Ka Ithinyi Ne La Mec

Ame la mec, tre tha celë kö lai hna pi ithanatane hnene la itre atr. Ngazo pe, ame e ketre ijin, tre tro asë hi së a mec. Nge ketre ka akötre pi hë la ka ithinyi ne la mec.

Kösë lo jole koi easë asë troa mekune laka, tro ha meci e ketre ijine hnene la keme me thine së, maine föe së, maine nekö së pena. Ame itre xa atr, tre angatr a akötr qa ngöne laka, hna asesëkötrën; ame itre xan, ngacama ekö hë mec la sinee i angatr, ngo hace pala hi la hni angatr. Pëkö ketre e easë hna troa triane hnene la ka ithinyi ne la mec, nge ame hë la kola thinyi së, tre akötre i easë pala ju pë hë lai.

Antonio a qeje pengöne la hace i angeic, thupene la hna mec hnene la keme i angeic, hna fena hnei loto; öni angeic: “Kösë lo traqa pi hi la ketre atr a kiin asë la hnalapa i epun, nge kötre fë pi hë la kii. Matre, ketre lapa menu ju pe hi epun, ke pë hë jëne lö. Casi pe hi la hna atrein, ene la troa lapa mekune la itre drai ne epuni a mele e cili hnalapa, nge eje hë lai. Thele jëne ju hë epuni troa thëthëhmin, ke akötr koi epun, ngo aqane trongene hë lai.”

Ame Dorothy, tre hna meci triji angeice hnene la fö i angeic, nge 47 petre hi lae macatre i angeic; angeice pë hë a thele jë la kepin. Pine laka, ka dici angeic, tha hnei angeice kö hna hane mekune ka hape, meci la pune koi nöjei atr. Ngo ame pe, ketre tha nyipi mama kö koi angeice ka hape, nemene la ewekë ka traqa koi së la easa mec. Angeice pë hë a hnyingëne ju kowe la ketre hene ne la hmi angeic. Ngo öni nyidrë: “Pëkö atr ka atre. Tro hi sa lapa treqen, matre ketre isa sipu öhne jë kö së.”

Hapeu, aqane së pe hi lai, tro pe hi sa itreqe me goeën? Ijije kö tro sa atre maine nyipici lai hna qaja ka hape, meci la pune koi nöjei atr?