Mekene Theri

Loi e Draië La Wesi Ula i Akötresie

1. (a) Tune kaa la aqane wangatrehmekune hnei angetre Isaraela laka Wesi Ula i Akötresie la nyine troa mejiune kow? (b) Pine nemene fe matre ka lolo catre koi së?

“NGE atre hë nyipunie ngöne la itre hni me itre u i nyipunie laka, thaa tria kö la ketre ewekë ne la nöjei ewekë ka loi asë hnei Iehova Akötresi nyipunie hna ulatine koi nyipunie ; eatre asë hë koi nyipunie.” (Iosua 23⁠:​14-​16) Celë hi itre trenge ewekë i Iosua kowe la itre qatre ne Isaraela, thupene la hnei angatr hna nyiqaane lapane lo Nöje Hna Thingehnaean. Eje hi laka, eatr asë hi la itre hnei Nyidrëti hna thingehnaean. Hna cinyihane hnyawa thatraqa së la itre ewekë cili memine la nöjei ewekë asë hna qaja hnine la Tusi Hmitrötr matre “hete mejiune shë.”​—Roma 15⁠:⁠4.

2. (a) Nemen la aliene la hna qaja ka hape, “qa thene la ua i Akötesie” la Tusi Hmitöt? (b) Pine laka qaathei Akötresie la Tusi Hmitrötr, nemene la hnëqa së?

² Nyipici laka footre lao atr angetre cinyihan la Tusi Hmitrötr, ngo ame pe, Iehova kö la qaan me atrekë ewekëne ej. Matre hapeu, thaa kolo kö lai a amaman ka hape, itre xan pe hi a fejan la itre itus, ngo Nyidrëti la ka ameköti angatr? Eje hi. Hna eatrëne lai jëne la uati hmitrötre i Nyidrë ka men, ene la trenge catre i Nyidrë. Tune la hna qaja hnyawa hnei Paulo aposetolo ka hape: “Qa thene la Ua i Akötesie la hna cinyihan’ asë . . . mate nyipi meköti la ate i Akötesie, mate hnëkëne jë angeice thatraqane la nöjei huliwa ka loi asëjëihë.” Ame la nöjei atr e cailo fen ka mejiune ka hape, qaathei Akötresie la Tusi Hmitrötr, tre, angatr a wangatrune eje hnyawa me xomi tulu ne la mele i angatr thenge la itre aliene ej.​—2 Timoteo 3:​16, 17; 1 Thesalonika 2:​13.

Xatuane Jë La Itre Xaa Atr Troa Nyipiewekën Ej

3. Nemen la ewekë ka sisitria nyine troa kuca matre troa xatuan la itre atr ka ala nyim ka thaa mejiune kö ka hape, ame la Tusi Hmitrötr, tre, Wesi Ula i Akötresie?

³ Nyimutre la itre xaa atr hne së hna ithanata memin, ka thaa hane kö mejiune tu së kowe la Tusi Hmitrötr, ene la Wesi Ula i Akötresie. Tune kaa la aqane tro sa xatua angatr? Ame la nyine troa kuca ka sisitria, tre, ene la troa fe la Tusi Hmitrötr me amamane koi angatr la itre aliene ej. “Mele la wesi ula i Akötesie, me men, me ka idei hune la taua ka lue qenön . . . nge ate amekötine la ite mekune me ite aja ne la hni.” (Heberu 4:​12) Thaa itre ewekë kö ka pë thangan la “wesi ula i Akötesie”; kola hape ka mele ej! Pine laka ka eatr pala hi la itre hna thingehnaean hnene la Tusi Hmitrötr. Atraqatr catre kö la thangan la maca ne la Tusi Hmitrötr e kuhu hni ne la itre atr, hune la itre ithuecatr qaathe së pe hi hne së hna hamën koi angatr.

4. Nemen la itre mekun hna qejepengön hnene la Tusi Hmitrötr ka saze la aqane ujë ne la itre xaa atr kowe ej? Pine nemen?

