, hnei nyidrëti hna inine la itretre drei i nyidrë troa thithi kowe la Baselaia i Akötresie. Ame la baselaia, ke, ketre musi hna cilëne hnene la ketre joxu. Ngo ame la Baselaia i Akötresie, ke, ketre musi ka ketre pengön. Hna acile eje e koho hnengödrai, nge eje fe a troa musi kowe la fene celë. Tro eje a ahmitrötrëne la atresiwa i Akötresie. Qa ngöne lai, troa kuca la aja i Akötresie e celë fen, tune e koho hnengödrai.​—Mataio 6:9, 10.

2. Hnei Akötresieti hna thingehnaeane ka hape, tro Iesu a Joxu ne la Baselaia i Nyidrë. (Luka 1:30-33) Ngöne lo Iesu e celë fen, ke, hnei nyidrëti hna amamane laka, ketre Joxu ka loi, me ka meköt, me ka pexeje nyidrë. Ngöne la nyidrëti a bëeke hmaca hnengödrai eë, thaa canga cile kö nyidrëti troa Joxu ngöne la Baselaia i Akötresie. (Heberu 10:12, 13) Ame lo macatre 1914, Iehova petre hi a hamë Iesu la musi hnei Nyidrëti ekö hna thinngehnaean. Qa ngöne la ijine cili, Joxu hë Iesu e koho hnengödrai, ene laka hna sië nyidrë hnei Iehova.​—Daniela 7:13, 14.

3. Hnei Iehova hna iëne qa ngöne la fene la itre xaa trahmanyi me föe ka mele nyipici koi Nyidrë, matre troa hane elë hnengödrai eë. Tro angatre a ce musi me Iesu, a itre joxu me itretre huj, nge tro angatre a amekötine la nöjei atr. (Luka 22:28-30; Hna Amamane 5:9, 10) Hnei Iesu hna hëne la itre ka troa ce musi me nyidrë ngöne la Baselaia i nyidrë ka hape, “hnënge mamoe ka xalaith.” Ala 144 000 angatr.​—Luka 12:32; Hna Amamane 14:1-3.

4. Thupene la hna acili Iesu troa Joxu, ke, hnei nyidrëti hna ukapië Satana memine la itre angela i angeice ka ngazo, qa koho hnengödrai kowe la fen. Celë hi matre, kola ngazo la fene qaane lo macatre 1914. (Hna Amamane 12:9, 12) Itre Isi, me itre jiin, me itre mec, me pë ihnim​—Drei lo götrane ka amamane lo “hatrene” ka qajaqaja ka hape musi hë Iesu, nge qa ngöne ju hi la itre drai cili, kola melëne hnene la fene celë lo hna hape, itre drai hnapin.​—Mataio 24:3, 7, 8, 12; Luka 21:10, 11; 2 Timoteo 3:1-5.

5. Easënyi hë tro Iesu a amekötine la itre atr, me thewe angatre tune la atre thup a thawa la itre mamoe memine la itre gootr. Ame la itre “mamoe,” ke, itre eje hi lai ka sipu amamane ka hape, itre atr ka lapa nyipici angatre koi Akötresie. Tro angatre a kapa la mele ka thaa ase palua kö e celë fen. Ame la itre “gootr,” ke, itre eje hi lo hna troa lepe humuthe hnene la Baselaia i Akötresie. (Mataio 25:31-34, 46) Ngöne la itre drai ka troa xulu, tro Iesu a apaatrene trije la itre gootr. (2 Thesalonika 1:6-9) Maine epuni a ajane tro epuni a hane “mamoe” i Iesu, ke, nyipi ewekë tro epuni a wangatrune la maca ne la Baselaia, me trongëne la hnei epuni hna inin.​—Mataio 24:14.

6. Hna thawa la fen, hnene la itre nöje ka nyimutre. Ngöne la itre nöje cili, ke, isa hetrenyi la itre mus. Nge, kola isi hnei ketre me ketre. Ngo, tro la Baselaia i Akötresie a nyi hnane la itre musi atr. Tro hmekuje hi la musi ne ej, a jilapane la fene hnengödrai asë. (Daniela 2:44) Thupene lai, pë hmaca kö isi, me ihumuth, me iakötrë. Tro la nöjei atr a ce mele tingeting, me caas.​—Mika 4:3, 4.

7. Ngöne la ijine lo itre macatre ka ca thauzane ne mus i Iesu, ke, tro la itre atr a pexej, nge tro la fene asë a paradraiso. E traqa ha kowe la pune la itre macatre cili, ase hë Iesu lai kuca asë la nöjei ewekë hnei Akötresieti hna upi nyidrëti troa kuca. Thupene lai, tro nyidrëti a hamëne hmaca la Baselaia kowe la Tretretro i Nyidrë. (1 Korinito 15:24) Hnauëne laka thaa qaja trongëne pe kowe la itre sinee i epun, maine itre atr hnei epuni hna hnime la hna troa kuca hnene la Baselaia i Akötresie?

[Iatr ne la götran 13]

Fene la mus i Iesu, pë hmaca kö imethinë, maine itre hulö