Nyipi Mejiun

“Qaane la kola hnahone la atr, angeice fe hi lai a cile qëmekene la mec; nge eje hi lai laka, tro angeice elanyi a mec.”—ARNOLD TOYNBEE, TRAHMANYI NE AGELE KA QEJE PENGÖNE LA MELE NE LA ATR.

1. Nemene la ewekë ka traqa kowe la atr, ewekë hna thatreine neëne hnei angeic; nge nemene la itre hnyinge ka xulu qa ngöne lai?

REI la ka atreine troa isenyine caha trenge nyipici, hna qaja ha ekö? Hnene pala hi la itre atr hna kapa la mec, pine laka, pëkö ka atreine neën. Nge troa akötre catre koi së ngöne la kola meci la ketre atr hne së hna hnim, pine laka, pëkö mene së qëmekene la ewekë cili! Haawe, kola mama hnyawa, laka, pëkö sa i mec. Hapeu, atreine kö troa iöhnyi hmaca memine lo itre atr hne së hna hnim, ka meci hë? Nemene la mejiune hna hamëne hnene la Tusi Hmitrötr, thatraqane la itre ka mec? Tro sa ce wange cahu itre xaa mekune nyine ixatua koi së.

‘Meci Hë La Trejine Me Eahun’

2-5. (a) Nemene la aqane amamane Iesu la ajane memine la atreine i nyidrë troa amelene hmaca la trejine me nyidrë ka meci hë, ene Lazaro? (b) Jëne la hna hamëne hmaca la mel koi Lazaro, nemene la hna kuca hnene la imamanyikeu göi melehmaca?

² Hetrenyi la ketre ewekë ka traqa ngöne la macatre 32 M.K., e Bethania, ketre traone ka co; 3 kilomet la enanyine qaa Ierusalema, traone hna mele ngön hnei Lazaro me lue xa i angeic, ene Maretha me Maria. Itre enehmu i Iesu angatr. Ame ngöne la ketre drai, hna tithi Lazaro hnene la ketre meci ka tru. Ame hnei Maria me Maretha hna canga upe la maca koi Iesu e Ioridrano, ke nyidrëti ngöne la hneopegejë cili. Atraqatre la ihnimi Iesu koi Lazaro me lue xa i angeic, haawe, nyidrëti a tro pi a tro Bethania. Ngöne la gojeny, öni nyidrëti kowe la itretre drei nyidrë, ka hape: “Meköle hë Lazaro, sine shë; ngo ini a tro troa ahlë angeice jë qa hna meköl.” Pine laka, thaa trotrohnine kö angatre la aliene la trenge ewekë i nyidrë, haawe, nyidrëti a qaja amamane jë koi angatre ka hape: “Meci hë Lazaro.”​—Ioane 11:1-15.

³ Drengë Maretha, ka hape, kolo ha easenyine e Bethania hnei Iesu, haawe, nyidroti a canga tro pi troa ixelë me nyidrë. Tru catre la ihnimi Iesu ngöne la nyidrëti a öhne la aqane hleuhleu i Maretha; haawe, nyidrëti a qaja jë koi nyidroti ka hape: “Tro ha mele hmaca la xa i nyipo.” Ame hna sa hnei Maretha ka hape: “Ate hë ni laka tro angeic’a mele hmaca ngöne la ijine mele hmaca, ngöne la drai hnapin.” Iesu a qaja koi nyidroti ka hape: “Ini hi la mele hmaca, memine fe la mel; ame la ate lapaune koi ni, ngacama meci hë, te, tro angeic’a mel.”​—Ioane 11:20-25.

⁴ Iesu a tro kowe la hua, me iupi troa xome trije la etë ka hetrëne la ulane ej. Thupene la hnei nyidrëti hna thithi draië, nyidrëti a hë catre jë me hape: “Lazaro fe! löpi.” Angatre asë hi a icilenyi me goeëne la hua, nge kola löpi hnei Lazaro. Haawe, hnei Iesu hna amele Lazaro hmaca, me hamëne la mele kowe la ketre atr ka meci hë, a foa ha lao drai e hnine la hua!​—Ioane 11:38-44.

⁵ Ka lapaune kö Maretha ekö kowe la melehmaca. (Ioane 5:28, 29; 11:23, 24) Ngo kolo hmaca pe a acatrene catrëne la lapaune i nyidro me itre xane ju kö, hnene la iamamanyikeu hna kuca koi Lazaro, ene la kola hamëne hmaca la mele koi angeic. (Ioane 11:45) Ngo nemene la sipu aliene la hnepe hnëewekë hna hape, “melehmaca”?