⁴ Nyimu atr ka thele troa atrepengöne hnyawa la Tusi Hmitrötr, thupene la hnei angatr hna hane atre la ëje i Akötresie. Ame itre xan tre hnei angatr hna mekune troa inin la Tusi Hmitrötr, qa ngöne laka hnene ej hna amaman koi angatr la aliene la mel, memine la kepin matre Akötresieti pala kö a pane nue la iakötrë, memine fe la alien la itre ewekë ka traqa enehila, memine la mejiune kowe la mele ka thaa ase palua kö ngöne la paradraiso e celë fen. Ame ngöne la itre nöje ka tru, hetrenyi la itre atr hna kucahmën hnene la itre ua ka ngazo, pine laka, ame la itre pengöne aqane kuci hmi i angatr tre ceitu me kolo pe hi a nue axöji angatr koi itre dremoni, haawe, ame la angatr a öhne hnine la Tusi Hmitrötre la kepin la itre ewekë ka ketre pengöne kö ka traqa koi angatr, memine fe la aqane troa kötrene itre ej, ene pe ahlëne jë hi la aja ne la itre atr cili. Pine nemen matre kola ketr la hni ne la itre atr ka menyik? Pine laka Tusi Hmitrötr hmekuje hi la ka hamën la itre nyipi ithuemacany ngöne la itre tane mekune cili ka nyipi ewekë catr.​—Salamo 119⁠:130.

5. (a) Maine troa qaja hnene la ketre atr ka hape, thaa jele nyipicine kö angatr la Tusi Hmitrötr, nemene jë la itre kepine lai? (b) Tune kaa jë la aqane tro sa xatuan la atr cili?

⁵ Ngo nemen la nyine troa kuca e qaja jë hnene la ketre atr ka hape, thaa jele nyipicine kö angeice la Tusi Hmitrötr? Hapeu tro hi së a umuthe la ithanata e cili? Ohea, maine ka ajane hi angeic troa drenge la itre mekune e troa hetre enyipicin, nge ka ajane fe angeic troa waiewekë matre öhne la meköt, haawe, loi e troa ithanata me angeic. Maine jë angeic a mekune ka hape, ame la Tusi Hmitrötr, tre, itusi ne la hmi ne lo angetre sipu selë angatr ka hape, itre Keresiano. Celë hi matre angatr a xele troa waimekun jëne la Tusi Hmitrötr, pine laka thaa sihngödri kö koi angatr la itre ewekë ka ngazo hna kuca ekö hnene la itre atr ka sipu selën ka hape, itre keresiano fe angatr, ngo lapa pe troa huliwa iaö, me kuci politik, me sipo manie lapaa. Hnyingë angeice ju ka hape, tune kaa fe la mekune i angeic? Maine jë tro hë lai a hlë la aja i angeic, e tro nyipunie a amaman jëne la Tusi Hmitrötr laka, thaa hna kapa kö la itre ewekë ka ngazo hna kuca hnene la itre hmi ka sipu selë angatre kö ka hape, itre Keresiano, ketre tune mina fe loi e tro angatr a öhne hnyawa la isapengönen la itre hmi ka sipu selë angatr ka hape, Keresiano memin la nyipi Keresiano.​—Mika 3:​11, 12; Mataio 15:​7-9; Iakobo 4⁠:⁠4.

6. (a) Nemen la ka acatrene hnyawa la mekuna i epun laka ame la Tusi Hmitrötr tre celë hi la Wesi Ula i Akötresieti lai? (b) Nemen la itre xaa ewekë nyine troa mekun ka troa xatuan la ketre atr troa atrehmekune laka nyipici qaathei Akötresieti hi la Tusi Hmitrötr?

