Meken 109

Iesu a Ejine La Itre Ithupëjia Me Nyidrë

QOU hë enehila la itre keme ne hmi ka icilekeu me Iesu, troa hnyinge koi nyidrë, ke hna amenu angatre pala hi hnene la itre hnyinge i nyidrë. Haawe, nyidrëti a thele troa qajaqaja la pë wangatrehmekune thei angatr. Nyidrëti a hnyingë angatre ka hape: “Nemene la mekune i nyipunie göi Keriso? Nekö i dei nyidë?”

Kola sa hnene la itre Faresaio ka hape: “Nekö i Davita.”

Thaa sihngödre kö koi Iesu laka, Davita la xötrapane i Keriso maine Mesia, ngo nyidrëti pe a hnyinge jë ka hape: “Hna uë Davita laka qeje nyidë ‘Joxu’ hnene la ua, [ngöne Salamo 110], kola hape, ‘Öni [“Iehova,” MN ] kowe la tixeng, ka hape, Lapa ju nyipë ngöne la götrane macang, uti hë la tro ni a amë la nöjei ithupëjia me nyipë nyine tane lue ca i nyipë’? E qeje nyidë ‘Joxu’ hnei Davita, te, nekö i angeice tune ka nyidë?”

Kolo hi a lapa thaupe la itre Faresaio, ke thatre hnyawa kö angatre la sipu pengöne la Keriso, maine hna iën. Thatre hnyawa kö la itre Faresaio laka, ame la Mesia, ke thaa matrane atr hmekuje kö, ngo ka mele hë nyidrëti ekö e koho hnengödrai, nge sisitria kö nyidrëti hui Davita; nyidrëti lo Joxu i Davita.

Enehila, nyidrëti a ithahnata kowe la ka ala nyim, me kowe fe la itretre drei nyidrë, me hmekë angatre qa ngöne la aqane ujë ne la itre Faresaio, me itretre cinyihan. Pine laka, kola hamëne la wathebo i Akötresie, hnene la itre atr cili, me “tithe la ita ne lapa i Mose,” öni Iesu ka hape: “Ame la nöjei ewekë asëjëihë hnei angatre hna qaja koi nyipunie, kucajë, me thupëne ju.” Ngo nyidrëti a qaja fe ka hape, “ngo the kuca thenge kö la thina i angatr; ke angate hi a qaja, ngo tha kuca pe.”

Itretre huliwa thoi angatr, nge Iesu a jele ngazo angatr, tune lo itre hnepe treu ka ase hë, ijine nyidrëti a xeni thene la ketre Faresaio. Öni nyidrë, “Hna kuca asë la nöjei huliwa i angate nyine nyi waina i ate.” Hanawange la itre ceitun:

“Angat’ a aishaishane la nöjei filateri angat, me atrune la ite pune la ite ixete i angat.” Itre filateri ka co catr, hna hnöthe ngöne la ime maine ngöne göpadri pena, nge itre eje a qatrenge la foa lao götrane la wathebo: Esodo 13:1-10, 11-16; Deuteronomi 6:4-9; 11:13-21. Ame itre Faresaio, angatre a atrune la itre filateri angatr, matre nyine troa amamane koi itre xane ka hape, ka catre trongëne angatre la wathebo i Akötresie.

Öni Iesu fe ka hape, angatre a “atrune la ite pune la ite ixetre i angat.” Hetrenyi ngöne Numera 15:38-40 lo hna amekötine koi angetre Isaraela, ene la troa atrune la itre pune iheetre i angatr; itre Faresaio a aqeane la itre iheetre i angatr, matre tro kö angatre a mama hune la itre xan. Ame asë hi la itre hnei angatre hna kuca, ke nyine troa goeëne me haine hnei atr! Öni Iesu ka hape: “Angate a ajane la ite maca ne lapa ngöne la nöjei pui ne xen.”