“Tro Angeic’a Mele Hmaca”

6. Nemene la aliene la hna hape “melehmaca”?

⁶ Ame la hnepe hnëewekë “melehmaca,” hna ujëne eje qene Heleni hnene la hnepe hnëewekë hna hape, anastasis, a kola hape, “kola mejë hmaca.” Hnene la itretre Heberu ka ujëne la itre itusi kowe la qene Heleni, hna ujëne la anastasis qa ngöne la itre hnepe hnëewekë qene Heberu, hna hape, techi·yathʹ ham·me·thimʹ, kola hape, “kola bëeke hmaca kowe la mel hnene la itre ka meci hë.”a Haawe, ame la melehmaca, ke, ene la kola bëeke hmaca kowe la mele hnene lo atr ka meci hë, cememine lo itre pengö i angeice ekö.

7. Pine nemene matre thaa jole kö koi Iehova Akötresie me Iesu Keriso troa amelene hmaca la itre atr?

⁷ Atreine nge hmaloi koi Iehova Akötresie troa amelene hmaca la ketre atr, pine laka, thatrehmekune la inamacane i Nyidrë, nge pexeje la mekun. Pëkö ejolene koi Nyidrë troa mekune hmaca lo itre pengöne la itre atr ka meci hë, ene la itre thiina, me aqane trongene la mele i angatre ekö, memine la nöjei ithuemacanyi ngöne la pengöi angatr. (Iobu 12:13; wange ju la Isaia 40:26.) Iehova la qaane la mel. Qa ngöne lai, thaa jole kö koi Nyidrë troa amelene hmaca la atr; troa hetrenyi hnene la atr cili ngöne la mele ka hnyipixe, lo thiina ka eje ekö ngöne lo mele hnapan. Ketre, tune la hna amamane hnene la ewekë ka traqa koi Lazaro, madrine Iesu Keriso, nge atreine hi nyidrë troa amelene hmaca la itre ka meci hë.​—Wange ju la Luka 7:11-17; 8:40-56.

8, 9. (a) Pine nemene matre isazikeu kö la lue mekun, ene la melehmaca, memine la ini, ene laka, thaa ka meci kö la u? (b) Nemene la nyin kowe la mec?

⁸ Thaa ka ihmeku kö la ini hna hamëne hnei Tusi Hmitrötr, göi melehmaca, memine la mekun, ene laka, thaa ka meci kö la u. Thaa nyipi ewekë kö troa amelene hmaca la ketre atr, maine tro pena a hamëne hmaca la mele koi angeic, e ame la u ke, ka thaa meci kö. Eje hi laka, thaa hane fe kö Maretha mekune me qaja la ketre u ka thaa meci kö, a ka mele pë hë ngöne la ketre götran, thupene la mec. Thaa hnei nyidroti kö hna hane mejiune laka, Lazaro hë ngöne la ketre götrane hna mele ngön hnene la itre ua. Ohe, hnei nyidroti pe hna amamane la lapaune i nyidroti kowe la aja i Akötresie, ene laka, troa ujëne la mec, matre mele hmaca pena ha. Öni nyidroti ka hape: “Ate hë ni laka tro angeic’a mele hmaca ngöne la ijine mele hmaca, ngöne la drai hnapin.” (Ioane 11:23, 24) Ketre tui Lazaro, thaa hnei angeice kö hna qaja pena ha la ketre ewekë hnei angeice hna öhne thupene lo angeice a mec, pine laka, pëkö nyine troa qaja.

⁹ Haawe, tune la hna amamane hnyawa hnei Tusi Hmitrötr, thaa ka meci kö la u, nge ame la nyin la mec, ke, melehmaca. Ngo nyimutre la itre atr ka meci hë, itre milio la etrun, qaane lo kola waja la ihnadro hnene la pane atr, ene Adamu. Haawe, matre drei la ka troa melehmaca; nge kola troa mele eka?

‘Nöjei Atr Ngöne La Ite Hua Nyine Amekunën’

10. Nemene la hna thingehnaeane hnei Iesu, göne lo itre atr ka meköle ngöne la itre hua nyine amekunën?

¹⁰ Hnei Iesu Keriso hna qaja ka hape: “Calemi hë la ijine tro la nöjei ate ngöne la ite hua [nyine amekunën “NW”] a denge la aqane ewekë i angeic [Iesu], me tropi.” (Ioane 5:28, 29) Hnei Iesu Keriso hna thingehnaeane ka hape, tro ha mele hmaca la nöjei atr asë, ange hna siji ëjene ngöne la mekune i Iehova. Nyimutre catre hë la itre atr ka mec, a itre milio la etrun. Drei e angatre la itre hna siji ëjene ngöne la mekune i Akötresie, angetre treqene la melehmaca?

