Meken 124

Hna Wanaxoeë Iesu Me Ee Nyidrë

HNA ketr la hni Pilato hnene la aqane menyike i Iesu, qëmekene la iaxösisi; ene pe angeice a tupathe hmaca jë troa nue nyidrë, ngo kolo jë pe ka hape, elëhni catre jë la itre tane i angetre huj. Xecie hnyawa koi angatre laka, pëkö ewekë ka troa sewe angatre troa kuca la aja i angatre ka ngazo. Celë hi matre angatre a ce sue hmaca draië me hape: “Athipe jë, athipe jë” (MN ).

Kola sa hnei Pilato ka hape: “Xomi angeice jë nyipunie, me [“athipe hune la sinöe,” MN ].” (Thaa ceitune kö la hnei angatre hna qaja panëne e cili lo, laka, atreine hi tro angetre Iudra a athipe la ketre atre ihumuth, ka ena la ketre wathebo ka tru ne la hmi.) Haawe, maine jë hnaafaifine hë, Pilato a qaja ka hape pëkö ngazo i Iesu, öni angeice ka hape: “Tha öhne kö ni la kepine thei angeic.”

Ame la kola öhne hnei angetre Iudra laka, thaa ie kö la ijelengazo i angatr, ngöne la götrane ka eje thene la musi Roma, haawe, angatre a bëeke hmaca ju kowe lo mekune i angatre hna catre fë ngöne lo hna kootr thei angetre isenyin, ene laka, Iesu a nyi tru. Öni angatre ka hape: “Hete wathebo hun, nge ijije la wathebo tro nyën’ a mec, ke, hnei nyëne hna qeje nyëne kö Hupuna i Akötesie.”

Ka hnyipixe la aqane nyi ewekë Iesu celë, matre kösë kola xou atraqatre hnei Pilato. Angeice a atrehmekune hnyawa enehila laka, thaa ketre atr menu kö Iesu, tune lo hna amamane koi angeice hnene la pu ne la föe i angeic, memine la thiina ka catre i Iesu. Ngo “Hupuna i Akötesie”? Atre hi Pilato laka, ka fetra Iesu qaa Galilaia. Ngo maine jë ka mele hë nyidrëti ekö? Angeice a alö nyidrëti jë hnine la uma, me hnyingë nyidrë ka hape: “Qa i nyipëti ka?”

Iesu a lapa thaup. Ase hë nyidrëti lo qaja koi Pilato laka, joxu nyidrë, ngo ame la Baselaia i nyidrë, ke, thaa qaa kö e celë fen. Thaa nyipi ewekë hmaca kö troa qeje pengöne atrune lai. Ngo kösë kola thaipiëne la pi draië i Pilato ngöne laka, kola xelene hnei Iesu troa sa koi angeic, ene pe elëhni jë Pilato koi nyidrë me qaja ka hape: “Tha sedi ni hnei nyipë? tha ’te kö nyipëti laka hete menenge troa nue nyipë, nge hete menenge troa [“athipi nyipëti pena hune la sinöe,” MN ]?”

Kola sa hnei Iesu cememine la hni ka ipië, öni nyidrë: “Maine tha hna hamë nyipëti qa koho, te, pëkö mene i nyipëti hung.” Iesu a qaja lo musi hnei Iehova hna nue kowe la itre atr matre troa cilëne la itre ewekë ne la fen. Nyidrëti fe a qaja ka hape: “Celë hi mate tru jë la ngazo ne la ate hamë ni koi nyipë.” Eje hi laka, atraqatre catre kö la ngazo ne la tane i angetre huj, ene Kaifa, me itre sine xöle i nyidrë, me Iuda Isakariota, hui Pilato ngöne la aqane qanangazo Iesu.

Kola hai Iesu hmaca hnei Pilato nge angeice a xouene maine jë ka qaa koho nyidrë, haawe, angeice a thele jëne hmaca troa nue Iesu. Ngo thaa drei angeice pi kö hnei angetre Iudra. Angatre a amexeje hmaca lo aqane nyi ewekë Iesu thei mus, me ithahnata hnihni Pilato, öni angatre ka hape: “Maine tro nyipëti a shenge la ate celë, tha sine i Kaisara fe hë nyipë; ke ame la ate celohmë nyëne kö nyine joxu, te ithupëjia ha nyëne me Kaisara.”