⁶ Ame koi itre xaa atr, canga kapa hi angatr e tro hi a qejepengöne hnyawa ka hape, qaathene la ua i Akötresie la Tusi Hmitrötr. Nemen la ka anyipicine hnyawa koi nyipunie ka hape, qaathei Iehova Akötresie la Tusi Hmitrötr? Ma hnene jë laka ej a ketre sipu qaja la qaan ne ej? Maine pena, qa ngöne laka Tusi Hmitrötr a qatrenge la itre hna perofetan ka nyimutre, kola qaja la itre ewekë ka troa traqa hnyawa ngöne la itre drai elany, eje hi thaa ijije kö troa xulu la atrein cili qaathei atr? (2 Peteru 1:​20, 21) Ame la ketre götran, maine jë hnene laka ame la itre mekune e hnine la nöjei tusi ne la Tusi Hmitrötr, kösë pi hi lo hna cinyihane hi hnei ala caas, ngacama 40 lao ka cinyihane itre ej ngöne la itre macatre ka isapengön, traqa koi 1 600 la etrun? Maine pena hnene laka, ame la itre hnen ej hna qaja, hna kapa fe hnene la Sias, nge ketre pengöne pi kö ej hune la itre xaa itus ne la hneijine cili? Maine jë pena hnene la aqane nyipici la itre ka cinyihan? Maine hnene pena la aqane cile huti ej ngacama tru la hna thele troa apaatrene ej? Maine hetrenyi qa ngöne la itre mekune celë ka ketri epun, loi e troa hane xome matre nyine xatuan la itre xaa atr.a

E Tusi Hmitrötr

7, 8. (a) Nemene la nyine tro sa kuca kow, memine la Tusi Hmitrötr? (b) Nemene la ketre ka nyipi ewekë nyine nyi sinatrongen la tro sa isa e la Tusi Hmitrötr? (c) Tune kaa la aqane isa atre nyipunie la itre mekuana i Iehova?

⁷ Thaa ene hmekuje kö la tro sa xatuan la itre xaa atr troa lapaun kowe la Tusi Hmitrötr, ngo nyipi ewekë catre fe tro sa hane e ej o drai. Hapeu hane kö nyipunie e lapaan la Tusi Hmitrötr? Sisitria catre kö la Tusi Hmitrötr hune la nöjei itusi hna cinyihan asë. Ame pe thaa kolo kö lai a qaja koi së troa e caasin me e hmekuje hi la Tusi Hmitrötr nge trije ju pë hë la itre xaa itus. Öni Tusi Hmitrötre lo, wange kö la troa umë. Thaa tro kö sa mekune ka hape, ijiji së hi troa ketre trotrohnin caasin la Tusi Hmitrötr, qa ngöne la hne së hna ketre thele la alien la itre mekune ne ej. Maine easë a ajan tro sa itre Keresiano ka atreine tulu ewekë thatraqane la mele së, nyipi ewekë tro sa catre isa inin la Tusi Hmitrötr me sine pala hi la itre icasikeu.​—Ite Edomë 18⁠:1; Heberu 10⁠:​24, 25.

⁸ Tusi Hmitrötre a qaja la pengöne la ketre atr ka sisitria ne Aithiope kola e trongën la hna perofetan hnei Isaia. Hnene la ketre angela hna tro xomi Filipo ketre keresiano ka tro fë evangelia matre troa hnyingën kowe lai atr ka hape: “Trotrohninë hë nyipëti la hnei nyipëti hna e ?” Cememine la hni ka ipië önine lai atre Aithiope ka hape: “Tro ni a ate tune ka e pëkö ate troa amekötine koi ni ?” Ene pe angeic a sipone iele Filipo ju troa qejepengöne lai xötr ne la Tusi Hmitrötr. Ame Filipo, tre thaa thele caasine kö angeic troa atre la Tusi Hmitrötr, me hamën la itre sipu mekuna i angeic göi troa qejepengöne la itre xötr. Ketre atrene angeice la organizasio i Akötresie e celë fen. Celë hi kepin matre ijiji angeice hi troa xatuan la atre Aithiope troa kepe thangane ka loi qa ngöne la ini hnei Iehova hna hamën jëne lai organizasio cili. (Ite Huliwa 6:​5, 6; 8:​5, 26-​35) Tune mina fe enehila, pëkö atr ka atrein troa ketre sipu trotrohnin caasin la itre mekuana i Iehova. Easë asë hi a ajan la ixatua hnei Iehova hna hamën cememin la ihnim, jën la organizasio i Nyidrë e celë fen.

