Hapeu, Ijije Kö Tro Nyipunieti a Cainöj e Nöjei Sabath?
1. Nemene la ini hne së hna xom qa ngöne la aqane ujë i Paulo me itre sine tronge i nyidrë e Filipi?
1 Ame la Sabath, tre, celë hi drai ne mano ne lo angetre Iudra ekö e Filipi. Hnei Paulo memine la itre sine tronge i nyidrë hna ihamë ngöne la nöje cili, ngöne lo ketre trongene cainöje i angatr ceitu me itre mesinare. Pëkö ka troa qeje angatr e tro angatr a pane amë la huliwa ne cainöj ngöne la drai cili, matre tro fe a hane mano. Ngo pine laka atre hnyawa hi angatr laka, kola troa hmi hnene la angetre Iudra e kuhu trön la nöj, ene pe hna xome la ijine cili matre troa cainöje koi angatr. Drei la madrine i Paulo memine la itre sine tronge i nyidrë, la kola drei angatr hnyawa hnei Lidia memine la hnepe lapa i eahlo, me hane xome la bapataiso! (Ite hu. 16:13-15) Pine laka nyimutre la itre atr ka mano e Sabath, haawe, tune kaa matre troa xome la drai cili matre troa cainöje koi angatr?
2. Nemene la itre itupath hna cile kow hnene la nöje i Iehova, matre troa aijijë së troa cainöje hnyawa e nöjei Sabath?
2 Kola Isi Göi Troa Cainöj e Sabath: Ame ngöne lo macatre 1927, hna ithuecatre kowe la nöje i Iehova troa xome la ketre hnepe ijin ne la nöjei Sabath matre troa cainöj. Ngo canga xulu pi hi la icilekeu. Nyimutre la itre hna xölehuj e Etazini pine laka hnei angatre hna ena la itre wathebo göi Sabath, me axulune la gomegom, me salemë itus ngo thaa hna nue pe hnei mus. Ngo thaa hna hmaca kö e cili hnene la nöje i Iehova. Ame ngöne lo itre macatre 1930, hnei angatre hna eköthe la “itre huliwa hna thawa nyimutren,” ene la troa traqa itronyi la itre trejine ka ajane qa ngöne la itre ekalesia ka iasenyi, matre troa cainöje hnyawa ngöne la ketre teritoar. Haawe, ame ju hi la kola troa xölehuje la itre xan e angatr hnene la itre hene ne mus, tre, gufa kö, ke, ala nyimu pala ha angatr. Hapeu, trotrohnine hnyawa kö epuni la aqane hujëne la itre trejin la mele i angatr matre troa aijijë së troa cainöje hnyawa e nöjei Sabath?
3. Pine nemene matre Sabath la ketre drai ka lolo troa cainöj?
3 Ketre Drai Ka Sisitria Troa Cainöj: Nyimutre la itre atr ka thaa huliwa kö e Sabath, nge ka lapa pe hi ngöne la itre hnalapa i angatr. Angatr a isa mano. Maine jë hetrenyi la itre xaa ka hmi ka ajane troa qeje Akötresie ngöne la drai cili. Maine easa icasikeu e Sabath, eje hi laka, easa heetr ceitu me easa tro troa cainöje trootro; haawe, tune kaa matre troa eköthe amë troa cainöj qëmekene troa icasikeu maine e thupene pena? Loi e tro fe sa hane hnëkë kemeji së.
4. Nemene la madrine hne së hna troa melën, e tro sa xome la ketre hnepe iijn troa cainöj e Sabath?
4 Maine tro sa xome la ketre hnepe ijine së troa cainöj e Sabath, tre, tro pala hi a hetre ijine së troa mano. Nge tro hë sa melëne ngöne la easa mano, la ketre madrine ka tru qa ngöne la hna catre xome la huliwa ka hmitrötr. (Ite edomë 19:23) Maine jë tro fe sa kapa la manathithi ka sisitria troa öhne la ketre atr ka tui Lidia!