Nemene La Kepine Matre Kola Meci La Atr?
“Pë hë caa mejen e hune la itre sasala, thaa enije hë la itre hone hnitr, meköle hë itre waco hnine la hna sinöe; easenyi fe hë matre hane pi eö mano tui nyudren.”—JOHANN WOLFGANG VON GOETHE, POET NE ALEMA.
1, 2. (a) Nemene la aja hna amë thene la itre atr, ngöne la kola xupi angatr? (b) Tuneka la mele ka eje ekö, thene la lue pane keme me thine së?
HNEI Akötresie hna xupe la atr cememine la aja troa mele epine palua. Eje hi kola qaja hnei Tusi Hmitrötre ka hape, hnei Nyidrëti hna amë “la mekune göi troa mele epine palua, ngöne la itre hni angatr.” (Ate Cainöj 3:11, Beck) Ngo thaa hnei Akötresieti hmekuje kö hna hamëne kowe la itre atr la ajane troa mele epine palua. Hnei Nyidrëti fe hna hamë ijine koi angatre troa eatrëne lai.
2 Hna xupe la lue pane keme me thine së, Adamu me Eva, lue atr ka pexej, a pëkö ethane la mekun, memine la ngönetrei i nyidro. (Deuteronomi 32:4) Pane mekune jë—pëkö kucakuca me akötr, pëkö xou, maine nyine kukehnin! Ketre, hnei Akötresieti hna ami nyidroti ngöne la ketre paradraiso ka mingöminge catr. Ame la aja i Akötresie, ke, ene laka, tro la atr a mele epine palua, nge e cili kolo fe ha troa nyialiene la ihnadro hnene la itre matra i angeic, nge troa itre ka pexeje asë. (Genese 1:31; 2:15) Nemene kepine kö la kola meci hne së?
Meci La Pune La Thaa Idrei
3. Maine Adamu me Eva a ajane troa mele epine palua, nemene la nyine tro nyidroti a kuca?
3 Hnei Akötresieti hna ahnithe koi Adamu ka hape: “Tro eö a xeni qa ngöne la nöjei sinöe asëjëihë ngöne la hlapa. Ngo the tro kö eö a xeni qa ngöne la sinöe ne ate hmekune la loi me ngazo; ke tro eö a meci ngöne la drai ne xeni eö qa ngön’ej.” (Genese 2:16, 17) Haawe, tro Adamu me Eva a hetrenyi la mele ka thaa ase palua kö, e hnei nyidroti hna drenge thenge Akötresieti hnyawa.
4. Ngöne lo nyidroti a ena la wathebo, nemene la kepine matre triane jë Adamu me Eva, lo manathith, ene la troa mele epine palua ngöne la paradraiso?
4 Ngo ame la engazon, hnei Adamu me Eva hna shashaithe la wathebo i Akötresie. (Genese 3:1-6) Haawe, lue atr ka ngazo hë nyidro, pine laka, “ame la kola shashaithe la wathebo, celë hi ngazo.” (1 Ioane 3:4) Qa ngöne lai, thatreine hmaca kö tro Adamu me Eva a hetrenyi la mele ka thaa ase palua kö. Pine nemen? Pine laka, “ame la thupene la ngazo, te, mec.” (Roma 6:23) Haawe, ame hë la kola qaja la pune la thaa idrei koi Adamu me Eva, öni Akötresieti koi nyidroti ka hape: “Xaxau eö, nge tro hmaca eö kowe la xaxau.” Ame hna helë nyidroti pi lue pane keme me thine së, qa ngöne la paradraiso. Ame ju fe kö ngöne lo lai ijine nyidroti a ena la wathebo, kolo fe a nango nyiqaane uti ipië trootro fe la mele i nyidro, me qëmeke trootro kowe la mec.—Genese 3:19, 23, 24.
“Hna Traqa La Meci Kowe La Nöjei Ate Asë”
5. Hna traqa tuneka la meci kowe la nöjei atr asë?
5 Eje hnyawa ha e kuhu hni Adamu me Eva la ngazo. E cili thatreine kö tro nyidroti a hamë matrane ka pexej, tune la trengene sa gato ka hnyiwa, a thatreine jë kö troa hamëne la itre gato ka jijia lolo. (Iobu 14:4) Eje hi laka, kola amamane hnyawa ngöne la kola hnahone la itre atr asë, laka, ase hë aluzine la mele ka pexej, me mele ka epine palua, hnene lo lue pane keme me thine së, a thaa koi nyidroti hmekuj, ngo me itre matra i nyidroti fe. Hna cinyihane hnei Paulo aposetolo, ka hape: “Qa ngöne la traqa ha la ngazo kowe la fene hnengödrai hnene la ate ka cas, nge meci fe pine la ngazo; tune lai hna traqa la meci kowe la nöjei ate asë, ke ngazo asë hë.”—Roma 5:12; wange ju la Salamo 51:5.
6. Pine nemene matre easë a mec?
6 Thatre kö la itre ka inamacan, la kepine matre kola qatre trootro la itre atr me mec. Ngo Tusi Hmitrötre a qaja ka hape, easë a mec pine laka, itre ka ngazo së qaane lo kola hnaho së, ngazo hne së hna kapa qa thene la lue pane keme me thine së. Ngo nemene pë hë la ewekë ka traqa koi së thupene la mec?