Meken 116

Iesu a Hnëkëne La Itre Aposetolo, Ke Nyidrëti a Troa Nue Angatr

ASE hë umuthe la drai ne amekunën, ngo Iesu petre kö me itre aposetolo ngöne la hnahage e koho hun. Easenyi hë matre paatre pi hë Iesu; ngo nyimutre pala kö la itre ewekë nyine tro nyidrëti a qaja. Nyidrëti a ithuecatre kowe la itre aposetolo ka hape: “The hlohlo kö la ite hni nyipunie!” Öni nyidrë: “Nyipunie a lapaune koi Akötesie, lapaune fe koi ni.”

Kola qaja fe ka hape: “Kösaue la nöjei hnalapa ngöne la ēnē i Kaka. Ini a tro troa nyihnyawane la hne i nyipunie . . . mate tro nyipunie a ce lapa me ini. Ame la hnenge hna troa tro kow, te, ate hë nyipunie la jën.” Thaa trotrohnine kö hnene la itretre drenge laka, Iesu lai a qeje tro hnengödrai eë; celë hi matre kola hnyinge hnei Toma, ka hape: “Joxu, thatre kö huni la götrane hnei cilieti hna tro kow. Tro huni a atre tune kaa la kala i cilie” (MN ) ?

Öni Iesu e sa ka hape: “Ini la gojeny, me nyipici, me mel.” Eje hi laka, ame la atr ka ajane troa lö kowe la itre göhnë e hnengödrai, loi e tro angeice a kepe Iesu, me xötre thenge la aqane mele i nyidrë; ke tune la aqane qaja i nyidrë, “pëkö ate a tro koi Tetetro e tha qa kö theng.”

Öni Filipo ka hape: “Joxu, aleuleunyinëti koi anganyihunieti la Tetetro, mate loi pi hun.” Maine jë kola ajane hnei Filipo tro Iesu a kuca la ketre iamamanyikeu, tune lo itre ewekë hna meköle goeëne hnei Mose, me Elia, me Isaia. Ngo hetre ewekë kö ka sisitria hune lai; celë hi hnei Iesu hna pune qaja: “Ekö hë ni thei nyipunie, nge tha ’te ni kö hnei ’ö, Filipo? ame la ate goeë ni, angeice fe a goeëne la Tetetro.”

Pine laka, kola mama hnyawa la thiina i Akötresie thei Iesu, haawe, maine tro la ketre atr a ce mele me goeë nyidrë, kösë lo angeice fe hi lai a öhne la Tretretro. Ngo eje hi laka, ka tru kö la Tretretro hune la hupuna, tune lo aqane wangatrehmekune Iesu, kola hape: “Tha qaja xanëne kö ni la nöjei ewekë hnenge hna qaja koi nyipunie.” Iesu a atrunyi Akötresie pine la itre ini hnei nyidrëti hna kapa.

Troa ketre ithuecatre kowe la itre aposetolo, troa drei Iesu e qaja ka hape: “Ame la ate lapaune koi ni, tro angeic’ a kuca fe la nöjei huliwa hnenge hna kuca; nge tro angeic’ a kuca la ite huliwa atraqatre hune lai.” Thaa nyidrëti kö a qaja ka hape, tro la itretre drei nyidrë a kuca la itre iamamanyikeu ka tru hune la itre hnei nyidrëti hna kuca ha. Nyidrëti pe a qaja ka hape, tro kö a qea la ijine tro angatre a cainöj, nyimutre la itre götrane ne la fene hna troa ketr, nge ala nyimu catre kö la itre atr hna troa ithahnata kow.

Thaa hnei Iesu kö hna nuetrije pe la itretre drei nyidrë, thupene lo nyidrë a elelengë hnengödrai eë. Nyidrëti a ahnithe koi angatre ka hape: “Ame la nöjei ewekë asëjëihë tro nyipunie a sipone ngöne la ëjeng, tro ni a kuca lai.” Öni nyidrëti fe ka hape, “tro ni a xëwe koi Tetetro, mate tro nyidëti a hamë nyipunie la kete ixatua, mate tro nyidëti a ce munëti me nyipunie epine palua; ene la Uati ine la nyipici.” Ame hë la nyidrëti e koho hnengödrai, haawe, nyidrëti a troa nenge kowe la itretre drei nyidrë, la uati hmitrötre i nyidrë, ene la ketre ixatua.

