Pëkö Ka Atre Akötresie

MEKUNA NE LA ITRE ATR

Ame e hnine lo hmi Keresiano hna catre fë hnene la hmi Katolik me Orthodoxe, me Porotesta, tre kola inine lo hna hape, A I U; laka ca Akötresie ngo ka köni qëmek, ke Akötresieti la Tretretro, me Hupuna, me Uati Hmitrötr. Ngo kola qaja hnene la itre ka inamacan, ka thele troa atrepengöne la itre hmi, ka hape, tha köni akötresieti kö, ngo casi hi.—The New Encyclopædia Britannica.

NYIPICI QA HNINE LA TUSI HMITRÖTR

Iesu la Hupuna i Akötresie, nge tha hane fe kö nyidrë qaja ka hape, nyidrëti lae Akötresie, maine thele pena troa ithepe göhmeku memine la Tretretro i nyidrë. Hnei nyidrëti pe hna qaja ka hape: “Ini a tro koi Tetetro, ke atraqate Tetetroti hung.” (Ioane 14:28) Nge öni nyidrëti fe kowe la ketre atre drei nyidrë: “Ini a elë kowe la Tetetrongö, me Tetetro i nyipunieti fe ; nge Akötesingö, me Akötesi nyipunieti fe.”—Ioane 20:17.

Tha ketre atr kö la uati hmitrötr. “Hna tiqa [la itre pane Keresiano] asë hnei Uati Hmitöt,” nge hnei Iehova hna qaja ka hape: “Tro ni a nenge la Unge hune la nöjei ate asëjëihë.” (Ite hu. 2:1-4, 17) Tha ka ce pengöne kö la uati hmitrötr me Akötresie, ngo trenge catre i Nyidrëti pe.

ENYIPIEWEKËN

Önine la lue xa ka inine la pengöne la hmi Katolik ka hape, ame lo A I U, tre loi e troa pane qeje pengöne matre atre jë la alien; ngo ngacama qeje pengöne ju hë hnei ketre, tre tha tro pala hi a trotrohnine hnyawa la alien. Atreine kö tro nyipunieti a hnime la atr hnei nyipunieti hna thatre, maine atr hnei nyipunie hna thatre pengöne hnyawa kö? Ame hi la A I U, tre ketre ini lai ka thingi jë së troa atre Akötresie, me hnimi Nyidrë.

Celë hi aqane goeëne Marco lai ini cili; kolo trahmanyi hna qaja ngöne la qaane la tane mekune celë. Öni angeic: “Öninge pena kö ka hape, Akötresieti a juetrëne la pengöi Nyidrëti koi ni, celë hi matre tha pi tro kö ni a thele troa easenyi Nyidrë, nge kösë lo trehnyiwa ni koi Nyidrë, nge tha ijiji ni kö troa hane ce sinee me Nyidrë.” Ngo, “tha qa thei Akötesieti kö la menumenu.” (1 Korinito 14:33) Tha hnei Nyidrëti kö hna juetrëne la pengöi Nyidrëti koi së. Aja i Nyidrëti pe tro sa atre Nyidrë. Öni Iesu: “Ate hë huni la hne huni hna hmi kow.”—Ioane 4:22.

Öni Marco: “Ame hë la eni a atre ka hape, tha ka köni qëmeke kö la nyipi Akötresie, hmaloi ju hi koi ni troa atrepengöi Nyidrëti hnyawa.” Maine tro sa goeë Iehova ceitu me ketre atr hi hne së hna atre, nge maine tha trehnyiwa hmaca kö Nyidrëti koi së, haawe, tro ha hmaloi catre koi së troa hnimi Nyidrë. Ke kola qaja hnei Tusi Hmitrötr ka hape: “Ame la ate tha ihnimi kö, te, tha ’te Akötesieti kö hnei angeic.”—1 Ioane 4:8.