Meken 69

Kola Isenyine La Sipu Atrekë Kemen

AME ngöne la ijine pui ne xen, kola nango catrehnine trootro la icilekeu i itre hene hmi me Iesu. Iesu a qaja ju ka hape: “Ate hi ni laka, ite matra i Aberahama nyipunie; ngo nyipunie pe a thele troa humuthi ni, ke pëkö hne ne la tenge ewekënge e kuhu ite hni nyipunie. Ini a qaja la hnenge hna öhne thei Tetetro; nge nyipunie a kuca la hnei nyipunie hna öhne thei keme i nyipunie.”

Ngacama thaa hnei Iesu kö hna qaja la ëje ne la keme i angatr, ngo nyidrëti a amamane hnyawa ka hape, isa keme i angatre kö. Pine laka, thaa trotrohnine kö hnene la itre hene hmi ne Iudra la mekune i Iesu, haawe, angatre a sa ka hape: “Aberahama la keme hun.” Angatre a mekune ka hape, caasi hi la lapaune i angatre me Aberahama, ene lo enehmu i Akötresie.

Ngo hna akötrëne la hni angatr, hnene la ithahnata i Iesu, ngöne la nyidrëti a sa ka hape: “Maine ite nekö i Aberahama nyipunie, maine nyipunie a kuca la ite huliwa i Aberahama.” Eje hi laka, kola xome la tulu ne la keme hnene la itre nekön. Öni Iesu ka hape: “Ngo enehila nyipunie a thele troa humuthi ni, ene la ate qaja koi nyipunie la nyipici hnenge hna denge qa thei Akötesie; tha hnei Aberahama kö hna kuca tune lai.” Haawe, nyidrëti a qaja fe ka hape: “Nyipunie a kuca la ite huliwa ne la keme i nyipunie.”

Thaa trotrohnine pala kö angatre la mekune i Iesu. Angatre a qaja hmaca ka hape, itre sipu matra i Aberahama angatr, kola hape: “Tha ite nekö ne gojenyi kö hun.” Celë hi matre, angatre a qaja catrëne ka hape, itretre nyihlue nyipici angatr, tui Aberahama, nge öni angatre fe: “Casi la keme hun, ene Akötesie.”

Ngo hapeu, nyipici laka keme i angatre Akötresie? Iesu a sa ka hape: “Maine Akötesieti la keme i nyipunie, maine nyipunieti a hni ni; ke traqa ha ni qa thei Akötesie; nga tha uti xane kö ni, ngo hnei nyidëti hna upi ni. Ue laka, tha trotrohnine kö hnei nyipunie la tenge ewekëng?”

Hnei Iesu hna thele troa amamane kowe la itre hene hmi la itre thangane la hnei angatre hna thipetriji nyidrë. Ngo nyidrëti a qaja hnyawa koi angatre ka hape: “Keme i nyipunie la diabolo, nge pi tro nyipunie a kuca la ite aja i keme i nyipunie.” Nemene pengöne kem, lae Diabolo? Iesu a qaja amamane ka hape, atre ihumuthi angeic, nge öni nyidrëti fe ka hape: “Ate thoi nyën, nge keme ne ej.” Nyidrëti a nyipune me hape: “Ame la ate qa thei Akötesie, te, angeic’ a denge la wesi ula i Akötesie, celë hi mate tha denge kö hnei nyipunie, ke tha qa i nyipunieti kö thei Akötesie.”

Ame hna elëhni hnei angetre Iudra, pine la aqane pane thaucë angatre hnei Iesu, matre öni angatre e sa ka hape: “Hape u, tha hne huni kö hna qaja anyipicin, ka hape, ate Samaria eö, nge thei ’ö la demoni?” Hnene la aqane imethinë, me aqane eetre i angetre Iudra, haawe, angatre a jele “ate Samaria” nyidrë, pine laka, hna xele ma wai angetre Samaria hnei angetre Iudra.