Easenyi hë tro Iesu a tro. Öni nyidrë, ka hape: “Xoxopa pe hi la ijin, ame hna tha öhnyi ni hmaca kö hnene la fene hnengödrai.” Thaa tro kö a öhnyi nyidrëti hnei atr, pine laka, nyidrëti a troa ketre ua. Ngo nyidrëti hmaca pe a thingehnaeane kowe la itre aposetolo, ka hape: “Öhnyi ni kö hnei nyipunieti; mele kö ni, qa ngöne lai tro fe hë nyipunieti a mel.” Eje hi laka, thaa nyidrëti hmekuje kö a troa iamamanyi kösë ngönetrei ne atr thupene la mele hmaca, ngo troa traqa la ijine tro nyidrëti a amele angatre hmaca qa hna mec, matre troa itre ua ka troa ce mele me nyidrë e koho hnengödrai.

Enehila, Iesu a hamëne la ketre hna amekötine ka thaa jole kö troa trotrohnin, hna hape: “Ame la ate hetenyi la ite wathebong, me trongën’ it’ ej, angeice hi la ate hni ni; nge ame la ate hni ni, tro ha hni angeice hnei Tetetro, nge tro ni a hni angeic, nge tro ni a amamai ni kö koi angeic.”

Ene pe thepe ithahnata jë hnei Iuda, lo hna hëne ka hape Tedaio, me qaja koi Iesu ka hape: “Joxu, hna uëne laka, tro cilieti a amamai cilieti kö koi hun, ngo tha kowe la fene hnengödrai fe kö?”

Iesu a sa ka hape: “Maine kete ate a hni ni, tro angeic’ a trongëne la tenge ewekëng; nge tro ha hni angeice hnei Kaka . . . Ame la ate tha hni ni kö, te, tha trongëne kö la tenge ewekëng.” Ame la itretre drei Iesu, ke angatre a denge thenge; thaa ceitui angatre kö memine lo itre atrene fen, laka, thaa hane kö kapa hnyawa la itre ini qa thei Keriso. Celë hi matre thaa iamamanyi kö nyidrëti koi angatr.

Ame ngöne lo ijine nyidrëti a cainöje e celë fen, hnei Iesu hna hamëne la itre ini ka nyimutre kowe la itre aposetolo. Nemene la aqane tro angatre a mekune hmaca itre ej; ngöne laka, nyimu hnei angatre hna thaa trotrohnine hnyawa? Eloine pe, hnei Iesu hna thingehnaeane ka hape: “Ame la ixatua, ene la Uati Hmitöt, la hnei Tetetroti hna troa upe ngöne la ëjeng, tro eje a ini nyipunie la nöjei ewekë asë, me amekunë nyipunie la nöjei ewekë asë hnenge hna qaja koi nyipunie.”

Nge Iesu a ithuecatre hmaca koi angatre me qaja ka hape: “Ini a amë la tingetinge thei nyipunie, tingetingenge kö la hnenge hna hamë nyipunie. . . . The hlohlo kö la ite hni nyipunie, nge the qou kö!” Haawe, Iesu a nue angatr, ngo tune la hnei nyidrëti hna qaja, “Maine nyipunie a hni ni, maine nyipunie a madine laka, ini a tro koi Tetetro, ke atraqate Tetetroti hung.”

Hna e pe hi la itre hawa ne lapa nyidrëti thei angatr. Öni nyidrëti ka hape: “Tha tro hmaca kö ni a nyimu a ewekë koi nyipunie; ke calemi hë la tane celë fene hnengödrai, nge pëkö ewekë i nyëne theng.” Satana, Diabolo la tane la fen, nge angeice hi la ka löthi Iuda me musinë angeic. Ngo pëkö thei Iesu la ketre thiina ka ngazo, hna troa xome hnei Satana matre troa sewe nyidrë troa nyihlue i Akötresie.

Lolo La Aqane Imelekeu Me Iesu

Thupene la pui ne xeni ne la drai ne amekunën, Iesu a ase ithuecatre kowe la itre aposetolo, me fe hnyawa la itre mekune i nyidrëti koi angatr. Maine jë hnenyipajidri hë. Qa ngöne lai, Iesu a qaja ka hape: “Cile jë ma tro shë.” Ngo qëmekene troa lö pi, nyidrëti a ithahnata pala hi koi angatr; ngöne laka, tru la ihnimi nyidrëti koi angatr, haawe, nyidrëti a hamëne ju la ketre ceitune nyine ixatua.

