Kola Methinë Iosefa Hnene La Itre Trejin Me Angeic

HACE me hleuhleu cahu nekönatr, ngöne cahu iatr. Iosefa la ëje i nyën. Pine laka, kola ase salemë nyën hnene la itre trejin me nyën, kowe la itretre itö mo ka tro Aigupito eë. Tro fe hë Iosefa lai a hane öhne la ithahluë e cili. Pine nemen matre kola huliwa menu tune lai, hnene la itre trejin me angeic? Pine laka, angatr a zalu koi Iosefa.

Hnimina i Iakobo qatr lae Iosefa. Hna mama hnyawa la ihnimi nyidrë koi angeic, ngöne laka, hnei nyidrëti hna can la ketre ipelewe ka tru alamekene catr thatraqai angeic. Ame la kola öhn hnene la itre trejin me Iosefa laka, tru catr la ihnimi Iakobo koi angeic, haawe, hna nyiqaane hi e cili la zalu me methinë Iosefa. Ngo hetre ketre kepine kö, matre angatr a xele ma wai Iosefa.

Hnei Iosefa hna alua pu. Ame ngöne la lue pu, tre kola thili koi angeic hnene la itre trejin me angeic. Ame la Iosefa a qaja lai lue pu, kolo hi a jele catrën la trenge hni ne la itre trejin me angeic.

Ame ju hi la ketre ijin kola thupë mamoe hnene la itre trejin me Iosefa, hnei Iakobo hna upi Iosefa troa pane iwai, matre troa hnyingë pengö i angatr. Ame la kola öhne hnene la itre trejin me Iosefa la kola alemi trootro hnei angeic, önine jë hi la itre xan: ‘Easë a humuthi angeic!’ Ngo eloine pe hnei Reubena, ene lo haetra, hna qaja ka hape: ‘Ohe, the kuca kö së la ewekë celë!’ Thaa humuthi Iosefa ju kö, ngo hnei angatre hna xolouthi angeic, me kuië angeic hnine la tim hna kuj. Ene pe angatr a ilapany, matre troa ce thë la nyine troa kuca.

Nge hanawang, kola fetra la tronge i itre Isamaela. Kola qaja hnei Iuda kowe la itre trejin me angeic ka hape: ‘Tro sa salemë angeic koi angetre Isamaela.’ Celë hi ewekë hnei angatr hna kuca. Angatr a salemë Iosefa pi koi 20 lao dralë. Drei lai ketre ewekë ka ngazo nge ka akötr!

Nemen la hna troa qaja hnene la itre trejin kowe la keme i angatr? Angatr a humuthe pi la ketre nani trahmany, me anyimua hnea la iheetre i Iosefa ngöne la madra ne ej. Thupene lai, angatr a tro fë jë la iheetre i Iosefa koi Iakobo keme i angatr, me qaja ka hape: ‘Hnei eahuni hna öhne la. Pane goeëne ju, maine jë iheetre i Iosefa.’

Iakobo a wanga atrehmekun la iheetre i Iosefa. Nyidrëti a treije latresi, me hape: ‘Maine jë hnene la ketre öni ka ihej hna humuthi Iosefa.’ Eatre hë la hna ajan hnene la itre trejin me Iosefa, ene la tro nyidrëti a mekune tune lai. Atraqatre catr la akötre i Iakobo. Itre drai ka nyimutre ne nyidrëti a mele hleuhleu pi Iosefa. Ngo thaa meci kö Iosefa. Tro sa ce wang la götran hna xomi Iosefa kow.