9. Nemen la ketre porogaram ne e Tusi Hmitrötr ka troa hetre thangane ka loi qa ngön koi së asë?

⁹ Kola hamën hnene la organizasio i Iehova la itre itus ka qejepengöne hnyawa la Tusi Hmitrötr, matre troa xatua së troa trotrohnin la alien ej. Ketre, kola hamëne fe hnene la organizasio la ketre porogaram göi troa e pala hi la Tusi Hmitrötr, nge hna ce amë memine lo Ini Ne Cainöje Trootro Qaathei Akötresie hna kuca e hnine la itre ekalesia asë ne la Itretre Anyipici Iehova e cailo fen. Lolo catr la thangan e troa ketre fe me wange la Tusi Hmitrötr. (Salamo 1:​1-3; 19:​7, 8) Pane thele ijine jë troa e pala hi la Tusi Hmitrötr. Ngacama thaa trotrohnine hnyawa kö nyipunie la nöjei mekun hna qaja, ngo tro hë nyipunie a atrehmekune hnyawa me trotrohnine la aliene la Tusi Hmitrötr, nge celë hi ewekë lai ka sisitria catr. Hanawang la ketre ceitun, maine tro nyipunie a e la foa maine faif lao götran ngöne la drai, atreine hi troa afenesin la Tusi Hmitrötr ngöne la caa macatre.

10. (a) Eu la ijine epuni a e la Tusi Hmitrötr? (b) Drei la ka ijij troa ce e me nyipunie la Tusi Hmitrötr, nge pine nemen matre nyipi ewekë troa e lapaane ej?

¹⁰ Tro nyipunie a e eu la Tusi Hmitrötr? Maine tro nyipunie a xome la 10 maine 15 lao menetr ngöne la drai, troa hetre thangan ka loi tro nyipunie a kapa qa ngön. Maine thaa ijije kö, wange ju pena matre troa kuca ngöne la nyimu ijin ngöne la wiik nge eatrëne hnyawa ju la porogarame i epun. Maine ka faipoipo nyipunie, ijije hi tro epuni a catre ce e la Tusi Hmitrötr cememine la föe i epun. Maine hetre itre nekö i epuni hë ka atreine e tus, upi angatre jë fe troa hane e catrën la Tusi Hmitrötr, ase jë ketre matre ketre. Loi e tro la e Tusi Hmitrötr a ceitu memine la kola xen, thaa hne së hna thëthëhmin ngöne la mele së ka pexej. Atre hnyawa hi së laka, e thaa loi kö la aqane xeni së, tre tro lai a tithi së hnene la itre xaa mec. Ceitune fe hi lai memine la mele së ngöne la götrane la ua, ene mina fe la pengö së göi mele ka thaa ase palua kö, laka, tro sa kapa la itre manathithi cili e hne së hna majemine troa xeni pala hi la “nöjei tenge ewekë asë ka xulu qa ngöne la ine ula i Akötesie.”​—Mataio 4⁠:⁠4.

Nyine Tro Sa Thele Troa Eatrën

11. Nemen la hna troa eatrën ngöne la easë a e la Tusi Hmitrötr?

¹¹ Nemen la nyine tro sa thele troa eatrën ngöne la easë a e la Tusi Hmitrötr? Ame la nyipi ewekë tre, thaa ene kö la troa e nyimenyimën matre fenesi pi la itre götran ka nyimutre. Ohe, loi e tro pe së a thele troa atre Akötresieti hnyawa, memine fe la tro së a akökötren la ihnimi së koi Nyidrë me amadrinë Nyidrë hnene la aqane hmi së. (Ioane 5:​39-​42) Loi e tro sa xome la aqane mekune ne la atre cinyihan la Salamo, kola hape: “Iehova fe, amamai ni jë la ite kala i cilie ; ini ni jë la ite jë i cilie.”​—Salamo 25⁠:⁠4.

12. (a) Pine nemen matre nyipi ewekë troa kapa la “nyipi atrehmekun,” nge nemen la nyine tro sa catre kuca ngöne la easë a e la Tusi Hmitrötr matre troa kapa la atrehmekune cili? (b) Nemen la foa lao jëne aqane troa thele ewekë ka aijijë së troa trotrohnine hnyawa ngöne la easë a e la Tusi Hmitrötr? (Wange ju la itre mekune hna eköhagen ngöne götrane 30.) (c) Amamane jë la aqane troa trongën la itre mekune cili, ngöne la kola sa la itre hnying hna hamën hnine la paragarafe celë. Xome jë la itre xötr hnine la Tusi Hmitrötr, ene lo itre xötr thaa hna hane pë hë cinyihan.

