Meken 132

Ngöne La Götrane Maca i Akötresie

AME la kola traqa ngöne la ijine Paseka lo uati hmitrötr, ke celë hi hatrene nyine amamane ka hape, bëeke hmaca ha Iesu hnengödrai eë. Ketre tune mina fe, hna canga ketri Setefano hnene la ewekë ka traqa me jele nyipicine laka, traqa hnyawa ha Iesu e hnengödrai. Qëmekene troa tranyi Setefano hnei etë pine la aqane mele nyipici angeice koi Akötresie, öni angeice e qaja ka hape: “Hana wang, ini a goeëne la hnengödrai hna thawa, memine la Nekö i ate a cile ngöne la götrane maca i Akötresie.”

Iesu a lapa ngöne la götrane maca i Akötresie, me treqene tro la Tretretro i nyidrë a iupi troa kuca la huliwa celë: “Musinëne jë nyipëti la nöjei ithupëjia me nyipë.” Ngo nemene la hnei Iesu hna kuca ngöne la nyidrëti a treqene troa icilekeu memine la itre ithupëjia me nyidrë? Nyidrëti a cile me musi hune la itretre drei nyidrë hna iën, me eatrongë angatre ngöne la hna cainöje trootro, me hnëkë angatre jëne la mele hmaca, troa ce musi me nyidrë ngöne la Baselaia ne la Tretretro i nyidrë.

Hanawange la ketre ceitun, Iesu a ië Saulo (kola atre angeice hnyawa, pine laka, hna lapaa hë angeice ka hape, Paulo hnei angetre Roma) matre tro angeice a cilë mekene la huliwa, ene la troa inine la itre atr ngöne la itre xaa nöj. Saulo a catre trongëne la Trenge Wathebo i Akötresie, ngo hna amenu angeice hnene la itre keme ne hmi ne Iudra. Celë hi matre, thaa angeice hmekuje kö a madrine la aqane humuthi Setefano, ngo angeice pe a tro Damaseko; hna upi angeice hnei Kaiafa matre troa othe la itretre drei Iesu, trahmanyi me föe, me ee angatre a tro Ierusalema. Nge Saulo petre kö ngöne la gojeny, ame hna wië xötreithi angeice la lai, kösë samek, nge angeice a kei ju e kuhu hnadro.

Ame hna denge la aqane ula, ngo pë pe atr hna öhn, kola hape: “Saulo, Saulo fe, ue lae eö a angazo ni?” Saulo a hnyinge ka hape, “Deti cilieti, Joxu?”

Ame hna drenge la aqane ula kola hape, “Iesu ni lo hnei ’ö hna pune angazon.”

Hna thunge la lue meke i Saulo hnene la ketre lai ka hudrume catr, nge Iesu a upi angeice troa lö Damaseko eë, nge troa treqene tro nyidrëti a amekötine koi angeic. Nge kola meköle hnei Anania, ketre atre drei Iesu, nge angeice a goeëne la nyidrëti a mama koi angeic. Kola qeje Paulo hnei Iesu me hape: “Hna ië angeice nyine inegenge troa kapa trongëne la ëjenge kowe la nöjei ethen, me nöjei joxu, me ite nekö i Isaraela.”

Eje hi laka, jëne la ixatua hna hamëne hnei Iesu, hetre thangane ka loi la huliwa ne cainöje me ini, hna xome hnei Saulo (laka Paulo hë enehila) me itre xaa ka tro fë evangelia. Kola e la 25 lao macatre thupene la hna mama hnei Iesu koi angeice ngöne la gojenyi ne tro Damaseko, Paulo a cinyihane ka hape, ame la “maca ka loi” ke, “hna cainöjëne kowe la nöjei ate asëjëihë e celë fen.”

Nyimutre hë la itre macatre ka paatr, nge Iesu a amamane koi Ioane, ene lo aposetolo hnei nyidrë hna hnim, la itre ewekë hna meköle goeën. Jëne la itre ewekë cili hna edromëne hnei Ioane ngöne la tusi Hna Amamane, haawe mele petre kö angeice troa öhnyi Iesu e beëke ngöne la mene ne la Baselaia i nyidrë. Kola qaja hnei Ioane ka hape, “ngöne la ua” hna xomi nyidrë kowe “la drai Joxu.” Nemene la “drai” cili?