Nyidrëti a qaane troa ithahnata me hape: “Ini la nyipi vine, nge Kakati la ate eëny.” Hnei Iehova, Atre eënyi ka tru, hna traane la vine ngöne la ua, ngöne lo Nyidrëti a sië Iesu hnene la uati hmitrötr, hmekune lo nyidrëti a xome la bapataiso, nge hneijine li xaji, macatre 29 M.K. Ngo Iesu a amamane fe ka hape, thaa kolo hmekuje kö a nyihatre i nyidrë hnene la vine; öni nyidrë ka hape: “Nyidëti a xome pi la nöjei umene thenge ka tha wa kö; nge ame la nöjei ka wa, nyidëti a nyihnyawan, mate wa atrune pi. . . . Tha ’teine kö la umene troa wa xane kö, maine tha cile kö ngöne la vine; kete tune, tha ’teine kö nyipunie maine tha lapa kö e kuhu hning. Ini la vine, nyipunie la ite umen.”

Ame ngöne la drai ne penetekos, 51 lao drai thupen, tro pë hë la itre aposetolo me itre xaa ka drei Iesu a itre umene la vine, ngöne la kola troa nenge hui angatre la uati hmitrötr. Haawe, troa e asë la 144 000 lao atr ka troa itre umene la vine ngöne la götrane la ua. Iesu Keriso la cane la vine, nge ce nyidrëti me angatr, ene la vine ka troa hamëne la itre wene ne la Baselaia i Akötresie.

Iesu a qaja la aqane troa hamë wen; öni nyidrë: “Ame la ate lapa e kuhu hning, nge ini e kuhu hni angeic, celë hi ka troa wa atraqat; ke tha ’teine kö nyipunie troa kuca kete ewekë e iananyi me ini.” Nge maine thaa wawene kö la ketre, “tro ha tiji angeice pi tune la umen, ame hna fite jë; nge angat’ a icasikeune it’ ej, me kuiëne kowe la eë, ame hna deuthe tije pi.” Nge nyidrëti fe a ahnithe ka hape: “Maine nyipunie a lapa e kuhu hning, nge tenge ewekënge fe a lapa e kuhu ite hni nyipunie, tro nyipunie a sipone la hnei nyipunie hna ajan, nge tro ha kuca thatraqai nyipunie.”

Nge Iesu a qaja hmaca kowe la itre aposetolo ka hape: “Nyine atrunyi Kaka la tro nyipunie a wa atrun; nge tro ha nyipunie a itete dei ni.” Ame la itre wene hna ajane hnei Akötresie, troa hamëne hnene la itre umene vine, ke, ene la troa xötrethenge la itre thiina i Keriso, ene la ihnim. Ketre, pine laka, hnei Keriso hna cainöjëne la Baselaia i Akötresie, haawe, ame la itre wene cili, kolo fe a hane qaja la huliwa, ene la troa inine la itre atr.

Öni Iesu koi angatre ka hape: “Cile huti ju ngöne la ihniming.” Ngo, troa tune kaa? Öni nyidrë: “Maine nyipunie a trongëne la ite wathebong, tro nyipunie a cile huti ngöne la ihniming.” Kola qaja fe ka hape: “Dei la wathebong, ka hape, Tro nyipunie a ihnimikeun, tune la hnenge hna hnimi nyipunie. E tro kete ate a hamëne la mele i angeice thatraqane la itre sine i angeic, pëkö ihnimi ka sisitia hune lai.”

Easenyi hë matre amamane jë Iesu la aqane troa ihnim, ngöne laka, nyidrëti a troa meci thatraqane la itre aposetolo, me kowe fe la itre atr ka troa lapaune koi nyidrë. Tro la tulu cili, a upe la itretre drei nyidrë troa ihnimikeu, goi tro fe a hujëne la mele i angatr. Celë hi hatre i angatr, tune lo hna qaja hnei Iesu ka hape: “Celë hi mate tro nöjei ate asëjëihë a wangate hmekune laka, itete dei ni nyipunie.”

Iesu a qaja la pengöne la itre enehmu i nyidrë, öni nyidrë: “Maine tro nyipunie a kuca la nöjei ewekë hnenge hna ahnithe koi nyipunie, ite sinenge nyipunie. Tha ini hmaca kö a hape, ite hlue nyipunie, ke tha ’te kö hnei hlue la hna kuca hnei tixe i angeic. Ngo hnenge hna hape, ite sinenge nyipunie, ke ame la nöjei ewekë asë hnenge hna drenge qa thei Kaka, ase hë ni amamane koi nyipunie.”

