ITRE HNAXULU

Itre Jol Ka Traqa

E nöjei macatre, kola jë la itre miliar lao sinöe matre eëny. Ame ngöne la pun la itre macatre 1940, kolo ha patre trootro la itre hnaxulu, ngöne la itre götran gaa manie lapa.

Ame la kola jë la hnaxulu, kolo fe a apatrene la itre sinöe me nöjei ka mel hnene itre ej.

Hna Xup La Ihnadro Troa Cile Palua

Ngacama ase hë jë la itre xaa götran, ngo kolo hmaca a cia e cili la itre sinöe me feja. Kola sesëkötr la itre ka inamacan la angatr a öhne la aqane nyimenyime cia la itre sinöe, me nyi hnaxulu hmaca. Hna tune kaa?

• Hnene la itre ka ithel hna goeëne la itre götran hna jë matre eëny, nge hna nue hmaca e thupen. Hnei angatr hna öhne laka, ame ngöne la 2 200 lao götran hna jë e Amérique me Afrique de l’Ouest, ke thupene la 10 lao macatre, kolo hmaca a cia la itre sinöe me nyi hnaxulu.

• Ame ngöne la zonal Science, itre ka ithel a qaja ka hape, thupene la 100 lao macatre, tro hmaca a cia lolo la itre sinöe, tune ekö, lo qëmekene troa jë.

• Ame e Brésil, hnene la itre ka ithel hna mekun ka hape, tro kö a tran la itre sinöe hnei atr, maine tro kö a nue itre ej troa cia xan.

• Önine la zonal National Geographic ka hape: “Tha nyipiewekë kö tro la atr a tran hmaca la itre sinöe.” Thupene hi la 5 lao macatre, hnei angatr hna öhne ka hape, ame ngöne la itre götran hna jë, ke cia xan hmaca la “itre sinöe ka tru,” itre ka cia hmekuje hi e cili.

Kola Thel Troa Nyinyine La Jol

Ame ngöne la fen asë, itre atr a isine troa thupëne la itre hnaxulu, me nyihnyawane hmaca la itre hnaxulu hna angazon. Matre önine la ONU ka hape, ame ngöne lo 25 lao macatre ka ase hë, “ke co hë la itre hnaxulu hna jë.”

Ngo tha ijije palahi. Önine la ketre rapor qaathene la Global Forest Watch ka hape, “Tha saze kö la etrune la itre hnaxulu hna jë ngöne la itre macatre ka ase hë.”

Itre entreprise ka jë la itre hnaxulu, nge tha hna nue kö hnei mus a kepe mani atrun, itre miliar lao dolar. Nge pine laka, angatr a thele maniëne lai, matre kola patr nyimenyim la itre hnaxulu.

The Xou Kö—Mekuna i Tusi Hmitrötr

“Iehovaa Akötresie a aciane ju la nöjei pengöne sinöe ka mingöming e troa goeën, me itre wene sinöe ka hnyapa.”—Genese 2:​9, NWT.

Hnene la Atre Xup hna xup la hnaxulu matre tro ej a cia xan hmaca, thupene la hna huliwan hnene la atr. Aja i Nyidrë troa cilehut la itre hnaxulu, memine la itre öni me itre feja ka mel e kuhu hnin.

Tusi Hmitrötr a amamane ka hape, easenyi hë tro Akötresie a apatrene la itre atr ka pi tru, itre ka angazone la ihnadro me itre ka mel ngöne ej. Wange ju la tane mekun “Ase Hë Akötresie Qaja Ka Hape Tha Tro Kö a Patr La Ihnadro,” götrane 15.