Ini 11

Itre Ini Me Itre Aqane Mele Hna Xele Ma Wange Hnei Akötresie

Nemene la itre ini me itre aqane mele ka thaa loi kö? (1)

Hapeu loi kö tro la itre keresiano a lapaune ka hape Tirinite lae Akötresie? (2)

Pine nemene matre thaa hna atrune kö hnene la itre nyipi keresiano la Noel, me Paak, me aniverser? (3, 4)

Atreine kö la atr ka meci hë troa akötrëne la itre ka mel? (5)

Satauro kö lo hnei Iesu hna thipi ngön? (6)

Nemene la ewekë nyine troa kuca ka sisitria matre troa amadrinë Akötresie? (7)

1. Thaa ka ngazo asë kö la itre ini memine la itre aqane mel, lo hna hape kutim. Ngo maine ka traqa itre eje qa ngöne la hmi thoi, maine ka icilekeu pena memine la itre ini qa hnine la Tusi Hmitrötr, nyipici thaa tro kö Akötresieti a kapa itre ej.​—Mataio 15:6.

2. Tirinite: Hapeu, nyipici kö ka hape, ketre atrene la Tirinite lae Iehova​—ene lo hna qaja ka hape, köni atr ngo caasi hi angatre a nyi Akötresie? Ohea! Iehova, Tretretro, “la nyipi Akötesieti ka cas.” (Ioane 17:3; Mareko 12:29) Iesu la neköne haetra i Nyidrë, nge ka lapa nyidrë fene la mus i Akötresie. (1 Korinito 11:3) Atraqatre catre kö la Tretretro, hune la Nekön. (Ioane 14:28) Nge ketre, thaa atr fe kö la uati hmitrötr; ngo trenge catre i Akötresie.​—Genese 1:2; Ite Huliwa 2:18.

3. Itre Feet Ne Noel Me Paak: Thaa hna hnaho Iesu kö ngöne la drai 25 diseba. Ngo hna hnaho nyidrë ngöne lo drai 1 okotropa, kolo petrekö lo itre treu ne la macatre laka lai me jidr, paatre kö la itre mamoe me itretre thupëne ngöne la itre uma i öni. (Luka 2:8-12) Thaa hnei Iesu kö hna upe la itre keresiano troa atrune la drai ne hnaho nyidrë. Ngo, hnei nyidrëti pe hna qaja kowe la itretre drei i nyidrë troa amekunën, maine mekune hmaca, la mec i nyidrë. (Luka 22:19, 20) Ame la Noel me itre kutimine ej, ke, itre trengathoi hna traqa fë hnene la itre hmi ekö. Ka ceitu memine la itre kutimi ne paak, hna atrune jëne la itre wakuja i gutu me itre lapë. Tha hnene kö la itre pane keresiano hna atrune la Noel me Paak, ketre tune mina fe la itre nyipi keresiano enehila, thaa hane fe kö angatre kuca la itre ewekë celë.

4. Aniverserë Drai Ne Hnaho: Lue aniverser hmekuje hi hna qaja hnei Tusi Hmitrötr, nge kola atrune la itre drai cili hnene la itre atr ka thaa nyi hlue i Iehova kö. (Genese 40:20-22; Mareko 6:21, 22, 24-27) Pë fe kö aniverser hna fetëne hnene la itre pane keresiano, göi troa atrune la drai ne hnahon. Ame la troa fetëne la drai ne hnahone la atr, ke, ketre kutimi lai ka xulu qa ngöne la itre hmi ka thoi ekö. Nyipici, ame la itre nyipi keresiano, ke, ka hane fe angatre hamë ahnahna, nge angatre fe a ce madrine ngöne la nöjei pengöne drai ne la macatre, ngo thaa ngöne ijine feetë aniversere ne hnaho kö.

5. Xoue Ka Mec: Pëkö hna atreine kuca hnene la itre ka mec, nge pë hë mekune thei angatr. Thatreine kö së troa xatua angatr, nge thatreine kö angatre troa akötrë së. (Salamo 146:4; Ate Cainöj 9:5, 10) Ame la u, ke, ka meci ej; thaa ka mele kö eje e thupene la mec. (Ezekiela 18:4) Ngo ame itre xaa ijin, ke, kola nyi u ne ka meci hnene la itre angela, ene lo itre demoni. Ame la itre kutimi hna eköthe nyine iaxoueny, maine nyine troa atrune la itre ka meci hë, ke, itre trengathoi lo lai.​—Isaia 8:19.

6. Satauro: Tha hnei Iesu kö hna meci hune la satauro. Hnei nyidrë hna meci hune la sinöe, maine poto. Ame la qaane la hnëewekë hna hape “satauro,” ke hnëewekë lai qene heleni, a kola qaja la ketre hnepe sinoe, poto. Ame la pengöne me hatrene la satauro, ke, ka fetra qa ngöne la itre hmi ka thoi nge ka hekö. Thaa hna huliwane kö ekö la satauro hnene la itre pane keresiano, nge thaa hnei angatre fe kö hna hmi kow. Qa ngöne lai, hapeue la mekune i epun, ka loi kö e troa huliwane la satauro ngöne la hmi së?​—Deuteronomi 7:26; 1 Korinito 10:14.

7. Maine jë jole catre troa nuetrije la itre hna inine hë, maine itre kutime pena. Maine jë tro la itre sinee i epuni maine itre sine ce elo i epuni a tupath, troa iele epuni matre thaa tro kö epuni a nuetrije la itre ewekë hnei epuni hna inine ekö. Ngo ame la ewekë ka sisitria catr, ke, ene la troa amadrinë Akötresie, ngo thaa atr kö.​—Ite Edomë 29:25; Mataio 10:36, 37.

[Iatr ne la götran 22]

Thaa Tirinite kö lae Akötresie

[Iatr ne la götran 23]

Ame la Noel me Paak, ke, itre feet ka fetra qa ngöne la itre hmi ekö ka thoi

[Iatr ne la götran 23]

Pëkö kepine troa hmi kowe la itre ka mec, maine troa xoue angatre pena