Meken 128

Ka Mele Iesu!

ÖHNË hë Maria Magadalena laka, pë hë aliene la hua i Iesu, nyidroti a canga nyenyape pi troa thuemacanyi Peteru me Ioane. Ngo ame itre xaa föe ke, angatre pë hë a lapa pe ezine la hua. Ene pe kola mama koi angatre la angela, me hë troa lö hnine la hua.

E hnine hë la hua, kola öhne hnene la itre föe la ketre angela, nge kola qaja koi angatre hnene la ketre ka hape: “The qou kö, ke ate hë ni laka nyipunie a thele Iesu, lo hna [“athipe hune la sinöe,” MN ]. Patë hë nyidëti la; ke mele hmaca ha nyidë, tune lo hnei nyidëti hna ulatin. Trohemi ma wange la göhnë hnei joxu hna huedë. Nge canga tro nyimenyime jë, me qaja koi angete dei nyidë, ka hape, Mele hmaca ha nyidëti qa hna mec.” Ene pe kola xou me madrine atraqatre la itre föe, nge angatre a hane nyenyape pi fe.

Ngöne la ijine cili, kola öhnyi Peteru me Ioane hnei Maria, nge eahlo a qaja koi nyidro ka hape: “Ase hë angate xome la Joxu qa hnine la hua, nge tha ’te kö huni la hnei angate hna ami nyidëti ngön.” Ame hna nyenyape fe hnene la lue aposetolo. Traqa pai Ioane ngöne la hua pine laka, maine jë thöthi angeic. Pëkö atr ezine la hua, ketre paatre hë lo itre föe. Thaa hnei Ioane kö hna lö e hnine la hua, ngo angeice pe a tuëne ej, me öhne pë hë la itre maano.

Ame Peteru ke angeice a traqa me lö meköti hnine la hua. Angeice a öhne la itre sine maano e meköle pe, memine la iuti hna xome troa atuthe la he i Iesu, a eje pena ha ngöne la ketre götran. Enehila Ioane a hane lö fe hnine la hua, nge angeice enehila a lapaune kowe la hnei Maria hna qaja. Ngo thaa trotrohnine kö Peteru me Ioane laka, ase hë amele Iesu hmaca qa hna mec, ewekë hnei nyidrëti pala hi hna amexej. Nyidroti a luelue me bëeke kowe la hnalapa i nyidro, me nue Maria pë hë ngöne la hua.

Ngöne la ijine cili, kola canga tro hnene la itre xaa föe troa canga qaja kowe la itretre drenge ka hape, mele hmaca ha Iesu, tune la hna qaja koi angatre hnene la itre angela. Angatre a inyenyapeny, ene pe kola tro hnei Iesu troa ixelë me angatr, me qaja ka hape: “Ekölö hi ni nyipunie.” Ame hnei angatre hna tro me xöleuthe la lue ca i nyidë, me thili ju koi nyidë. Ame hnei Iesu hna ulatine koi angate ka hape: “The qou kö, tro ja ithue macane la ite tejine me ini, ka hape, Tro jë Galilaia eë, nge tro angat’ a iöhnyi me ini e cili.”

Ame petre kö ngöne lo ijine kola traqa la sa, nge kola mama la itre angela, hna sesëkötre lo itre sooce ka thup, nge angatre hë a troa meci hnei xou. Ame hë la kola paatre la xou thei angatr, ene pe tro pi angatre a tro kowe la traon, me qaja kowe la itre tane i angetre huje la ewekë ka traqa. Thupene la hna thuemacane la itre “qate” i angete Iudra, hna axeciëne hë laka, loi e troa itöne la itre sooce matre troa he la ewekë cili. Celë hi matre hna amekötine koi angatre la mekune celë, hna hape: “Qaja jë nyipunieti ka hape, Hnei angete dei nyëne hna tro e jidi me ënö nyën, nge meköle kö hun.”

