Mekene Sikis
Ketre Ewekë Ka Jole Catr Tro Asë Hi Së a Cile Kow
1, 2. (a) Nemen la mekun ka traqa qaathei Satana ka axulun ekö e Edena la luelu? (b) Tune kaa la aqane mama la mekune cili ngöne la itre trenge ithanata i angeic?
EPUNI e hnine la ketre icilekeu a pë hmaca kö ketre ka tru hune lai hnene la itre atr hna troa melën. Ngo ame pe, jëne tro hi epuni lai a mele epine palua, haawe, tro epuni a ce me drei. Hna mama ekö la jole cili ngöne lo kola icilekeu e Edena. Hna nyiqaan ngöne la kola hnyingë Eva hnei Satana ka hape: “Hape u, ase hë ulatine hnei Akötesie ka hape, The tro kö nyipoti a xeni qa ngöne la nöjei sinöe asëjëihë ne la hlapa ?” Matre hnei Eva hna sa ka hape Akötresieti hi a qaja la caa isinöe, öni Nyidrë: “The tro kö nyipoti a xeni wen’ ej . . . ke mecipi.” Hane hi lai kola jele thoi Iehova hnei Satana, kola hape ame la nyidroti a mel, tre thaa qa ngöne kö la hnei nyidroti hna drengethenge Akötresie. Satana hi lai a catre fë ju la mekune ka hape, hnei Akötresieti hna cipan la ketre ewekë ka tru kowe la itre xupuana i Nyidrë, ene la atreine ka eje thei angatr troa isa sipu acil la itre meköt ka loi thatraqane la isa mele i angatr. Öni Satana jë hi ka hape: “Ate hmekune kö Akötesie laka ngöne la drai ne tro nyipoti a xeni wen’ ej, tro ha maca la lue meke i nyipo, mate kösë lue Akötesie nyipo, mate ate hmekune la loi me ngazo.”—Genese 3:1-5.
2 Kösë Satana hi lai a qaja ka hape ketre ka sisitria catre kö e tro la itre atr a isa trongëne thenge la itre sipu mekuna i angatr, hune la troa drengethenge la itre trenge wathebo i Akötresie. Haawe, angeice hi lai a icilekeu me qanangazon la musi ka eje thei Iehova. Celë hi matre lueluë hë la atr kowe la musi ka pë sane i Akötresie e celë fene hnengödrai, ene laka Nyidrëti hmekuje hi la ka ijije me ka meköti troa hetrenyi la musi cili. Haawe, mama pi hi la hnyinge celë, kola hape: Nemen la ka loi kowe la itre atr, ene la aqane musi Iehova maine troa isa acili musine kö? Maine ju ekö ijije hi tro Iehova a apaatrenyi Adamu me Eva ngöne lo nyidroti a thaa drei Nyidrë, ngo thaa celë kö la aqane tro lai a amekötine paluan ka hape eje hmekuje hi thei Nyidrëti la musi ka pë san. Hnei Akötresieti pe hna nue la itre atr troa isa mele thenge la itre sipu meköti angatr, matre mama hnyawa pi la itre ejolen la troa mele ananyi Nyidrë me lapa e tröne la itre trenge wathebo i Nyidrë.
3. Nemen la mekun hnaaluen hna amejën hnei Satana?
3 Eje hnyawa koi Satana la troa icilekeu memine la musi Iehova, celë hi matre thaa ea hmaca ju hi ngöne lo itre ewekë ka ngazo ka traqa e Edena. Öni angeic hmaca jë, ame fe lo la itre xaa xupuana i Iehova tre itre xaa ka tro jë fe hi a hane mele thoi. Mekune hnaaluene hi lai, a kola nyi sinatrongen lo hnapan. Hnene la itre mekune hmo cili hna hane ketr la itre matra i Adamu me Eva asë me itre nekö i Iehova asë ene lo itre ua, memine fe la nekö hnimina i Nyidrë ka caas. Hanawang la ketre ceitun, ame ngöne la itre hneijine i Iobu, hnei Satana hna qaja ka hape ame la itre atr a nyihlue i Iehova tre, thaa thenge kö la nyipi ihnimi maine kolo pena a ajan la aqane musi Nyidrë, ohea hetre hnei angatr hna thel. Öni angeice ka hape, maine troa traqa la itre jole koi angatr, canga tro hi a cia ngöne la itre hni angatr la itre aja ka ngazo.—Iobu 2:1-6; Hna Amamane 12:10.
