Meken 106

Mama Cile Hë Jëne La Itre Ceitune Göi Eënyi Vine

IESU e hnine la ēnē, nge nyidrëti a ase hajine la itre hene hmi kaajane troa atre la qaane la musi ka aijijë nyidrëti troa kuca la itre ewekë. Hlohlo petre kö la itre hni angatr, nge Iesu hmaca a hnyingë angatre ka hape: “Nemene la mekune i nyipunie?” Nge jëne la ketre ceitun, nyidrëti a amamane hnyawa koi angatre la pengö i angatr.

Öni Iesu ka hape: “Dei lai ate tene lue kuku, nge angeic’ a tropi kowe la haetra, me hape, Neköng, troja huliwa ngöne la drai celë ngöne la hnënge vineng. [“Nge öni angeic, ka hape, Joxu, ini hi la; ngo tha tro pe. Ame hnei angeice hna tro pi kowe la cipa, me qaja tune mina. Nge öni nyën, ka hape, Xele ni; thupene lai angeic’ a ietra me tro,” MN ]. Dei la ate kuca la aja i keme i nyido?”

Öni angatre koi nyidëti ka hape, “cipa” (MN ).

Haawe, öni Iesu jë hi koi angatre ka hape: “Nyipici ini a qaja koi nyipunie, ame la nöjei telona me ite föe ne gojeny, te, kola thipatë nyipunie kowe la baselaia i Akötesie.” Eje hi, ame la itre telona me itre föe ne gojeny, angatre lo itre ka xele ma nyihluei Akötresie ngöne la xötrei. Nge tune la cipa, hnei angatre hna ietra ju me hane nyihluei Nyidrë. Ngo ame itre hene hmi, ceitui angatre memine la haetra, laka, angatre a uune ka hape, angatre a nyihluei Akötresie; ngo Iesu pe a qaja ka hape: “Traqa ha Ioane [bapataiso] koi nyipunie ngöne la jëne la thina ka meköt, nge tha hna kepe angeice kö hnei nyipunie; ngo hna kepe angeice hnei nöjei telona me ite föe ne gojeny; nge öhne hi nyipunie, te tha hna ietra kö thupen, mate troa kepe angeic.”

Thupene lai, Iesu a amamane ka hape, ame la ngazo ne la itre keme ne hmi, ke, thaa ene hmekuje kö laka, xele kö angatre ma hane nyihlue i akötresie, ngo atraqatre catre kö la ngazo i angatr, pine laka, itre ka iakötrë catre angatr. Öni nyidrëti fe koi angatre ka hape: “Dei lai ate tixene uma kola eënyi vine, me ekö hage xöteith, me sha tepen’ e cili, me acile la ita ne thup, me nue koi angete eëny, ame hna tro ga nanyi eë; kolo ha easenyi la ijine macaj, ame hnei nyidëti hna upe la ite hlue i nyidë koi angete eëny, troa xome la ite wen. Ame hnei angete eënyi hna xölehuje la ite hlue i nyidë, me thaucëne la kete, me humuthe la kete, me trâne la kete. Nge nyidëti a upe hmaca ite xa hlue ka kösaue hune la angete pa; nge angat’ a kuca tune mina koi angat.”

Ame la “itre hlue” ke, angatre lo itre perofeta hna upe hnei Iehova Akötresie, “tixene uma,” kowe la “angetre eëny” ngöne la “vine” i Nyidrë. Ame la itretre eënyi cili, ke angatre la itre qene qaja ka sisitria ne la lapa i Isaraela, ene la “vine” i Akötresie hnine la Tusi Hmitrötr.

Pine laka, hnene la “angete eëny” hna qanangazone me humuthe la “itre hlue,” drei la hna kuca hnene la atrekë ewekëne la vine: “Thupene lai nyidëti a upe koi angate la nekö i nyidë, kola hape, Mate tro angat’ a qouene la neköng. Nge öhnë hë la neköne hnei angete eëny, angat’ a ithahnata ka hape, Kolo ha lo matrane la; eësha humuthi nyën, mate tenge nyi shë pë hë la ite ewekë i nyën. Angat’ a xölehuji angeic, me helëne qa ngöne la hnënge vine, me humuth.”

Haawe, öni Iesu kowe la itre keme ne hmi ka hape: “E traqa la joxu ne la hnënge vine, tro nyidëti a kuci nemene koi angete eëny?”

Önine la itre hene hmi koi nyidrëti ka hape: “Tro nyidëti a apatene la nöjei ate ka ngazo cili, me nue la hnënge vine kowe la ite xa ate eëny, ite ka troa hamë xenine koi nyidëti ngöne la ijin.”

Thatre kö angatr, ngo angatre hi lai a qaja la pune koi angatre kö, pine laka, angatre fe, angetre isaraela lo “angete eëny” ngöne la “vine” i Iehova, ene la lapa i Isaraela. Ame la wene ne la ua hna thele hnei Iehova thene la angetre eëny, ke ene la tro angatre a lapaune kowe la hupuna i Nyidrë la nyipi Mesia. Ngo pine laka, thaa hamëne kö angatre la wene cili, Iesu a thuemacanyi angatre ka hape: “Tha hna e kö hnei nyipunieti la hna cinyihan [Salamo 118:22, 23], ka hape, ‘Ame la etë hna tije hnei angete xupi uma, te, ase hë kuca nyine sinete xomixöt; hna kuca lai hnei [“Iehova,” MN ] nge eësha goeëne me hain?’ Qa ngöne lai ini a qaja koi nyipunie, ka hape, Tro ha xome qa thei nyipunie la Baselaia i Akötresie, me hamëne kowe la nöje ate wa wen’ ej. Nge ame angeic’ ate kei hune la etë celë, te, tro ha nyilanyila; ngo e malapi lai hune la ate, te, tro ha amudromudronyi angeic.”

Haawe, trotrohnine hë hnene la itretre cinyihane memine la itre tane i angetre huj, laka, Iesu a qeje angatr, nge angatre a ajane troa humuthi nyidrë, sipu “matran.” Celë hi matre tro ha xome qaathei angetre Isaraela, ene la nöje Isaraela, la hnëqa ne troa musi ngöne la Baselaia i Akötresie, nge troa acile la ketre nöje ka hnyipixe, ‘angetre eëny ngöne la vine,’ ketre nöje ka troa hamëne la itre wene ka ijij.

Pine laka, kola xouene hnene la itre keme ne hmi la ka ala nyimu ka kepe Iesu ceitune me ketre perofeta, haawe, thaa thele kö angatre troa humuthi Iesu. Mataio 21:28-46; Mareko 12:1-12; Luka 20:9-19; Isaia 5:1-7.

▪ Kola qeje drei hnene la lue neköne ne la pane ceitun, hna hamëne hnei Iesu?

▪ Ame ngöne la hnaaluene ceitun, drei la “tixene uma,” memine la “vine,” me “angete eëny,” itre “hlue” memine la “matran”?

▪ Nemene la pune kowe la ‘itre ka eënyi ngöne la vine,’ nge drei la ka troa nyihnai angatr?