Drei la ketre manathithi ka tru, ene la troa itre enehmu i Iesu! Ngo maine kola ajane hnene la itretre drenge troa imelekeu hnyawa pala hi me Iesu, haawe, loi e tro angatre a “catre hamë wen.” Maine angatre a kuca tune lai, öni Iesu ka hape: “Troa hamë nyipunie hnei Tetetro la nöjei ewekë asë hnei nyipunie hna troa sipo nyidrëti ngöne la ëjeng.” Drei la ketre manathithi ka loi hna troa kapa, qa ngöne la hna hamë wene kowe la Baselaia! Thupene lai, Iesu a xatuane hmaca la itre aposetolo troa “ihnimikeu,” me qaja koi angatre ka hape, troa methinë angatre hnene la fen. Nyidrëti a pane ithuecatre koi angatre me hape: “Maine methinë nyipunie hnene la fene hnengödrai, ate hë nyipunie laka, hna pane methinë ni.” Thupene lai, nyidrëti a qaja la kepine matre kola methinëne la itretre drei nyidrë hnene la fen; öni nyidrëti ka hape: “Ngöne laka, tha ite sine ne la fen nyipunie, ngo hnenge hna ië nyipunie qa la fen, celë hi laka, methinë nyipunie hnene la fen.”

Nyidrëti a qeje pengöne hnyawa la kepine matre kola methinë angatre hnene la fen, öni nyidrëti fe ka hape: “Tro angate a kuca la nöjei ewekë asë cili koi nyipunie pine la ëjeng, ke tha ’te kö angate la Ate [Iehova Akötesie] upi ni.” Eje hi, kola qaja amamane hnene la itre iamamanyikeu i Iesu, la ngazo ne la itre atr ka methinë nyidrë, tune la hnei nyidrëti hna qaja jë ka hape: “Maine tha traqa kö ni troa ithuemacanyi angat, maine pëkö ngazo i angat; ngo enehila, pëkö nyine xomesheshewëne la ngazo i angat. Ame la ate methinë ni, kolo kö a methinë Kakati fe.” Haawe, tune la hnei Iesu hna qaja ka hape, eatre hë la hna cinyihan, kola hape: “Ase hë angate methinëne gufa ni.”

Tune lo hna kuca ha hnei nyidrë, Iesu a ithuecatrene la itre aposetolo me ahnithe koi angatre laka, tro nyidrëti a upe la ixatua, ene la uati hmitrötr, lo trenge catre i Akötresie. “Tro ha anyipici ni hnei nyidë; nge tro fe nyipunie a anyipicin.”

Itre Mekune Tixenuë

Kola troa uti hnei Iesu me itre aposetolo i nyidrë qa ngöne la hnahage e koho, nge Iesu a qaja koi angatre ka hape: “Ase hë ni qaja la tengewekë cili mate tha tro kö nyipunie a thixöt.” Nge nyidrëti a hmekë angatre ka hape: “Tro angat’ a helë nyipunie qa ngöne la ite sunago; Nge troa traqa la ijine tro la ate a lepe humuthi nyipunie, a mekune laka, angeice a nyi hlue i Akötesie.”

Haawe, atraqatre pi hë la qou thene la itre aposetolo. Maine ase hë Iesu lo thuemacanyi angatre laka, troa methinë angatre hnene la fen, ngo thaa hnei nyidrëti kö hna qaja amamane hnyawa koi angatre ka hape, troa humuthi angatr. Öni nyidrëti ka hape: “Tha hnenge hna qaja la ite ewekë cili koi nyipunie ngöne qan, ke hnenge hna ce me nyipunie.” Eloine pe nyidrëti a hamëne la itre ithuemacanyi ka lolo nyine troa acatrene la lapaune i angatr, qëmekene tro nyidrëti a tro!

Nge Iesu a sisedrëne ka hape: “Ngo enehila, ini a tro koi nyidrëti ate upi ni, nge pëkö kete e nyipunie a hnyingë ni, tro nyipëti ië?” Ekula ngöne la jidr, hnei angatre hna hnyingëne la götrane hna troa tro kow hnei nyidrë, ngo enehila, tru catre la qou thei angatre matre thaa hnyinge hmaca kö angatre koi nyidrë. Öni Iesu jë hi ka hape: “Ngo tiqa ha la ite hni nyipunie hnene la hleuhleu ngöne la hnenge hna qaja la tenge ewekë cili koi nyipunie.” Kola hace la hni ne la itre aposetolo, a thaa hnene hmekuje kö laka, kola troa akötrë angatre me humuthi angatr, ngo hnene fe laka, kola troa nue angatre pe hnene la joxu i angatr.