¹² Ame ngöne la kola ini së hnei Iehova, loi e tru e kuhu itre hni së la aja troa xöle kapa la [“nyipi atrehmekun,” MN ]. Nyipici, tro sa trongëne me qejepengöne hnyawa tune kaa kowe la itre xaa atr la Wesi Ula i Akötresie, nge pëkö the së la atrehmekun? (Kolose 3:​10; 2 Timoteo 2:​15) Maine easë a ajan troa kapa la nyipi atrehmekun, nyipi ewekë tro sa thele troa e hnyawa la Tusi Hmitrötr, nge maine jol troa trotrohnin la ketre götran ke jui la mekun, haawe, loi e troa anyimua e matre troa atre hnyawa la alien ej. Ka loi mina fe tro sa ami ijin troa thele ewekë ngöne la itre hne së hna e, nge troa thele la nöjei jëne aqane troa trotrohnin. Foa lao jëne aqane troa thele ewekë hna hamën nyine ixatua ngöne la götrane 30. Maine tro sa xome lai itre jëne aqane troa thele ewekë cili, ijije hi troa trotrohnine hnyawa la itre xötr ne la Tusi Hmitrötr. Hane cahu itre mekun ka sa la itre hnying, kola amaman la aqane tro sa thele ewekë.

(1) Ame ngöne la itre xaa ijin, kola amaman hnene la itre xötr hne së hna e, la pengö i Iehova. Hanawang la ketre ceitun, kola amaman ngöne Salamo 139⁠:​13, 14, la etrune la ihnimi Akötresie kowe la itre medreng e nyudren petre kö e kuhu hni ne la thin, kola hape: “Hnei cilieti hna hetë ni e kuhu hni nenë. Ini a olene koi cilie ke hna akete pengönë ni, nge nyine hain ; nyine haine la ite huliwa i cilie ; nge ate hnyawa lai hnene la ung.” Mingöminge catr la itre hnei Iehova hna xup! Kola mama hnyawa la etrune la ihnimi Iehova ngöne la aqane xupi së hnei Nyidrë.

Tune la hna qaja ngöne Ioane 14:​9, 10, ame ngöne la easë a e la itre hna qaja me kuca hnei Iesu kowe la itre xaa atr, easë hi a öhne hnyawa e cili la tulu qaathei Iehova. Haawe, jëne la itre ewekë hna cinyihan ngöne Luka 5:​12, 13 me Luka 7:​11-​15, nemene hë la pengö i Iehova nyine tro sa qaja?

(2) Mekune ju la aqane ihmekune la itre mekune hna e memine lo taan ne la Tusi Hmitrötr hna hape, troa anyipicin la musi ka draië i Iehova me ahmitrötrën la ëje i Nyidrë hnene la Baselaia hna cilën hnei Iesu Keriso, matran hna thingehnaean.

Tune kaa la aqane qaja hnei Ezekiela me Daniela la taan ne la Tusi Hmitrötr? (Ezekiela 38⁠:​21-​23; Daniela 2:​44; 4:​17; 7:​9-​14)

Nemen la aqane amamane hnyawa hnene la Tusi Hmitrötr, laka, Iesu hi la matran hna thingehnaean? (Galatia 3:​16)

Tune kaa la aqane qejepengöne hnene la tusi Hna Amamane la aqane troa eatre hnyawa elanyi la hna qaja hnene lo taan mekun ene la Baselaia? (Hna Amamane 11⁠:15; 12:​7-​10; 17⁠:​16-​18; 19⁠:​11-​16; 20:​1-3; 21⁠:​1-5)

(3) Thele jë la aqane tro nyipunie a isa trongën la hnei nyipunie hna e. Hanawang la ketre ceitun, easë a e ngöne la tusi Esodo uti hë Deuteronomi, la aqane kuci ngazo memine la aqane icilekeu i angetre Isaraela. Easë a atre la itre thangan ka ngazo ka traqa koi angatr, qa ngöne la itre aqane ujë me itre huliwa ka ngazo hnei angatr hna kuca. Haawe, thaa tro pi kö së a xötrethenge la tulu ka ngazo i angetre Isaraela, ngo loi e tro pe sa thele troa amadrinë Iehova. “Traqa ha la nöjei ewekë cili koi angate nyine haten ; nge hna cinyihan’ it’ eje nyine eamo shë, lo hna traqa la ite pune la fene hnengödrai kow.”​—1 Korinito 10⁠:⁠11.