Nemen La Hna Amaman Hnene La Mele Ne La Atr
4, 5. Nemene la ewekë ka mama ngöne la kola ketre sipu amekötin hnene la atr la hna feke ca hnei angeic?
4 Hetre götrane ka nyipi ewekë catr ngöne la pengöne la musi ka pë san. Nyipici thaa hnei Akötresieti kö hna xupe la itre atr matre tro angatr a mele trije la musi Nyidrë, nge thupene lai troa kepe thangane ka loi qa ngön. Hnei Nyidrëti pe hna xupi angatr matre troa lapa fene la itre trenge wathebo i Nyidrë ka meköt, ene pe troa kapa hnei angatr la manathith. Hna kapa la mekune cili hnei Perofeta Ieremia, kola hape: “Iehova fe, ate hë ni laka tha qâ i ate kö la jë i angeic ; tha qâ i ate troa amekötine la ite hna feke ca hnei angeic. Iehova fe, haji ni jë.” (Ieremia 10:23, 24) Kola ithuecatr hnene la Wesi Ula i Akötresie ka hape: “Lapaune ju koi Iehova hnene la hni ’ö ka pexej, ngo the lapa qale kowe la hnei ’ö hna trotrohnin.” (Ite Edomë 3:5) Tune la aqane eköthe Akötresie la itre wathebo, hna aceitunëne me itre ifego matre troa thupëne la mele ne la atr ngöne la ngönetrei, haawe, hnei Nyidrëti mina fe hna acile la itre wathebo nyine amekötine la itre thiina së; qa ngöne lai, maine tro sa xötrethenge hnyawa itre ej, eje hi laka tro hë së a atreine troa imelekeu.
5 Atre hnyawa hi Akötresieti laka musi qaathei Nyidrëti hmekuje hi la ka ijije troa amekötine hnyawa la itre atr, matre tro angatr a traqa kowe la pune ka loi. Hnene la hna ketre pi musi hnene la itre atr, ene pe acile jë angatr la nöjei pengöne mus, ngöne götrane politik, me hna thele mo, me ngöne la hmi. Ame ngöne la nöjei götrane cili, isa pengöne catr la aqane isa waiewekën ne la itre atr, ene pe fetra jë hi e nyipi angatr la itre icilekeu, me itre iakötrë, me itre isi, me mec. “Kete ate a musinëne la kete mate angazo nyëne kö.” (Ate Cainöj 8:9) Celë hi ewekë lai ka traqa kowe la mele ne la atr. Tune la hna ahnithe hë hnene la Wesi Ula i Akötresie, “tro pala kö a ngazo” catr la thiina ne la itre atr ka kuca la ngazo memine la itre ka iaö. (2 Timoteo 3:13) Hna öhne mina fe ngöne la hneijine së laka kola elë la inamacane ne la atr, kola mama ngöne la götran la sias me itre ewekë hna kuca hnene la atr, ngo ame pe kolo fe a traqa tretr la nöjei pengöne hulö ka tru. Kolo hi lai a amamane hnyawa la enyipicin la itre hna qaja hnei Ieremia 10:23 lo hna hape—thaa hna xupe kö la itre atr matre tro angatr a isa amekötin la itre hna feke ca hnei angatr.
6. Easenyi catre hë matre apaatren trije pi Akötresie lo lai mekune ne isa kuci musin thene la atr; tro jë Nyidrëti a kuca tune kaa?
