Hna Hamën’atrun—Nge Tro Fe a Thel’atrun
1 Madrin’atraqatre troa mekune laka nyipici the së! Qangöne la ihnimi së koi Iehova matre, Nyidrëti a “nue koi së la Maca ka loi.” (1 Thes. 2:4) Celë hi ketre hnëqa katru hna hamëne koi së. Hnei Iesu hna qaja ka hape: “Ame la hna hamëne atrune kow, tro ha thele atrune thei angeic.”—Luka 12:48b.
2 Drei la enyipicine la hna ewekë celë! Nyipici laka alanyimu the së la itre atr hna amanathithine jëne la wangatrehmekune qa ngöne la Tusi Hmitrötr, hetre thangane qa ngön’ej, ngöne la mele së isa alacas; maine atreine hë së ce mele memine la itre trejin, ketre, hetre mejiune hë ka sisitria; celë hi matre mama ha koi së laka, hna hamën’ atrune koi së, nge ijije troa thel’atrune the së.
3 Nyipi Ewekë Troa Trotrohnine Hnyawa La Itre Trenge Wathebo: Kola mekune hnei itre xane ka hape, ma nango tru palaha la hna thele the së; ene la troa kuca la aja i Nyidrë. Hnei Iesu Keriso, hene ne la keresiano hna qaja ka hape “nemene la hna ajane” matre troa kuca hnyawa la hnëqa së. (Efe. 4:15, 16) Nge Nyidrëti fe a qaja koi së ka hape: ‘Uqa la nyine isilekeung, nge hmaloi la ehnefeng.’ (Mata. 11:28-30) Nyidrëti a hnime la atr ka aja ixatua. (Luka 21:1-4) Ejehi laka, tha tro kö së a goeëne la etrun, ngo loi pe tro së a mekune hnyawa la hne së hna atreine troa hamën; qa ngöne lai, tro ha amanathithi së.—Kol. 3:23, 24.
4 Loi e tro epuni a isa hnyinge ka hape: ‘Hapeu, eni kö a pane thele la itre ewekë ne Baselaia ngöne meleng? Ketre, eni kö a hane hamëne la traemenge memine la itre ewekëng, nyine troa atrune la atresiwa i Akötresie, maine troa xatuane pena la itre xaa atr? Nge tuneka la madrine ka eje theng; ej’a xulu qa ngöne laka eni a nyihlue i Iehova, maine hnene la hna thele itre mo ne fen?’ Nyipi ewekë tro së a isa sa hmekune la itre hnyinge celë, pine laka itrej’a troa amamane la aliene la itre hni së.—Luka 6:45.
5 The Ujë Kö Troa Kuca La Ngazo: Catrehnine catre hë la itre itupathi enehila, itupathi qa ngöne la itre aja së, ene la pi hetreny, me itre aja ne ngönetrei. E nöjei drai, easë a cile kowe lo itre itupath, e nöjei drai, ngöne la aqane mel, kola upi së troa ena la itre wathebo i Akötresie. Ejehi laka, atreine tro sa hun, e hne së hna sipo ixatua thei Iehova. (Mat. 26:41) Tro Nyidrëti a hamëne la trenge catre koi së, jëne la uati hmitrötre i Nyidrë. (Isa. 40:29) Maine jëne la wesiula i Nyidrë; celëhi matre, loi e tro palahi së a catre e ej, e nöjei drai. (Sal. 1:2, 3) Ketre nyipiewekë troa atreine huliwa me xomihni, matre traqa kowe la hna hni kow.—1 Kor. 9:27.
6 Tha celë hmekuje kö la troa hniine la loi, ngo troa inine troa sisine la ngazo. (Sal. 97:10) Kola hape, tha tro kö a pi ajane la itre ewekë ka ngazo. Ite Edomë 6:16-19 a e xötrëne la sevene lao ewekë hnei Iehova hna sisiin. Ejehi laka, e ajane së troa amadrinë Nyidrë, ke, loi e tro së a sisiine la itre ewekë cili. Hawe, easë a öhne laka hetre manathithi hna troa kapa qa ngöne la inamacane ne la nyipici; loi e tro së a melën’ej, me catre troa mekune palahi la itre ewekë ka loi kowe la mele së.
7 Nyipi ewekë tro së a thithi matre ijiij sē troa “catre huliwa i Joxu palahi.” (1 Kor. 15:58) Alanyimu lo itre ka wangatrehmekune laka, nyipiewekë troa tru la traeme hna huliwaane kowe la aja i Iehova, matre co ju pe hi la traeme ne troa thele la itre ewekë ka tha nyipi kö. Hawe, loi e troa hetre porogarame ngöne la huliwa i Iehova; ketre aqane thupë së lai.
8 Easë a trotrohnine hnyawa jëne la itre mekune hne së hna ce ithahnataan, laka, pëkö ehacene la itre ewekë hnei Iehova hna ajane the së. (Mika. 6:8) Loi pe hetre kepine matre ijije tro së a olene la itre hnëqa hna isa hamëne koi së. (Efe. 5:20) Qa ngöne lai, Loi e tro së a “huliwa me catr,” me mekune palahi laka nyipi atraqatre kö lo hne së hna kapa hune la itre ewekë hna thele the së.—1 Tim. 4:10.