Meken 118

Iwanaxoeë Me Ixölehuj

HNENYIPAJIDRI hë, nge kola traqa hnei Iudra ngöne la hlapa e Gethesemane, kola tro qëmekene la ka ala nyimu qaathene la itre sooce me nöjei tane i angetre huj, me itre faresaio, me itre xane ju kö. Hna ce thë hnene la itretre huje troa kuiëne koi Iuda la 30 lao manie sileva, matre troa wanaxoeë Iesu.

Ame ju fe kö lo kola upi angeice e tröne la uma ne pui ne xeni ne Paseka, hnei angeice hna tro meköti kowe la itre tane i angetre huj. Ame hnei angatre hna canga icasikeune la itre tane lapa, me itre sooc. Maine jë hnei Iuda hna pane tro sai angatre kowe lo hnei Iesu me itre aposetolo hna atrune la Paseka. Ame la kola öhne laka, pë hë aliene la uma, haawe, kola tro pi la ka ala nyimu cili fë la itre jiane isi, me itre lamepa me itre uke jina, nge angatre a tro pi qaa Ierusalema, me sasaithe la hnathupe ne Kederon, nge kola elemekene la trongei angatre hnei Iuda.

Eje hi laka, kola tro meköti hnei Iuda kowe la wetr Elaio, ke, ka xecie koi angeice laka, troa öhnyi Iesu e cili. Ame lo angatre a lapaa tro lo wiike hnapane qaa Bethania a tro Ierusalema, me bëeke hmaca, hnei Iesu me itretre drei nyidrë hna pune jea kowe la hne hlapa e Gethesemane, matre troa pane mano me porotrik. Maine jë ame hë ngöne la hawa cili, miti miti hë ke angatre e fene la itre elaio, matre kolo ha ikelikelë atr; tune kaa jë la aqane troa wangatrehmekunyi Iesu hnene la itre sooc? Maine jë thaa hane jë pala kö angatre öhnyi Iesu. Celë hi matre Iuda a hamëne ju koi angatre la ketre hatren, me qaja ka hape: “Ame la hnenge hna troa idemi memin, te, eje hi, xölehuji angeice ju.”

Ame hnei Iuda hna tro memine la ka ala nyimu kowe la hlapa, angeice a öhnyi Iesu memine la itre aposetolo, ene pe angeice a canga tro pi koi nyidrë me hape: “Rabi!” me dremi nyidrë.

Öni Iesu koi angeice ka hape: “Sinenge tro eö a ue e ce?” Nge nyidrëti a ketre sa la hnyinge i nyidrë me hape: “Iuda fe, tro eö a wanaxoeëne la nekö i ate hnene la kola idem?” Ma ijije hë kowe la atre iwanaxoeë celë! Iesu a tro pi kowe la gaa lai, me hnyingëne ka hape: “Dei la hnei nyipunieti hna thel?”

Itre xane a sa ka hape: “Iesu ate Nazareta.”

Nyidrëti a qëmeke koi angatre asë me hape: “Ini hi la.” Ame hnei angatre hna xou, nge thatre kö angatre la ewekë ka troa traqa, haawe, angatre a kötrëpu me kei e kuhu hnadro.

Öni Iesu hmaca koi angatre ka hape: “Ase hë ni lo qaja koi nyipunie, ka hape, ini hi la; maine nyipunie a thele ni, nue angate la, mate tro pi.” Ame petre kö lo nyidrëti e hnine lo hnahage hna pui ne xeni ngön, hnei nyidrëti hna thithi kowe la Tretretro me qaja ka hape, hnei nyidrëti hna thupëne la itre aposetolo i nyidrë ka mele nyipici, nge pëkö ketre ka paatr e angatr, “ngo ate ne hnëjine hmekuje hi.” Matre troa eatre la trenge ewekë i nyidrë, haawe, nyidrëti a sipone troa nue la itretre drei nyidrë.

Ame la kola öhne hnene la itre aposetolo la kola cile hmaca la itre sooce me nyiqaane troa othi Iesu, haawe, angatre a hnyinge ka hape: “Joxue, tro nyihunieti a jajatine hnei taua?” Thaa ase petre kö Iesu sa la hnying, nge Peteru hë a xome la caasi ngöne la lue taua hna xome trongëne hnene la itre aposetolo, me hna koi Maliko, ketre hlue ne la tane i angetre huj. Triane ju kö angeice la he ne la hlue, ngo hnangenyë maca i nyëne la hna thupa.

Iesu a isew me hape: “Ase ju hë.” Ame hnei nyidrëti hna ketr la hnangenyë i Maliko, me ameun. Nyidrëti a hamëne jë la ketre ini ka lolo, me hape koi Peteru: “Line hmaca ju la taua i ’ö kowe la tengen, ke ame angete xome la taua, te, tro ha meci hnei taua. Ke mekune eö laka tha ’teine kö ni troa xëwe enehila koi Kakati, nge tro anganyidëti a hamë ni la nöjei angela hune la ka luako la o legeona?”

Iesu a nue troa xöleuthi nyidrë, pine laka, nyidrëti a qaja ka hape: “Troa eate tune kaa la hna cinyihane laka, troa tune lai?” Öni nyidrëti fe ka hape: “Hape u, tha tro kö ni a iji la inege hnei Tetetro hna nunuë nie?” Nyidrëti a nue la mele i nyidrëti ka pexeje kowe la aja i Akötresie.

Nyidrëti a ithahnata jë kowe la itre atr me hape: “Nyipunieti a traqa fë la ite taua me jia kösë koi ate kë ’nö e troa xomi ni? Hnenge hna ce me nyipunie ngöne la ēnē o drai kola ihaji, nge tha hna ixölehujikeu ni kö hnei nyipunie, ngo ijije troa aeatene la hna cinyihan.”

Ame hnene la itre sooce memine la komadran, me itre tane lapa i angetre Iudra, hna xöleuthe me othi nyidrë. Öhnë hë la itre aposetolo lai, angatre a nue nyidrëti pe me kötr. Ngo hna cile pëhë e hnine la ka ala nyimu hnene la ketre atre dreng thöth, maine jë Mareko. Ma angeice jë fe e cili lo hnine lo uma, hnei Iesu hna atrune la Paseka ngön, nge thupene lai, hna hane jë fe xötrethenge la ka ala nyim. Ene pe wangatrehmekunyi angeice jë hi hnene la itre xaa atr, me thele troa xöleuthi angeic. Ame hnei angeice hna nue trije ju la iheetre i angeice lino, me kötre mel. Mataio 26:47-56; Mareko 14:43-52; Luka 22:47-53; Ioane 17:12; 18:3-12.

▪ Pine nemene matre, thaa luelue kö Iuda troa öhnyi Iesu ngöne la hne hlapa ne Gethesemane?

▪ Tune kaa la aqane amamane Iesu laka, nyidrëti a hnehengazone la itre aposetolo i nyidrë?

▪ Nemene la hnei Peteru hna kuca matre troa cilëgöli Iesu, ngo öni Iesu koi angeice ka hapeu?

▪ Nemene la aqane amamane Iesu laka, pexeje la mele i nyidrë kowe la aja i Akötresie?

▪ Ame ngöne la kola nuetriji Iesu hnene la itre aposetolo, drei pëhë la ka lapa, nge nemene la ewekë ka traqa koi angeic?