Ketre Joxu Ka Ithahluë e Aigupito

KOLA thahluën cahu itre trahmany troa huliwa. Hanawang cahu trahmany ka thaucën la ketre ka huliwa! Itre atren la lapa i Iakobo la itre ka huliwa, nge hna hë angatr ka hape, angetre Isaraela. Nge ame la itre ka thahluë angatr, tre, angetre Aigupito. Haawe, itre hlue i angetre Aigupito hë lo la angetre Isaraela. Hnei nemen matre traqa pi tune lai?

Nyimutre la itre macatre ne mele tingeting la lapa i Iakobo e Aigupito, nge ala nyimu catre hë angatr. Hna thupë angatre hnyawa hnei Iosefa, ene lo atr ka sisitria catr thupe i Farao joxu. Ngo meci pi hi Iosefa. Nge acile jë hi hune la nöje Aigupito la ketre Farao ka hnyipixe, a ka pë ihnim kowe la angetre Isaraela.

Celë hi matre hnene la Farao celë ka ngazo hna thahluën la angetre Isaraela. Nge hnei angeic hna amë la itre trahmany, ka iqanangazo me ka iaxösisi matre troa thup. Hnei angatr hna folosan la itretre Isaraela, matre troa huliwa mec, me xup la itre traon thatraqai Farao. Ngo kolo pala hi a elë la etrun la itre nekö i Isaraela. Celë hi matre, kola xou hnei angetre Aigupito e mana menu jë elany me catr la itretre Isaraela.

Atre fe hi nyipunie la hna kuca hnei Farao? Hnei nyidrë hna qaja kowe la itre föe ka xomi upune ka hape: ‘Tro nyipunie a humuth la nöjei nekönatr trahmany hna hnahon.’ Ngo thaa hna drei Farao kö hnene la itre föe, pine laka, ka lolo angatr.

Ngo ngazo pe, hnei Farao fe hna amekötin kowe la nöje i nyidrë asë ka hape: ‘Xome jë la itre medreng trahmany ne Isaraela, nge humuthi nyudrene pi. Ngo tro pe kö a nue troa mel la itre medreng jajiny.’ Hapeu, thiina ne atre kö lai? Tro sa ce wang la pengön, matre mele pi pe la ketre medreng trahmany.