Celë hi matre, Iesu a qaja ka hape: “Loi thatraqai nyipunie e tro jë ni, ke maine tha tro kö ni, kete tha tro kö a traqa koi nyipunie la Ixatua; ngo maine tro jë ni, tro ni a upi [“eje,” MN] koi nyipunie.” Pine laka, atr pala kö Iesu, thatreine kö tro nyidrë a öhne asë la fen, ngo ame hë la nyidrëti elanyi e koho hnengödrai, tro hë nyidrëti a upe la ixatua, ene la uati hmitrötre i Akötresie, kowe la itretre drei nyidrë, ngöne la nöjei nöje hnei angatre hna mele ngön. Haawe, troa hetre thangane ka loi koi angatre la trongei Iesu.

Öni Iesu fe ka hape, ame la uati hmitrötr, ke, kola “amacane la fene ngöne la ngazo, me meköt, me troa nyithupen.” Tro ha mama la ngazo ne la fen, memine la aqane pë lapaune ne eje kowe la hupuna i Akötresie. Ketre, Tro ha mama hnyawa fe la itre hatrene nyine anyipicine la meköti Iesu, qa ngöne laka, nyidrëti a elë hnengödrai eë kowe la Tretretro. Ketre hatrene ka mama cile fe laka, ase hë amekötine nge hnëjinë hë la tane la fen, ke thatreine ju kö Satana memine la fene hnei angeice hna musinën, troa sewe Iesu troa mele nyipici koi Akötresie.

Öni Iesu ka hape: “Hetenyi pala kö ni la ite ewekë ka kösaue troa qaja koi nyipunie, ngo tha ’teine kö nyipunie troa kapa enehila.” Celë hi kepine matre, nyidrëti a ahnithe koi angatre ka hape, ame ngöne la nyidrëti a troa nenge la uati hmitrötr, ene la trenge catre i Akötresie, haawe, tro la uati cili a xatua angatre troa trotrohnine la itre ewekë, thenge la ka ijije koi angatr.

Ame la ewekë hna thaa trotrohnine kö hnene la itre aposetolo, ke, ene laka, tro Iesu a meci me mama hmaca ngöne la nyidrëti a troa mele hmaca. Celë hi matre kola iqajakeune hnei itre xane e angete drei nyidrë, ka hape: “Nemene lai hnei nyidëti hna ulatine koi shë, ka hape, Pana cas, nge tha tro kö nyipunie a goeë ni; nge pana casi hmaca, nge tro nyipunie a goeë ni, nge, Ke ini a tro koi Tetetro?”

Atre hi Iesu laka, hetre hnyinge i angatre koi nyidë; haawe, nyidrëti a qaja jë ka hape: “Nyipici, nyipici, ini a qaja koi nyipunie ka hape, tro nyipunie a teije me latesi, ngo tro la fene hnengödrai a madin; tro nyipunie a hleuhleu, ngo tro ha ujëne la hleuhleu i nyipunie kowe la madin.” Ame hë ngöne la hnaipajö, ngöne la ijine kola troa humuthi Iesu, tro ha madrine la itre hene hmi, nge tro pë hë a treije latesi la itretre dreng. Ngo troa ujëne la hleuhleu i angatr, matre he hnene la madrin, qa ngöne laka, troa amele Iesu hmaca qa hna mec. Nge troa cile huti la madrine i angatr, ngöne la nyidrëti a troa hamëne koi angatre la men, matre itretre anyipicine angatr; a ngöne lo kola nenge koi angatre la uati hmitrötre i Akötresie ngöne la drai ne penetekos.

Nyidrëti a aceitunëne la pengöne la itre aposetolo, memine la föe ka hnaho; öni nyidrëti ka hape: “E aköte hë la sile ne la fö, nyido a hleuhleu, ke traqa ha la nekönat.” Ngo nyidrëti a qaja ka hape, thaa mekune hmaca kö nyidoti la akötre cili, ke kola madine la hna hnahone la nekönatr. Öni nyidrëti fe ka hape: “Hetenyi nyipunie enehila la hleuhleu; ngo tro hmaca ni a iöhnyi me nyipunie [ngöne la ini a troa mele hmaca] nge tro ite hni nyipunie a madin, nge pëkö ate troa thapa qa thei nyipunie la madine i nyipunie.”

