Meken 100

Itre Mina Nyine Ceitun

MAINE jë Iesu petre kö thei Zakaio, hnalapa hnei nyidrëti hna pane xeni me mano ngön, qëmekene troa xome la gojenyi ne tro Ierusalema. Itretre drei nyidrë a mekune laka, tro nyidrëti a qaja amamane ka hape nyidrëti hi la Mesia me acilëne la Baselaia i nyidrë. Iesu a hamëne la ketre ceitune matre troa amekötine la mekune i angatre me amamane laka nanyi pala kö la Baselaia.

Nyidrëti a qaja ka hape: “Ame hna tropi la kete joxu kowe la nöje ga nanyi, troa kapa la baselaia thatraqai angeic, nge tro kö a hmaca.” Ame la “joxu” ke, Iesu, nge ame la “nöje ga nany” ke, e hnengödrai. Ngöne la Iesu a bëeke hnengödrai eë, nyidrëti a kapa la musi troa joxu qaathene la Tretretro i nyidrë.

Ngo qëmekene tro la joxu a tro, ke, nyidrëti a hëne lai treene lao hlue, me isa hamë angatre la caa mina, me hape koi angatr: “Huliwanejë it’ eje uti hë e traqa ha ni.” Ngöne la hnapane eatrene la ceitune celë, ke, hna nyi hatrene lai treene lao hlue hnene la itretre drei Iesu hnapan. Ngo hatrene fe hi lai kowe asë la itre ka troa musi me nyidrë ngöne la Baselaia e hnengödrai.

Ame la itre mina sileva, ke, kolo itre mani ka tru alameken, nge ame la etrune ej, ke, ka ceitu me köni treu ne nyithupene la ketre hlue ka huliwa ngöne hna eëny. Ngo nemene la hna nyi hatrene hnene la itre mina? Nge nemene pengöne huliwa nyine tro la itre hlue a kuca memine la itre mina?

Hna aceitunëne la itre mina memine la trenga mo hna troa huliwane hnene la itretre drenge hna iën, matre troa hetrenyi pala hi la itre matrane la Baselaia e hnengödrai, uti hë la hlepëti Iesu matre Joxu ngöne la Baselaia cili hna thingehnaean. Thupene la hna amele nyidrëti hmaca, me mama kowe la itretre drei nyidrë, Iesu a hamëne jë la itre mina nyine hatren matre tro angatre a catre inine la itre atr matre itretre drenge jë fe nyudren, ene pe nyixane jë fe la itre ka troa ce joxu me Iesu ngöne la Baselaia e hnengödrai.

Iesu a sisedrëne ka hape: “Nge ame hna . . . [xelene la joxu] hnene la lapa i angeic, nge angat’ a upe la maca troa nyenyape thenge angeic, troa hape, Tha ajane kö huni tro nyipëti a musinë hun.” Ame la lapa cili, ke, kola qaja la angetre isaraela, ene la angetre Iudra, ngo thaa itretre drei Iesu kö. Thupene la kola elë hnengödrai eë hnei Iesu, hna akötrëne la itretre drei nyidrë hnene la angetre Iudra cili, haawe kola amamane laka, thaa ajane kö angatre tro nyidrëti a musi hui angatr. Caasi hi la aqane ujë i angatre memine la lapa ka upe la maca.

Kola uëne la itre mina hnene la treene lao hlue? Iesu a qeje pengöne ka hape: “Ame hna traqa hmaca pi angeic, nge ase hë kapa la baselaia; ame hnei angeice hna iupi troa thenge la ite hlue cili lo hnei angeice hna hamëne la manie kow, mate atejë angeice la hnei angate hna isa huliwan. Ame hna traqapi la kete, me hape, Joxue, ase hë nyi xane la mina i cilie, luepi hë la o mina. Nge angeic’ a ulatine koi nyën, ka hape, Ole, eö la hlue ka loi; qa i ’ö troa musinëne la ite lapa ka luepi, qa ngöne la hnei ’ö hna nyipici ngöne la ewekë ka co. Ame hna traqapi fe la kete, me hape, Joxue, ase hë nyi xane la mina i cilie, tripi hë la o mina. Nge angeic’ a ulatine mina koi nyën, ka hape, Musinëneju fe hnei ’ö la ite lapa ka tripi.”

