Meken 27

Iesu a Hë Mataio Troa Xötrethenge Nyidrë

THUPENE la hna aloine lo atr ka geny, Iesu a tro pi qaa Kaperenauma kowe la hnagejë e Galilaia. Kola traqa itronyi la itre atr koi nyidrë, nge nyidrëti a ini angatr. Ame la nyidrëti a tro qëmekene la uma ne kepe hotr, nyidrë a öhnyi Mataio lo hna hëne ka hape Levi, kola nango lapa. Öni nyidrëti koi angeice ka hape: “Xöte thenge ni jë.”

Maine jë atre hnyawa hë Mataio la itre ini hna hamëne hnei Iesu, tune la aqane atre i Peteru me Anederea, me Iakobo, me Ioane, ngöne lo Iesu a hë angatre troa xötrethenge nyidrë. Ceitune me angatr, Mataio a canga drenge la kola hë angeic. Angeice a nue pe la itre hnëqa i angeice ngöne la uma ne kepe hotr, me xötrethenge Iesu.

Thupene lai, kola kuca hnei Mataio la ketre pui ne xeni ngöne la hnalapa i angeic, maine jë troa fetëne la hna hë angeic. Nyimutre la itre atrene la feet, Iesu me itretre drei nyidrë, ngo memine fe lo itre sine huliwa i Mataio ene la itre atr hna methinëne hnei angetre Iudra, pine laka, angatre la itre ka hleme trongëne la itre hna hotr, me tro fë kowe la itre ka cilëne la musi Roma, lo hna xele ma wange hnene la nöj. Ketre, ngöne la itre xaa ijin, angatre a atrekënö la nöj, ene la troa sasaithe menune pala ha la aqane hëne la etrune manie hna isa athipe kowe la itre atr.

Ame la kola ce öhnyi Iesu memine la itre telona, haawe, kola hnyingëne hnei itre Faresaio koi itretre drenge ka hape: “Hna uëne laka ce xeni me iji nyipunie me ite telona me nöjei ka ngazo?” Drenge hi Iesu la hnying, matre nyidrëti a sa jë ka hape: “Tha nyipi ewekë kö la tene drösinöe koi angete egöcat, ngo loi pe koi ange tene mec. Ngo trojë nyipunie, a inine la pengöne la, ka hape, ‘Ajange la ihnim, ngo tha huje kö.’ Ke tha traqa kö ni troa hëne la ite ka meköt, ngo ite ka ngazo.”

Maine jë fe Mataio a hëne la itre telona kowe la hnalapa i angeic, matre tro angatre a hane drei Iesu, me kapa la iamele ngöne la ua. Celë hi matre Iesu a hane ce porotrike me angatr, matre troa xatua angatre troa apuiloine la aqane imelekeu i angatre me Akötresie. Thaa xele angatre kö hnei nyidrë, thaa tune kö la itre Faresaio ka mekune laka ka meköti angatr. Ngo kösë ketre droketre ne la ua, nyidrë a amamane koi angatre la ihnimi ipitö i nyidrë.

Maine Iesu a amamane laka, ka senge trije nyidrë la ngazo ne la itre atr, ngo thaa kolo kö a hape nyidrë a thinge la lue meke i nyidrë ngöne la itre ngazo i angatr. Nyidrëti pe a amamane laka, ceitune hi la aqane hnimi angatre hnei nyidrë memine lo itre atr hnei nyidrë hna aloine mecin. Mekune hi epuni lo ketre lepera hnei nyidrëti hna hnime matre nyidrëti a li ime kow, me ketr, me qaja ka hape: “Ini a ajan; loi hë eö.” Epi tro fe së a hane ihnimi ipitö tui Iesu, hnene la troa ithuecatre kowe la itre atr ka aja ixatua, ene la troa hamëne la ixatua ngöne la götrane la ua. Mataio 8:3; 9:9-13; Mareko 2:13-17; Luka 5:27-32.

▪ Kola öhnyi Mataio ekaa hnei Iesu?

▪ Nemene la huliwa i Mataio, nge pine nemene matre kola methinëne la itre atr ka huliwa tui angeice hnene la itre xaa atre Iudra?

▪ Nemene la hna jele ngazo Iesu pin, nge tune kaa la aqane sa i nyidrë la hnying?

▪ Pine nemene matre Iesu a ce xeni memine la itre atr ka kuca la ngazo?