Thaa hna hane kö sipo jëne Iesu, hnene la itre aposetolo, ngo ame hë enehila, nyidrëti a qaja ka hape: “Ame la nöjei ewekë asë tro nyipunie a sipone thei Tetetro, tro nyidëti a nunuë nyipunie ngöne la ëjeng. . . . Ke Tetetroti a hnimi nyipunie, ngöne la hnei nyipunie hna hni ni, me lapaune laka, hnenge hna tropi qa thei Akötesie. Hnenge hna tro pi qa thei Tetetro, nge traqa ni e celë fen. Nge ini hmaca ha la a troa nue la fene hnengödrai, me tro koi Tetetro.”

Drei la ketre ithuecatre ka tru hna hamëne hnei Iesu kowe la itre aposetolo. Öni angatre ka hape: “Ngöne hi lai mekunë hë huni laka hnei cilieti hna tro pi qa thei Akötesie.” Iesu a hnyinge ka hape: “Mekunë hë nyipunie enehila? Hana wang, easenyi hë la ijin, nge ejë hë, la troa isa ije nyipunie kowe la ite sine i nyipunie, nge ini hmekuje pë hë.” Maine thatreine kö troa kapa la mekune cili, ngo celë hi ewekë lai ka troa traqa qëmekene la kaqa ne lai!

Öni nyidrëti fe ka hape: “Hnenge hna qaja la tenge ewekë cili koi nyipunie, mate hetenyi nyipunie la tingetinge theng.” Nge kola nyipune ju me hape: “Tro ha axösisi nyipunie e celë fen; ngo catejë nyipunie, ke ase hë ni apone la fen.” Hnei Iesu hna apone la fen, ngöne laka, hnei nyidrëti hna kuca hnyawa la aja i Akötresie, ngacama hna thele hnei Satana me fene i angeice troa thinge jë i nyidrëti troa mele nyipici koi Akötresie.

Thithi Ne Nyipun Ngöne La Hnahage e Koho

Qa ngöne laka, tru la ihnimi Iesu kowe la itre aposetolo, haawe, nyidrëti a hnëkë angatre qëmekene tro nyidrëti a tro. Thupene la hnei nyidrëti hna pane xatua angatre me ithuecatre koi angatr, haawe, nyidrëti a gala jë hnengödrai eë, me sipo kowe la Tretretro i nyidrë, me hape: “Atrune jë la Nekö i cilie, mate atrunyi cilieti pena hnene la Nekön; ngöne la hnei cilieti hna nunuë angeice troa musinëne la nöjei ate asë, mate tro angeic’ a hamëne la mele ka tha ase palua kö.”

Mele ka thaa ase palua kö! Iesu la a ithahnatane la ketre mekune ka sisitria catr. Pine laka, nyidrëti hë a “musi hune la nöjei ate asë,” atreine hi troa nyi thangane hnei nyidrë lo mele i nyidrëti hna hujën, kowe la itre atr asë ka hnëjine me mec. Ngo nyidrëti pë hë a troa hamëne hmekuje la “mele ka thaa ase palua kö,” kowe la itre atr hna kapa hnei Akötresie. Iesu a ithahnatane xötreithe lai mele ka thaa ase palua kö, me sisedrëne la thithi nyidrë; öni nyidrë:

“Dei lola mele ka tha ase palua kö, laka tro angat’ a ate hmekua cilie la nyipi Akötesieti ka cas, me Iesu Keriso la hnei cilieti hna upengëtin.” Eje hi laka, maine easë a ajane troa mel, loi e troa thele troa atre Akötresie memine la hupuna i nyidrë. Ngo thaa celë hmekuje kö la atrehmekun.

Nyipi ewekë troa atrepengöi Akötresieti hnyawa memine la hupuna i nyidrë, me imelekeu me nyidro. Loi e tro fe a mekune tui nyidro, me göeëne la itre ewekë, thenge la aqane wai ewekë i nyidro. Nge nyipi ewekë tro së a xome la itre thiina ka loi nyidro, ngöne la aqane ce mele së me itre xan, matre atreine tro së a ce mele fe memine la itre xaa atr.

