Meken 2
Hna Atrunyi Nyidrë Qëmekene Troa Mala
THUPENE la hna qaja koi Maria hnene la angela Gaberiela, ka hape, tro nyidro a hnahone la nekö trahmany, ka troa joxu epine palua; Ame hna sesëkötre hnei Maria me hnyinge ka hape: “Troa tune ka la ewekë celë, ke tha iate pete kö ni me trahmany?”
Gaberiela a qeje pengöne ka hape: “Tro ha traqa la Uati Hmitrötre koi ’ö, me hetë eö hnene la mene ne la Kasisitia; qa ngöne lai tro ha qaja la ëjene la ka hmitöte la hna troa hnahon, Hupuna i Akötesie.”
Gaberiela a xatua Maria troa lapaune kowe la maca cili, öni angeice ka hape: “Nge hana wang, la ka cahae me eö Elisabeth, hna hape, safëje, te, upune hë, nge qatë hë nyido; nge dei la teu hna acangemenëne i nyido. Qa ngöne laka pëkö ewekë hnei Akötesie hna tha pucatin.”
Ame hna kapa hnei Maria la trenge ewekë i Gaberiela. Nge tune kaa la aqane amamane nyidroti lai? Nyidroti a hai me hape, “Hana wang, la hlue i Joxu jajiny. Aeatenejë koi ni tune la tenge ewekë i nyipë.”
Thupene la hna trotriji nyidroti pe hnei Gaberiela, Maria a xome la itre hnepe ewekë i angeice me tro kowe la hlapa gaa hetre wetr ne Iudra, nöje hna mele ngön hnei Elisabeth, ifënekö i Zakaria. Nanyi pi hë la gojeny, pine laka ame qaa Nazareta nöje hna mele ngön hnei Maria, köni drai ne troa tro maine foa.
Ame hë la Maria a traqa ngöne la hnalapa i Zakaria, angeice a lö jë me ibozu. Ngöne la ijine cili, hna tiqa Elisabethe hnei uati hmitrötr, nge öni nyidroti koi Maria ka hape: “Manathithi hë nyipë hune la nöjei fö, nge manathithi hë la matra ne la hni nyipë. Qa ka la koi ni, laka traqapi koi ni la thine ne la Joxung? Ke, hana wang, kolo pete hi a traqa la nine ihehe i nyipë kowe la lue hnangenyëng, ame hna sheshëkötejë la medenge e kuhu hninge kola madin.”
Ame la kola drenge hnei Maria la itre trenge ewekë celë, angeice a olene atraqatr me sa ka hape: “Kola atrune la Joxu hnene la hning, nge ame la unge, te, kola aciacine koi Akötesie ate amele ni; Qa ngöne la hnei anganyidëti hna xajawatine laka, ipië hë ni hlue i nyidë; ke hana wang, qane hila tro ha la nöjei xöt’ a qeje ni ka manathith; ke hnei anganyidëti la ka mene hna kuca koi ni la ite ewekë atraqat.” Nge, ngacama kola atrunyi Maria, ngo nyidroti kö a adraië Akötresie. Nyidroti a qaja ka hape: “Hmitöte la atesiwa i nyidë. Nge eje kö la ihnimi nyidë kowe la nöjei xöte angete qoue nyidë.”
Maria a catre atrunyi Akötresie jëne la ketre nyima nyine perofetan, hna sile jëne la uati hmitrötr, öni angeice ka hape: “Hnei nyidëti hna longëtine catëne hnene la ime i nyidë; nyidëti a aisa ijene pi la angete pi tru ngöne la mekune e kuhu ite hni angat. Anganyidëti a ukapiëne la ite joxu qa hune la ite therone i angat, me adraiëne la angete ipië. Anganyidëti a amejine la angete mecijine hnene la ite ewekë ka loi; nge nyidëti a upe hnyawa angate pi pe hi ange tene ewekë. Nge anganyidëti a xomexatua Isaraela hlue i nyidë, kola mekune la ihnimi koi Aberahama memine la matra i angeic’ epine palua; tune lo hnei nyidëti hna ulatine kowe la ite xötapane shë.”
Kola pane ce lapa me Elisabethe hnei Maria, a köni treu; Maine jë, göi troa pane xatua eahlo, pine laka, kolo pe hi lo itre wiike tixenuë lai, matre malane pi hë la nekönatr. Nge pine laka, lue ka upune asë hi nyidro jëne la uati hmitrötre i Akötresie, ka lolo catre e tro la lue föe cili ka lapaune a ce treqene la drai hna sa, ene lai sipu ijine madrine ngöne la lue mele i nyidro!
Hapeu, hane fe kö epuni öhne la aqane atrunyi Iesu, nge thaa ase petre kö hnaho nyidrë? Hna hë nyidrë hnei Elisabeth, ka hape, “Joxung” nge hna sesëkötre madrine la nekönatre e kuhu hni eahlo ngöne lo kola xötrei traqa hnei Maria. Ngo ame pë hë thupen, troa tru hnei atr ka thaa metrötrë Maria kö memine la nekönatre hna troa hnahon; haawe, celë hi hne së lai hna troa wange e thupene pe. Luka 1:26-56.
▪ Nemene la hnei Gaberiela hna qaja, nyine xatua Maria troa trotrohnine laka, ka tro angeice a upune?
▪ Tune kaa la aqane atrunyi Iesu qëmekene la tro nyidrë a mala?
▪ Nemene la hna qaja hnei Maria, a kola perofetane jëne nyima la aqane atrunyi Akötresie?
▪ Ije treu ne pane ce lapa Maria me Elisabethe, nge pine nemene matre ewekë ka loi la tro Maria a pane xatua Elisabethe ngöne la ijine cili?