Nge pine laka, atreine hi troa humuthe la itre sooce ne Roma pine meköle ngöne la ijine thup, haawe, hna qaja koi angatre hnene la itretre huje ka hape: “Maine ate hë gavana [laka hnei epuni hna meköl], tro huni a tha la hni nyidëti mate tha qou kö nyipunie.” Pine laka, nango tru pi hë la ahnahna hna hamën, haawe, kola xötrethenge hnyawa hnene la itre sooce la hna ahnithe koi angatr. Celë hi matre kola hlemu menu thei angetre Iudra laka, hna atrekënö la ngönalë i Iesu.

Atraqatre pi hë la hleuhleu thei Maria, nyidroti a lapa e tröne la hua. Nge ekaa jë Iesu? Nyidroti a tuëne ju la hua me öhne la lue angela kola iamamanyi hmaca, nge hna heetrë ka wië hnei nyidro! Kola lapa hnene la ketre ngöne lo hmekune hna amë la he i Iesu, nge ame ketre, ngöne hmekune lo lue waca. Nyidroti a hnyingë Maria ka hape: “Fö, nemene la hnei nyipoti hna teije pin?”

Kola sa hnei Maria ka hape: “Ase hë angate xome la Joxung, nge thate kö ni la hnei angate hna ami nyidëti ngön.” Haawe, nyidroti a ujë me öhne la ketre atr, a kola qaja hmaca la hnying: “Fö, nemene la hnei nyipoti hna teije pin?” Nge kola qaja fe ka hape: “Nyipoti a thele dei?”

Kola mekune hnei Maria ka hape, ame la atr cili ke ene lo ka nyihnyawane la hna kele wezipo, matre nyidroti a qaja koi nyidrë ka hape: “Joxu, maine hnei nyipëti hna xomi nyidrëti, pane qaja koi ni la hnei nyipëti hna ami nyidëti ngön, mate tro ni a xomi nyidë.”

Ene pe önine jë lai atr ka hape: “Maria!” Canga atrehmekunyi Iesu hi hnei Maria qa ngöne la aqane lapaa ithahnata nyidrëti koi nyidro, ame hnei nyidroti hna sue me hape: “Raboni!” (kola hape “Ate ini!”) Atraqatre la madrine i Maria, matre nyidroti a thipi Iesu. Ngo öni nyidrëti ka hape: “The kete ni kö; ke tha ase pete kö ni elë koi Tetetro; ngo tro jë kowe la ite tejine me ini, me qaja koi angate ka hape, Ini a elë kowe la Tetetrongö, me Tetetro i nyipunieti; nge Akötesingö, me Akötesi nyipunieti fe.”

Enehila kola nyenyape hnei Maria, kowe la hna icasikeu hnene la itre aposetolo me itretre dreng. Nyidroti a hane nyixane fe lo itre ithuemacanyi hna qaja hnene la itre xaa föe, ene laka, hnei angatre hna öhnyi Iesu, laka, mele hmaca ha qa hna mec. Ngacama nyimu hatrene nyine anyipicin, ngo thaa hna lapaune kö hnene la itre trahmanyi cili kowe la hna qaja hnene la itre föe, a tune mina fe la hna qaja hnei Maria. Mataio 28:3-15; Mareko 16:5-8; Luka 24:4-12; Ioane 20:2-18.

▪ Thupene la hna öhne la hua ka pa alien, nemene la hna kuca hnei Maria, nge nemene la ewekë ka traqa kowe la itre xaa föe?

▪ Nemene la aqane ujë i Peteru me Ioane ngöne la nyidroti a öhne la hua, laka, pë hë alien?

▪ Drei la hna iöhnyi memin hnene la itre xaa föe ngöne la angatre a tro troa thuemacane la itretre drenge la mele hmaca i Iesu?

▪ Nemene la ewekë ka traqa kowe la itre sooce ka thup, nge nemene la mekune hna qaja hnene la itretre huje koi angatr, thupene la hna ithuemacany?

▪ Nemene la ewekë ka traqa koi Maria Magadalena ngöne la nyidroti caasi ngöne la hua, nge nemene la aqane ujë ne la itretre drenge ngöne la kola traqa la itre föe troa ithuemacanyine la hnei angatre hna öhn?