Meken 19
Iesu a Inine La Ketre Föe Ne Samaria
KOLA nue pe e Iudra hnei Iesu me itretre drei nyidrë, me thupa Samaria thenge a tro Galilaia eë. Kucakuca pi hë angatre hna tro, nge hnaipajö hë, matre angatre a pane mano ju ezine la ketre tim ka qeqe, thaa nanyi kö qa ngöne la ketre traon, Sikara la ëjen. Ketre timi lai hna kuje ekö hnei Iakobo a itre hadredre macatre hë, nge eje pala hi enehila e kohilo ngöne la ketre traone ne la hnedrai së, ene Naplouse.
Iesu pë hë a pane mano, nge itretre drei nyidrë a tro troa itö xeni ngöne la traon. Ame hna traqa pi koi nyidrë la ketre föe ne Samaria troa tha tim, matre nyidrëti a qaja ju koi nyidroti ka hape: “Thue imeng.”
Ka ixelemawai catre la itretre Iudra me angetre Samaria, pine laka ka iwangatrehmekunyi atr catre la lue nöje cili. Celë hi matre, kola sesëkötre la föe me hnyinge ka hape: “Ue lae cilieti ate Iuda a sipo timi theng, nge föe ne Samaria kö ni?”
Öni Iesu a sa ka hape: “Maine ate hë nyipo la ahnahna i Akötesie memine la ate qaja koi nyipo, ka hape, ‘Thue imeng,’ maine ase hë nyipo sipo angeic, nge maine ase hë angeice hamë nyipo la ani ka mel.”
Önine la föe ka hape: “Joxu, pëkö nyine tha thei cilie, nge jui la an, nge qa kö ka la ani ka mele i cilie? Hape u, tru cilieti hui Iakobo sine la xötrapane hun, ate hamë huni la an, nge ime i nyidëti lai, me ite nekö i nyidë me ite si nyidë?”
Iesu a wetë koi nyidro ka hape: “Tro ha pi iji hmaca la angete iji la ani celë. Ngo ame la ate iji la ani hnenge hna troa hamë angeic, te tha pi iji hmaca kö epine palua; ngo ame la ani hnenge hna troa hamë angeic, tro ha eje e kuhu hni angeice la ani qeqe kowe la mele ka tha ase palua kö.”
Ame hna sa hnene la föe ka hape: “Joxu, hamë ni pi la ani cili, mate tha pi iji hmaca kö ni, nge mate tha hmaca kö ni kowe la troa tha an.”
Öni Iesu koi nyido, ka hape: “Troja thenge la fö’ i nyipo e kolemi.”
Ame hnei föe hna sa ka hape: “Pëkö föeng.”
Iesu a jele nyipicine la hna qaja hnene la föe. “Nyipici lai hnei nyipo hna qaja, ka hape, Pëkö föeng; ke qa i nyipo hna hetenyi la ala tripi la ite fö’ i nyipo, nge ame la hnei nyipoti hna ce lapa memin’ enehila, te, kete tha fö’ i nyipoti kö.”
Önine la föe koi nyidrëti ka hape: “Joxu, ötetëtine hë ni laka, perofeta cilie.” Eahlo a amamane la lapaune i eahlo, me qaja ka hape, ame la itretre Samaria, hnei angatre “hna hmeti ngöne la wete celë [Gerizim], nge nyipunieti [angete Iuda] a ulatine ka hape, Ierusalema la nyipi huhnahmi.”
Ngo kolo pe a qaja hnei Iesu ka hape, ame la ka nyipi ewekë ke, thaa ene kö la göhnë hna troa hmi ngön. Öni nyidrëti ka hape: “Tro ha traqa la ijin, nge dei ha la, e tro la nöjei ate nyipi hmi a hmi kowe la Tetetro ngöne la [“ua,” Traduction du monde nouveau (MN ) ] me nyipici, ke Tetetroti a thele la itre ka tune lai troa hmi koi nyidë. Ua la Akötesie; nge qâ i angete hmi koi nyidëti troa hmi ngöne la [“ua,” MN ] me nyipici.”
Ame hna hai atraqatre la föe. Öni nyidroti ka hape: “Otetëtinë hë ni laka, tro ha hlepëti la Mesia, (kete ëjene Keriso), e hlepëti hë, tro nyidëti a aleuleunyinëti koi nyihunie la nöjei ewekë asë.”
Iesu a ulatine koi nyidro ka hape: “Ini hi la, ate ithahnata me nyipo.” Pane mekune ju lai! Maine jë kola tro troa tha timi e hnaipajö hnene la föe celë, ke kola xele ma iöhnyi memine la itre xaa föe ne la nöj, ka xele ma wai eahlo pine la aqane mele i eahlo ka ngazo; ame pe, Iesu a adraië nyidro me qaja amamane la ketre ewekë ka sisitria. Nyidrëti a qaja koi nyidroti la ketre ewekë hnei nyidrëti hna thaa hane qaja petre kö koi itre xan. Nemene hë la itre thangane lai?
