Meken 70
Kola Aloine La Atr Ka Timeke Qaane Lo Kola Hnahon
NGACAMA hna thele hnei angetre Iudra troa tranyi Iesu hnei etë, ngo nyidrëti kö a lapa e Ierusalema. Ame ngöne la drai cili, drai sabath, Iesu a tro me itretre drei nyidrë, nge angatre a öhne la ketre timek, qaane la kola hnahon. Ame hnei angetre drei nyidrëti hna hnyingë nyidrë ka hape: “Rabi, dei ate kë ngazone la, laka, hna hnaho nyëne ka timek, hape u nyën, maine keme me thin?”
Maine jë angatre a mekune tune lo itre xaa hene hmi, laka, ngazo hë la atr, nge angeice petre kö e kuhu hni ne la thin. Ngo Iesu a sa koi angatre ka hape: “Tha ngazo kö nyëne la, nge kete tha ngazo la keme me thine i nyën; ngo loi pe mate mamapi la ite huliwa i Akötesie göi nyën.” Thaa kolo kö a timeke la atr celë, pine laka, hnei angeice maine hnei thine me keme i angeice hna kuca la ngazo. Hnene la ngazo ne la pane atr, ene Adamu, matre ngazo asë pi la itre atr, nge qaane ju hi lai, kola tithi angatre hnene la itre mec, tune la timeke qaane la kola hnahon; haawe, Iesu a troa amamane la itre huliwa i Akötesie, hna jëne la meci cili.
Iesu a amamane la enyipi ewekëne la troa canga kuca la itre huliwa cili. Öni nyidrëti ka hape: “Ijiji ni troa kuca la ite huliwa ne la ate upi ni e lai pete kö; ke, calemi hë la jid, mate tha ’teine kö la ate troa huliwa. Ini la lai ne la fene hnengödrai, ngöne la ijine [“ini petre kö ngöne,” MN] la fene hnengödrai.” Easenyi hë matre meci pi Iesu, nge troa ami nyidrë hnine la hua, matre thatreine hmaca kö nyidrë troa huliwa. Ngo, enehila nyidrëti pala hi a alaine la fene hnengödrai.
Ase hë nyidrëti qaja lai, nyidrëti a hnyijue kowe la hnadro, me lone la dro me itrahnyiju. Nyidrëti a inyiathe ju kowe la lue meke ne la timek, me qaja koi angeice ka hape: “Troja hnea ngöne la ani e Siloama.” Hna kuca thenge lai hnene la timek, ene pe goe pi angeic; angeice petre hi a öhne la lai ngöne la mele i angeic. Drei la madrine atraqatre koi angeic, ngöne la kola xome la gojenyi ne bëek!
Kola hai hnene la itre atre lapa easenyi angeic, ketre tune mina fe lo itre atr ka atre angeic. Angatre a hnyinge ka hape: “Ma tha angeice kö lo ate lapa sipo?” Öni Itre xane ka hape: “Angeice hi.” Ame itre xan, thatreine kö angatre troa kapa lai, öni angatr: “Cei tune hi me angeic.” Ngo önine jë hi la thupëtresiji ka hape: “Ini hi.”
Matre kola pi atre hnene la itre atr, öni angatr: “Hna fe tune ka la lue meke i ’ö?”
“Hnene lo atr, Iesu la ëjei nyidrë, hna lone la dro me inyiathe ngöne la lue mekeng, me qaja jë koi ni ka hape, Trojë Siloama eë troa hnea; ame hnenge hna tro me hnea, ame hna goepi ni.”
Angatre a hnyinge ka hape: “E ka ha nyidë?”
Angeice a sa me hape: “Tha ’te.”
Ame hnene la itre atr hna tro fë lo timeke laka, goeë hë enehila, kowe la itre hene hmi, me itre Faresaio; haawe, angatre fe a hane hnyingëne koi angeice la aqane fe la lue meke i angeic. Öni angeice koi angatre ka hape: “Hnei nyidëti hna inyiathe kowe la lue mekenge la dro, nge ini pë hë a hnea, ene pe goepi.”
Nyipici, hetre kepine tro la itre hene hmi a ce madrine memine lo timek, pine laka, goe hë! Ngo thaa celë kö la hnei angatre hna kuca, angatre hmaca pena ha a qaja angazo Iesu. Öni angatr: “Tha qa thei Akötesieti kö la ate celë.” Pine nemene la kola qaja la trenge ewekë cili? “Pine laka, tha metötëne kö la sabath.” Ngo kola isa hnyinge hnene la itre xaa Faresaio: “Hna tune ka la ate ka ngazo laka ateine troa kuca la ite iamamanyikeu ka tune lai?” Ame hna kaqa luë pi angatr.
Haawe, angatre a hnyinge kowe lai atr ka hape: “Nemene la ewekë i ’ö göi angeic, ngöne la hnei angeic hna fe pi la lue meke i ’ö?”
Angeice a sa me hape: “Perofeta nyidë.”
Ngo thaa kapa kö hnene la itre Faresaio. Xecie e kuhu itre hni angatre laka, hna ithahnata juetrë hnei Iesu memine lai timek, matre troa thoi kowe la ka ala nyim. Haawe, angatre a mekune ju troa hëne la keme me thine ne lai atr ka puafala, matre troa hnyingë nyidroti la ewekë ka traqa kowe la nekö i nyidro. Ioane 8:59; 9:1-18.
▪ Nemene la kepine matre timeke jë la atr, nge nemene la mekune nyine troa nuetrij?
▪ Nemene la aliene la hna qaja ka hape, jidr, ene la ijine pëkö atr atreine troa huliwa?
▪ Tune kaa la aqane ujë ne la itre atr ka atre la timek, ngöne la angatre a öhne laka, goe hë angeic?
▪ Hnene laka, goe hë la timek, pine nemene matre kola isazikeu la itre Faresaio?