Thaa hnei Iesu kö hna sa thenge lo lai xele ma wai angetre Samaria, hnei angetre Iudra, ngo nyidrëti pe a qaja ka hape: “Pëkö demoni theng, ngo ini a atrunyi Angakaka, nge nyipunie a aipië ni.” Nyidrëti a xome fe la ketre hna thingehnaeane me qaja ka hape: “Maine hete ate trongëne la tenge ewekënge, te, tha tro kö angeic’ a öhne la meci epine palua.” Eje hi, thaa Iesu kö la a qaja ka hape, ka thaa tro hë a hane meci la itretre xötrethenge nyidrë. Nyidrëti pe a qaja ka hape, thaa tro kö a apaatrenyi angatre palua, maine thaa tro kö angatre a hane traqa kowe la “hnaluene mec,” laka, pëkö mele hmaca ka ijij.

Ngo hnene laka, kola wangatrune menune pala ha hnei angetre Iudra la itre trenge ewekë i Iesu, matre öni angatre ka hape: “Ate hë huni enehila, laka, thei ’ö la demoni. Meci hë Aberahama me nöjei perofeta, nge eö a qaja ka hape, Maine hete ate trongëne la tenge ewekënge, te, tha tro kö angeic’ a öhne la meci epine palua. Hape u tru eö hune la keme huni Aberahama lo ka mec? Ketre tune la itre perofeta, meci fe hë angatr. Nge dei pena eö?”

Ngöne la ijine angatre a ithahnata, kola ajane hnei Iesu troa amamane hnyawa kowe la itre atr, laka, nyidrëti lo Mesia hna thingehnaean. Ngo thaa hnei nyidrëti kö hna sa mekötine la hnyinge i angatr, me qaja la pengö i nyidrë, nyidrëti pe a qaja ka hape: “Maine ini a atrunyi ni kö, tha nyipi ewekë kö la tru ni; ngo hnei Angakakati hna atrunyi ni, lo hnei nyipunie hna hape, nyidëti la Akötesi nyipunie. Thate nyidëti kö hnei nyipunie, ngo ate nyidëti kö ni; nge maine tro ni a qaja ka hape, Tha ’te nyidëti kö ni, ene pe thoi pi ni tui nyipunie.”

Thupene lai, nyidrëti hmaca kö a qeje Aberahama, atre mele nyipici, öni nyidrë: “Aciacinë hë Aberahama la keme i nyipunie troa goeëne la draing, nge öhnë hë angeic, ame hna madin.” Eje hi laka, jëne la itre lue meke ne la lapaun, canga madrine atraqatre Aberahama la traqa ne la Mesia hna thingehnaean. Gufa kö la lapaune i angetre Iudra, matre öni angatre ka hape: “Tha luate nge luepi pete kö la o macate i ’ö, nge hane eö öhnyi Aberahama?”

Iesu a sa me hape: “Nyipici, nyipici, ini a qaja koi nyipunie, ka hape, ini pala kö, nge pate pete kö Aberahama.” Eje hi laka, Iesu la a qaja la mele i nyidrëti ekö, ngöne lo nyidrëti petre kö e hnengödrai, ketre ua ka trene men.

Ame hna elëhni atraqatre angetre Iudra, ngöne la Iesu a qaja ka hape, pa i nyidrëti kö öhne la jö hui Aberahama; haawe, angatre a hleme la itre wene etë me tranyi nyidrë. Ngo nyidrëti a zae, me lö pi qa hnine la ēnē, pëkö eatre i nyidrë. Ioane 8:37-59; Hna Amamane 3:14; 21:8.

▪ Tune kaa la aqane amamane Iesu ka hape, thaa ce keme i nyidrëti kö memine la itre ithupëjia me nyidrë?

▪ Nemene la hna ajane troa qaja hnei angetre Iudra ngöne la angatre a jele atre Samaria Iesu?

▪ Nemene la aliene la Iesu a qaja ka hape, thaa tro jë kö la itretre drei nyidrëti a hane mec?