Ame la ejolen, ke, ase fe hë ketr la itretre drenge hnene la pi mama. Celë hi matre Iesu a hamëne la ketre eamo me hape: “The tro kö a hë nyipunie, Rabi, ke casihi la ate ini nyipunie, ene Keriso, nge ite tejine asë nyipunie. Nge the tro kö a hëne la kete ate e celë fen, kaka, ke casi hi la Tetetro i nyipunie e hnengödrai. Nge kete the tro kö a hë nyipunie ite ‘meken’; ke casi hi la mekene i nyipunie, ene Keriso.” Loi e troa paatre thene la itretre drei Iesu, la aja ka eje thei angatr, ene la troa pi draië. Iesu a ithuecatre koi angatre me hape: “Ame la ka tru e nyipunie, te, tro ha hlue i nyipunie.”

Thupene lai, nyidrëti a ëjine la itretre cinyihane memine la itre Faresaio, me anyimua jele angatr, ceitune me itretre thoi. Angatre a “thinge la baselaia ne hnengödrai koi at,” me “xom’ alöne la ite uma ne la nöjei sine föe, me thithi ahoeanyi nyine hēn.”

Öni Iesu ka hape: “Ekölö hi ni nyipunie, itete ie ngo timeke pe.” Nyidrëti a qaja la aqane ujëne la itre Faresaio, pine laka, pëkö atrehmekune i angatr, ngöne la esisitriane la itre ewekë ngöne la götrane la ua; kola mama lai, ngöne la aqane menu ne la aqane wai ewekë angatr. Hanawange la ketre ceitun, öni angatre ka hape: ‘Maine ketre atr a sisinyi a qaja la ēnē, te, pëkö lai; ngo maine angeic’ a sisinyi a qaja la gole ne la ēnē, te, ate thingehnaeane angeic.’ Kola mama laka, ti la itre lue meke i angatre ngöne la ua, ke angatre a wangatrune menune pala ha la gole ne la ēnē, nge wangacone pë hë la esisitriane lai hnë troa hmi, me pengöne eje ngöne la götrane la ua.

Tune lo hnei nyidrëti hna kuca ha, nyidrëti a qaja angazone la aqane ujë ne la itre Faresaio, pine laka, angatre a wangacone “la ite ewekë ka hace ne la wathebo, ene la meköt, me ihnim, me lapaun,” ngo kolo pe kö a hamëne la ite hnaaluepine la minet, me aneto, me komina, ene la hnaaluepine la itre ewekë ka pui loi, a thaa ka nyipi ewekë catre kö.

Iesu a aceitunëne la itre Faresaio me “itete ie ngo timeke pe, angatre a ihanekene la itre nekötruala, ngo ulume pë hë la kamela.” Eje hi laka, maine tro angatre a ihanekene la tresitre ka mala hnine la waina i angatr, thaa hnene hmekuje kö laka, ketre neköi öni ka co, ngo hnene laka, ka sis ngöne la itre hna majemine kuca ngöne la hmi. Ngo ame la angatre a wangacone la itre ewekë ka sisitria ne la wathebo, kösë angatre hi lai a ulume la kamela, ketre öni mina fe ka sis ngöne la itre huliwa ne la hmi. Mataio 22:41–23:24; Mareko 12:35-40; Luka 20:41-47; Levitiko 11:4, 21-24.

▪ Pine nemene matre lapa thaupu ju pe hi la itre Faresaio ngöne la Iesu a hnyinge koi angatre jëne la itre mekune ka eje hnine la trenge ewekë i Davita, hna cinyihane ngöne Salamo 110?

▪ Pine nemene matre kola aisaisane hnene la itre Faresaio, la itre filateri angatr, ka qatrenge la itre xötre ne Tusi Hmitrötr, nge nemene kepine matre angatre a aqeane la itre pune iheetre i angatr?

▪ Nemene la eamo hna hamëne hnei Iesu kowe la itretre drei nyidrë?

▪ Nemene la aqane waiewekë ka menu ne la itre Faresaio, nge nemene la aqane jele ngazone Iesu la aqane wangacone angatre la itre ewekë ka sisitria?