Amamane Jë La Ihnimi Së Kowe La Itre Ka Faipoipo Ka Thaa Ce Hmi Kö Me Easë
1 Eje hi laka, ketre madrine ka tru la kola caasi hnene la föe me trahmanyi ngöne la nyipi hmi. Ngo ame thene la itre fami ka nyimutre, ala caasi thene la lue trefën, la ka kapa la nyipici. Nemene la aqane tro së a hane amamane la ihnimi së me xatuane la ketre e nyidro lue trefëne ka thaa ce hmi kö me easë, matre hane fe ce nyihluei Iehova me easë?—1 Tim. 2:1-4.
2 Loi e Troa Trotrohnine Hnyawa La Mekune i Angatr: Ame ngöne la itre xaa ijin, ke, ma troa icilekeu hnene la trahmanyi maine föe ka thaa hmi kö, pine laka, pëkö ajane troa ithahnatane la itre ewekë ne la ua, maine thaa itrotrohni pena kö. Maine tro la ketre e nyidro lue trefëne a mekune ka hape, thaa wangatrunyi angeice kö hnei ketre, maine kolo pena a zalu pine laka hetre ewekë ka hnyipixe pena ha hna ajan, ene la ewekë ngöne la götrane la ua. Kola qaja hnene la ketre trahmanyi ka hape: “Ame la eni a lapa caasi mina pe ngöne la hnalapa, kösë lo ketre atr ka mele caasi ni.” Kola qaja hnene la ketre ka hape: “Kösë lo hna nue triji ni hnene la foenge me haneköng.” Kola mekune hnene la itre xaa trahmanyi ka hape, ma ase hë kötre fë la fami i angatre hnei hmi. (Wange ju La Tour de Garde ne 15 Ogas 1990, götrane 20-3.) Drei lai kepine matre, ka lolo catr, e ijij, tro la trahmanyi a sine la etidi ne la föe i angeic, ngöne la xötrei.
3 Loi e Troa Ce Huliwa: Hnene la lue trefëne Temoë i Iehova, hna ce huliwa me xatuane la lue xaa atr ka faipoipo troa kökötre ngöne la nyipici. Thupene la hnene la sör hna etidi memine la föe, haawe, hna tro fe hnene la fö i nyidro troa hane wange la trahmany. Qa ngöne la aqane huliwa cili, atreine hi e itre xaa ijine tro fe a hane nyiqaane etidi memine la trahmany.
4 Loi e Troa Menyike La Aqane Ujë, Me Hane Ikep: Loi e tro la itre fami ngöne la ekalesia, a hane amamane laka, angatre a hane ajane troa xatuane la itre fami ka thaa ce hmi kö. Maine tro së a thele troa hane tro agö kowe lai ka thaa ce hmi kö me easë, haawe, tro angeice a öhne laka, ame la itre Temoë i Iehova, angatre a thele loi, nge kola hane nyipi ewekëne fe hnene la itre keresiano la mele ne la itre xaa atr.
5 Loi e troa wange hnyawa pala hi ngöne la nöjei ijin, hnene la itre qatre thup, la itre ixatua hna hamëne hë kowe lai ketre e nyidro lue trefëne ka thaa hmi kö, nge troa wange hnyawa mina fe la nyine troa kuca hmaca, cememine la mejiune laka, tro angatre elanyi a hane nyihluei Iehova.—1 Pet. 3:1, Ithuemacanyi e cahu fen.