Itre Ithuemacanyi Ne La Baselaia Na. 37

Ketre Ithuemacanyi e Cailo Fen

Calemi Catre Hë La Pune La Itre Hmi Ka Thoi!

▪ Nemene la pengön la itre hmi ka thoi?

▪ Nemene la pune koi angatr?

▪ Troa ketri nyipunieti tune kaa?

Nemene la pengön la itre hmi ka thoi?

Hapeu, hna ahleuhleunyi nyipunieti kö me akötrë nyipunie hnene la itre ihumuth hna kuca ngöne la ëje ne la hmi? Nge tune kaa la itre isi, me itre ka iaxoueny me ihumuth, me huliwa qene atrekënö hna kuca hnene la itre ka selëne ka hape, itre ka nyihlue i Akötresieti angatr, thaa ewekë jë kö lai ka akötrë nyipunie, angetre thele la thiina ka meköt? Pine nemene matre qaja jë ka hape, hmi la atrekë zöne la itre jole ka nyimutre?

Thaa tro kö a upe la zöne kowe la nöjei hmi asë, ame la atrekë zöne lai, tre, itre hmi ka thoi. Hnei Iesu Keriso, lo hene hmi ka hlemu nge nyine wanga atrun, hna amamane laka, ame la itre hmi ka thoi, tre, ka ngazo la wen ne la itre huliwa i angatr, ceitu me ketre “sinöe ka ngazo, kola wa ngazo.” (Mataio 7:15-17) Nemene la wen ne la itre hmi ka thoi?

Itre Hmi Ka Thoi . . .

◼ A HANE LÖ HNINE LA ITRE ISI ME KUCI POLITIK: Kola qaja hnene la zonal Asiaweek ka hape: “Ame ngöne la nöje e Asia me ngöne la itre xaa götran, kola iaöne la itre atr hnene la itre hene hmi ka pi mus, matre troa aejëne la itre sipu aja i angatr ka ngazo.” Ame la pune lai, önine la zonal: “Kösë kola troa menumenu la fen.” Hna qaja hnene la ketre hene hmi ka tru e Etazini ka hape: “Troa apaatrene la itre ka iaxoueny me ihumuth matre thaa tro hmaca kö angatr a ihumuth.” Nemene la nyin hna mekune hnei nyidrë thatraqane la itre jole cili? “Troa apaatren asë la itre ka iaxoueny me ihumuth ngöne la ëje i Joxu.” Ngo isazikeu hë memine la hna qaja hnei Tusi Hmitrötr, kola hape: “E öni kete ate, ka hape, Ini a aja Akötesie, ngo methinëne pe la tejine me angeic, angeice la ate thoi.” (1 Ioane 4:20) Öni Iesu mina fe ka hape: “Hnimeju la ite ithupëjia me nyipunie.” (Mataio 5:44) Matre, tune kaa la mekuna i nyipunie, nyimutre kö la itre hmi, laka ame la itre atren, tre, angatr a lö hnine la itre isi?

◼ A HAMËNE LA KETRE INI KA THOI: Ala nyimu la itre hmi ka inin, ka hape, ame la u maine ua, tre, celë hi ketre götrane lai ka sihngödre thene la atr, nge ka mele pe kö ngöne lo kola meci la ngönetrei i angeic. Nyimutre la itre hmi ka thahluëne la itre atrene itre ej, me thele maniëne la ini celë; angatr a thithi thatraqane la itre u ne la itre ka meci hë. Ngo, isazikeu catr memine la ini hna hamën hnei Tusi Hmitrötr. “Ke ate hë la ite ka mele laka, tro angat’ a mec ; ngo tha ’te kö la kete ewekë hnei ite ka meci hë.” (Ate Cainöj 9:5) Hnei Iesu lo hna inine laka troa amelene hmaca la itre ka meci hë—nga thaa nyipi ewekë kö hö lai, e troa amele angatre hmaca e hetrenyi angatr la ketre u ka mele pe epine palua thupene la kola mec. (Ioane 11:11-25) Hapeue la hmi nyipunie, eje kö a inine laka thaa ka meci kö la u?

