Nyitipune Jë Së La Nöjei Perofeta—Nahuma
1. Nemene la hna ini së hnene la tus i Nahuma?
1 Itre hunapak e Nineve a anyipicine ka hape, hnei Iehova hna nyithupene kowe la itre ithupëjia me Nyidrë, thenge la hna perofetane hnei Nahuma. Nge ngacama hna xouene la itre ithupëjia cili, ngo catre kö Iehova hui angatr. (Nah. 1:2, 6) Hetre ini koi së qa ngöne la hna perofetane hnei Nahuma.
2. Nemene maca ka loi la hne së hna tro fë?
2 Iapuny Me Mejiun: Ame la pane ewekë hna öhn hnine la tusi Nahuma, tre kösë maca ka ngazo koi angetre Nineve, traone ka pi tru ne la nöje Asuria. (Nah. 1:1; 3:7) Ngo maca ka loi pe kowe la nöje i Iehova. Ke öni Nahuma (kola hape “Atre Aupun”) koi angetre Iudra, ka hape, tro ha apatrene paluane la itre ithupëjia me angatr![1] Öni Nahuma hmaca jë, “hnapo [Iehova] ngöne la drai ne aköt.” (Nah. 1:7) Ame la easa cainöj, maca ka loi la hne së hna tro fë, nge easë thuecatre koi itre atr troa xomi Iehova nyine hnapo i angatr.—Nah. 1:15.
3. Nemene la aqane tro sa anyipicine la hne së hna qaja?
3 Tulu Nyine Anyipicin: Ame e hnine la tus i Nahuma, Iehova a qeje Nineve me Noamona, traone ne Aigupito hna lepe hnei angetre Asuria. (Nah. 3:8-10)[2] Ame la easa qaja kowe la itre atr ka hape, easenyi hë la pun, tro sa amamane koi angatr la itre tulu ka anyipicin. Maine jë troa amamane lo aqane lepi Nineve ekö hnei angetre Babulona me angetre Madai, lo 632 M.P.K. Hna trotro catr me hlupi la imani, ene pe di jë hi lo hneopegejë hna hape Tigre, me theng la ketre igötranen la ihage hna tra etin e Nineve. Itre ithupëjia pë hë a lepi Nineve jë, tune lo hna perofetane hnei Iehova.—Nah. 1:8; 2:6.[3]
4. Nemene la nyine tro sa kuca matre hmaloi troa trotrohni së hnene la itre atr hna cainöje kow?
4 Hmaloi Troa Trotrohnin: Hnei Nahuma hna qeje pengöne hnyawane hnine la itus i angeic la itre ewekë ka troa traqa.[4] Tha jole kö troa trotrohnin. (Nah. 1:14; 3:1) Haawe, loi e tro fe sa qaja la itre ithanata ka hmaloi troa trotrohnin. (1 Kor. 14:9) Ame la easa öhne la ketre atr, tro sa qaja hnyawane la aliene la tronge së. Ame la easa ini Tusi Hmitrötr me ketre, xatua angeice jë troa lapaune koi Iehova me kowe la Wesi Ula i Nyidrë, nge matre tro angeic a öhn ka hape, thatraqai angeic la ithuemacany hna qaja.—Rom. 10:14.
5. Nemene la ka troa xeci hnyawa koi së?
5 Kola mama hnyawa jëne la tus i Nahuma, ka hape xeci hnyawa koi angeic laka, troa eatr la trenge ewekë i Iehova. Easenyi hë matre patre pi la fene i Satana, ngo madrine jë së, ke öni Akötresie: “Tha tro kö a lu a xulu la aköt.”—Nah. 1:9.[5]