Meken 59

Drei Lae Iesu?

TRAQA ha Iesu me itretre drei nyidrë e Bethesaida, ame hna tro fë pi koi nyidrëti la timek, me sipo nyidrë troa ketr la atr cili matre goe pi. Iesu a xome la ime ne la timek, me ee angeice pi tröne la lapa eë, nge thupene la hnei nyidrëti hna hnyijuëne la lue meke i angeic, nyidrëti a hnyingë angeice ka hape: “Öhnë hë eö la kete ewekë?”

Öni angeice ka hape: “Ini a goeëne la ite ate a tro kösë ite sinöe.” Nyidrëti a ati ime hmaca hune la lue meke i angeic, nge angeic a goe pi, ame hna loi pi angeic, me öhne hnyawa la nöjei ewekë asë. Thupene lai, nyidrëti a upi angeice pi kowe la uma i angeic, me wathebo angeice troa tro kowe la traon.

Enehila, Iesu a ce tro memine la itretre drei nyidrë kowe la itre lapa e Kaisaria Filipi, ngöne la götrane ailopi ne Palestine. Kaisaria la ketre lapa hna acile ngöne la ketre götrane gaa mingöminge catr; draië catre eje qa ngöne la hnagejë, kola e la 350 met la edraiën. Hetre gojenyi ka elë uti hnyawa ha la traqa e cili, ngo 50 kilomet la enanyin. Celë hi matre, lue drai ne troa tro, matre traqa pi ngöne la lapa.

Ame ngöne la gojeny, Iesu a jea caasi troa thith. Naene pe hi, maine trene lao treu matre humuthi nyidrëti pi hë, nge nyidrëti a hnehengazone la itretre drei nyidrë. Nyimutre hë thei angatre la itre ka xele ma xötrethenge nyidrë. Nanazije hë itre xan, nge pë hë mejiune i angatre koi Iesu, pine laka, hnei nyidrëti hna thipetrije la aja ne la ka ala nyimu troa acili nyidrë troa joxu; ketre xele ju kö nyidrë ma hamëne la ketre hatrene qaa hnengödrai, ngöne la kola upi nyidrë hnene la itre ithupëjia me nyidrë troa anyipicine laka, joxu nyidrë. Drei nyidrë koi ange aposetolo? Ame la angatre a traqa koi nyidrë ngöne la götrane hnei nyidrëti hna thithi ngön, Iesu a hnyingë angatre ka hape: “Drei ni kowe la nöjei atr?” (MN ).

Öni angatre e sa ka hape: “Ioane bapataiso, nge öni ite xan Elia, nge öni ite xan, Ieremia, ma kete perofeta.” Eje hi, kola mekune hnene la itre atr ka hape, nyidrëti hi lo ketre atr hna amelene hmaca qa hna mec!

Iesu a hnyingë angatre ka hape: “Ngo ame [“koi nyipunieti ke, drei ni,” MN ]?”

Ame hna canga sa hnei Peteru ka hape: “Enëtilai la Keriso, Hupuna i Akötesie ka shewengönie.”

Iesu a madrine la aqane sa i Peteru, nge nyidrëti a qaja koi angeice ka hape: “Ini a qaja koi ’ö ka hape, Peteru eö, nge hune la etë celë tro ni a acile la ekalesiang, nge tha tro kö a cate la nöjei qanahage ne hedis hun’ ej.” Iesu petre hi a ithuemacanyi ka hape, nyidrëti a troa acile la ketre ekalesia nge thatreine kö troa lapa xome la itre atren hnene la mec, ene la itre ka mele nyipici koi Iehova ngöne la fen. Thupene lai, nyidrëti hmaca a qaja koi Peteru ka hape: “Tro ni a hamë eö la ite ki ne la baselaia ne hnengödrai.”

Iesu a amamane hnyawa laka, tro Peteru a kapa la itre hnëqa ka ketre pengöne kö. Ngo, thaa kolo kö a hape tro Peteru a tro pa hune la itre xaa aposetolo; ketre, thaa hna acili angeice kö troa trepene la ekalesia. Iesu la etë hut, hna troa acile hune la ekalesia i nyidrë. Ngo kola troa hamëne koi Peteru la köni kii nyine tro angeice a fe gojenyine la itre xaa atr, troa hane lö kowe la baselaia ne hnengödrai.

Ame ngöne la macatre 33 M.K. Peteru a troa xome la pane kii matre troa amamane kowe la itretre Iudra ka ietra, la nyine tro angatre a kuca matre hetrenyi angatre la mel. Tro angeice a xome ju fe la hnaaluen, matre troa hamëne kowe la itretre Samaria ka lapaun, la jëne troa lö kowe la baselaia i Akötresie. Ame hë ngöne la macatre 36 M.K. tro angeice a xome la hnaakönin, thatraqane la itre wanaithihlë, tui Korenelio me itre enehmu i angeic.

Iesu a sisedrëne la porotrike i nyidrë me itre aposetolo. Angatre a nango hleuhleu ngöne la nyidrëti a qaja koi angatre ka hape, easenyi hë matre akötre jë nyidrë me meci e Ierusalema. Pine laka, thaa trotrohnine kö Peteru laka, tro Iesu a mele hmaca me elë hnengödrai eë, angeice a ee nyidrëti aconyi me hape: “Ekölö hi ni enëtilai Joxu; tha tro kö a axajanëti lai koi cilie.” Nge nyidrëti a hutrö koi angeice me hape: “Satana fe tro jë kowe la hutröng, eö la ate nyi zö ni, ke tha mekune kö eö la ite ewekë i Akötesie, ngo ite ewekë i ate pe.”

Eje hi laka, nyimutre kö la itre xaa atr ka ce tro me Iesu me itre aposetolo i nyidrë. Nyidrëti a hë angatre jë, me qaja koi angatre ka hape, thaa ewekë ka hmaloi kö la troa ketre atre drei nyidrë, öni nyidrëti koi angatre ka hape: “Maine kete ate a ajane troa xöte thenge ni, loi e tro angeic’ a xele angeice kö, me xome la [“sinoë,” MN ] i angeice kö, me xötrethenge ni fë. Ke ame la ate pi amelene la mele i angeic, te, tro ha patre lai; ngo ame la ate nue la mele i angeice pi ini, [“memine la maca ka loi,” MN ] te, tro ha hetenyi lai.”

Eje hi laka, maine kola ajane hnene la itretre drei Iesu tro nyidrëti a kepe angatr, haawe, nyipi ewekë tro angatre a hetrenyi la trenge catre memine la hni ne ajane troa hujëne la mele i angatr. Öni Iesu ka hape: “Ame la ate hmahma göi ni me tenge ewekënge ngöne la xöte celë ka kuci ngazo me ka ngazo, tro pena ha la Nekö i ate a hmahma göi nyën’ e ce traqa angeice memine la ite angela ka hmitöte ngöne la lolo ne la keme i angeic. Mareko 8:22-38; Mataio 16:13-28; Luka 9:18-27.

▪ Pine nemene matre Iesu a hnehengazone la itretre drei nyidrë?

▪ Drei Iesu kowe la itre xaa atr?

▪ Nemene la itre kii hna hamëne koi Peteru, nge tune kaa la aqane tro angeice a huliwane itre ej?

▪ Nemene la aqane haji Peteru hnei Iesu, nge pine nemen?