6 Kola tro la itre drai nge kola mama hnyawa enehila la itre thangane ka ngazo qa ngöne la hnene la itre atr hna mele ananyi Akötresie, nyine tro hi lai a jele nyipicin laka thatreine jë kö troa hetre thangane ka loi e troa kuci ketre musi hnene la atr. Ame la musi Akötresie tre, celë hi sipu jëne manathith, me caas, me egöcatr me mel. Ketre, kola amaman hnene la Wesi Ula i Akötresie ka hape, easenyi hë tro Iehova a apën la musi ne la atr. (Mataio 24:3-14; 2 Timoteo 3:1-5) Easenyi hë tro Nyidrëti a amekötine la itre atr, me musi hune la ihnadro. Hna perofetan hnei Tusi Hmitrötr ka hape: “Ngöne la ite drai ne la ite joxu cili [itre musi ne la itre atr enehila] tro Akötesieti ne hnengödrai a axulune la kete baselaia [ne hnengödrai] ka tha tro kö a apaten’ epine palua ; nge tha tro kö a nue la baselaia cili kowe la ite xa nöj [kösë pë hmaca kö ka troa musi e celë fen], tro ej’ a lep’ anyilanyilane me apatene la nöjei baselaia asëjëihë cili [ne la hneijine së enehila], nge tro ej’ a cile hut’ epine palua.”—Daniela 2:44.
Kola Lö Hnine La Fene i Akötresie Ka Hnyipixe Hnei Itre Ka Mele Pe
7. Drei la ka troa mele pe ngöne la Akötresieti a troa apën la musi ne la atr?
7 Drei la ka troa mele pe ngöne la ijine kola troa apaatren hnei Akötresie la musi ne la atr? Tusi Hmitrötr a sa me hape: “Tro la ite ka meköti [itre atr ka cilëgölin la emekötin la musi Akötresie] a lapane la [“ihnadro,” MN ], nge tro la ite ka pë ethan’ a hne ngön’ ej. Ngo troa thupa tije la ite ka ngazo qa ngöne la [“ihnadro,” MN ].” (Ite Edomë 2:21, 22) Ketre hna qaja hnene la atre cinyihan la salamo ka hape: “Panacas, ame hna patepi la ate ka ngazo . . . Tro ha la ange ka meköti a hetenyi la [“ihnadro,” MN ], me lapa palua kö ngön’ ej.”—Salamo 37:10, 29.
8. Tro Akötresieti a anyipicine tune kaa la mus i Nyidrë ka pë san?
8 Thupene la hna apaatren la fene i Satana, tro Akötresieti a acile la fene hnengödrai i Nyidrë ka hnyipixe, matre paatre pi epine palua la iaxösisi, memine la itre isi, me jiin, me itre akötr, me itre kucakuca me mec, ene la itre hace ka xomacon la mele ne la atr, a traqa ha enehila kowe la itre thauzane lao macatre. Lolo catr la aqane qejepengön hnene la Tusi Hmitrötr la itre manathithi cili hna troa kapa hnene la itre atr ka drengethenge, kola hape: “Tro nyidëti [Akötresieti] a köle tije la nöjei tenge timida asëjëihë qa ngöne la ite lue meke i angat ; nge pa hmaca kö mec, me hace hni, me teij, me aköt ; ke patë hë la ite ewekë hnapan.” (Hna Amamane 21:3, 4) Jëne la Baselaia i Nyidrë, ene la musi ne hnengödrai hnei Nyidrëti hna nue koi Keriso, tro hë Akötresieti a anyipicine (acile) me apexejen la meköt i Nyidrë, ke Nyidrëti la ka musinën asë nge Atre ka pucatin asë nge Joxu së.—Roma 16:20; 2 Peteru 3:10-13; Hna Amamane 20:1-6.
Aqane Cile Catre Ne La Itre Xaa Atr
9. (a) Tune kaa la aqane wangatrun la Wesi Ula i Iehova hnene la itre atr ka mele nyipici koi Nyidrë? (b) Tune kaa la aqane mele nyipici Noa, nge nemene la ini hne së hna xom qa ngöne la tulu i angeic?