Nyimutre La Itretre Samaria Ka Lapaun
Ame la kola bëeke hnene la itretre drenge qa hna xomi xeni e Sikara, angatre a öhnyi Iesu ngöne la ani Iakobo, lo hnei angatre hna tro triji nyidrëti ngön, nge nyidrëti a ithahnata memine la föe ne Samaria. Nge traqa hë la itretre dreng, ame hnene la föe hna amë pe la ge i eahlo, me tro kowe la lapa.
Atraqatre catre pi hë la itre trenge ewekë hna qaja hnei Iesu, matre eahlo a qaja kowe la itre trahmanyi ne la traon, ka hape: “Ange trojë fe, ma troa wange la ate cengöne qaja koi ni la nöjei ewekë asëjëihë lo hnenge hna kuca.” Eahlo a thele ju fe troa aciane la aja i angatre troa hane dreng, öni eahlo ka hape: “Hape u, ma Keriso jë hi?” Hetre thangane la hnyinge cili: angatre a tro troa ketre isa wange la ewekë hnei angatre hna dreng.
Ngöne la ijine cili, itretre drei Iesu a upi Iesu troa xome la xeni hnei angatre hna traqa fë qa ngöne la traon. Ngo öni nyidrëti ka hape: “Hete ange kö la hnei nyipunieti hna tha ’te.”
Kola iqajakeune hnei angetre drenge ka hape: “Ma hetete thu a i nyidë?” Iesu a qeje pengöne ka hape: “Ange la tro ni a kuca la ajane la ate upi ni, me umuthe la huliwa i nyidë. Hape u tha trenge ewekë i nyipunieti kö, ka hape, Eke teu pë hë mate troa menu?” Ngo Iesu a qaja la menu ngöne götrane ua me hape: “Goeënejë nyipunie, mate öhne jë la hna eënyi, elehmedehë e troa menu. Hete thupene kowe la ate sin, icasikeune la eköne kowe la mele ka tha ase palua kö mate troa madine la ate trane memine la ate sin.”
Maine jë canga öhnë hë Iesu la etrune la thangane la porotrike i nyidrë memine la föe ne Samaria: ala nyimu la ka lapaune qa ngöne la hnei eahlo hna anyipicin. Eahlo a anyipicine kowe la itre atrene la traon, me qaja ka hape: “Hnei nyidëti hna cengöne ulatine la nöjei ewekë asëjëihë lo hnenge hna kuca.” Celë hi matre, kola tro pi hnene la itre trahmanyi ne Sikara koi Iesu ezine la an, me sipo nyidrë troa ce munëti me angatre matre troa qeje pengöne hnyawa la itre xaa ewekë. Iesu a kapa la sipo i angatr, me lapa a lue drai.
Kolo pala hi a tru trootro la itretre Samaria ka lapaune pine laka, nyimutre catre la ka drei Iesu. Öni angatre kowe la föe ka hape: “Tha lapaune hmekuje kö huni ngöne lo ewekë i nyipo, ke dengë hë huni me ate, laka, Nyipici nyidëti la Ate amelene la fene hnengödrai.” Eje hi laka, kola hamëne koi së hnene la föe ne Samaria la ketre tulu ka lolo, ngöne la aqane tro së a anyipici Keriso, ene la troa aciane la aja ne la itre atr troa pi atre la itre ini hne së hna troa hamën!
Mekune hnyawa kö së laka, itre ewekë la ka traqa ngöne la foa lao treu qëmekene la ijine troa menu—maine jë kola troa menuëne la bali, e palestine ngöne la ijine kola cia dröne hmaca la itre sinöe. Haawe, atreine hi tro së a qaja ka hape, e Nofeba maine e Diseba pena. Matre kola mama laka, thupene la pui ne paseka ne macatre 30 M.K. hna lapa a eitr lao treu hnei Iesu me itretre drei nyidrë e Iudra, matre troa inine me bapataisone la itre atr. Enehila, angatre a bëeke a tro Galilaia eë, zi angatr. Nemene la ewekë ka troa traqa koi angatr? Ioane 4:3-43.
▪ Pine nemene matre kola sesëkötre hnene la föe ne Samaria ngöne la Iesu a ithahnata me nyidro?
▪ Nemene la ini hnei Iesu hna hamëne göi timi ne mel, me göi hnë troa hmi?
▪ Nemene la aqane qaja amamane Iesu koi nyidroti lae nyidrë, nge pine nemene matre nyine haine la iamamanyi cili?
▪ Nemene la hna anyipicine hnene la föe ne Samaria, nge nemene la thangane lai?
▪ Nemene la ka acaasine la göxeni Iesu memine la menu?
▪ Tune kaa la aqane tro së a e la eqeane la hna huliwa hnei Iesu e Iudra thupene la pui ne paseka ne macatre 30 M.K.?