Meken 4
Ka Upune Ngo Thaa Ka Faipoipo Pala Kö
KÖNI treu hë la upune i Maria. Atre hë së laka, angeice thei Elisabethe ngöne lo itre pane treu i angeic, ngo enehila, bëeke hmaca ha Nazareta eë. Easenyi hë matre, atre jë la pengö i angeice hnene la itre atrene la nöj. Celë hi matre, atraqatre la xou i angeic!
Kola hnehengazo catre hnei angeic, pine laka, ka iatre angeice me Iosefa lo atre tratrau. Nge atre hnyawa hi angeice laka, ngöne la Trenge Wathebo hnei Akötresieti hna hamëne koi Isaraela, e ase hë amë la jajinyi troa faipoipo, wathebo troa kuci ngazo memine pena ha la ketre trahmanyi wanga troa trane humuthi angeice hnei etë. Tune kaa la aqane tro angeice a qaja amamane koi Iosefa ka hape, ka upune angeic?
Pine laka, köni treu ne pane thaa iöhnyi Maria me Iosefa, nyipici tru la ajane i nyidrë troa kepe angeic. Ame la nyidroti a iöhnyi ke, ma Maria jë hi a hane thuemacanyi Iosefa la pengö i angeic. Angeice a thele la nöjei pengöne aqane troa qeje pengöne laka, ka upune hë angeice hnene la uati hmitrötre i Akötresie. Ngo eje hi laka, jole koi Iosefa troa kapa la ewekë cili.
Atre hi Iosefa laka, hna qaja aloine la aqane mele i Maria. Nge atraqatre la ihnimi nyidrëti koi nyidro. Nge, ngacama tro Maria a catre fë la mekune ka eje thei angeic, ngo ame koi Iosefa ke kola upune hnei ketre trahmany. Ngo eje hi laka, thaa ajane kö Iosefa troa tranyi Maria hnei etë, maine troa ahmahmanyi angeice pena qëmekene la nöjei atr. Haawe, nyidrëti a mekune ju troa senge juetrëne lo hna othi Maria nyine föe i nyidrë. Ngöne petre kö la itre ijine cili, kola goeëne la itre ka iatre kösë itre ka faipoipo hë, nge maine thaa tro hmaca kö a faipoipo, haawe, ame e cili ke troa seng.
Thupene lai, kola tro hnei Iosefa troa meköl, ngo thaa lapa hnyawa kö la hni nyidrë. Ame hna mama pi la angela i Iehova ngöne la pu, me qaja ka hape: “The qou hnine kö eö troa xomi Maria fö’ i ’ö; ke upune hë hnei Uati Hmitröt. Nge tro angeic’ a hnahone la trahmany, nge tro eö a ati atesi anganyidë Iesu; ke tro anganyidëti a amelene la nöjei ate i anganyidë qa ngöne la nöjei ngazo i angat.”
Ngöne la Iosefa a hlë, atraqatre catre la madrine i nyidrë! Nge nyidrëti a canga saqe kuca jë tune la aqane ahnithe koi nyidrë hnene la angela. Nyidrëti a xomi Maria jë kowe la hnalapa i nyidrë. Tune la lue ka faipoipo, nyine amamane kowe la nöjei atr asë laka, qaane enehila, lue ka faipoipo hë Iosefa me Maria. Ngo thaa ce meköle trefëne kö Iosefa me Maria, ngöne la itre treu ne lapa sai Iesu.
Öhne hi nyipunie! Atraqatre hë la iupune i Maria, ngo Iosefa a ati nyidro hune la asina. Nyidroti a tro ië, nge pine nemene matre nyidroti a tro qaa Nazareta ngo kolo pe a easenyi troa hnaho hnei Maria? Luka 1:39-41, 56; Mataio 1:18-25; Deuteronomi 22:23, 24.
▪ Tune kaa la aqane ujë i Iosefa ngöne la nyidrëti a atre laka, ka upune Maria, nge pine nemene matre kola ujë tune lai?
▪ Pine nemene matre tro Iosefa a seng, ngo thaa hna faipoipo pe me Maria?
▪ Nemene la aqane ujë nyine troa amamane koi nöjei atr, laka, kösë ka faipoipo hë Iosefa me Maria?