Meken 48

Iesu a Trotriji Iairo Me Bëeke a Tro Nazareta

TRU catre hnei jole i Iesu ngöne la drai ka pexeje celë: Nyidrëti a traqa hune he qaa Dekapoli; hnei nyidrëti hna aloine la meci ne la ketre föe ka neni hnin, me amelene hmaca qa hna meci la nekö i Iairo jajiny. Ngo thaa fenesi hnyawa pala kö la drai. Ame ju petre hi la nyidrëti a tro trije la uma i Iairo, kola xötrethenge nyidrë hnene la lue timek, nge nyidroti a sue me hape: “Hupuna i Davita fe, epi fetesi ho.”

Ame la nyidroti a hë Iesu ka hape, “Hupuna i Davita,” nyidroti hi lai a wangatrehmekune ka hape, nyidrëti la matra ne la therone i Davita, qa ngöne lai, nyidrëti hi la Mesia hna thingehnaean. Ngo Iesu a dreisimine la hë i nyidro, maine jë, kola troa wange la aliene hni nyidro. Ngo thaa mano kö xötrethenge Iesu hnei nyidro. Nyidroti a huzu Iesu uti hnyawa ha la traqa Iesu ngöne la hnalapa hnei nyidrë hna lapa ngön; ame la nyidrëti a lö hnine la uma, nyidroti fe hi la hutrö.

E cili, Iesu a hnyingë nyidroti ka hape: “Hape u mekunë hë nyipo laka ateine ni kuca lai?”

Öni nyidroti e sa hnyawa ka hape: “Ejëti, Joxu.”

Haawe, Iesu a ketr la lue meke i nyidro, me qaja ka hape: “Tro ha eje koi nyipo cei tune memine la mekune i nyipo.” Ame hna canga goe pi nyidro! Nge Iesu a ahnithe xönexönëne koi nyidro ka hape: “Wange kö ke atejë hnei kete at.” Ngo hnene la trenge madrine i nyidro, thatreine kö nyidro lapa fë thaupune la ewekë hna kuca koi nyidro hnei Iesu, matre nyidroti a qaja agö nyidrëti ngöne la nöj.

Thaa isa ije pala kö angatr, nge kola traqa fë koi Iesu la ketre atr hna löth, a hna sawa hnene la ketre dremoni troa ithahnata. Ame la Iesu a upe trije la ua ka ngazo, ithahnata jë hi la atr. Kola haine hnene la itre atr la itre iamamanyikeu, öni angatre ka hape: “Tha öhne kö shë ka tune la e Isaraela.”

Thatreine kö tro la itre faresaio a kelikelëne la itre iamamanyikeu hna kuca hnei Iesu, pine laka öhne fe hi angatre itre ej; ngo hnene laka ka ngazo la itre hni angatr, nge pëkö lapaun, angatre pena ha a lueluëne la qaane la mene i Iesu, öni angatre ka hape: “Nyëne a helëne la ite demoni hnene la tixene la nöjei demoni.”

Thupene lai, Iesu a bëeke hmaca a tro Nazareta, traone hnei nyidrëti hna tru ngön, nge ce nyidrëti hë memine la itretre drei nyidrë. Caa macatre hë thupene lo hnei nyidrëti hna inine la itre atr hnine la sunago. Ngacama hna haine ngöne lo xötrei hnene la itre atr la itre trenge ewekë i nyidrë ka lolo, ngo thupene pe, angatre a icilekeu memine la itre ini hnei nyidrë hna hamën, me thele troa humuthi nyidrë. Ame hë enehila Iesu a amamane la ihnimi nyidrë me tupathe troa bëeke hmaca troa xatuane lo itretre lapa easenyi nyidrë.

Maine ngöne la itre xaa götran, kola traqa itronyi la itre atr troa wai Iesu, ngo thaa hna tune fe kö e celë. Celë hi matre, traqa ha kowe la drai sabath, nyidrëti a tro ju kowe la sunago troa inine la itre atr. Kola hai hnene la itre atr ka drei nyidrë. Angatre a isa hnyinge ka hape: “Qa ka la inamacane me ite huliwa ka mene celë thene la ate ce? Tha neköne kö lo ate tratrau? nge tha Maria kö la ëjene la thine i angeic? Nge hape u, tha ite tejine kö me angeice lo Iakobo, me Iosefa, me Iuda, me Simona? Nge tha celë kö the së la ite xa i angeic’ asë? Nge qa kö ka la nöjei ewekë asë celë thei angeic?”

Öni angatre e hape, ‘Ceitu së hi me Iesu, ketre atrene la nöj. Hne së hna öhnyi nyidrëti e tru, nge atre hi së la hnepe lapa i nyidrë. Hapeu, ijije kö tro nyidrëti a Mesia?’ Haawe, ngacama nyimutre catre la itre hatrene la inamacane i nyidrë, memine la itre iamamanyikeu, ngo xele pi kö angatre ma kepe nyidrë. Ketre tune mina fe la itre sine la madra i nyidrë, pine laka atre nyidrëti hnyawa hnei angatr, thaa mejiu nyidrëti kö, celë hi matre, Iesu a qaja ka hape: “Tha pë hlemu kö la perofeta, ngo cili kö e zi angeic, me thene la ite sine i angeic, me ngöne la lapa i angeic.”

Eje hi laka, kola sesëkötre hnei Iesu, pine la pë lapaune ne la itretre Nazareta. Thaa tro kö a tru la itre iamamanyikeu hnei nyidrëti hna troa kuca e cili; maine tro hi a atë la lue iwanakothemi nyidrë hune la itre xaa ka wezipo matre troa aloine la itre meci angatr. Mataio 9:27-34; 13:54-58; Mareko 6:1-6; Isaia 9:7.

▪ Nemene la hna wangatrehmekune hnene la lue timek, matre hë Iesu jë nyidroti ka hape “Hupuna i Davita”?

▪ Tune kaa la aqane qeje pengöne la itre faresaio, lo itre iamamanyikeu i Iesu?

▪ Pine nemene matre kola qaja ka hape, ka ihnimi lae Iesu, ngöne laka nyidrëti a bëeke hmaca troa xatuane la itretre Nazareta?

▪ Nemene la aqane kepe Iesu e Nazareta, nge pine nemen?