Kaqa Ha La Baselaia

HNAUËN cahu kola kuie zezen hnene la trahmany la iheetre i angeic? Hna upi angeice lai hnei Iehova. Ahia la ëje i angeic, ketre perofeta i Akötresie. Nemen la pengön la perofeta? Celë hi ketre atr hnei Akötresie hna pane amamane kow, la itre ewekë ka paatr petre kö nge ka troa traqa ngöne la itre ijin ka troa xulu.

Kola ithanata hnei Ahia perofeta koi Ieroboama, ketre thupëtresij hna acil hnei Solomona, troa elemeken la itre xaa huliwa ne la xupi uma. Ame ngöne la nyidroti a iöhny, kola sesëkötr hnei Ieroboama pine la ketre ewekë hna kuca hnei Ahia ngöne la gojeny. Hnei nyidrë hna una la iheetre i nyidrë ka hnyipixe, me kuie zezene ej, 12 lao sine hnep. Nyidrëti a qaja jë koi Ieroboama ka hape: ‘Xome jë la 10 lao sine maano celë.’ Nemen la kepin matre, Ahia a hamën la 10 lao sine maano koi Ieroboama?

Ahia a ithuemacanyi koi Ieroboama la hna amekötin hnei Iehova. Kolo ha troa thapa la baselaia qaathei Solomona, matre hamën la 10 lao tribu koi Ieroboama. Matre luetre ju pe hi la ka lapa fene la musi Reoboama, nekö i Solomona.

Ame hë la Solomona a dreng la hna qaja hnei Ahia koi Ieroboama, hane hi lai kola traqa la trenge elëhni koi Solomona. Hnei nyidrë hna thel troa humuthi Ieroboama. Ngo hnei Ieroboama hna kötr Aigupito eë. Thupene lai, kola meci hnei Solomona. Traqa kowe la 40 lao macatre ne joxu nyidrë, nge ngöne la ijine cili, hna nyihnai nyidrë hnei Reoboama troa joxu. Drenge hë Ieroboama laka meci hë Solomona, haawe, angeic a bëeke hmaca jë a tro Isaraela.

Joxu ka ngazo lae Reoboama. Ka ithahluë catre kö nyidrë hui Solomona keme i nyidrë. Ame hna tro koi Reoboama joxu hnei Ieroboama me itre xaa tixene lapa, troa sipo nyidrë matre troa apujen la aqane xomiujin la nöj. Ngo hna dreisimine lai hnei Reoboama. Kolo jë petre hi ka hape, catrehnine jë. Celë hi matre kola ië Ieroboama jë hnene la 10 lao tribu troa joxu i angatr, ngo ame pë hë la lue xaa tribu, ene Beniamina me Iuda, ke lue ej a lapa ju pe fene la mus i Reoboama joxu.

Thaa ajane kö Ieroboama tro la itre jini nyidrë a elë Ierusalema eë, matre troa hmi ngöne la ēnē i Iehova. Haawe, nyidrëti a kuca jë la lue nekö i kau gool, me upe la itre atr ne la baselaia ne la 10 lao tribu, matre tro angatr a thili kowe lue ej. Qaane ju hi lai, tiqa jë hi la nöj hnei ihumuth me iakötrë.

Ketre hetrenyi mina fe la itre jol ngöne la baselaia ne la lue tribu. Ame ngöne la hnaafaifine macatre i Reoboama, hna traqa hnene la joxu ne Aigupito troa lep e Ierusalema. Ame hnei nyidrë hna xom la ketre götran ka tru ne la itre mo ka nyimutre, qa hnine la ēnē i Iehova. Celë hi matre, thaa qea kö la hna cil la ēnē memine la epexejen ej, tune lo kola xötrei ase xup.