Meken 130
Ezine La Hneopegejë Ne Galilaia
KOLA drengethenge hnene la itre aposetolo lo ini hna hamëne hnei Iesu, matre angatre a bëeke hmaca a tro Galilaia. Ngo thatre kö angatre la nyine troa kuca. Haawe, nango qea pi hë, nge Peteru a qaja jë koi Toma, me Nathaniela, me Iakobo me kowe la trejine me angeic, ene Ioane, me kowe fe la lue xaa aposetolo, ka hape: “Tro hë ni a [“nyi ie,” MN ].”
Önine fe lai ala sikisi ka hape: “Tro fe hun.”
Jidri ka pexeje ne nyi ie angatr, ngo pë pi kö tha i angatr. Haawe, kaqa ne lai hë, nge kola amamanyi hnei Iesu ngöne la hnangöni, ngo thaa mekune kö itre aposetolo ka hape, nyidrëti hi. Iesu a u koi angatre me hë ka hape: “Ange nekönat, hete öni thei nyipunie?”
Angatre a sa qa hune la he ka hape, “Pëkö.”
Iesu a qaja ka hape: “Thinge pi la eöte ngöne la götrane maca ne la he, nge tro nyipunie a öhn.” Ame hna drengethenge hnene la itre aposetolo, nge thatreine kö angatre troa xejë la ieötr, ke, tiqa gala hnyawa ha eje hnei ie.
Ame hna sue hnei Ioane ka hape: “Joxu lai.”
Drenge hë Peteru lai, ame hnei angeice hna othe la ipelewe i angeic, nge ase hë angeice una la hnaheetre i angeic, ame hna sesë pi qa hune la he. Angeice a aje jë, ma caa hadredre lao met a tro koho helep. Kola xötrethenge angeice hnene la itre aposetolo hune he, me hule trongëne lo ieötre ka tiqa hnei ie.
Traqa ha angatre ngöne la zanehngala me öhne la itre ie e hune la itre wanalep, me falawa ezine itre ej. Öni Iesu ka hape: “Awe jë la ite xa ie hnei nyipunie hna xome enehila.” Ame hnei Peteru hna elë hune la he, me hule la eötre kowe la ngöne gejë. Kola e la 153 lao ie ka tru!
Iesu a könë angatre me hape: “Ange trohemi ma xen.”
Hetrenyi la xou thei angatr, matre pëkö ala caasi e angatre ka hnyingë nyidrëti ka hape: “Dei nyipë?” ke atre hë angatre laka, celë hi Joxu. Hnaasevenene amamanyi hë nyidrëti la, qaane lo nyidrëti a mele hmaca, nge hnaakönine kowe la itre aposetolo ka ala nyim. Haawe, nyidrëti a isa thewe a i angatre falawa me ithue öni angatre ie.
Ase asë hë angatre xen, maine jë Iesu a goeëne la hna nyi ie hnei angatr, me hnyinge koi Peteru ka hape: “Simona i Iona, eö a hnimi ni hui angate la?” Eje hi laka, kösë kola qaja ka hape: Hapeu, haze i eö la nyi ie, nge co pë hë koi eö la huliwa hnenge hna hnëkëne thatraqai eö?
Peteru a sa, ka hape: “Cilieti a ate hmekuatine laka ini a hnimi cilie.”
Öni Iesu jë hi ka hape: “Ithu ane ju pë hë la ite areniong.”
Iesu hmaca a hnaaluene hnyinge ka hape: “Simona i Iona, eö a hnimi ni?”
Kola sa hnei Peteru ka hape: “Ejëti hi, Joxu, cilieti a ate hmekuatine laka ini a hnimi cilie.”
Iesu a qaja hmaca koi angeice ka hape: “Thupëne ju pë hë la itre mamoeng.”
Nge nyidrëti a hnaakönine hnyingë angeic, ka hape: “Simona i Iona, eö a hnimi ni?”