9 Ame ngöne la itre hnedrai, hetrenyi pala hi la itre trahmanyi me föe ka lapaun, hnei angatr pala hi hna mele nyipici koi Iehova Atre Ka Pucatin Asë. Atre hi angatr laka, tro angatr a mel e hnei angatr hna dreng me drengethenge Nyidrë. Noa hi la ketre e angatr. Haawe, hnei Akötresieti hna qaja koi Noa ka hape: “Xulu hë koi ni la pune la nöjei ate asëjëihë . . . Caneju thatraqai ’ö la aka.” Nge Noa hi lai a drenge ju la hna upi angeic hnei Iehova. Ngo ame ju pë hë itre xan, hnei angatre hna dreisimin la kola hmekë angatr, ene pe angatr a isa kuci aja me mele xetietë kösë pi hi lo pëkö ketre ewekë ka jole catr ka troa traqa. Ngo ame Noa tre, hnei angeic hna can la ketre aka ka tru catr, nge angeice fe a cainöjën o drai la itre jë i Iehova ka meköt. Hanawang la hna qaja göi Noa, kola hape: “Hnei Noa hna kuca asë tune lo hnei Akötesieti hna ahnithe koi angeic ; tune hi lai hnei angeice hna kuca.”—Genese 6:13-22; Heberu 11:7; 2 Peteru 2:5.
10. (a) Tune kaa la aqane nyi xölen Aberahama me Sara la musi ka pucatin asë i Iehova? (b) Nemene la ini hne së hna kapa qa ngöne la tulu hna amë pe hnei Aberahama me Sara?
10 Lue xaa tulu mina fe, Aberahama me Sara göi aqane ce xöle nyidroti memine la musi ka pucatin asë i Iehova, hnei nyidroti hna kuca asë la itre hna ahnithe koi nyidro hnei Nyidrë. Hnei nyidroti hna mele ngöne la nöj ne la itretre Kaledaia, ene Ure, ketre traone i ange trene mo. Ame la Iehova a upi Aberahama troa tro kowe la ketre nöj hnei angeic hna thatre, hnei Aberahama “hna tro thenge la hna ulatine koi angeice hnei Iehova.” Eje hi laka ka lolo catre lo mele i Sara, hetre uma i nyiidro, me itre enehmu, me itre sinee. Ngo hnei nyiidro hna drengethenge Iehova memine la föi nyiidro, ene pe hane tro pi fe nyiidro Kanana eë ngo thatre kö la pengöne la itre aqane troa mele e cili.—Genese 11:31–12:4; Ite Huliwa 7:2-4.
11. (a) Nemen la itre jol ka traqa koi Mose ngöne la angeic a ce xöle memine la musi ka pucatin asë i Iehova? (b) Nemene la thangane ka loi tro fe së a hane kapa e troa xötrethenge la tulu i Mose?
11 Hnei Mose mina fe hna enexölen la musi ka pucatin asë i Iehova. Thaa ewekë ka hmaloi kö koi angeic, la troa cile iqëmekë memine lo Farao ne Aigupito. Ame koi Mose, thaa ijiji angeice kö troa xome la itre hnëqa ka tru cili. Ohea, hetrenyi thei angeice la luelu, pine laka angeic a mekune ka hape thaa ka maca kö angeic troa ithanata. Ngo hnei angeic hna drengethenge Iehova. Hna xatua angeic hnei Akötresie, me Arona fe trejine me angeic, matre anyimua tro jë kö angeic troa tro fë la trenge ewekë i Iehova kowe lo lai ketre xeti hni ene Farao. Ketre tune mina fe la itre xaa nekö i Isaraela, hnei angatr hna sili ewekë Mose. Ngo hnei Mose hna mele nyipici koi Iehova me kuca asë la itre hnei Nyidrëti hna amekötin, qa ngöne lai hna autretrenyi Isaraela pi qaa Aigupito.—Esodo 7:6; 12:50, 51; Heberu 11:24-27.