◼ A WANGAHMALOHMALOEËNE LA KUCI NGAZO: Ame ngöne la itre xaa nöj, hna acilëne hnene la itre xaa hmi, la itre trahmanyi ka ce meköle me trahmanyi maine föe pena ka ce meköle me föe, matre troa xome la itre hnëqa ka tru ne la hmi, nge kola upe la itre mus troa aijijëne la itre atr cili troa faipoipo. Ame mina fe ngöne la itre hmi ka wathebon la kuci ngazo, tre, angatre a wangahmalohmaloeëne la itre hene hmi ka angazone la itre nekönatr. Nemene la hna inine hnei Tusi Hmitrötr ngöne la kuci ngazo? Eje a qaja amamane hnyawa ka hape: “The amenu nyipunieti kö ; ame angete nyi xetë me itete thithi koi idola, me angete kuci ngazo, me angete hni koi fö, me itete qene sodoma, . . . tha tro kö angate a hane sine la baselaia i Akötesie.” (1 Korinito 6:9, 10) Drei la itre hmi hnei nyipunieti hna atre ka sixane la kuci ngazo?

Nemene la pune kowe la itre hmi ka wa wene ka ngazo? Hna ithuemacanyi hnei Iesu ka hape: “Tro ha sha tij’ asë la nöjei sinöe ka tha wa loi, me kuiënepi kowe la eë.” (Mataio 7:19) Eje hi laka, tro ha lepe apaatrene la itre hmi ka thoi! Ngo troa lepe apaatrene tune kaa, nge eu? Hna hamëne la itre mekune ka sa la hnyinge celë ngöne la hna perofetan hnine la Tusi Hmitrötr, ngöne la tusi Hna Amamane, mekene 17 me 18.

Nemene la pune kowe la itre hmi ka thoi?

Pane mekune ju së. Kola tithe hnene la föe ne gojenyi la ketre öni hna xouen. Ka seven lao he ne la öni, me treen lao jon. (Hna Amamane 17:1-4) Drei lai hna nyihatrene hnene la föe ne gojeny? Thaa ka sihngödre kö la aqane musi nyiidro hune la “ite joxu ne la fen.” Hna heetrën hnei nyiidro la maano ka maea ngön, me hane xome la sinöe ka pui loi, nge tru catre hnei mo i nyiidro. Ketre, kola ‘amenune la nöjei etheni asë  ’ hnene la kuci haze i nyiidro. (Hna Amamane 17:18; 18:12, 13, 23) Haawe, Tusi Hmitrötr a xatua së troa trotrohnine laka, ame lai föe ne gojenyi cili, tre, celë hi ketre organizasio i hmi e cailo fen. Thaa nyiidro kö a nyihatrene la caa pengöne hmi, ngo ene asë hi lo nöjei hmi ka wa wene ka ngazo.

Ame lo öni hna tithe hnene la föe ne gojeny, tre, ej a nyihatrene la itre musi ne fen. (Hna Amamane 17:10-13) Kola tithe hnene la hmi ka thoi lai öni, ene la itre musi ne fen, me thele troa musinëne la itre mekune hnei angatr hna axeciën, me eatrongë angatr.

Ngo easenyi hë matre traqa pi la ketre ewekë nyine hain. “Ame la ite jone ka luepi hnei ’ö hna goeën, memine la öni ka sheshe, te, tro angat’ a sisine la föe ne gojeny, me thöeë nyido, me atro xö nyido, me önine la ngönetei nyido, me deuthe tiji nyido hnei eë.” (Hna Amamane 17:16) Troa traqa la ketre ewekë, thatre una ju kö së, nge kola troa ujë pena la itre musi ne fene kowe la itre hmi ka thoi, me lepe apaatrene itre ej! Hnauëne matre kuca jë hnene la itre musi ne fen la ewekë celë? Kola sa hnei Tusi Hmitrötr, ngöne la tusi Hna Amamane ka hape: “Hnei Akötesie hna amë e kuhu ite hni angate troa aeatene la aja i nyidë.” (Hna Amamane 17:17) Eje hi laka, tro Akötresieti elanyi a hnyingë kepine la nöjei ngazo hnei angatre hna kuca ngöne la ëje i Nyidrë. Jëne la meköt i Nyidrë ka pë ethan, tro Nyidrëti a nyijëne la itre sine xöle i angatr, ene la itre musi ne fen, matre nyine jia ne iameköti Nyidrë.