Ngacama catre la aqane nyinyithiina ne la angetre Iudra, ngo Pilato a ee Iesu me tro tröne uma ëe, me qaja catrëne koi angetre Iudra ka hape: “Hana wange la Joxu i nyipunie!”

“Xome jë, xome jë, [“athipi nyëne jë hune la sinöe,” MN ].”

Atre hi Pilato laka, pë hmaca kö nyine troa kuca, matre angeice a hnyinge ka hape: “Tro ni a [“athipe hune la sinöe,” MN ] la Joxu i nyipunie?”

Ka elëhni angetre Iudra pine la aqane xome acone la mele i angatre hnei angetre Roma. Angatre a xele ma wange la musi Roma. Ngacama ka icilekeu angatre me musi Roma, öni angatre e ithahnata thoi ka hape: “Pë kö xa joxu hun, ngo Kaisara hi.”

Pine laka Pilato a xouene göne la göhnë i angeic, me ajane troa hlemu pala hi la ëje i angeic, angeice a kapa ju la aqane sipone iele angeice hnei angetre Iudra. Ene pe wanaxoeë Iesu pi hnei angeic. Itre sooce a una trije la iheetre ka maea ngön, me heetrë nyidrë la ipelewe i nyidrë. Kola tro sai Iesu troa athipi nyidrë hune la sinöe, nge angatre a xötrethenge nyidrë, nge nyidrëti a ketre ajöne la sinöe hna troa athipi nyidrëti hun.

Hmakanyi ne drai ka tru hë, drai 14 Nisan; maine jë easenyi hë matre hnaipajö pangepange pi hë. Qaane lo drai ka co, pëkö hnei Iesu hna lapa, nyidrëti pala hi a cil, nge thaa mano kö nyidrëti akötr. Atreine tro së a trotrohnine laka, kucakuca nyidrë, pine laka, hace catre la sinöe. Celë hi matre angatre a upe ju la ketre atr troa ajöne la sinöe, Simona la ëje i angeic, atre kurene ne la götrane e Afrik. Nyimutre la itre atr, tune la itre föe, angatre a ixötrethenge, me xe la itre imano i angatre me treije latresi pi Iesu.

Nyidrëti a ujë kowe la itre föe me qaja koi angate ka hape: “Ite föe ne Ierusalema fe, the teije pi ni kö, loi pe troa teije pi nyipunie, me ite nekö i nyipunie. Ke hana wang, tro ha traqa la nöjei drai ne qaja hnei angat, ka hape, Manathithi la ite safëje, me ite hni ka tha hnaho, me ite thi tha hna ij. . . . Ke maine kuca jë hnei angate la nöjei ewekë cili ngöne la sinöe ka hat, troa kuci nemene ngöne la sinöe ka mec?”

Iesu a qaja la isinöe, ene la nöje Iudra; nango sia petre kö, nge hetre hnepe emelene eje pala kö, qa ngöne laka, Iesu e nyipi angatr, nge hetre thelene ka lapaune koi nyidrë. Ngo e ase hë elanyi xome la itretre Iudra cili qa hnine la nöj, ene pe lapa ju pe hi la isinöe ka meci ngöne la götrane la ua, laka ketre nöje ka tru ka fitre pë hë. Troa latresi catre hnene la nöje Iudra, ngöne la ijine Akötresieti a nyi jëne la itre sooce i angetre Roma, troa lepe apaatrene pi la nöje cili! Ioane 19:6-17; 18:31; Luka 23:24-31; Mataio 27:31, 32; Mareko 15:20, 21.

▪ Nemene la hna jelengazo Iesu pin, hnene la itre keme ne hmi, ngöne la angatre a öhne laka, pëkö thangane la aqane nyi ewekë Iesu angatr, koi mus?

▪ Pine nemene matre kola xou catre hnei Pilato?

▪ Drei la angetre hna troa nyi zöne catrëne la itre akötre hna kuca koi Iesu?

▪ Tune kaa la aqane kuca hnene la itre keme ne hmi, matre wanaxoeë Iesu pi hnei Pilato, me humuthi nyidrë?

▪ Nemene la hnei Iesu hna qaja kowe la itre föe ka treije pi nyidrë, nge nemene la aliene la itre trenge ewekë ka qaja la sinöe ka “sia” nge thupene lai kola “fitr”?