Öni nyidrëti fe ka hape: “Ase hë ni atrunyi cilieti e celë fen; ase hë ni umuthe la huliwa hnei cilieti hna nunuë nie troa kuca.” Uti hë enehila hnei nyidrëti pala hi hna eatrëne la huliwa i nyidrë, nge hetrenyi thei nyidrëti la mejiune laka, troa hun; matre nyidrëti a sipone jë koi Akötresieti ka hape: “Tetetroti fe, enehila atrunyi ni jë ceme cilie, hnene la lolo thei nyiso, nge pate pete kö la fene hnengödrai.” Nyidrëti a sipone troa acili nyidrëti hmaca jëne la mele hmaca, ngöne la lolo e hnengödrai, ene lo madrine ka eje thei nyidrëti ekö.

Iesu a qaja la huliwa ka sisitria hnei nyidrëti hna kuca e celë fen, öni nyidrë: “Ase hë ni amamane la atesiwa i cilie kowe la nöjei ate hnei cilieti hna nunuë nie qa la fen. Ite ewekë i cilieti angat, nge hnei cilieti hna nunuë angate koi ni; nge hnei angate hna trongëne la wesi ula i cilie.” Hnei nyidrëti hna cainöje fë la ëje i Akötresie, ene Iehova, me amamane la aqane troa e ej; ngo thaa hnei nyidrëti hmekuje kö hna amamane la ëje i Akötresie kowe la itre aposetolo. Ngo hnei nyidrëti fe hna akökötrene la atrehmekune i angatre göi Iehova, ene la thiina i Nyidrë, me aja i Nyidrë, memine fe la ole i angatre koi Nyidrë.

Iesu a atrehmekune laka, sisitria kö Iehova hui nyidrë, ene lo hnei nyidrëti hna nyihluen, öni nyidrëti e qaja cememine la hni ka ipië ka hape: “Hnenge hna hamë angate la nöjei tenge ewekë hnei cilieti hna hamë ni; nge ase hë angate kapa, nge ate hnyawa ha angate la hnenge hna tro pi qa thei cilie, nge lapaunë hë angate la hnei cilieti hna upi ni.”

Iesu fe a qaja la eisapengönene la itretre drei nyidrë, memine la itre atrene fen; öni nyidrë: “Ini a thithi thatraqai angat; tha thithi kö ni thatraqane la fene hnengödrai, ngo thatraqai angate la hnei cilieti hna hamë ni . . . Hnenge hna thupë angate ngöne la atesiwa i cilie, lo ini pete kö thei angat . . . ; hnenge hna thupë angate lo hnei cilieti hna hamë ni, nge pëkö kete ka pat’ e angat, ngo ate ne hnëjine hmekuje hi,” ene Iuda Isakariota. Ame ngöne la ijine cili, Iuda a kuca lo hna upi angeice kow, ene la troa wanaxoeë Iesu. Haawe, thatre kö angeic, ngo kolo hi a eatrëne lo hna perofetane hë.

Öni Iesu ka hape: “Kola methinë angate hnene la fen . . . Tha sipo cilieti kö ni, mate tro cilieti a thei angate qa la fen, ngo mate tro cilieti a thupë angate ene la ngazo. Tha itete fene kö angat, nge tunge tha ate fene kö.” Itretre drenge a mele ngöne la fen, ene la fene hna musinëne hnei Satana, ngo loi e tro pala hi angatre a iananyi memine la fene celë me itre ngazo ne ej.

Öni Iesu ka hape: “Ahmitötë angate hnene la nyipici cilie; wesi ula i cilie la nyipici.” nyidrëti la a hëne la Itre Hna Cinyihane qene Heberu, hnei nyidrëti hna majemine xom, ka hape, “nyipici.” Ngo ame fe la itre ini hnei nyidrëti hna hamëne kowe la itretre drei nyidrë, memine la itre hnei angatre hna troa cinyihane pë hë, kola hëne asë lai ka hape, Itre Hna Cinyihane qene heleni, ke celë fe “nyipici” lai. Atreine hi troa ahmitrötrëne la ketre atr pine la nyipici cili, me saze la mele i angeic, me kuca matre troa ketre keresiano ka thaa hane sine kö la fen.

Enehila, Iesu a thithi me hape: “Tha thatraqai angate hmekuje hi, ngo thatraqai angate fe angete tro ha lapaune koi [nyidë] hnene la tenge ewekë i angat.” Haawe, Iesu a thithi kowe la itretre drei nyidrë hna iën, me kowe fe la itre xane hna troa icasikeune matre “hna axö ka cas.” Nemene la hnei nyidrëti hna thele thei angatre lai?