Kola aceitunëne la hlue ka treene lao mina memine la ketre ielapanyine la itretre dreng, me aposetolo, ka mele ngöne la hneijine Penetekos ne macatre 33 M.K. uti hë la hneijine së enehila. Kolo fe a nyi hatrene la ketre ilapanyine la itre atr hnene la hlue ka aelëne la etrune la itre mina i angeic, a faifi hmaca, caasi pala hi la ijine huliwa i angatr, nge thenge la ka ijije koi angatr, me itre atreine i angatr, angatre a catre troa aelëne la trenga mo ne la joxu i angatr, e celë fen. Kola catre cainöjëne la maca ka loi hnene la lue ilapanyine cili, qa ngöne lai, ala nyimu catre la itre atr ka saze troa keresiano. Ala naene lao hlue ka catre huliwa matre troa aelëne la trenga mo hna ahnithe koi angatr.

Iesu a sisedrëne me hape: “Ame hna traqapi fe la kete, me hape, Joxue, hana wang, la mina i cilie, lo hnenge hna amë ngöne la sine mano; ke hnenge hna qoue cilie, qa ngöne laka, nyipëti la ate iwesitë, kola xome la tha hnei nyipëti hna amë, nge kola menuëne la tha hnei nyipëti hna tran. Nge angeic’ a qaja koi nyën, ka hape, Eö la hlue ka ngazo, qa ngöne la ukeineqe i ’ö tro ni a hnëjinë eö. Ate hë eö laka ini la ate iwesitë, kola xome la tha hnenge hna amë, me menuëne la tha hnenge hna tran; hna uë eö laka tha hamëne kö la maninge kowe la laulau ne itö, thatraqane e traqa ha ni, tro ni a hetenyi la ewekënge hna nyi xan? Nge nyidëti a qaja koi angete cile eashenyi, ka hape, Thapapi qa thei nyëne la mina, nge hamë angeice la tene mina ka luepi.”

Ame la kola thapa la mina ngöne la ua qaathene la hlue ka ngazo, ke, kola hape, pëkö göhnë i angeice ngöne la Baselaia e hnengödrai. Eje hi laka, kösë angeice a triane la hnëqa ka tru troa hane musi hune la treene maine faifi lao traon. Ketre, thaa hna jele ngazone kö la hlue, pine la ewekë ka ngazo hna kuca, ngo hnene laka, thaa hnei angeice kö hna catre huliwa matre troa aelëne la itre trenge mo ne la baselaia ne la maseta i angeic.

Ame la kola hamëne la mina ne la hlue ka ngazo kowe la hlue hnapan, ke, kola nyiulili la itre xane ka hape: “Joxu fe, hetenyi mina hi angeice la ite mina ka luepi.” Ngo, Iesu a sa ka hape: “Tro ha hamëne kowe la ate heteny, nge tro ha thapa qa thene la ate ka pë, ene la hnei angeice hna heteny. Nge ame angate lai hna methinë ni, lo angete tha aja ni troa musinë angat, tro fë pi e kolem, troa humuthe qëmekeng.” Luka 19:11-27; Mataio 28:19, 20.

▪ Nemene la ka upi Iesu troa hamëne la itre mina nyine ceitun?

▪ Drei lai joxu, nge nemene la nöje hnei nyidrëti hna tro ngön?

▪ Drei la itre hlue, nge nemene la hna aceitunëne me itre mina?

▪ Drei la itre lapa, nge nemene la aqane amamane angatre la imethinë i angatr?

▪ Pine nemene matre kola jele ngazone la ketre hlue, nge kola hapeue la kola thapa la mina qaathei angeic?