Hna inine la itre hna perofetane hnine la Tusi Hmitrötr, ketre tune mina fe lo itre hna qaja hnei Iesu göi itre drai hnapin, nge kola mama laka, hna nyiqaane la “drai Joxu” ngöne la macatre 1914! Qa ngöne lai, hnei Iesu hna bëeke hmaca ngöne la macatre 1914, nge thaa hna öhnyi nyidrëti kö nge pëkö mejene la bëeke i nyidrë, nge itretre nyihlue i nyidrëti hmekuje hi la ka wangatrehmekune ka hape, bëeke hmaca ha nyidrë. Ame ngöne la macatre cili, hnei Iehova hna upi Iesu troa musi e nyipine la itre ithupëjia me Nyidrë.

Iesu a drengethenge la Tretretro, ene la troa nyihnyawane la hnengödrai me upe triji Satana me itre dremoni angeic, a tro kowe fen. Thupene la hna öhne hnei Ioane la ewekë celë, kola drenge hnei angeice la aqane ewekë qaa hnengödrai, kola ulatine ka hape: “Traqa ha enehila la mel, me men, me baselaia i Akötesi shë, me musi ne la Keriso i nyidë.” Eje hi laka, qaane lo macatre 1914, Iesu a nyiqaane musi hune la Baselaia.

Drei la ketre maca ka lolo kowe la itre xupuana i Iehova, ka mele nyipici koi Nyidrë e koho hnengödrai! Angatre a kapa la ithuecatre celë, kola hape: “Madine jë, nöjei hnengödrai, me angete lapa ngön’ it’ ej.” Ngo tune kaa pë hë la itre ka mele e celë fen? Nge kola sisedrëne la aqane ewekë qaa koho hnengödrai ka hape, “Ekölö hi ni la hnadro me hnagejë! qa ngöne la hna uti pi koi nyipunie la diabolo ka tru trenge elëhni, ke, trotrohnine hë nyëne laka, xoxopatre pe hi la ijine i nyën.”

Easë a melëne enehila la hneijine ka xoxopatre cili. Kola amamane fe enehila hnene la aqane mele ne la itre atr laka, ijiji angatre fe troa hane mele ngöne la fene ka hnyipixe. Nyipici, tro sa hetrenyi la mele elany, e hne së hna kapa hnyawa la maca ka loi, maca ka jilapane enehila la fene hnengödrai, fene la musi Keriso.

Tro pë hë Iesu Keriso a nyi ime maca i Akötresie, matre troa apaatrene la fene hnengödrai Satana memine asë la itre ka xomexatuane ej. Tro nyidrëti a apaatrene la iakötrë cili ngöne la ijine isi hna hëne hnei Tusi Hmitrötr, ka hape, Amagedo. Thupene lai, tro Iesu Keriso, lo atr ka draië thupei Iehova ngöne la hnengödrai me fen, a xöleuthi Satana me itre dremoni angeic, me kuië angatre asë me othi angatr, koi waane thauzane lao macatre hnine la “hnaop”; kola aceitunëne la hnaope cili, memine la mec, ngöne laka, pë hmaca kö hna atreine troa kuca. Ite Huliwa 7:55-60; 8:1-3; 9:1-19; 16:6-10; Salamo 110:1, 2; Heberu 10:12, 13; 1 Peteru 3:22; Luka 22:28-30; Kolose 1:13, 23; Hna Amamane 1:1, 10; 12:7-12; 16:14-16; 20:1-3; Mataio 24:14.

▪ Thupene la hnei Iesu hna elë hnengödrai eë, ekaa la göhne i nyidrë, nge nemene la hnei nyidrëti hna treqen?

▪ Iesu a musi hui drei thupene la hnei nyidrëti hna elë hnengödrai eë, nge nemene la aqane mama ka hape, nyidrëti hë a mus?

▪ Eue la kola nyiqaane la “drai joxu,” nge nemene la ewekë hna nyiqaane kuca ngöne la kola xötrei xomi musi hnei Iesu?

▪ Tune kaa la aqane isa ketri së enehila hnene la huliwa ne cainöj, laka kolo pala hi a kökötre catr?

▪ Nemene la itre ewekë ka troa traqa, ngöne la kola troa pexeje elanyi la huliwa ne cainöje cili?