Nyine Amekunëne Thatraqane La Itre Drai Hedredrei
1 Nemene la hne së hna mekune troa kuca ngöne la itre ijine hedredrei? Tuneka elanyi thupene la itre hnepe ijine cili, atreine kö së troa qaja ka hape madrine atraqatre së nge hetre thangane ka loi hne së hna kapa qa ngöne lai itre ijine cili? Troa traqa kow, e hne së hna wangatrune la eamo, ene la troa ‘anyipi ewekëne la nöjei ijin.’ (Efe. 5:15, 16.) Ame la ketre nyine troa lapa mekune me hnëkën, ke, ene la troa hane sine la porogarame ne la drai ne asabele ka ketre pengöne e treu januare. Ame la ketre huliwa nyine tro së a hane kuca, ke, ene la troa hane ixatua troa xupe la Bethela ka hnyipixe. Nge, tuneka göi troa cainöje trootro?
2 Ame e treu januare, ke, kola troa trofë trongëne la itus La paix véritable, maine ketre itusi ju kö ka 192 lao götran. Ame e treu febuare, kolo itus L’humanité à la recherche de Dieu hna troa trofë. Maine tha easë kö a troa feke qangöne la ekalesia së, ke, loi e tro së a hane sine palahi la itre ijine hna hnëkëne hnei ekalesia troa cainöje trootro. Ma ijije fe hi tro së a cainöje e hej, pine laka qea la troa lai ngöne la itre treu ne hedredrei. Maine hetre ijine ka ijije koi së troa cainöj, ke, the xomehnöthe kö troa amamane la ketre itus. Maine easë a tro gaa nany, ke, loi e tro së a pane thele troa atre la hmekune la uma ne Baselaia, matre troa hane sine la itre icasikeu, me hane cainöje trootro memine la itre trejine me easë ngöne la götrane cili. Drei la ketre ithuecatre ka tru, ngo tha koi së hmekuj ngo kowe mina fe la itre trejine hne së hna ce icasikeu memin.—Rom. 1:12.
3 Maine easë a mekune troa pane tro qangöne la ekalesia së ngöne la pune la treu, ke, loi e tro së a canga fejane la rapore së, me hamëne kowe la seketere matre troa hane ce iupifë memine la itre rapore ne la ekalesia qëmekene la drai 6 ne la treu thupen. Maine hne së hna fejane la aderesi nyidrë, maine hna canga hnëkëne pena la ketre trengene tus, ke, ijije tro së a hamëne la rapore së ngöne la drai hna sa kowe la ekalesia.
4 Ejehi laka, ngöne la itre treu hedredrei e pune la macatre, ke, kola ipië la etrune la itre hna inin, pine laka angatr’a hane vakaas. Ma tro jë la ka ini a hane tro gaa nany, ngo ngöne pe la ketre ijin. Tha loi kö troa nue la itre wiike nge tha hna inine kö la Tusi Hmitrötre kowe la ketre atr; ngo hapeue matre ce wange pe memine la ketre trejine matre troa kuca palahi la etidi ngöne la ijine patre kö së? Ka loi e troa kuca lapaane la etid, matre atreine troa lapa huti ngöne la mekune la ka ini, la ajane troa xeni palahi ngöne la ua. Tro asë hi së, itre hlue i Iehova, a mekune hnyawa la ijine hedredrei celë, matre tro së a wange la aqane tro së a huliwane hnyawane la traeme së.