Ini 9

Loi e Thaa Tro Kö a Qeje Gelene La Itretre Nyi Hlue i Akötresie

Pine nemene matre nyipi ewekë koi së e troa pë gele së ngöne la nöjei götrane la mel? (1)

Nemene la aliene la troa pë ethane ngöne la ua? (2) ngöne la troa pë gelene ngöne la aqane ujë së? (3) ngöne la itre mekune ka eje the së? (4) ngöne fe la ngönetrei? (5)

Nemene la itre porotrike hmo nyine tro së a neëne pine laka ka hetre ethanyin? (6)

1. Ka hmitrötre Iehova Akötresie, nge ka pë gelene Nyidrë. Nyidrëti a ajane tro la itre ka thili koi Nyidrë, a hane pë gele tui Nyidrë ngöne la götrane la mel​—maine ngöne la ua, ngöne la itre trepene meköt i Akötresie, ngöne la aqane ujë, me ngöne la ngönetrei. (1 Peteru 1:16) Kola hape koi së, troa catre matre troa lapa pë gelene qëmeke i Akötresie. Easë a mele hnine la fene ka ngazo. Hawe, easë a isi memine la itre aja së ka ngazo. Ngo, thaa tro pi kö së a nue itre eje troa hun.

2. Troa Pë Ethane Ngöne La Ua: Maine easë a ajane troa nyihlue i Iehova, ke, thatreine kö tro së a trongëne pala hi la itre ini, maine itre kutim, ene lo itre huliwa hna majemine kuca hnene la hmi ka thoi. Nyipi ewekë tro së a trotrije la hmi ka thoi memine la nöjei götrane huliwa ne eje asë, matre thaa tro fe kö a hetre ixatua së kowe ej. (2 Korinito 6:14-18; Hna Amamane 18:4) Ame la easë a atre la nyipici göi Iehova, ke, tro së a hmeke wanga amenu së jë hnene la itre atr ka hamë ini ka thoi.​—2 Ioane 10, 11.

3. Troa Pë Gelene Ngöne La Aqane Ujë: Iehova a ajane tro la itre ka nyihlue i Nyidrë, a thiina ne nyipi keresiano ngöne la nöjei ijin. (1 Peteru 2:12) Nyidrëti a goeëne la nöjei ewekë hne së hna kuca, me itre ewekë ka sihngödre koi atr. (Heberu 4:13) Loi e tro së a thipetrije la kuci ngazo, me itre xaa ewekë ka sis hna kuca e celë fen.​—1 Korinito 6:9-11.

4. Itre Mekune Ka Pë Ethan: Maine hne së hna nyialiene la he së hnene la itre mekune ka loi me ka meköt, ke, tro fe ha loi me wië la aqane ujë së. (Filipi 4:8) Ngo maine eje pala hi e hnine la he së la itre mekune ka ngazo, ke, eje hi laka tro fe hë a ngazo la itre aqane ujë së. (Mataio 15:18-20) Ka loi mina fe la tro së a neëne la itre aqane kuci madrin, ka angazone la itre mekune së. Atreine hi tro së a nyialiene la he së hnene la itre mekune ka loi, e hne së hna inine la Wesiula i Akötresie.

5. Troa Pë Ethane Ngöne La Ngönetrei: Loi e tro la itre keresiano a nyidrawane la ngönetrei i angatr, me heetre hnyawa, pine laka itre qene qaja i Akötresieti angatr. Loi e tro së a wasine la itre wanakoime së thupene hna tro koi kabine, me kala ime qëmekene troa xen, maine ngöne la kola troa xomi xen. Maine pëkö kabine hna xup, ke, loi e troa keleme la itre hna kötrengönë. (Deuteronomi 23:12, 13) Tro pala hi së a egöcatr, e hne së hna nyidrawane la ngönetrei së. Tro fe la itre keresiano a nyidrawane la hnine me tröne hnalapa i angatr. Tro hë epuni a amamane la tulu ka loi kowe la itre xaa atr.

6. Troa Loi La Aqane Ithahnata: Tro pala hi la itre hlue i Akötresie, a qaja la nyipici. Thaa tro kö a hane sine la Baselaia i Akötresie, hnene la angetre thoi. (Efeso 4:25; Hna Amamane 21:8) Thaa ka qeje ka sisi kö la itre keresiano. Tha angatre kö a hane drenge maine qaja pena la itre qene hnyima ka ngazo, maine itre isitoare ka sis. Hnene laka, lolo la aqane ithahnata i angatr, thaa jole kö e troa wangatrehmekunyi angatr, isapengö i angatre kö memine la itre xane ngöne la hna huliwa, maine hna ini, maine ngöne la itre götrane hnei angatre hna mele ngön.​—Efeso 4:29, 31; 5:3.

[Iatr ne la götran 18, 19]

Tro la itre hlue i Akötresie a nyidrawa angatre ngöne la nöjei götrane asë