12. (a) Nemen la ka amamane ka hape sisitria la troa mele nyipici koi Iehova, hune la troa drengethenge la itre hna cinyihan? (b) Kola xatua së tune kaa troa trongëne la 1 Ioane 2:15 hnene la aqane trotrohnine hnyawa la pengöne la mele nyipici celë?
12 Ame kowe la itre atr ka mele nyipici koi Iehova tre, thaa hnei angatre kö hna mekune ka hape, loi e hna cihnyihan la itre mekuna i Iehova, matre xötrethenge jë pë hë. Ohea, pane mekune ju lo kola thele jëne hnene la föe i Potifara troa ce kuci ngazo me Iosefa, ame ngöne la ijine cili, thaa hna hane cinyihane petre kö ka hape wathebo la troa nyi xetë. Ngo ame pe atre hi Iosefa la hnei Iehova hna amekötin ekö e Edena, lo Nyidrëti a ami trepen la faipoipo. Haawe, trotrohnine hnyawa hi Iosefa ka hape, ewekë ka sisi koi Akötresie la troa kuci ngazo hnene la trahmany memine la ifekë föen. Thaa hnei angeice kö hna thele troa wange ka hape uti hë ekaa la itre thiina hna kuca hnei angetre Aigupito a ka loi fe hi e tro angeice a hane xötrethenge, pine laka pëkö hna qaja hnei Akötresie. Hnei Iosefa pe hna trongën la itre jë i Iehova, me mekune catrën pala hi la itre aqane ujë i Nyidrë kowe la itre atr, me kuca hnyawa la hnei angeic hna trotrohnin pine laka aja i Akötresieti hi.—Genese 39:7-12; Salamo 77:11, 12.
13. Tune kaa la aqane amamane hnyawa laka ka sili trenga thoi lae Diabolo ngöne lo itre ewekë ka traqa koi (a) Iobu? (b) Köni thöth ne Heberu?
13 Ngacama catrehnine la itupath hna cile kow hnene la itre atr ka atre Iehova hnyawa, ngo thaa hnei angatre kö hna kelikelë Nyidrë. Hnei Satana hna qeje Iobu, lo ketre atr hna kapa hnei Iehova, kola hape, maine troa pë mo i Iobu me tithi angeic hnei mec, tro hë angeic a nuetriji Akötresie. Ngo hnei Iobu hna amaman hnene la aqane mele nyipici angeic ka hape trenga thoi la hna qaja hnei Diabolo, ngacama thatre kö angeic la kepin matre kola traqa itrai la itre ngazo me hleuhleu kowe la mele i angeic. (Iobu 2:9, 10) Itre macatre thupene lai, Satana pala hi a thele troa pi hune fë la itre mekuna i angeic, ame hnei angeic hna löthe ju la mekune ne la ketre joxu ngöne la ketre ijine kola traqa la elëhni koi Nyidrë e Babulona, ene la troa kuën hnine la eë la köni thöthi ne Iudra e thaa thili kö angatr kowe la hna saatr hnei nyidrë hna acil. Hna una iele angatr troa iën, maine troa drengethenge la trenge ewekë ne la joxu maine trenge wathebo i Akötresie lo ka hape wange kö la kuci idrola. Haawe hnene la itre thöth hna amamane hnyawa ka hape, ka tru koi angatr la troa nyihlue i Iehova, pine laka Iehova la Atre Musi hui angatr. Angatre hi lai a amamane hnyawa ka hape, sisitria kö la mele nyipici koi Akötresie hune la mec!—Daniela 3:14-18.
