Kola Sa La Itre Hnyinge i Nyipunie
◼ Tro sa trongëne tune kaa la itre qa së ngöne la ekalesia?
Kola thaa gomegom la itre atren la ekalesia i Iehova, qa ngöne la hnei angatr hna catre troa caas. (1 Kor. 14:33, 40) Pane mekune ju la itre nyine troa kuca asë ngöne caa icasikeu. Thaa tro kö sa qaja la aqane hnëkëne la porogaram, ngo ene pe lo nöjei pengöne götrane qa hna kuca hnene la itre trejine trahmany me föe qëmeken me thupene la icasikeu. Hetrenyi la itre götrane qa ka sihngödr, ngo ka nyipi ewekë mina fe itre ej. Tune kaa la aqane tro së isa ala caas a sajuëne la hna amekötine cili?
Loi e hetre traeme së. Nyimutre la itre ewekë nyine troa kuca hnene la itre ka hetre hni ne ajan troa ixatua. (Sal. 110:3) Amamane jë la ihnimi së kowe la itre ka wezipo memine la itre trejin ka qatre hë. Ixatua jë troa nyihnyawane la Uma Ne Baselaia. Thaa nyipi ewekë kö tro sa treqene troa sipo së troa kuca la ketre huliwa ka lolo. Ame la nyipi ewekë, tre ene la troa hetrenyi la ajan troa ixatua.
Loi e troa huliwa cememine la hni ka qahmihmi. Ame la itre atr ka qahmihmi, tre angatr a madrin troa xatuan la itre xan. (Luka 9:48) Troa hmekë së hnene la qahmihmi troa xome la itre hnëqa ka nyimutre nge thatreine pe së e troa kuca asë. Ketre, tro la qahmihmi a thupë së wanga tro sa sasaithi tulu la aqane tro sa xome la mus.—Ite edomë 11:2.
Loi e tro sa nyipici. Hna ithuecatre koi Mose troa iën la itre “ate ka nyipici” troa cilëne la itre hnëqa ekö e Isaraela. (Eso. 18:21) Ka nyipi ewekë mina fe lai thiina cili enehila. Loi e tro sa xome hnyawa la itre götrane qa hna hamë së. (Luka 16:10) Maine thatreine kö së troa pane kuca la ketre götrane qa, loi e troa xecie hnyawa koi së laka troa thele la ketre trejin matre troa kuca la hnëqa cili.
Loi e tro sa hamën la ka nyipi ewekë the së. Hna xatuane pala hi la itre Keresiano troa catre huliwa cememine la u i angatr ka pexej, a ngöne mina fe la kola huliwa i maseta. (Kol. 3:22-24) Hetrenyi la ketre kepin ka tru troa ujë tune lai, ngöne la easë a akökötren la itre aja ne la nyipi hmi. Ngacama ka co hi la götrane qa hne së hna kuca, troa hetre thangane ka loi lai kowe la ekalesia ngöne la easa a kuca hnyawa.
Kola aijijën hnene la nöjei götrane qa, tro sa amamane la ihnimi së koi Iehova me kowe la itre trejine me easë. (Mat. 22:37-39) Epi tro sa catre thupëne me xome hnyawa la nöjei götrane qa asë hna hamëne koi së.