Atraqatre la hleuhleu e kuhu hni Peteru. Maine jë angeice a mekune ka hape, Iesu a luelue ngöne la aqane mele nyipici angeic. Nyipici laka, ame lo kola kootrë Iesu me mekune troa humuthi nyidrë, hnei Peteru hna akönia kelikelë nyidrë. Celë hi matre, Peteru a qaja ka hape: “Joxu, cilieti a ate hmekuatine la nöjei ewekë asë; nge cilieti a ate hmekuatine laka ini a hnimi cilie.”
Iesu a hnaakönine qaja jë koi angeice ka hape: “Ithuane ju pe la ite mamoeng.”
Iesu a nyi jëi Peteru matre tro angeice a xatuane la itre xan, troa trotrohnine hnyawa la huliwa hnei nyidrëti hna ajane tro angatre a kuca. Pine laka, easenyi hë tro nyidrëti a tro qaa la fen, ame la aja i Iesu ke, ene la tro angatre a elemekene la huliwa, me thupëne la itre atr ka troa lö hnine la hna axö mamoe i Akötresie.
Iesu a qaja amamane ka hape, hna othi nyidrë me humuthi nyidrë, pine laka, hnei nyidrëti hna kuca la huliwa i Akötresie; matre ketre tui Peteru fe, thaa tro kö angeice a sesëkötre e tupathi angeice jë tune lai. Öni nyidrëti koi angeice ka hape: “Ame lo thupëtesiji pete kö eö, hnei ’ö hna oteë eö kö, nge hna tro kowe la hnei ’ö hna ajan; nge e qatë hë eö, tro eö a line la lue ime i ’ö, nge tro kete a oteë eö, me tro sai ’ö kowe tha hnei ’ö hna ajan.” Ngacama troa meci hnei Peteru pine la ëje i nyidrë, öni Iesu e iele angeic, ka hape: “Xöte thenge ni jë.”
Peteru a öhnyi Ioane e hutrö i angeic, me hnyinge ka hape: “Joxu troa tune ka la ate celë?”
Iesu a sa ka hape: “Maine ini a ajane tro angeic’ a iteqe uti hë traqa ni, nyine ue koi ’ö? xöte thenge ni jë pe hnei ’ö.” Itre trenge ewekë la ka upe la itretre drei Iesu troa mekune menune ka hape, thaa tro kö a hane meci hnei Ioane. Ngo tune la aqane troa qeje pengöne pë hë thupene hnei Ioane, thaa hnei Iesu kö hna qaja ka hape, thaa tro kö angeice a hane mec; hnei nyidrëti pe hna qaja ka hape: “Maine ini a ajane tro angeic a iteqe uti hë traqa ni, nyine ue köi ’ö?”
Ame hë thupen, tro Ioane a qaja fe ka hape: “Nge kösaue pe kö la nöjei ewekë hnei Iesu hna longëtin, nge maine cengöne cinyihan’ asë jë, te, ini a mekun, tha ijije kö e celë fene la nöjei tusi hna cinyihan.” Ioane 21:1-25; Mataio 26:32; 28:7, 10.
▪ Nemene la ka amamane ka hape, thatre kö hnene la itre aposetolo la nyine troa kuca e Galilaia?
▪ Tune kaa la aqane wangatrehmekunyi Iesu hnene la itre aposetolo, ezine la hnagejë ne Galilaia?
▪ Aija amamanyi hë Iesu enehila, qaane lo nyidrëti a mele hmaca?
▪ Nemene la aqane amamane Iesu la ewekë, hnei nyidrëti hna ajane tro la itre aposetolo a kuca?
▪ Tune kaa la aqane amamane Iesu la pengöne la meci Peteru?
▪ Nemene la itre trenge ewekë i Iesu göi Ioane, hna thaa trotrohnine hnyawa hnene la itrete drenge ka ala nyim?