KOLA TRO NGAZO LA FEN

1 | Thupëne Kö La Mele i Epun

ENYIPIEWEKËN

Ijij tro la ketre jol a axulune la itre sine mec the së.

Ame la kola traqa la itre jol, tru la stress thene la itre atr. Nge e qea palaha la hna stress, canga tro hi a fetra la itre sine mec.
Nge e tru palaha la itre jol, thatreine kö la itre pital troa nyinyine hnyawane la itre mec, ke tru hnei ka wezipo, nge co hi hnei drösinöe.
Hnene la itre jol, matre pëhë manie ne la itre atr troa itöne la ka nyipiewekë, tune la xen me itre drösinöe.

Nyine Troa Atre

Maine ka wezipo catr epun, me stress, thatreine jë kö epuni lai troa xomi mekune hnyawa, me thupëne la mele i epun.
Maine tha canga nyinyine kö epun la itre meci epun, tro lai a jole catr, nge tro fe epuni lai a mec.
Tro epuni a atreine axecië mekune hnyawa ngöne la itre ijine jol, e pëkö sine meci epun.
Ngacama pëkö manie i epun, ijije hi tro epuni a thupëne la mele i epun.

Nyine Troa Kuca Enehila

Ame la atr ka inamacan, ijiji angeic hi troa canga mekun la aqane tro angeic a neëne la itre jol. Ka nyipici lai la easa thel troa neëne la itre sine mec. Tro epuni a neëne la itre sine mec, e tro epuni a porop, me aporopëne fe la hnalapa i epun. Kaloi troa canga neëne la jol e ijine petre kö.

“E tro sa porop me aporopëne la hnalapa së, ke co hi la mani hne së hna troa aluzine thei droketre, me itö drösinöe.”—Andreas.a

a Hna saze la itre ëj ngöne la zonale celë.

NEMENE LA NYINE TRO SA KUCA?—Itre Ixatua

Ame ngöne la itre jol, trongëne jë la itre eamo celë matre tha tro kö a tithi epun hnei mec

TROA POROP

Troa Porop

Öni Tusi Hmitrötr: “Ame la ate maca meke, te, kola goeëne la ngazo, me za.” (Ite Edomë 22:3) Thele jëne jë matre tha tro kö a tithi epun hnei mec.

Tro palahi a wasi wanakoime hnei tim me soop qëmekene troa xen, maine thupene la hna tro koi kabine.
Tro palahi a nyidrawane la hnalapa, me köle hnei produit la itre götran hna ketr lapan.
Tha tro kö a easenyine la itre atr hna tithe hnei mec ka ixötrekeu.

TROA XENI HNYAWA

Troa Xeni Hnyawa

Öni Tusi Hmitrötr: “Pë pala kö trahmanyi ka methinëne la ngönetrei angeic, ngo angeice pe a ithuan, me nyidrawan hnyawa.” (Efeso 5:29) Easa wangatrune la ngönetrei së, la easa xeni hnyawa.

Troa iji timi lapa.
Troa xeni wene sinöe me sil.
Troa xeni acon la itre ka si giris, me sotr, me suka.
Tha tro kö a ufi sixa, maine iji kahaitr, maine xomi dorog.

“Eahuni a xeni hnyawa matre tha tro kö a tithi hun hnei mec, nge co hi la mani hna troa aluzin thei droketre. Eahuni pe a itöne la itre nyipi xen.”—Carlos.

TROA KUCI SPOR ME MANO HNYAWA

Troa Mano Hnyawa

Öni Tusi Hmitrötr: “Loi e ca hnatrapaime ka tiqa ce me tingeting, hune la lue hnatrapaime ka tiqa ce me huliwa me kola xeni la eny.” (Ate Cainöj 4:6) Loi e troa mano hnyawa thupene la hna huliwa.

Loi e tro palahi a enij. Maine jë tro epuni a nango ngenu. Tro la spor a aegöcatrenyi epun, ngacama qatre hë epun, maine adikape, maine hetre sine meci epuni pena.
Troa Kuci Spor

Troa mano hnyawa. E tha mano hnyawa kö së, tro sa stress, nge tro ha ngazo la mekun. Nge e qea ha, troa fetra la itre xaa mec.
Troa sa traem ne meköl, isine jë troa meköl me hlë ngöne la hawa hnei epuni hna sa.
The goeë tele kö, maine mobilis la epuni ha meköl.
The xeni atrunyi kö, maine iji kofi maine kahaitr qëmeken troa meköl.

“Eni a öhne laka, nyine loi koi së la troa meköl hnyawa. E tha meköle hnyawa kö ni, eni a akötre he, nge tha nyipi egöcatre kö ni. Ngo, e hnenge hna mano hnyawa, hetre trengecatreng troa kuca la hnenge hna ajan! Nge tha eni kö a wezipo lapa.”—Justin.