Meken 102

Iesu a Lö e Ierusalema Cememine La Madrin

AME ngöne la hmakanyi ne sabathi 9 Nisan, Iesu a tro qaa Bethania, cememine la itretre drei nyidrë; angatre a tro Ierusalema eë, wetre Elaio thenge. Canga traqa hi angatre e Bethefage, ketre götrane ne la wetr cili. Ame hnei Iesu hna qaja kowe la lue xaa sine trongei nyidrë ka hape:

“Lue trojë kowe la lapa hmeku i nyipo, nge tro nyipoti a öhne la asina hna sil, me neköne fe thei nyën; shengepi me ea e kolemi koi ni. Nge e hete ate a ewekë koi nyipo, öni nyipoti jë, Hete qâ ne lu’ ej’ e Joxu; nge tro angeic’ a canga upe lu’ ej.”

Ame ngöne la xötrei, thatre kö hnene la itretre drenge laka ka ihmeku la itre trenge ewekë cili memine la aqane troa eatre la ketre hna perofetan, ngo tro pë hë angatre a trotrohnine pe e thupen. Hna qaja ha ekö hnei perofeta Zakaria, ka hape, tro la joxu hna thingehnaeane hnei Akötresie, a lö e Ierusalema hune la ketre asina, eje hi, ketre “asina me fekene asina.” Hna tithe mina fe hnei Solomona la ketre fekene asina, ngöne lo nyidrëti a tro matre troa sië nyidrë troa joxu.

Haawe, kola tro pi hnene la luetre drenge a tro Bethefage, me ea la asina memine la nekön, ngo kola qaja koi nyidro hnene la itre xaa atr ka cile e cili ka hape: “Shenge a troa uëne la nekö i asina?” Ngo atre hë angatre laka, thatraqane la joxu la itre öni cili, ame hnei angatre hna nue nyidro. Thupene lai, hnene la itretre drei Iesu hna atë la itre ixetre i angatre hui nyëne memine la nekön; ngo Iesu kö a tithe la fekene asina.

Ame la Iesu a easenyi trootro a tro Ierusalema, kola ketre ala nyimu trootro la itre atr ka traqa itronyi e cili. Nyimutre la itre atr, angatre a sheluthe la itre ixetre i angatre e kuhu gojeny, nge itre xane a hutra la itre umene sinöe, me haöthe la gojeny. Nge angatre a u ka hape, “Manathithi la ate hlepëti ngöne la atesiwa i [“Iehova,” MN ]. Tingeting’e hnengödrai, nge lolo e koho qa.”

Ame hna qaja hnene la itre Faresaio sine la ka ala nyimu ka hape, “Ate ini fe shawa ju la angete dei cilie.” Ngo Iesu a sa koi angatre ka hape: “Ini a qaja koi nyipunie ka hape, maine lapa thaupe ju angatre la, tro pena ite etë a ewekë.”

Easenyi trootro hë Iesu a tro Ierusalema, nge nyidrëti a xajawatine la lapa me treije pin, kola hape: “Maine ate hë eö ngöne la drai i ’ö celë, la ite ewekë thatraqane la tingetinge i ’ö! Ngo enehila hna juetën’ene la lue meke i ’ö.” Tune la aqane qaja i Iesu, Ierusalema a troa xeni pune enehila la thaa idrei i angeic:

“Ke tro ha traqa koi ’ö la ite drai, mate tro ite ithupëjia me eö [itretre Roma fene la musi Général Titus] a tra thithë xötreithi ’ö, me cile xöteithi ’ö, me thinge qaluqalu eö; nge tro ha ace sedë eö memine la hnadro, eö me ite nekö i ’ö thei ’ö; nge tha tro kö angat’ a hnene la kete etë hune la kete etë ngöne nyipi ’ö.” Tune la hna perofetane hnei Iesu, troa apaatrenyi Ierusalema ngöne la 37 macatre thupen, 70 M.K.

Thaa ca treu pala kö hmekune lo Iesu a amele Lazaro hmaca qa hna mec. Nge pine laka, ala nyimu ngöne la itre atr ka öhne lai, haawe, angatre a hane qaja fe la iamamanyikeu cili kowe la itre xan. Celë hi matre, ame la Iesu a lö e Ierusalema, ene pe kola emuemu ju la madrine ne la itre atr. Öni angatre ka hape: “Dei lai?” Nge kola qaja hnene la ka ala nyimu ka hape: “Iesu perofeta lai, qa Nazareta e Galilaia!” Nge öhne hë la ewekë cili hnene la itre Faresaio, ame hnei angatre hna nyihneulil, pine laka, thaa ieene kö la mekune i angatr; tune la hnei angatre hna isa mekune laka, “angete fene hnengödrai a xöte thenge angeic.”

Tune lo hnei Iesu hna pune majemine ngöne la nyidrëti e Ierusalema, nyidrëti a tro troa inine la itre atr hnine la ēnē. Kola traqa koi nyidrë la itre timek me itre peje ca, nge nyidrëti a amele angatr! Ame la kola öhne hnene la itre tane i itretre huj me itretre cinyihane la itre ewekë ka sisitria cili hna kuca hnei Iesu, me drenge la kola u hnene la itre nekönatre hnine la ēnē ka hape, “Hosana kowe la Hupuna i Davita!” ene pe angatre a elëhni. Öni angatre ka hape: “Hape u dengë hë nyipëti la hnei nyudeni la hna qaja?”

Iesu a sa ka hape, “Ö. Tha hnei nyipunieti kö hna e ka hape, ‘Qa ngöne la ukeineqe ne la nöjei nekönate me ite medeng hnei cilieti hna amekötine la hna qaja aloin’?”

Iesu pala hi a hamëne la ini, me goeëne la nöjei ewekë e hnine la ēnē. Nge pine laka, hnenyipajidri hë, nyidrëti a tro pi memine la itretre drei nyidrë, me bëeke hmaca a tro Bethania, 3 kilomet la enanyine qaa Ierusalema. E cili hi la hnei nyidrëti hna meköl, maine jë thene la enehmu i nyidrë ene Lazaro. Mataio 21:1-11, 14-17; Mareko 11:1-11; Luka 19:29-44; Ioane 12:12-19; Zakaria 9:9.

▪ Eu nge nemene la aqane lö Iesu e Ierusalema, ceitune me ketre joxu?

▪ Hapeu, nyipi ewekë kö la tro la itre atr ka ala nyimu a atrunyi Iesu?

▪ Nemene la mekune ka eje e kuhu hni Iesu, ngöne la nyidrëti a öhne e Ierusalema, nge nemene la ewekë hna perofetane hë, nyidrëti a amexeje hmaca?

▪ Nemene la ewekë ka traqa ngöne la Iesu a tro kowe la ēnē?