Nemene la nyine tro nyipunieti a kuca maine thaa ajane kö nyipunie troa hane ce paatre memine la itre hmi ka thoi? Kola catre ithuemacanyi hnene la ka tro fë maca qaathei Akötresie, ka hape: “Nöjenge fe, tropi qa thei nyido.” (Hna Amamane 18:4) Eje hi laka, enehila hi la ijine troa lö pi qa hnine la itre hmi ka thoi! Ngo tro sa kötre ië? Thaa kowe kö lo itre wanaithihlë, ene lo itre ka qaja ka hape, pëkö Akötresie, ke, eje hi lai laka, pëkö iamele thei angatr. (2 Thesalonika 1:6-9) Caasi hi la hnapo së, eje e hnine la nyipi hmi. Tro sa wanga atrehmekune tune kaa la nyipi hmi?

Troa wanga atrehmekune tune kaa la nyipi hmi

Nemene la itre wene ka loi nyine troa hamën hnene la nyipi hmi?—Mataio 7:17.

Nyipi Hmi . . .

◼ A MELËNE LA IHNIM: “Thaa itete fene kö” la itre atrene la nyipi hmi, nge thaa hna aisa angatre kö hnene laka ketre pengöne kö la hane ikupeine i angatr, maine ketre qene nöje pena, ngo eje pe thei angatre la ‘ihnimikeu.’ (Ioane 13:35; 17:16; Ite Huliwa 10:34, 35) Thaa ka humu atre kö angatr, ngo hnene la etrune la ihnimi angatr, ene pe angatr a hane nue la mele i angatr thatraqane la ketre atr.—1 Ioane 3:16.

◼ A MEJIUNE KOWE LA WESI ULA I AKÖTRESIE: Thaa nyipi hmi kö a hamëne la itre “ini” qaathei atr me itre “wathebo i ate,” ngo hna xome pe la itre ini ne eje qa hnine la Wesi Ula i Akötresie, ene la Tusi Hmitrötr. (Mataio 15:6-9) Pine nemen? Pine laka “qa thene la Ua i Akötesie la hna cinyihan’ asë, nge nyipi ewekë troa inin, me nyine amekötin, me nyine eamo.”—2 Timoteo 3:16.

◼ A ACATRENE LA ITRE FAMI ME SAJUËNE LA ITRE TREPENE MEKÖT KA DRAIË: Nyipi hmi a inine la itre trahmanyi troa ‘hnime la föe i angate tune la ite itei angate kö,’ eje fe a xatuane la itre föe troa ‘akökötrene la metrötr kowe la fö i angatr,’ me inine la itre nekönatr troa ‘drenge thenge la itre keme me thine i angatr.’ (Efeso 5:28, 33; 6:1) Ketre, ame koi itre trene hnëqa e hnine la hmi, tre, nyipi ewekë tro angatr a pane amamai tulu ngöne la itre thiina ka loi.—1 Timoteo 3:1-10.

Hapeu, hetre hmi kö ka trongëne la itre trepene meköti cili? Kola qaja hnene la itus La politique de l’Holocauste (qene papale) ka mama lo macatre 2001, ka hape: “Maine ala nyimu ju pe la itre atr ka melëne la itre ini me itre huliwa ne la Itretre Temoë i Iehova, tre, thaa tro kö a traqa lo ijine kola lepe apaatrene lo itretre Iudra ekö ngöne la Hnaaluene Isi Ka Tru, hna hape Holocauste. Nge thaa tro kö a lepe la fen hnene la ihumuthi pine laka thaa ceitune kö la hane ikupein, maine pi politik, maine pi qene nöje pena.”

Eje hi laka, ame ngöne la 235 lao nöj, tre, thaa Itretre Anyipici Iehova kö a cainöjëne hmekuje hi la itre trepene meköti qa hnine la Tusi Hmitrötr—ngo angatre fe a melëne itre ej. Eahuni a ithuecatre koi epuni troa sipone kowe la Itre Temoë i Iehova troa xatua epuni troa atrepengöne la hnei Akötresieti hna thele thei epun, matre tro epuni a hane hmi koi Nyidrë thenge la aja i Nyidrë. Enehila hi la ijine tro epuni a eatrëne lai. The hmitre kö. Calemi catre hë la pune kowe la itre hmi ka thoi!—Zefania 2:2, 3.

□ Eni a ajane troa hane kapa la boroshüre Nemene La Hnei Akötresieti Hna Thele The Së?

□ Eni a ajane troa inine la Tusi Hmitrötr.

[Hna cinyhan ne la götran 3]

Thaa ka sihngödre kö la emenene me aqane musinëne hnene la itre hmi ka thoi la “ite joxu ne la fen”

[Hna cinyhan ne la götran 3]

“Nöjenge fe, tropi qa thei nyido”