Nyitipune Jë Së La Nöjei Perofeta—Hosea
1. Nemene la hne së hna hane hnyingëne ngöne la ketre ijin?
1 ‘Nemene jë la ketre ewekë ka tru, nyine tro ni a kuca koi Iehova?’ Maine jë hnei nyipunieti hna hane hnyinge tune la, ngöne la nyipunieti a lapa mekune la etrune la ihnim me utipine i Iehova. (Sal. 103:2-4; 116:12) Ka ajane Hosea ekö troa trongëne la itre hna amekötine hnei Iehova, ngacama tru la itre ejolene koi angeic. Tro sa nyitipu Hosea tune kaa?
2. Nemene la aqane tro sa catre cainöj, tune lo aqane catre Hosea ekö?
2 Atre Cainöje Ngöne La Ijine Jol: Qa i Hosea ekö troa tro fë maca kowe lo treene lao tribu ne la baselaia ne Isaraela, ke kola ae trootro la nyipi hmi e cili. Ngazo catr xajawai Iehova la itre huliwa hna kuca hnei Ieroboama Joxu hnaaluen, ke, hnei nyidrëti hna catre fë lo hmi koi idrola hna eköthe hë ekö hnei Ieroboama Joxu hnapan. (2 Ite jo. 14:23, 24) Nge ame lo itre joxu ka cil thupei nyidrë, tre ketre hnei angatre hna hane athixötrëne lo treene lao tribu ne Isaraela ngöne la götrane ua, uti hë lo macatre 740 M.P.K, macatre ne kola lepe lai baselaia cili. Ngacama ase hë haöthe la baselaia hnene la hmi ka thoi, ngo ame pe, hnei Hosea pala hi hna catre aeatrëne la hnëqa ne perofeta, traqa koi 59 jë kö lao macatre. Ngo hapeu, tro fe kö sa hane catre cainöje ngöne la nöjei macatre, ngacama tha semesinee së kö hnei itre atr maine icilekeu pena?—2 Tim. 4:2.
3. Hna amamane tune kaa hnene la aqane mele i Hosea la utipine i Iehova?
3 Wang Atrune Jë La Utipine i Iehova: Hnei Iehova hna upi Hosea troa faipoipo memine la “föe ne gojeny.” (Hos. 1:2) Ngacama hnei Gomera, fö i Hosea, hna hnahone la ca nekö i angeice trahmany, ngo tha nekö i angeice pë hë la lue xan. Kola mama jëne la aja i Hosea troa nue la ngazo ne la fö i angeic, la etrune la utipine i Iehova kowe lo angetre Isaraela ka tro triji Nyidrë, ngo ka ietra hmaca. (Hos. 3:1; Rom. 9:22-26) Hapeu, pi tro fe kö sa hane nue la itre sipu aja së, göi troa xatuane la itre atr troa atrehmekune la etrune la utipine i Iehova?—1 Kor. 9:19-23.
4. Nemene la itre xa ewekë ka tru nyine tro sa kuca koi Iehova?
4 Hnene la itre xa hlue i Iehova hna tro trije la ketre huliwa ka loi, matre tru la traeme ne tro angatr a cainöj. Ame la itre xan, tre mele casi pë hë angatr, maine tha hnaho pena, matre troa catre huliwa thatraqane la Baselaia. Ame la easa mekune la aqane mele i Hosea, maine jë tro sa qaja ka hape, ‘Tha koi eni fe kö lai.’ Ngo ame la easa atrehmekune la etrune la ihnimi gufa i Iehova koi së, me mejiune kowe la ecatrene la uati hmitrötr, tro së lai a sesëkötre la aqane tro Iehova a aijijë së troa kuca la itre ewekë hne së hna mekune ka hape tha hmeku së kö, tune lo aqane kuca i Nyidrë koi Hosea.—Mat. 19:26; Fil. 2:13.