Kola Sa La Itre Hnyinge i Nyipunie

◼ Tune kaa la aqane troa caasi hnene la angetrekë hnëqane la troa ikep, memine la itre keme me thine matre troa xatuane la itre nekönatre troa lapa hnyawa ngöne la itre ijine icasikeu?

Thaa majemine kö la itre nekönatr, troa lapa thaa enije ngöne la itre hawa ka nyimutre. Thupene la hna lapa fë la trenge pi elo ngöne la ijine icasikeu, angatre a pane nyenyape me ihuzu me itre xane hnine la Uma ne Baselaia, maine pena ngöne la itre xaa götrane la iuma, me itre hna acili loto, maine ngöne la itre hnë tro. Önine la ketre edomë, ka hape, ‘Ame la nekönate hna nue, te, troa ahmahmane la thine i nyën.’—Ite edomë 29:15.

Hetre ethane pi hë la aqane ujë cili, pine laka, hetrenyi la itre qatre trahmanyi me föe ka eatre hna pen hnene la itre nekönatre ka nyenyap. Thaa loi kö e troa akötrëne la itre xan, me thue ehnefene menune la itre keme me thine memine la ekalesia, troa nyithupene la itre eatr. Maine thaa ajane kö së troa eatre hnene la itre nekönatr, maine itre xane pena, ke, thaa tro kö a nue nyudren troa nyenyape me elo e hnine maine e tröne la Uma ne Baselaia.

Tusi Hmitrötre a qaja ka hape, hnëqa ne la itre keme me thine troa inine la itre nekönatre troa wangatrune la itre hnë hmi së, me metrötrëne itre ej. (Ate Cai. 5:1a) Hna amekötine kowe la atrekë hnëqane la troa ikep troa goeëne hnyawa ngöne la kola icasikeu, me itre asabele, me itre kovasio, maine hna “kuca alolone me amekötine la nöjei ewekë asë”, nge kola “lapa hnyawa” la itre atr. (1 Kor. 14:40; Kol. 2:5) Angatre ju hë e hnine maine e tröne la hnë icasikeu, nyipi ewekë tro pala hi angatre a thupëne hnyawa me hmeke qëmekene troa nyiqaane la porogaram, me ngöne ijine icasikeu, me ngöne la kola fenes. Maine kola öhne la kola nyenyape me enije menu hnene la ketre nekönatr, ke, ijije troa sewe nyëne cememine la hni ka menyik, me qeje pengöne koi nyëne la kepine matre thaa loi kö la itre aqane ujë i nyën. Loi e tro fe a qaja menyikëne kowe la itre keme me thine lai jole cili, memine la enyipi ewekëne la troa thupëne hnyawa nyën. Loi e troa kapa hnyawa hnene la itre keme me thin, la itre ithuemacanyi cili.

Nyipici laka, troa treije la itre nekönatre ka co, maine pena troa iluilu, matre thaa drenge hë së la hna qaja. Haawe, loi e tro la itre trejine ka ikep ka canga traqa 20 menetre qëmekene troa nyiqaane icasikeu, a canga masuane la itre cea ngöne la pune hnë hmi, thatraqane la itre keme me thine trene nekönatre ka co. Tro fe së isa ala caasi a imekunekeun, me nue la itre icea cili.

Maine kola iluilu la ketre nekönatr, loi e tro la keme me thine a athaupu nyën. Maine pëkö hna kuca hnene la keme maine thin, tro la trejine ka ikepe a sipone menyikëne kowe la ketre e nyidro, maine ijije troa pane lö fë la nekönatr. Maine hne së hna könëne la itre atr trene nekönatr, ke, loi e tro sa lapa ezi angatre me ixatua troa thupëne la itre nekönatr, maine kola treij, maine kolo pena a iluilu.

Hetre madrine së ngöne la easë a goeëne e hnine la uma i Iehova, la thiina ka lolo ne la nöjei nekönatre ka isa pengöne macatren. (1 Tim. 3:15) Qa ngöne laka, angatre a metrötrëne la hna amekötine hnei Akötresie thatraqane la hmi, haawe, angatre fe hi lai a atrunyi Nyidrë, nge kolo mina fe a kapa madri angatre hnene la nöjei atrene la ekalesia.