Ini 4

Drei Lae Diabolo?

Satana la Diabolo​—Ka fetra angeice qa ka? (1, 2)

Angeice a amenune tune ka la itre atr? (3-7)

Nemene la kepine matre nyipi ewekë tro epuni a cile catre qëmeke ne la itre nyinyithina i Diabolo? (7)

1. Ame la hna ewekë “diabolo,” ke, kola hape ketre atre atë la itre trengathoi nyine akötrëne la ketre atr. Ame la aliene la “Satana,” ke, ketre ithupëjia, maine ka icilekeu. Drei lai itre hna ewekë nyine ati ëjene lo sipu ithupëjia me Akötresie. Ngöne la qaan, ke, ketre angela ka pexeje angeice e koho hnengödrai, nge ce angeice me Akötresie. Ngazo pe, hnei angeice hna sipu meku angeice kö, ene pe piine ju angeice la hnëqa hna amekötine hnei Iehova kowe la atr, ene la troa thili koi Nyidrëti hmekuje hi.​—Mataio 4:8-10.

2. Hnene la angela cili, ene Satana hna ithahnata koi Eva jëne la ketre un. Jëne la itre trengathoi hnei angeice hna qaja, hnei angeice hna upi Eva troa thaa drei Akötresie. Qa ngöne lai, hnei Satana hna icilekeu memine la “mus” i Akötresie, maine la göhnë ka Draië hna cilëne hmekuje hnei Iehova. Hnei Satana hna amejëne la itre hnyinge me aciane la luelue ngöne lo aqane musi Akötresie, maine ka loi kö nge nyine loi kowe la itre atre i Nyidrë. Qa ngöne lai, hnei Satana fe hna amenune la huliwa nyipici ne la atr koi Akötresie. Drei hi lai huliwa ka ngazo hnei angeice hna kuca, matre ithupëjia jë angeice me Akötresie. Drei la aliene matre hë angeice jë pë hë ka hape Satana, Diabolo.​—Genese 3:1-5; Jobu 1:8-11; Hna Amamane 12:9.

3. Satana a thelejëne la nöjei pengöne la aqane nyinyithina, matre tro la itre atr a thili koi angeic. (2 Korinito 11:3, 14) Ame la ketre aqane iukaane la itre atr, ke, jëne la hmi ka thoi. Maine kola inine la itre trengathoi hnene la ketre hmi, ke, eje hnyawa hi lai a nyi xölene la aja i Satana. (Ioane 8:44) Ame itre atrene la itre hmi ka thoi, ke, angatre a mekune menune e kuhu hni angatre ka hape, angatre hi a hmi kowe la nyipi Akötresie. Ngo, thatre kö angatre ka hape, angatre hnyawa hi a nyihlue i Satana. Angeice hi ‘la haze ne la fen’ celë.​—2 Korinito 4:4.

4. Ame la ketre aqane lapa xome Satana la itre atr fene la mus i angeice ke, ene la troa kuci haze. Angatre a sipone la itre ua troa thupë angatr, maine troa akötrëne la itre xan, maine troa ahnithe la itre ewekë ka troa traqa, maine troa kuca la itre iamamanyikeu. Satana hi lai mene ka ngazo, ka zae e tröne la nöjei ngazo hna kuca celë. Maine ajane së troa amadrinë Akötresie, ke, nyipi ewekë koi së troa ananyine la kuci haze.​—Deuteronomi 18:10-12; Ite Huliwa 19:18, 19.

5. Hnei Satana hna amenune fe la itre atr jëne la troa isa pi mama fë nöjen, me troa löhnine la itre organizasio ka kuci politik. Ame itre xaa atr, ke, angatre a mekune ka hape ka draië kö la nöje i angatre hune la itre xan. Ngo thaa ka nyipici kö lai. (Ite Huliwa 10:34, 35) Itre xaa atr a mejiune kowe la itre organizasio ka kuci politik, troa apaatrene la itre jole ka eje thene la atr. Ame la itre atr ka ujë tune lai, angatre hi lai a amamane laka, ase hë angatre nuetrije la Baselaia i Akötresie, ene hmekuje hi la nyin la itre jole së.​—Daniela 2:44.

6. Ame la ketre jëne iamenu i Satana, ke, ene la troa tupathe la itre atr, matre tro angatre a kuca la itre aja i ngönetrei. Iehova a upi së troa ananyine la ngazo, pine laka atre hnyawa hi Nyidrë ka hape tro së a menuëne la itre akötre qa ngön. (Galatia 6:7, 8) Ma tro la itre xaa atr a huli epuni troa ce kuca me angatre la itre ngazo cili. Ngo, mekune hnyawa ju epuni laka, Satana la ka ajane tro epuni a kuca la itre ewekë celë.​—1 Korinito 6:9, 10; 15:33.

7. Satana fe a nyi jëne la iakötrë maine icilekeu, matre troa nuetriji Iehova hnei epun. Tro la itre atr hnei epuni hna hnim a elëhni, pine laka epuni a ini Tusi Hmitrötr. Ame itre xan, ke, tro angatre a ahmahmanyi epun. Ngo drei la atrekë ewekëne la mele i epun? Satana a ajane troa axouenyi epuni matre, troa sewe epuni troa atre Iehova. The nue Satana pi kö troa hun! (Mataio 10:34-39; 1 Peteru 5:8, 9) Maine tro epuni a cile koi Diabolo, ke, atreine tro epuni a amadrinë Iehova me amamane laka, epuni a sajuëne la musi ka draië i Nyidrë.​—Ite Edomë 27:11.

[Iatr ne la götran 9]

Kola amenune la itre atr hnene la hmi ka thoi, me kuci haze, me isi pii nöj

[Iatr ne la götran 9]

The nue Satana kö troa thingijëne la aja i epuni troa atre Iehova