11. Drei la hna troa amelene hmaca?

¹¹ Ame koi angetre nyihluei Iehova, me catre kuca la thiina ka meköt, tro hë angatre a melehmaca. Ngo ame la itre xaa atr, itre milio la etrun, meci hë angatr ngo thaa hane ju kö trongëne la itre trenge wathebo i Akötresie. Thatre kö angatre la itre hna amekötine hnei Iehova, maine pena, pë ju kö ijine koi angatre troa hane saze. Hna sija fe la itre ëje i angatre lai, ngöne la mekune i Akötresie, nge tro fe hë a hane amele angatre hmaca, tune lo hna thingehnaeane hnei Tusi Hmitrötre ka hape: “Tro ha mele hmaca la nöjei ka meköt, me ka tha meköti kö.”​—Ite Huliwa 24:15.

12. (a) Nemene la hna meköle goeëne hnei Ioane aposetolo, göi melehmaca? (b) Drei la hna troa “kuiëne hnine la hneopegejë eë,” nge nemene la aliene la hnepe hnëewekë celë?

¹² Hnei Ioane aposetolo hna meköle goeëne la kola icilenyi qëmekene la therone i Akötresie, la itre atr ka mele hmaca. Nyidrëti a qeje pengöne lai me cinyihane ka hape: “Hna hamëne hnei hnagejë la nöjei ka meci then’ej; nge meci me hedis a kete hamëne la nöjei ka meci thene lu’ej; ame hna isa hnyingë angate thenge la nöjei huliwa i angat. Ame hna kuië meci me hedise pi kowe la hneopegejë eë. Celë hi meci hnaaluen, ene la hneopegejë eë.” (Hna Amamane 20:12-14) Pane mekune ju la aliene la itre hna thingehnaeane celë! Tro asë hi la itre atr asë ka meci hë hna siji ëjene ngöne la mekune i Akötresie, a löpi qa ngöne la hedis, maine sheol, ene lo hua hna tro kow hnene la nöjei atr. (Salamo 16:10; Ite Huliwa 2:31) Thupene lai, troa kuiëne la “meci me Hedis” ngöne la “hneopegejë eë,” kola hape, tro lue eje a paatre palua. Ene pe, paatre ju fe hi lo hua hna tro kow hnene la nöjei atr asë.

Troa Melehmaca Eka?

13. Pine nemene matre Akötresieti a iëne la itre xaa atr troa melehmaca e hnengödrai, nge ka tuneka la ngönetrei hnei Iehova hna troa hamë angatr?

¹³ Xalaithe hi la itre trahmanyi me itre föe ka troa melehmaca e koho hnengödrai. Angatre a troa ce musi me Keriso, matre itre joxu fe angatr, nge itretre huj; tro hë angatre a ce huliwa matre troa apaatrene la itre ethane la meci thene la atr, a hna kapa qa thene lo pane atr, ene Adamu. (Roma 5:12; Hna Amamane 5:9, 10) Tune la hna qaja hnei Tusi Hmitrötr, ala xalaithe hi la itre atr ka troa elë hnengödraieë, 144 000 la etrun, nge hna ië angatre qa ngöne lo itretre ce tro me Iesu; hna nyiqaane thene lo itre aposetolo ka mele nyipici koi nyidrë. (Luka 22:28-30; Ioane 14:2, 3; Hna Amamane 7:4; 14:1, 3) Ame koi angatr isa ala caas, itre ka troa mele hmaca, tro Iehova a hamëne la ketre ngönetrei ne ua, matre ijije fe tro angatre a hane mele e hnengödrai.​—1 Korinito 15:35, 38, 42-45; 1 Peteru 3:18.

14, 15. (a) Nemene pengöne mele pë hë hna troa melehmaca kow, hnene la itre atr ka nyimutre ka meci hë? (b) Nemene la itre manathithi hna troa kapa hnene la itre atr ka drenge thenge?