14. Ngacama itre atr ka ngazo së, ngo tune kaa la aqane tro sa amamane ka hape easë a mele nyipici koi Iehova?
14 Qa ngöne la itre ceitune cili, hapeu, tro hë së a qaja ka hape, loi e tro la atr a traqa kowe la pexej matre ijiji angeice jë troa mele nyipici koi Iehova, maine pena ame la ka kuca la ngazo tre ka tria palua ha angeice lai? Ohea! Kola qaja hnei Tusi Hmitrötr ka hape, hnei Mose hna hane tria ngöne lo itre xaa ijin. Ngacama thaa madrine kö Iehova lai, ngo ame pe, tre thaa hnei Nyidrëti kö hna nue triji Mose. Ketre tune mina fe la itre aposetolo i Iesu Keriso, laka, itre atr ka ngazo fe angatr. Iehova a trotrohnin laka edrö së la ngazo, nge Nyidrëti a madrin koi së e thaa hne së kö hna thë troa thipe trije la aja i Nyidrë. Maine tro së a kuca la ngazo hnene laka ka kucakuca la ngönetrei së, nyipi ewekë tro sa ietrane hnyawan la ngazo së, me thupën matre thaa tro kö a majemine kuca hmaca lai ngazo. Easë hi lai a amamane hnyawa laka, easë a hnin la ewekë ka loi koi Iehova, me sisin la itre ewekë hnei Nyidrëti hna qaja ka hape ka ngazo. Jëne la lapaune së kowe la mele hna huujën hnei Iesu, ijije hi troa kepe së hnei Akötresie ceitune me itre atr ka wië.—Amosa 5:15; Ite Huliwa 3:19; Heberu 9:14.
15. (a) Drei la atr ka amaman ka hape ka pexeje la aqane mele nyipici angeic koi Akötresie, nge nemen la hna anyipicin hnene lai? (b) Nemene la eloine la tulu i Iesu koi së?
15 Hapeu kolo hi lai a hape thatreine jë kö troa pexeje la aqane troa drengethenge hnene la itre atr la musi ka pucatin asë i Iehova? Kola e la 4 000 lao macatre ne pane treqen troa sa la hnyinge celë, ceitune eje me ewekë ka “sihngöd.” (1 Timoteo 3:16) Ngacama ka pexeje Adamu ngöne la kola xupi angeic, ngo thaa hnei angeice kö hna amë la ketre tulu ka pexej ngöne la aqane troa qale catre koi Akötresie. Matre drei pë hë la ka amamai tulu ka pexej? Eje hi laka ketre pëkö ka atrein thene la itre matra i Adamu ka ngazo troa hamën la ketre tulu ka pexej. Caasi hi la atr ka hamën la tulu cili, tre Iesu Keriso. (Heberu 4:15) Ame la hnei Iesu hna kuca tre, kolo hi a amamane laka maine hnei Adamu ju hna ajan troa cile catr ngöne la nyipici, tro hi angeic a atrein ke pexej nge lolo la aqane mele i angeic ekö. Haawe, thatreine kö troa jelengazon la xupi atre i Akötresie. Qa ngöne lai, Iesu Keriso hi la tulu nyine tro sa xötrethenge, thaa ngöne hmekuje kö la troa drengethenge la itre trenge wathebo i Iehova, ngo ngöne mina fe la easë a thele troa acatren la aqane imelekeu së me Nyidrë, Atre Musi Ka Pucatin Asë Ngöne La Hnengödrai Memine La Fene Hnengödrai.—Deuteronomi 32:4, 5.
Drei La Hne Së Hna Nyi Xölen?
16. Pine nemen matre nyipi ewekë pala hi tro sa thupën la aqane ujë së kowe la musi ka pucatin asë i Iehova?
16 Ijine tro së enehila isa ala caas a isa fe amaman la mekun ka ej the së, göne la musi e hnengödrai me e celë fen. Maine tro sa qaja mekötin ka hape ce easë me Iehova, tro ha tupathe la mele së hnei Satana. Tro angeic a hna koi së la nöjei pengöne itupath, nge aqane ujë i angeice hi lai uti hë la troa nyipune la fene ka ngazo celë. Loi e tro pala hi së a hmek. (1 Peteru 5:8) Troa amaman hnene la aqane ujë së ka hape drei la sine xöle së, maine ce easë memine la musi ka pucatin asë i Iehova, haawe, catre pi hë mele nyipici koi Akötresie ngöne la itupath. Ketre, thaa hnene kö laka kola hlemu la ngazo ngöne la fen, tre, tro pena ha së a wangahmaloeën ej. Ame la troa mele nyipici, tre ene la troa trongën la nöjei jën hna amekötine hnei Iehova ngöne la nöjei götrane la mele së.
