Iwë Ka Tru—Drei La Itre Ka Drei Akötresie? Drei La Itre Ka Thaa Drei Akötresie?

Ame ngöne lo hneijine i Noa, nyimutre la itre atr ka kuca la itre ewekë ka ngazo. Genese 6:5

Hnaho pi hi Adamu me Eva, nge mana pi hi la itre atr e celë fen. Thupene jë hi lai, lö hnine jë hi la icilekeu i Satana hnene la itre xaa angela.

Hnei angatre hna uti pi kowe la fen, me xome la pengö i atr, matre troa faipoipo memine la itre föe. Hnene la itre föe cili hna hnahone la itre nekön ka iakötrë me ka tru trenge catren.

Tiqa ha la fene hnene la itre atr ka kuca la nöjei ewekë ka ngazo. Kola qaja hnei Tusi Hmitrötr, ka hape: “Atraqate la ngazo i ate e celë fen, nge ngazo o drai pala hi la nöjei mekun’ asë e kuhu hni nyën.”

Hnei Noa hna drei Akötresie me cane la aka. Genese 6:13, 14, 18, 19, 22

Noa la ketre atr ka loi thiina. Hnei Iehova hna qaja koi Noa, ka hape, Nyidrëti a troa lepe apaatrene la nöjei atr ka ngazo asë hnene la ketre iwë ka tru.

Hnei Akötresieti mina fe hna upi Noa troa xupe la ketre he atraqatr, hna hëne ka hape aka, me atë hune la he cili la hnepe lapa i angeic memine la nöjei pengöne öni.

Hnei Noa hna thuemacane la itre atr me hmekë angatr wanga asesëkötrë angatre jë hnene lai Iwë, ngo pëkö ca ka drei angeic. Itre xan a hnyima sai Noa; nge itre xan a methinë angeic.

Ame la kola ase cane la aka, hnei Noa hna atë la itre öni.