“Mate casi hi angate asëjëihë; tui cilieti, Kakati, e kuhu hning, nge ini fe e kuhu hni cilie, . . . mate casi angat, tune la casi nyisho.” Isa kö nyidro, ketre Iesu kö nge ketre Iehova kö; ngo caasi hi la mekuna i nyidroti ngöne la nöjei ewekë asë. Iesu a thithi matre hetrenyi fe la itretre drei nyidrë la caasi cili, nge “mate atejë la fene laka hnei cilieti hna upi ni, me hnimi angat, tune lo hna hnimi ni hnei cilie.”

Enehila, Iesu pena ha thithi fë kowe la Tretretro i nyidrë, la itretre drei nyidrë hna troa iën. Nemene la aliene la thithi cili? Öni nyidrëti ka hape: “Tro ha ce me ini ngöne la hnenge la nöjei ate hnei cilieti hna hamë ni; mate tro angat’ a öhne la lolong, lo hnei cilieti hna nunuë nie; ke hnei cilieti hna hnimi ni, nge tha hna nyi tepene pete kö la fene hnengödrai,” ngöne lo qëmekene tro Adamu me Eva a nyiqaane hnaho. Qëmekene lai, hnei Akötresieti hna hnime la Hupuna i Nyidrë ka caas, ene Iesu Keriso.

Iesu a nyipune la thithi nyidrë me hape: “Hnenge hna amamane koi angate la atesiwa i cilie, nge tro kö ni a amaman; mate eje kö e kuhu ite hni angate la ihnim, tune lo hna hnimi ni hnei cilie, nge ini e kuhu ite hni angat.” Ame koi itre aposetolo, ame la troa atrepengöne la ëje i Akötresie, ke, ene la troa melëne hnyawa la ihnimi Akötresie. Ioane 14:1–17:26; 13:27, 35, 36; 10:16; Luka 22:3, 4; Esodo 24:10; 1 Ite Joxu 19:9-13; Isaia 6:1-5; Galatia 6:16; Salamo 35:19; 69:4; Ite Edomë 8:22, 30.

▪ Ekaa la hnei Iesu hna tro kow, nge nemene la mekune ka sa la hnyinge i Toma, göne la gojenyi hna troa xötrën?

▪ Nemene la ewekë hna sipone hnei Filipo koi Iesu?

▪ Pine nemene matre ame la atre öhnyi Iesu, ke, kösë kolo fe lai a öhne la Tretretro?

▪ Nemene la aliene la hna hape, tro la itretre drenge a kuca la itre huliwa ka tru kö hune la hnei nyidrë hna kuca?

▪ Nemene la aliene la hna hape, thaa hune kö Satana hui Iesu?

▪ Eue la Iehova a traane la vine ngöne la ua, nge eu, nge tune kaa la aqane hane sine hnene la itre xaa atr la vine?

▪ Troa ije umene la vine ne la ua?

▪ Nemene wene hna ajane hnei Akötresie troa hamëne hnene la itre umene la vine?

▪ Nemene la aqane tro së a itre enehmu i Iesu?

▪ Pine nemene matre kola methinëne la itretre drei Iesu hnene la fen?

▪ Nemene la aqane hmekëne Iesu la itre aposetolo, matre angatre a iqoukeu?

▪ Pine nemene matre thaa hnyingëne kö hnene la itre aposetolo, koi Iesu la götrane hnei nyidrëti hna tro kow?

▪ Nemene la hna thaa trotrohnine hnyawa kö hnene la itre aposetolo?

▪ Nemene la ceitune hnei Iesu hna hamëne nyine troa amamane laka, troa nyihnane la hleuhleu hnei madrin?

▪ Ame koi Iesu, nemene la hna troa kuca hnene la itre aposetolo?

▪ Nemene la aqane apone Iesu la fen?

▪ Nemene la aliene la hna hape, Iesu a “musinëne la nöjei ate asë”?

▪ Nemene la aliene la hna hape, troa thele troa atre hmekua Akötresie memine la Hupuna i Nyidrë?

▪ Nemene la itre aqane amamane Iesu la ëje i Akötresie?

▪ Nemene la “nyipici,” nge tune kaa la aqane “ahmitrötrëne” hnene eje la keresiano?

▪ Nemene la aliene la hna hape, caasi hi Akötresie, memine la Hupuna i Nyidrë, memine la nöjei ka nyihlue i Nyidrëti hnyawa?

▪ Eue la kola “nyi tepene la fene hnengödrai”?