¹⁴ Ala nyimu catre pë hë thene lo itre xaa ka mec, hna troa amelene hmaca matre troa lapane la fen. (Salamo 37:29; Mataio 6:10) Ka tuneka la fene cili? Ka tiqa la fene enehila hnene la isi, me itre ihumuthi ka tru, nge kola angazone la ihnadro hnene la atr, nge catrehnine catre la iakötrë. Maine tro la atr ka meci hë a melehmaca ngöne la fene ka tune la, eje hi laka, troa thupatëne hi la madrine i angeic. Ngo hna thingehnaeane pe hnene la Atre ixup, laka, easenyi hë tro Nyidrëti a apaatrene la fene hnengödrai celë, ka meköle hune la ihnatrapaime i Satana. (Ite Edomë 2:21, 22; Daniela 2:44) Tro ha eatre lo hna thingehnaeane göi “fene hnengödrai ka hnyipixe,” ene la aqane mele ne la itre atr, laka ka hnyipixe pena ha, nge ka meköt. (2 Peteru 3:13) Ngöne la ijine cili “Tha tro kö a qaja hnene la ate lapan’ej, ka hape, Ini a mec; tro ha nue tije la ngazo ne la nöje hna lapan’ej. ” (Isaia 33:24) Ketre tro mina fe a paatre la xoue mec, ke, Akötresieti a troa “köle tije la nöjei tenge timida asëjëihë qa ngöne la ite lue meke i angat; nge pa hmaca kö mec, me hace hni, me teij, me aköt; ke patë hë la ite ewekë hnapan.”​—Hna Amamane 21:4.

¹⁵ Ame ngöne la hna thingehnaeane hnei Akötresie göi fene ka hnyipixe, tro la itre atr ka hni ka menyike a “hetenyi la [ihnadro NW], nge tro angat’a madine la tingetinge atraqat.” (Salamo 37:11) Tro la Baselaia i Iesu Keriso me itretre ce musi me nyidrë e hnengödrai, ene lo ala 144 000, a tro xome trongëne la itre atr ka drenge thenge matre pexeje hnyawa angatr; celë hi lo manathithi ekö hna aluzine hnene la pane keme me thine së, ene Adamu me Eva. Troa hane e fe la itre atr hna troa amelene hmaca e celë fen, angetre troa hane kapa la manathithi cili.​—Luka 23:42, 43.

16-18. Nemene la madrine hna troa kapa hnene la itre hnepe lapa, jëne la melehmaca?

¹⁶ Kola qaja amamane hnei Tusi Hmitrötre la madrine ne la itre hnepe lapa, ngöne la ijine kola troa amelene hmaca la itre ka mec. Pane mekune jë së lo madrine ne la sine föe ne Naina, ngöne lo Iesu a acilëne la angetre xutu wezipo, me amelene hmaca la nekö i eahlo ka caas! (Luka 7:11-17) Thupene lai, Iesu pena ha ezine la hneopegejë ne Galilaia, e cili hnei nyidrëti hna hamëne hmaca la mele kowe la ketre nekö jajinyi ka 12 lao macatre, ame hnene la keme me thine i nyëne hna “canga haine atraqat.”​—Mareko 5:21-24, 35-42; wange ju fe la 1 Ite Joxu 17:17-24; 2 Ite Joxu 4:32-37.

¹⁷ Ame la melehmaca kowe la itre atr ka meci hë, itre milio la etrun, ke, kola hape lai, troa mele ngöne la ketre fene ka hnyipixe gaa tingeting. Drei la ketre mejiune ka lolo catre koi Tomi memine lo atr ka thele mani, lue atr hne së hna ithahnatane ngöne lo pane götrane ne la boroshüre celë! Ame ngöne la Tomi a troa hlë hmeke sesë elanyi me mele ngöne la paradraiso e celë fen, thaa jole kö e troa wangatrehmekunyi angeice hnei thine i angeic, pine laka, thaa saze kö angeic, ngo eje hi lai laka, paatre hë la itre sine mec. Atreine hi tro nyidroti a ketri angeic, me imadri me angeic, me amamane la ihnimi nyidroti koi angeic. Ketre tune mina fe lo atre Ëëd ka thele mani, laka, thaa hna othi angeice hmaca kö hnene la mekune ka hape, ame la atr, ka pëkö pune la tro angeice a unene lapa; eloine pe, hna fe pi la lue meke i angeice jëne la ketre mejiune ka sisitria, ene la troa mele ngöne la fene ka hnyipixe hna hnëkëne hnei Akötresie, nge e cili tro angeice a iöhnyi hmaca memine lo itre nekö i angeice trahmany.

¹⁸ Ame enehila, atre hë së la nyipici göi u, memine la ewekë ka troa traqa koi së e meci hë së, me göi mejiune kowe la melehmaca; eje hi laka, itre ewekë lai ka troa hetre thangane catre kowe la itre atr ka mele enehila. Drei la kepine matre, loi e tro sa ce wange la aqane ketr la itre hni angatr.

[Ithueamacany]

[Iatr ne la götran 26]

Tro ha kapa la madrine ka epine palua, jëne la melehmaca