Kola Sa La Itre Hnyinge i Nyipunie
◼ Nemene la nyine troa hmekëne ngöne la kola ce cainöje trootro hnene la lue trejine trahmanyi me jajiny?
Easë a ajane tro la itre trejine trahmanyi me itre söre a metrötrëne la itre trepene meköti ka draië ngöne la aqane ujë i angatr. Ngo, easë a mele ngöne la ketre fene ka sis, nge ka nue la itre atr troa kuca la ngazo. Ngacama wië lolo la itre mekuna së, ngo nyipi ewekë tro pala hi së a hmekëne wanga jelengazo së jë, nge ketre, wanga hane jë së kuca la ketre ewekë ka ngazo. Kolo lai a hape, tro së a hmeke ngöne la easë a cainöje trootro.
Ngöne la hna cainöje trootro, hne së pala hi hna iöhnyi memine la itre atr, trahmanyi maine föe ka amamane laka hetre aja i angatre kowe la nyipici. Maine easë hmekuje hi memine la atr, trahmanyi maine föe, nge paatre kö la itre xaa atrene la uma, haawe, loi e troa ithahnata qëmekene la uma, ngo thaa tro kö a lö e hnine ej. Maine hetre ajane thene lai atr, ke, ce wange ju matre troa bëeke troa ce iwai hmaca memine la ketre trejin, maine pena, e hetre itre xaa atr hë hnine la uma. Nge maine thaa ijije kö troa tune lai, loi e troa nue kowe la ketre trejine trahmanyi maine trahmanyi la hna troa wange hmaca, nge föe maine ketre föe la hna troa ithahnata memin. Troa tune fe lai, ngöne la kola etid, loi e tro kö la trahmanyi a etidi kowe la trahmany, nge föe koi ketre föe.—Mat. 10:16.
Nyipi ewekë tro së a hmekëne fe ngöne la aqane tro së a iëne la itre trejine ka troa ce cainöje trootro me easë. Ngacama kola ce cainöje trootro hnene la itre trejine trahmanyi me jajiny ngöne la itre xaa ijin, ngo ka lolo kö e troa ce tro memine la ketre gurup. Ketre, thaa loi kö e tro së itre trahmanyi a ce cainöje trootro caasi memine la ketre föe a thaa ifënekö së kö, tui itre söre mina fe. Qa ngöne lai, tro la ka cile fë la icasikeu göi cainöje trootro a atreine waiewekë ngöne la angeice a troa isa thawa ala lue la itretre cainöj, nge itre thöthi fe.
Maine tro pala hi së a waiewekë hnyawa, atreine hi tro së a neëne troa “athixötë” së maine itre xan.—2 Kor. 6:3.