Meken 42

Iesu a Thaucëne La Itre Faresaio

IESU a qeje pengöne ka hape: Maine nyidrëti a helëne la itre dremoni hnei Satana, haawe, Satana a icilekeu me angeice kö. Öni nyidrëti fe ka hape: “Aloine jë la sinö, mate loi la ite wen’ ej; ke hna wangate hmekune la sinöe hnei wen.”

Thatreine kö troa qaja ka hape, hetre wene ne la huliwa i Iesu, laka, nyidrëti a helëne la itre dremoni, pine laka, nyidrëti a nyihlue i Satana. Maine ka lolo la wene sinöe, thatreine kö troa qaja ka hape, ka hnyeqetre la isinöe. Kolo pena ha amamane hnene la itre wene ka ngazo ne la itre Faresaio, ene lo itre trenga thoi hna atë hui nyidrë, memine la aqane icilekeu menu i angatre me nyidrë, ka hape itre ka pui ngazo hnyawa angatr. Öni nyidrëti koi angatre ka hape: “Ite nekö i une fe, tro nyipunie a ithahnata aloine tune ka, nge ngazo pe nyipunie; ke kola ewekë la që qa kuhu hni ka tiqa.”

Pine laka, itre trenge ewekë së a amamane la itre aliene hni së, haawe, tro kö a ameköti së hnene la itre hne së hna qaja. Iesu a qaja ka hape: “Ngo ini a qaja koi nyipunie, ka hape, Ame la nöjei tenge ewekë ka gufa hna qaja hnei ite ate, tro hmaca angat’ a qaja ngöne la drai ne amekötin; ke tro ha ameköti ’ö hnene la ite tenge ewekë i ’ö, nge tro ha ahnëjinë eö hnene la ite tenge ewekë i ’ö.”

Ngacama tru catre hë la itre iamamanyikeu hna kuca hnei Iesu, ngo itretre cinyihane me itre Faresaio a sipo koi Iesu me hape: “Ate ini fe pi tro huni a goeëne la kete iamamanyikeu qa thei cilie.” Maine thaa hna sipu öhne kö hnene la itre atr ne Ierusalema la itre iamamanyikeu i nyidrë, ngo ame pe, hetrenyi kö la itre hatrene hna goeëne nyine anyipicine hnyawa lai. Celë hi matre Iesu a sa kowe la itre tane i angetre Iudra ka hape: “Nge nyidëti a wetë koi angat, me hape, Xöte ka ngazo me kuci ngazo, kola thele la iamamanyikeu, ngo tha tro kö a hamëne la iamamanyikeu koi angat, ngo loi la iamamanyikeu, ene Iona perofeta.”

Nyidrëti a qeje pengöne ju la aliene la trenge ewekë i nyidrë, öni nyidrëti ka hape: “Ke hnei Iona hna lapa hnine la ie ka tru köni lai me köni jid; tune lai tro la nekö i ate a lapa hnine la hnadro köni lai me köni jid.” Thupene la hna ulumi Iona hnene la ie, hna lö hmaca pi angeice qa hnine ej, kösë ketre hna amelene hmaca; ketre tune mina fe, Iesu a thingehnaeane ka hape, nyidrëti fe a troa mec, nge tro ha amele nyidrëti hmaca ngöne la drai hnaakönin. Ngo thaa tro jë kö la itre tane i angetre Iudra a saze la thiina i angatr, pine laka, tro angatre a xelene la “iamamanyikeu i Iona.”

Qa ngöne lai, Iesu a qaja ka hape, troa mele hmaca qa hna meci la itre thupëtresiji ne Nineve ka ietrane la itre ngazo i angatr, nge tro angatre a ahnëjinë angetre Iudra, itretre thipetriji Iesu. Nyidrëti mina fe a aceitunëne lai, memine la traqa ne la föe ne Seba, qa ngöne la cane la fene hnengödrai, troa drenge la inamacane i Solomona; ketre, nyidroti a madrine atraqatre pine la hnei nyidro hna öhne me dreng. Öni Iesu fe, “Nge hana wang, dei pe la ka sisitia hui Solomona.”

Thupene lai, Iesu a hamëne ju la ketre ceitun; ene la ketre atr hna lö trije hnene la ketre ua ka ngazo, a thaa nyi aliene pe matre nyi göhnene hnene la itre ewekë ka lolo; ame la pun, löthe ju pena ha hnene la sevene lao ua ka iakötrë catre kö hune lo hnapan. Öni Iesu ka hape: “Kete tro ha tune la xöte ka ngazo celë.” Hna awiëne la nöje Isaraela, nge nyimutre la itre ewekë ka saze e hnine la nöj; aqane tro hi së lai a aceitunëne memine la kola lö pi la ua ka ngazo laka, hna tro me canga bëeke hmaca. Ngo kola amamane pe hnene la nöje la aqane thipetrije angatre la itre perofeta i Akötresie, uti fe hë la icilekeu angatre me Keriso, laka, ngazo catre kö la itre hni angatre enehila hune lo qaan.

Ame ngöne la Iesu a ithahnata, kola traqa hnene la thine i nyidrë, me itre trejine me nyidrë, angatre a ce cile memine la itre atr. Haawe, kola amamai angatre ju koi nyidrë hnene la ketre atr, öni angeice ka hape: “Hana wang, kola icilenyi e kuhu la thine i cilie me ite tejine me cilie, kola pi ithahnata me cilie.”

Iesu a hnyingë angatre ka hape: “Dei la thineng? Nge ite dei la ite tejine me ini?” Nyidrëti a köja kowe la angetre drei nyidrë, me qaja ka hape: “Hana wange la thinenge me ite tejine me ini! Ke ame la ate kuca la aja i Kakati e koho hnengödrai, celë hi jining, me xang, me thineng.” Iesu hi lai a amamane laka, ngacama catre la ihnimi nyidrë kowe la hnepe lapa i nyidrë, ngo tru catre pala kö la hnei nyidrëti hna hnime la itretre drei nyidrë. Mataio 12:33-50; Mareko 3:31-35; Luka 8:19-21.

▪ Pine nemene matre ijije hi troa qaja göne la itre Faresaio, laka, thaa ka loi kö la “isinöe” me “wene ne ej”?

▪ Nemene la “iamamanyikeu i Iona,” nge nemene la aqane thaa nyipi ewekëne eje thupen?

▪ Nemene la ewekë ka aceitunëne la nöje Isaraela ngöne lo hneijine i Iesu, memine la atr hna lötrije hnene la ua ka ngazo?

▪ Tune kaa la aqane anyipiewekëne Iesu la itre otrene ihnimi ka othi nyidrëti kowe la itretre drei nyidrë?