Ini 10

Aqane Tro Sa Atrehmekune La Nyipi Hmi

Maine nyipunie a ajane troa ce sinee me Akötresie, nyipi ewekë troa xome la hmi hnei Nyidrëti hna kapa. Hnei Iesu hna qaja ka hape, tro hë la “nöjei ate nyipi hmi” a hmi koi Akötresie thenge la “nyipici.” (Ioane 4:23, 24) Caasi hi la nyipi aqane troa hmi koi Akötresie. (Efeso 4:4-6) Kola eatrongë së hnene la nyipi hmi kowe la mele ka thaa ase palua kö, nge hnëjine la pune kowe la hmi ka thoi.​—Mataio 7:13, 14.

Atreine hi troa wangatrehmekune la nyipi hmi, jëne la aqane melene la itre atrene ej. Pine laka, ka lolo Iehova, haawe, nyipi ewekë tro fe a hane lolo la itre nyipi hlue i Nyidrë. Tune la ipiici ka cia lolo, a kola hamë wene piici ka lolo, ame la itre atrene la nyipi hmi, ke itre atr ka lolo mina fe angatr.​—Mataio 7:15-20.

Kola ahmitrötrëne hnene la itre sinee i Iehova la Tusi Hmitrötr. Atre hi angatre laka, Akötresie la atrekë ewekëne la Tusi Hmitrötr. Angatre a xome eje matre troa nyitrepene la mele i angatr, me senge la itre jole ka eje thei angatr, nge nyine tro fe a xatua angatre troa atrepengöi Akötresieti hnyawa. (2 Timoteo 3:16) Angatre a catre mele thenge la hnei angatre hna cainöjën.

Ka ihnimekeu la itre sinee i Iehova. Hnei Iesu hna amamane la ihnimi nyidrë kowe la itre atr, ngöne laka, hnei nyidrë hna ini angatre troa atre la pengöi Akötresie, me hane aloine la meci ne la itre ka wezipo. Ame la itre atrene la nyipi hmi, angatre mina fe a ihnimekeu. Hnei angatre hna xome la tulu i Iesu, thaa hnei angatre kö hna methinëne la itre ka puafala, me xele ma wange la itre xaa atr ka isa qene hlapa kö me angatr. Hnei Iesu hna qaja ka hape, troa atrehmekune hnene la itre atr, lo itretre drei nyidrë, qa ngöne la aqane ihnimekeu i angatr.​—Ioane 13:35.

Kola atrune hnene la itre sinee i Akötresie la ëje i Nyidrë, ene Iehova. Maine hnene la ketre atr hna xele ma hëne la ëje i nyipunie, hapeu, tro kö a sinee i nyipunie la atr cili? Ohe! Ame la itre sinee së, ke, easë a hë angatre hnene la ëje i angatr, nge easë fe a qaja aloinyi angatre kowe la itre xaa atr. Qa ngöne lai, loi e tro la itre sinee i Akötresie a hane qaja la ëje i Nyidrë, me hane qeje Nyidrëti kowe la itre xan. Iehova a ajane tro sa kuca tune lai.​—Mataio 6:9; Roma 10:13, 14.

Kola tui Iesu hnene la itre sinee i Akötresie laka, angatre a inine la itre atr la pengöne la Baselaia i nyidrë. E koho hnengödrai la Baselaia i Akötresie, nge eje a troa aparadraisone hmaca la fene hnengödrai. Kola ce thawa fe hnene la itre sinee i Akötresie memine la itre xaa atr, la maca ka loi ne la Baselaia.​—Mataio 24:14.

Itretre Anyipici Iehova a thele troa ce sinee me Akötresie. Angatre a metrötrëne la Tusi Hmitrötr, nge catre la aqane ihnimekeu i angatr. Angatre fe a qaja me atrune la ëje i Akötresie, me inine la itre xaa atr la pengöne la Baselaia i Nyidrë. Kola melëne la nyipi hmi enehila e celë fen, hnene la Itretre Anyipici Iehova.