Ini Ne La Itus Thili Jë Kowe La Akötresie
1 Qaane e 14 Maac 2011 me wiike cili, easa troa inine la itus Thili Jë Kowe La Nyipi Akötresie Ka Caas ngöne la Ini Tusi Hmitrötr Ne La Ekalesia. Tro hë lai a hnëkë së hnyawa troa xome la jia ne huliwa cili ngöne la huliwa ne cainöj, me akökötrene la ihnimi së me hni ne ole së koi Iehova me kowe la organizasio i Nyidrë. Tro sa kepe thangane tune kaa qa ngöne la hna inine la itus Thili Jë Koi Akötresie?
2 Aqane Troa Xomiujine La Ini: Hnene laka xalaithe hi la itre paragaraf hne së hna troa ce wang ngöne la nöjei wiik, nyipi ewekë tro la itre qatre thup a huliwane hnyawa la hawa hna sa koi angatr. Tro ha xatuane la itre atrene la ekalesia troa hnehen la itre mekun ka tru, e hna ce wange hmaca la itre mekun hna eköhagen ngöne la pune la itre mekene la itus. Ame ngöne la itre xaa mekene la itus, hetrenyi la itre xaa hnying ka troa xatua së troa sine thele la itre mekun me ce ithanatane itre ej. Drei la ketre ceitun ngöne la götrane 48-9. Thaa nyipi ewekë kö troa e la itre hnyinge cili memine la itre paragaraf. Maine ijije hi la traem, ame la kola troa ce wange itre ej memine la ekalesia, loi e tro la qatre thup a e me ce ithanatane la itre xötr hna hamëne hë.
3 Loi e Troa Canga Hnëkë: Ame la troa hnëkëne hnyawa la ini së, tre, thaa ene hmekuje kö la troa nyihatrene la itre mekune ka sa la hnying. Nyipi ewekë tro sa thith me sine thele la itre xötr hna hamëne hë, matre tro sa hnëkëne hnyawa la itre mekun hne së hna troa qaja, me hnëkëne mina fe la hni së. (Ezera 7:10) Ijiji së asë hi troa ithuecatrekeu hnene la hna hamëne la itre mekune së. (Rom. 1:11, 12) Tro ha xatua së hnene la hna inine la itus Thili Jë Kowe La Akötresie, troa easenyi catre koi Iehova; nge ketre tro hë eje a hnëkë së troa xatuane la itre atr ka hni ka meköt troa cengöne nyihlue i Nyidrë. (Sal. 95:6; Iako. 4:8) Epi tro asë hi sa kepe thangane ka loi qa ngöne la hna amekötine ka lolo cili ngöne la götrane la ua.