Nemen la ini hne së hna xom qa ngöne la kola humuthi Abela hnei Kaina? (Genese 4:​3-​12; Heberu 11⁠:4; 1 Ioane 3:​10-​15; 4:​20, 21)

Tune kaa la itre eamo ne la Tusi Hmitrötr hna hamën kowe la itre Keresiano ka troa mele e hnengödrai, tro fe a hane trongëne itre ej hnene la itre atr ka troa mele epine palua e celë fen? (Numera 15⁠:16; Ioane 10⁠:⁠16)

Ngacama hlemu loi së e hnine la ekalesia, pine nemen matre loi e tro pala hi së a thele troa trongëne hnyawa la itre eamo hne së hë hna atre? (2 Korinito 13⁠:5; 1 Thesalonika 4⁠:⁠1)

(4) Thele jë la aqane tro nyipunie a xome la itre hnei nyipunie hna e matre troa xatuan la itre xaa atr. Qa ngöne laka easë asë hi a hnehengazon e tithi së jë hnene la ketre mec, haawe ijije hi tro sa e kowe la itre atr lo hna kuca hnei Iesu matre troa amaman la hnei nyidrëti hna troa kuca elany ngöne lo nyidrëti a troa musinën la fene hnengödrai asë: “Hna traqapi koi nyidëti la nöje ka ala nyimu, ce me angate fe la nöjei geny, me nöjei timek, me nöjei hum, me nöjei hna sathepën, . . . nge nyidëti a amele angatr.”​—Mataio 15⁠:⁠30.

Drei la hne së hna troa xatuan ngöne la easë a qaja lo kola amelene hmaca la nekö i Iairo jajiny? (Luka 8:​41, 42, 49-​56)

13. Nemen la itre thangan hne së hna troa kapa e hne së hna catre e me inine pala hi la Tusi Hmitrötr thene la organizasio i Iehova?

¹³ Troa hetre thangane ka lolo la Tusi Hmitrötr ngöne la easë a e ej thenge lo lai foa lao jën aqane troa thele ewekë! Nyipici laka, ketre tusi ka jole e troa e la Tusi Hmitrötr. Ngo ame pe la itre manathithi hne së hna troa kapa qa ngön, tre, ka epine palua itre ej, ke ame la easë a e la Tusi Hmitrötr, kola akökötren la inamacane së ngöne la itre ewekë ne la ua. Maine tro sa e pala hi la Tusi Hmitrötr, tro hë së a easenyi catr koi Iehova, Tretretro së ka ihnim, me kowe mina fe la itre trejine me easë Keresiano. Ketre, kolo mina fe a xatua së troa trongën la eamo celë, ene la troa “adraiën [hne së] la tenge ewekë ne la mel.”​—Filipi 2:​16.

Revizio

• Pine nemen matre cinyihane jë la Tusi Hmitrötr me thupëne ej uti hë ngöne la hnedrai së enehila?

• Tro sa xatuane tune kaa la itre xaa atr matre tro fe angatr a hane trotrohnin me wangatrun la Tusi Hmitrötr?

• Pine nemen matre hetre thangane ka loi e troa isa e pala hi la Tusi Hmitrötr? Nemene lo foa lao jëne aqane troa thele ewekë ka aijijë së troa trotrohnine hnyawa la itre hne së hna e?

[Hna Eköhagen Götran 30]

AME NGÖNE LA EPUNI A E LA KETRE HNEPE XÖTR NE LA TUSI HMITRÖTR, ISA THELE JË

La hnei nyipunieti hna kapa göne la pengö i Iehova

La itre mekun ka ihmeku ngöne la hnei nyipunieti hna e memine la taan la Tusi Hmitrötr

La thangane ej kowe la mele i nyipunie

La aqane troa xom la itre hna e matre troa xatuan la itre xaa atr