17. Nemene la qaan la thoi memine la atrekënö, kepine matre nyipi ewekë tro sa kötrene la itre hna majemine ka ngazo cili?
17 Hanawang la ketre ceitun, thatreine kö tro sa xome la tulu i Satana lo “keme ne la thoi.” (Ioane 8:44) Loi e tro pala hi së a qaja la trenge nyipici ngöne la nöjei ijine la mele së. Ame ngöne la fene i Satana, hna majemine hnene la itre thöth troa thoi kowe la itre keme me thine i angatr. Ngo ame la itre thöthi Keresiano tre thaa angatre kö a thoi, jëne tro fe hi angatre lai a amamane hnyawa laka ka sili trenga thoi lae Satana ngöne lo angeic a qaja ka hape, troa kei asë la itre hlue i Akötresie ngöne la itupath. (Iobu 1:9-11; Ite Edomë 6:16-19) Kola mama qa ngöne la aqane thele mo ne la ketre atr laka, ce angeic memine la “keme ne la thoi” ngo thaa ce angeice kö memine la Akötresie ka nyipici. Loi e tro sa kötrene la itre hna majemine kuca cili. (Mika 6:11, 12) Ketre thaa tro kö së a mekune ka hape pëkö mo së, nge trena mo la ketre, haawe ijiji së troa atrekënö angeic. (Ite Edomë 6:30, 31; 1 Peteru 4:15) Ngacama kola atrekënö la itre atr ka lapa ezi së maine thaa ka tru alamekene pena la mo hna atrekënö, ngo ame pe tre hna wathebone hnei Akötresie la troa atrekënö.—Luka 16:10; Roma 12:2; Efeso 4:28.
18. (a) Nemen la itupath hna troa cile kow hnene la nöjei atr asë ngöne la kola nyipune la Itre Macatre Ka Caa Thauzan Ne Musi Keriso? (b) Nemene la nyine tro sa majemine kuca enehila?
18 Ame ngöne la Itre Macatre Ka Caa Thauzan Ne Musi Keriso, thatreine hmaca kö troa ajojezine la itre atr hnei Satana memine la itre dremoni angeic, pine laka, angatr e hnine la hnaop. Drei la ketre ithuecatre ka lolo koi së! Ngo thupene lai itre macatre ka caa thauzan, tre troa nue angatre hmaca ngo koi ketre hnepe ijin ka xoxopatre hi. Tro Satana memine la itre ka ce xöle me angeic a tupath la itre atr ka catre nyihlue i Akötresie. (Hna Amamane 20:7-10) Maine tro së a hane mele elanyi ngöne la ijine itupathi cili, tune kaa fe së kowe la pengöne la musi e koho hnengödrai me e celë fen? Pine laka ka troa pexeje asë la itre atr, haawe, ame pë hë la ka thaa mele nyipici koi Akötresie, tre, tro ha apaatrenyi angeic epine palua. Qa ngöne lai, nyipi ewekë catr troa nyiqaane enehila, troa majemine canga drengethenge la nöjei ewekë hna amekötin hna hamëne hnei Iehova jëne la Wesi Ula i Nyidrë maine jëne la organizasio! Maine tro sa ujë tune lai, easë hi lai a amamane la aqane mele nyipici koi Nyidrë, lo Atre Musi Ka Pucatin Asë e koho Hnengödrai Me e Celë Fen.
Revizio
• Nemen la ketre mekune ka sisitria catr hna amejëne ekö ngöne la fene hnengödrai? Pine nemen matre nyipi ewekë catr la ewekë cili koi së asë?
• Nemen la ewekë ka mama hnyawa ngöne la aqane mele nyipici ne la itre föe memine la itre trahmany ne la itre hneijine ekö?
• Pine nemen matre nyipi ewekë catr troa atrunyi Iehova hnene la aqane ujë së ngöne la nöjei drai?