Nyipi Ewekë Troa Thithi Hnene La Itre Keresiano Ka Cainöj
1. Nemene la ewekë ka sisitria ka troa xatua së troa eatrëne la huliwa ne cainöje së?
1 Thatreine kö tro sa eatrëne la huliwa ne cainöj hnene la sipu trenge catre së. Iehova a hamë së la trenge catre ka ijij matre troa xome hnyawa la huliwa cili. (Fil. 4:13) Nyidrëti a upe la itre angela i Nyidrë matre troa xatua së troa thele la itre atr hna aceitunëne me itre mamoe. (Hna ama. 14:6, 7) Iehova la ka aciane la itre itine feja ne la nyipici hne së hna traan me fie lapaan. (1 Kor. 3:6, 9) Drei la enyipiewekëne kowe la itre Keresiano ka cainöj troa lapaune ngöne la thith kowe la Tretretro së e koho hnengödrai!
2. Nemene la itre xaa ewekë nyine tro sa thithi fë?
2 Thatraqa Së Kö: Loi e tro pala hi sa thithi ngöne la nöjei ijine easa cainöj. (Efe. 6:18) Nemene la itre ewekë nyine tro sa thithi fë? Maine jë tro sa thith matre troa lolo pala hi la aqane tro sa goeëne la götran hne së hna troa cainöje ngön, nge troa hetre trenge catre fe. (Ite hu. 4:29) Ijije tro sa sipo Iehova troa ee së kowe la itre atr ka hni ka meköt nge ka ajane troa ini Tusi Hmitrötr me easë. Maine kola hnyinge koi së hnene la ketre atr, ijije tro sa thithi thaup koi Iehova me sipo Nyidrë troa xatua së troa sa hnyawa la hnying. (Neh. 2:4) Maine jë tro fe sa sipone la inamacan ka ijij matre troa amë panëne pala hi la huliwa ne cainöj. (Iako. 1:5) Ketre, kola amadrinë Iehova ngöne la easa olene pala hi koi Nyidrë la hnëqa ka tru hnei Nyidrëti hna hamëne koi së, ene la tro sa itretre nyi trengewekë i Nyidrë troa cainöjëne la Baselaia.—Kol. 3:15.
3. Nemene la aqane sajuëne la huliwa ne cainöj ngöne la easa thithi thatraqane la itre trejine me easë?
3 Thatraqane La Itre Xan: Loi e tro mina fe sa “thithi . . . thatraqai kete,” kola hape, loi e tro sa qaja la ëje ne la itre trejine me easë. (Iako. 5:16; Ite hu. 12:5) Hapeu, kola sewe nyipunie troa xome la huliwa ne cainöj hnene laka hna tithi nyipunie hnei mec? Nga catre jë hö thithi thatraqane la itretre cainöj ka egöcatr. Thaa tro pi kö nyipunieti a wanga acone la emenen la itre thithi nyipunie thatraqai angatr! Ketre, loi e tro mina fe sa thithi thatraqane la itre mus, matre tro pala hi itre ej a nue hnyawa la huliwa ne cainöj, me aijijëne la itre trejine me easë troa “lapa tha enije, me tingeting.”—1 Tim. 2:1, 2.
4. Pine nemene matre loi e tro pala hi sa thithi iele?
4 Ketre hnëqa ka tru la troa tro fë la maca ka loi kowe la nöjei atr e cailo fen asë. Maine tro pala hi sa “thithi iele,” haawe, tro hë Iehova a xatua së troa eatrëne hnyawa la huliwa cili.—Rom. 12:12.