Meken 72

Iesu a Upe Troa Cainöje La 70 Lao Itretre Drei Nyidrë

EASË ngöne la heijine menue, macatre 32 M.K.; köni macatre ka pexeje thupene la hna bapataiso Iesu. Ase hë lo pui ne xeni ne hunuma e Ierusalema, nge thaa feke kö Iesu me itretre dreng, me ananyine la lapa cili. Matre kola mama hnyawa laka, ame ngöne lo sikisi lao treu tixenuë ne la huliwa ne cainöje i nyidrë, troa öhnyi nyidrëti pala hi e Iudra, maine ngöne pena lo ketre götrane ne la hneopegejë e Ioridrano, ngöne lo distrik ne Pere, ketre götrane hnë tro fe nyidrëti a hane cainöje ngön.

Eje hi laka, qaane lo paseka macatre 30 M.K., eitre hë lao treu ne cainöje nyidrë e Iudra. Ngo thupene la hna thele hnei angetre Iudra lo ijine paseka macatre 31 M.K., troa humuthi nyidrë ngöne la götrane cili, haawe, hnei nyidrëti hmekuje hi hna cainöje e Galilaia, a caa macatre nge sin. Ame ngöne la hnepe ijine cili, hnei nyidrëti hna pane hnëkëne me inine hnyawa la itretre cainöj; ewekë lai hnei nyidrëti hna xötrei kuca. Enehila, nyidrëti a catre cainöje tixenuë e Iudra.

Haawe, nyidrëti a iëne jë la 70 lao itretre drei nyidrë, me upi angatre isa ala lue troa cainöje trootro. Matre 35 lao gurupe ka cainöjëne la baselaia, a kola troa huliwa ngöne la götrane cili. Angatre a tro pa hui Iesu kowe la itre lapa, me itre götrane hnei nyidrëti hna ajane troa tro kow, maine jë cememine la itre aposetolo i nyidrë.

Thaa hnei Iesu kö hna upe la itretre drei nyidrë, 70 la etrun, troa tro kowe la itre sunago, ngo kowe pe la itre hnalapa, öni nyidrë: “Ame la uma hnei nyipunie hna troa lö kow, pane qaja, ka hape, Tro ha manathithi la lapa celë. Nge maine eje kö e cili la ate troa manathith, tro ha traqa kow’ eje la mene ne la thithi nyipunie.” Nemene la pengöne la maca cili? Öni Iesu, troa “qaja koi angat, ka hape, Easenyi hë koi nyipunie la baselaia i Akötesie.” Kola qaja hnene la itus Matthew Henry’s Commentary göne lai 70 lao atre drei Iesu, ka hape: “Tune la maseta i angatr, ame la götrane hnei angatre hna tro kow, angatre a cainöje ngöne itre hnalapa trootro.”

Ceitune hi la itre ini hna hamëne hnei Iesu kowe lai 70 lao atre drei nyidrë, memine la itre hnei nyidrë hna hamën, caa macatre hë kowe la 12 lao aposetolo qëmekene troa cainöje e Galilaia. Thaa nyidrëti hmekuje kö a hmekë angatre qa ngöne la icilekeu hnei angatre hna troa qëmeke kow, me hnëkë angatre troa tro fë la maca ka loi kowe la itre atr, ngo nyidrëti fe a nue koi angatre la men, matre troa aloine la itre trene mec. Haawe, ame la nyidrëti a traqa pë hë e thupe i angatr, tro nyidrëti a öhne la itre atr ka nyimutre, kola thele troa iöhnyi me nyidrë, pine laka, atre hë angatre laka, nyidrëti la maseta ne lo itretre dreng, ange ka kuca la itre iamamanyikeu ka loi.

Thaa ka qea menu kö la ijine cainöje i Iesu memine la 70 lao itretre drei nyidrë. Easenyi hmaca ha matre bëeke jë koi Iesu, lo lai 35 lao gurupe ka cainöj. Atraqatre la madrine ne la itretre dreng, matre öni angatr: “Joxu fe, ite demoni fe a dei huni hnene la atesiwa i cilie.” Iesu a madrine la huliwa hnei angatre hna kuca matre öni nyidrëti e sa koi angatre ka hape: “Hnenge hna goeë Satana kola sheshë qa hnengödrai tune la samek. Hana wang! Ini a hamë nyipunie la mene troa waja la ite une me ite sekopio.”

Atre hi Iesu laka, thupene la hna acile la Baselaia i Akötresie, ngöne la pun, haawe, tro ha helë Satana me itre dremoni qaa hnengödrai. Ngo enehila, kola amamane hnyawa hnene la aqane helëne hnene la itre atr, la itre ua ka ngazo, ene la itre dremoni, ka hape, nyipici troa traqa kow elanyi la mekune cili. Celë hi matre Iesu a qaja la kola helë Satana qaa hnengödrai, ceitune memine la ketre ewekë hna kuca ha. Qa ngöne lai, ngöne la götrane la ua, kola troa waja aficane la itre un, memine la itre nyonya, hnene lo 70 lao atre dreng. Ngo Iesu pe a qaja ka hape: “Ngo the madine kö qa ngöne [“laka hnei nyipunie hna musinëne la ite ua,” MN ]; loi pe madine jë qa ngöne la hna cinyihane la ite ëje i nyipunie e hnengödrai.”

Iesu a madrine me atrune la Tretretro i nyidrë, ngöne laka, hna pane aijijëne fe la itre atr ka ipië troa hane hetrenyi la mene cili. Nyidrëti a ujë kowe la itretre drei nyidrë me hape: “Manathithi la ite lue meke kola öhne la ite ewekë hnei nyipunie hna öhn. Ke ini a qaja koi nyipunie, laka, ala nyimu la ite perofeta me ite joxu hna pi wange la nöjei ewekë hnei nyipunie hna öhne, ngo tha öhne kö; me pi denge la nöjei ewekë hnei nyipunie hna denge, ngo tha denge kö.” Luka 10:1-24; Mataio 10:1-42; Hna Amamane 12:7-12.

▪ Hnei Iesu hna cainöje ekaa, ngöne la köni pane macatre ne huliwa nyidrë, nge thupene lai, eka la götrane hnei nyidrë hna cainöje ngöne la sikisi lao treu tixenuë?

▪ Hnei Iesu hna upe a tro ië la 70 lao atre drei nyidrë?

▪ Pine nemene matre Iesu a qaja ka hape, hnei nyidrëti hë hna öhnyi Satana e mala  qaa hnengödrai?

▪ Nemene la aliene la hna qaja ka hape, atreine hi tro la 70 lao atre drenge a waja fica la itre un me itre nyonya?